Maliwliwanaka ti Libro nga Isaias

1-2. Ania ti aramiden ni Jehova no malidlidaytayo?

PANUNOTEM daytoy: Adda ubing nga agsangsangit. Mabalin a gapu ta umakardan iti balay. Siempre, panawannan dagiti gagayyemna. Wenno mabalin nga adda basolna. Ania ngata ti aramiden ni nanangna? Gapu ta ay-ayatenna, arakupenna iti nairut, denggenna ti agsasaibbek nga anakna, ken ibagana nga ay-ayatenna isuna.

² Iti Biblia, impada ni Jehova ti bagina iti nadungngo ken naayat nga ina a mangliwliwa iti anakna. Imbagana: “Kas iti panangliwliwa ti ina iti anakna, itultuloykayto a liwliwaen.” (Isa. 66:13) Awan ti asinoman a nagannak a makaartap iti panagayat ni Jehova kadatayo. (Isa. 49:15) Us-usaren ni Jehova ti Saona, ti Biblia, a mangliwliwa ken mangpabileg kadatayo no malidlidayan wenno maup-upaytayo.—Roma 15:4.

3. Ania ti pagsasaritaantayo iti daytoy nga artikulo?

³ Adu a makaliwliwa a sasao ni Jehova ti mabasatayo iti libro nga Isaias. (Isa. 40:1) Impaisurat ti naayat nga Amatayo daytoy a libro tapno maliwliwa dagiti adipenna idiay Juda idi maipaspasangoda iti narigat a situasion. Agbibiagtayo met ita iti “delikado ken narigat a tiempo” isu a kasapulantayo ti liwliwa. (2 Tim. 3:1) Pagsasaritaantayo itan ti dadduma a bersikulo iti libro nga Isaias a mangliwliwa ken mangpabileg kadatayo (1) no bigla nga agbaliw ti situasiontayo, (2) no sidsidirennatayo latta ti konsiensiatayo, ken (3) no agladladingittayo gapu ta natay ti ipatpategtayo.

NO BIGLA NGA AGBALIW TI SITUASIONTAYO

4. Ania ti mabalin nga epektona kadatayo no bigla nga agbaliw ti situasiontayo?

⁴ Posible a bigla nga agbaliw ti biagtayo. (Ecl. 9:11; 1 Cor. 7:31) Baka bigla nga agsakittayo, agproblematayo iti pinansial, adda gulo iti politika, wenno agbaliw ti asaynmenttayo. Siempre, no mapadasantayo dagita, madanagan wenno mariribukantayo. Normal laeng a mapanunottayo: ‘Ania ti aramidekon?’ Ni Joseph ket agserserbin kas regular pioneer kalpasan ti dandani 17 a tawen a panagserbina iti Bethel. Imbagana: “Nagbayag a nagserbiak iti Bethel. Isu nga idi rimmuarak, diak ammo no kasanoak a mangrugi. Nagrigat ti mangabaruanan.” Ania a makaliwliwa a sasao ti impaisurat ni Jehova ken Isaias a makatulong kadatayo no bigla nga agbaliw ti situasiontayo?

5. Iti Isaias 42:​16, ania ti ipaspasigurado ni Jehova nga aramidenna para kadatayo? (Kitaen met ti ladawan.)

⁵ Basaen ti Isaias 42:16. Ikarkari ni Jehova nga iturongna dagiti arig bulsek nga adda iti dana a saanda a kabesado ken pagbalinenna a lawag ti kinasipnget iti sanguananda. No bigla nga agbaliw ti situasiontayo, mabalin a mariknatayo ti ibagbaga ti teksto a kasla ‘nakasipsipnget’ ti masanguanantayo, kaslatayo “bulsek,” wenno addatayo iti “likkalikkaong a lugar” ken iti ‘dana a saantayo a kabesado.’ Baka mariknatayo a kasla nayaw-awantayo iti kabakiran a saantayo nga ammo ti pagruarantayo. Ngem no addatayo iti kasta a situasion, ikarkari ni Jehova a siguraduenna nga idalannatayo ken saannatayo a pulos panawan. Kibinennatayo agingga a makaruartayo iti kasipngetan. Lawaganna ti dalantayo ken patagenna dagiti arig likkalikkaong a problematayo. Kasano nga aramiden dayta ni Jehova? Us-usarenna ti Saona ken ti organisasionna a mangipaay kadagiti nainsiriban a balakad. (Sal. 119:105; Isa. 30:21) Tignayenna met dagiti kapammatiantayo ken ti dadduma a tumulong kadatayo. Isu a no kas pagarigan ta mapampanunotmo ita, ‘Anianto ngay ti aramidek?’ Laglagipem daytoy: Ay-ayatennaka ni Jehova ken maaw-awatanna ti marikriknam. Isu nga agtalekka a kanayon a tulongannaka.—Isa. 41:10; 1 Ped. 5:​6, 7.

6. Ania ti masiguradotayo no bigla nga agbaliw ti situasiontayo?

⁶ Imbaga ni Joseph a nadakamat itay no kasanoda a narikna ken baketna ti naayat a tulong ni Jehova kadakuada kalpasan a rimmuarda iti Bethel: “Idi agad-adjust-kami, kanayon a nakitami ti ima ni Jehova. Inusarna dagiti nakaay-ayat a kakabsat a timmulong kadakami. Impaayna dagiti material a kasapulanmi ken liniwliwanakami iti tiempo a kasapulanmi la unay dayta. Agingga ita, saan a nagbalbaliw ni Jehova.” Isu a no maipasangoka iti situasion nga interamente a mangbalbaliw iti biagmo, dika agbuteng. Makapagtalekka nga idalan ken pabilgennaka met ni Jehova. (Isa. 54:10; 58:11) Imbaga pay ni Joseph: “Kaykayatko la unay ti liriko ti maysa nga orihinal a kantatayo. Kunana, ‘Uray no aniaman mapasamak, ammok a saanak agmaymaysa.’a Agpayso a saantayo a masigurado ti mapasamak inton bigat. Ngem daytoy ti sigurado: Kaduam ni Jehova iti abaymo iti tunggal addangmo.”

NO SIDSIDIRENNATAYO LATTA TI KONSIENSIATAYO

7. Ania ti mabalin a pakarigatan ti dadduma a nakaaramid iti nadagsen a basol?

⁷ No ipudnom ti nadagsen a basolmo kadagiti panglakayen, siaayat a tulongandaka. Kalpasan dayta, ikagumaam a saanmon nga uliten ti basolmo. (Prov. 28:13; Sant. 5:​14-16; 1 Juan 1:9) Ngem no dadduma, uray naipakitaankan iti asi, mabalin a marigatanka ta sidsidirennaka latta ti konsiensiam. Baka mapanunotmo, ‘Kasano koma a mapakawannak ni Jehova ket nakadagdagsen ti basolko?’ (2 Cor. 2:7) Mapaspasamak dayta no dadduma. Siempre, saan a kaskarina a maikkat dagiti nasaem nga epekto ti basoltayo. Posible pay ketdi nga agkarasubli dagita iti panunottayo. Kitaem ti imbaga ni Ari David: “Maburburiboranak gapu iti basolko.” Insuratna pay: “Nabibinegak ken nadudog ti riknak.” (Sal. 38:​3, 8) Isu a no adda gundaway a mariknam ti kasta, maliwliwanaka ti libro nga Isaias.

8-9. Sigun iti Isaias 1:​18, kasano ti panangpakawan ni Jehova?

⁸ Basaen ti Isaias 1:18. Nakalawlawag nga inladawan ni Jehova no kasano nga interamente a pakpakawanenna dagiti basoltayo. Imbagana nga uray “nakalablabbaga” dagiti basoltayo, ‘papurawennanto a kas iti niebe.’ No mamansaan ti badotayo iti nakalablabbaga a kolor, saan la ketdi a nalaka a maikkat dayta. Ngem ipaspasigurado ni Jehova a no pakawanennatayo, awan man la ti agbati uray sangkatedted laeng a mantsa ti basol. Interamente nga ikkaten wenno lipatenna dagita.

⁹ Kitaentayo ti napasamak ken Ari David. Nakikamalala ken nangpapatay, ngem pinakawan ni Jehova. Idi agangay, imbaga pay ketdi ni Jehova a naan-anay ti pusona. (2 Sam. 11:​3, 4, 14, 15; 12:13; 1 Ar. 9:​4, 5) Ania ti kinita ni Jehova ken David? Saan a dagiti kamalina, no di ket ti kinamatalekna. Kasta met laeng kadatayo ni Jehova ita. Siaayat a pakawanennatayo no agbabawitayo. Bangonennatayo tapno maitultuloytayo ti agserbi nga addaan iti nadalus a konsiensia. Kasanonatayo pay a maliwliwa ti libro nga Isaias no sidsidirennatayo latta ti konsiensiatayo?

10. Ania ti makaliwliwa nga ipaspasigurado kadatayo ti Isaias 38:17?

¹⁰ Basaen ti Isaias 38:17 ken footnote. Ti sasao nga “impuruakmo amin a basolko iti likudam” ket mabalin met a maipatarus kas “inikkatmo amin a basolko iti imatangmo.” Iti daytoy a teksto, nailadawan ni Jehova a mangal-ala iti basol ti maysa nga agbabbabawi sa ipuruakna dayta iti likudanna. Isu a saannan a makita wenno malagip pay dayta. Sigun iti maysa a reperensia, daytoy a teksto ket mabalin met a maipatarus iti kastoy: “Pinagbalinmo dagiti basolko a kas man la saan a napasamak dagita.” Isu a no pinakawanen ni Jehova dagiti basoltayo, awanen dagita kenkuana a kas man la saantayo a pulos a nagbasol. Saannatayon a dusaen ta ti agpayso, linipatnan dagita. Ikarkarina: “Saankonto a lagipen dagiti basolmo.” (Isa. 43:25) Saan kadi a makaliwliwa dayta? Panunotem daytoy: No ni Jehova a Kangatuan nga Ukom ket saannan nga isingir kadatayo dagiti basoltayo, apay ngarud koma a datayo ti mangisingir kadagita iti mismo a bagitayo?

11. Aniaman a basol ti naaramidtayo iti napalabas, ania ti pagpokpokusan ni Jehova ita? (Kitaen met ti ladawan.)

¹¹ Kada sidirennatayo manen ti konsiensiatayo, masapul nga ipalagiptayo iti bagitayo ti naayat a pammasiguro ni Jehova. No pakawanennatayo, talaga a lipatenna ti basoltayo. Ni Jehova ket saan a kas kadagiti tattao nga agipempempen iti sakit ti nakem. Ti agpayso, dinatay pulos ibain gapu kadagiti naaramidtayo a basol. (Isa. 57:16) Ania ngamin ti talaga a napateg ken Jehova? Saan a daydiay sika idi kalman. Imbes ketdi, ipatpategna daydiay sika ita, ken daydiay sika a mangikagkagumaan nga agbalin a nasaysayaat nga adipenna. (Isa. 55:7) Talaga a nakaay-ayat ken manangpakawan ti Diostayo! Isu a dika koma agpaitali iti napalabas. Dimo ipalubos a dayta ti mangpukaw iti rag-om iti agdama ken mangpakudrep iti namnamam iti masanguanan.

NO AGLADLADINGITTAYO GAPU TA NATAY TI IPATPATEGTAYO

12. Ania ti mabalin a mariknatayo no matayantayo iti ipatpateg iti biag?

¹² No matayantayo iti ipatpateg iti biag, mabalin nga awan ti sao a makailadawan iti saem a mariknatayo. Saan a nalaka a mailiwliwag dayta. No dadduma, baka maisaludsodtayo no apay nga impalubos ni Jehova a matay ti ipatpategtayo. Kitaentayo ti napasamak ken Michael. Nairaman a natay dagiti nagannakna iti maysa a puor. Imbagana: “Nakapapait unay ti riknak! Nakadagdagsen ti barukongko. Nagpasugnodak ken Jehova ta apay nga impalubosna a matay da Mama ken Papa. Ammok met ketdi a saan nga isu ti rason a natayda, ngem apay a saanna a linapdan?” Posible a nariknam metten dayta. Ngem no sumken ti kasta a nagpait a rikna, ania ti makaliwliwa a kari ni Jehova a masapul a laglagipem?

13. Ania ti ikarkari ni Jehova iti Isaias 25:8?

¹³ Basaen ti Isaias 25:8. Ikarkari ni Jehova nga “alimonennanto ni patay iti agnanayon.” Imadyinem ti tiempo inton awanen ti matay! Saanmonto manen a mapadasan ti saem a marikna ti matayan. (Isa. 35:10) No ita ket kasla mapigpigis ti pusom a kumita iti lapida ti natayen nga ipatpategmo, iti masanguanan, saanmonton a pulos marikna dayta. Kanayonton a kaduam dagiti ipatpategmo iti biag. Nakasarsaranta ken nakasalsalun-atdanton. Dayta ket saan a tagtagainep laeng. Laglagipem no asino a mismo ti nangikari iti dayta kenka, Daydiay kakaisuna nga addaan iti pannakabalin a mangtungpal iti dayta—ni Apo Jehova.—Apoc. 21:​4, 5.

14. Ania ti mariknam no pampanunotem ti namnama a panagungar? (Isaias 26:19) (Kitaen met ti ladawan.)

¹⁴ Basaen ti Isaias 26:19. Saan laeng a pagpatinggaen ni Jehova ni patay. Ikarkarina met a pagbiagennanto manen dagiti natayen nga ipatpategtayo. Imbagana: “Bumangonto ti bangkay dagiti tattaok.” Ania ti ipakita dayta? Ipakitana a kukua ida ni Jehova, isu a responsabilidadna ida. Kanayon a malaglagipna ida. Ket iti inyeskediulna a tiempo, pagungarennanto ida. Ti linnaaw iti agsapa paungarenna dagiti malaylaylay a mula. Kasta met laeng ni Jehova. Gapu ta isu ti Gubuayan ti amin a biag, riingennanto dagiti ipatpategtayo a naturog ken patay. Nakasaganaka kadin a mangsabat ken mangarakup kadakuada iti nairut?—Idilig ti Marcos 5:42.

15. Apay a maliwliwatayo no panunotentayo ti namnama a panagungar?

¹⁵ Agpayso a saan a naan-anay a maikkat ti kari a panagungar ti saem a marikriknatayo. Ngem maliwliwatayo ta ammotayo a saan a lipaten ni Jehova dagiti natayen nga ay-ayatentayo. Dayta ti nangliwliwa ken Michael a nadakamat itay. Imbagana: “Adda ti nasursurok iti Isaias 26:19. Asideg iti puso ni Jehova dagiti nagannakko a kas man la saanna a kayat ti maisina kadakuada. Agtaltalinaedda a natalged iti lagipna agingga iti aldaw a pagungarenna ida. No pampanunotek dayta, maliwliwaak ken lumag-an ti riknak.” Isu a no matayanka, agpokuska iti kari ni Jehova a makaduamto manen dagiti ipatpategmo iti biag. Makatulong dayta tapno nalaklakam a maibturan ti saem a marikriknam.

16. Ania a teksto ti nakitam a makaliwliwa kenka no adda nadagsen a problemam?

¹⁶ Napagsasaritaantayo ti sumagmamano a bersikulo iti libro nga Isaias a mangliwliwa kadatayo no bigla nga agbaliw ti situasiontayo, no sidsidirennatayo latta ti konsiensiatayo, ken no agladladingittayo gapu ta natay ti ipatpategtayo. Imbag laengen ta us-usaren ni Jehova ti Saona a mangliwliwa ken mangbang-ar kadatayo! (Sal. 94:19) Adda kadi nakitam a teksto a mangliwliwa kenka no adda nadagsen a problemam? Ikabesam dayta, isuratmo, wenno ikabilmo iti lugar a kanayonmo a makita. Sapay koma ta mabang-aranka kadagiti makaliwliwa a sasao a naggapu a mismo iti naayat a nailangitan nga Amatayo, ni Apo Jehova!