Itultuloymo a Mas Am-ammuen ni Jehova

1. Ania ti mariknatayo no utobentayo ti pannakaammo, sirib, ken dagiti inaramid ni Jehova?

NAPAMPANUNOTMO kadin no kasano kauneg ti sirib ni Jehova, no kasano kalawa ti pannakaammona, wenno no kasano kaadu dagiti inaramidna? No panunotentayo ti maipapan iti Namarsua kadatayo, sigurado a pagpakumbabaennatayo. Baka mariknatayo ti kas iti narikna ni apostol Pablo. Insuratna: “Anian a nakaad-adu ti kinabaknang ti Dios ken nakaun-uneg ti sirib ken pannakaammona! Saan a naan-anay a maawatan dagiti pangngeddengna ken saan a matunton dagiti dalanna!”—Roma 11:​33, 34.

2. Apay a masiguradom a posible a maam-ammotayo ni Jehova?

² Agpayso a saantayo a pulos a maammuan ti amin maipapan ken Jehova. Ngem uray kaskasano, posible latta a maam-ammotayo isuna. Imbaga ni Ari David iti anakna a ni Solomon: “Am-ammuem ti Dios ni amam ket agserbika kenkuana iti naan-anay a puso . . . No birokem, ipalubosnanto a masarakam.” (1 Cron. 28:9) Ginasut a tawen kalpasanna, impalagip ni apostol Juan kadagiti padana a Kristiano nga addaanda iti ‘pannakaawat tapno maammuanda daydiay pudno.’ (1 Juan 5:20) Ken imbaga a mismo ni Jesus a tulonganna ti ‘asinoman a kayatna a pangipakaammuan’ iti maipapan ken Jehova.—Mat. 11:27.

3. Ania ti usigentayo iti daytoy nga artikulo?

³ Kas agserserbi ken Jehova, adun ti ammotayo maipapan kenkuana. Ngem saantayo koma a sumardeng a “mangam-ammo” ken Jehova. (Juan 17:3; kitaen ti study note.) Kas pagarigan, adu pay ti maammuantayo no kasanotayo a maparagsak isuna ken no kasanotayo nga ad-adda nga agtalek kenkuana. Isu a kasanotay man kabayag nga agserserbin ken Jehova, makatulong daytoy nga artikulo tapno mas maam-ammotayo isuna. Pagsasaritaantayo dagitoy tallo a saludsod: Ania ti kayat a sawen ti panangam-ammo ken Jehova? Apay a masapul nga itultuloytayo a mas am-ammuen isuna? Ken kasanotayo nga aramiden dayta?

ANIA TI KAYAT A SAWEN TI PANANGAM-AMMO KEN JEHOVA?

4. Ania ti karaman iti panangam-ammo ken Jehova?

⁴ Ania ti karaman iti panangam-ammo ken Jehova? Kitaentayo ti inkari ni Jehova kadagiti agsubli a Judio manipud Babilonia. Imbagana: “Ikkakto ida iti puso a makaam-ammo kaniak, a siak ni Jehova.” (Jer. 24:7) Sigurado nga adu idin ti ammoda maipapan ken Jehova. Ngem adda pay ti masapul nga aramidenda. Masapul nga ipapusoda ti panangam-ammo kenkuana. Imbaga ti maysa a reperensia: “Dakkel ti nagdumaan ti panangammo iti maipapan iti Dios ken ti panangam-ammo kenkuana. Mayarig dayta iti nagdumaan ti panangbasbasa laeng iti maipapan iti ayat ken ti mismo a riknam no agayatka.” Ania ti punto? Saan nga umanay nga ammotayo laeng a Jehova ti nagan ti Dios ken isu ti Dios. Masapul a mas am-ammuentayo ti kinasiasinona ken dagiti nagpipintas a kualidadna.

5. Ania ti masursurotayo ken Ari Josias no maipapan iti panangam-ammo ken Jehova?

⁵ Maam-ammotayo met ni Jehova no ammuentayo dagiti mangparagsak ken mangpaliday kenkuana. Kasta ti inaramid ni Ari Josias. Ibaga ti Biblia: “Iti maika-8 a tawen ti panagturayna, bayat nga ubing pay laeng, inrugina a sapulen ti Dios ni David nga apongna.” (2 Cron. 34:3) Ngem nagpatingga kadi ditan ti inaramid ni Josias? Saan. Saanna la a basta inadal ti Sao ti Dios. Inyaplikarna met dagiti nasursurona. Imbaga ni Jehova ken propeta Jeremias maipapan ken Josias: “Impatungpalna ti hustisia ken kinalinteg” ken inlabanna dagiti marigrigatan ken dagiti napanglaw. Imbaga pay ni Jehova: “Saan kadi nga inaramidna dayta gapu ta am-ammonak?”—Jer. 22:​15, 16.

6. Iti Salmo 9:​10, ania ti epektona kadatayo no mas am-ammotayo ni Jehova?

⁶ Basaen ti Salmo 9:10. No mas am-ammotayo ni Jehova, mas agtalektayo met kenkuana. Kasta ti napasamak ken apostol Pablo. Ngamin, iti maudi a pannakaibaludna ken sakbay ti ipapatayna, insuratna no apay a saan a mabain nga agsagaba kas Kristiano. Imbagana: ‘Ta am-ammok Daydiay pinatik.’ (2 Tim. 1:12) Gapu kadagiti naammuan ni apostol Pablo maipapan ken Jehova ken gapu iti panangtultulongna kenkuana, naan-anay a nagtalek ken Jehova. Kombinsido a saan a lipaten ni Jehova ti kinamatalekna ken pagungarennanto.

APAY NGA ITULTULOYTAYO A MAS AM-AMMUEN NI JEHOVA?

7. Ania ti posible a mapasamak no nabayagtayon nga agserserbi ken Jehova?

⁷ Idi damo a naammuantayo ti maipapan ken Jehova, sigurado a nakagaggagettayo nga agadal ta kayattayo a mas maam-ammo isuna. Ngem iti panaglabas ti adu a tawen, baka saanen a kas iti dati ti panagreggettayo a mangam-ammo kenkuana. Apay? No ngamin agbasbasatayo iti Biblia wenno addatayo kadagiti gimong, baka nakapokustayon no kasano a makatulong kadatayo wenno iti dadduma dagiti nasursurotayo. Nasayaat met ketdi dayta. Ti agpayso, dayta ti iparparegta kadatayo ti Biblia. (2 Tim. 3:​16, 17) Ngem adda pay ti napatpateg nga aramidentayo. Panunotentayo dagiti masursurotayo iti mismo nga Autorna. (Sal. 25:​8-10) No ngarud basbasaentayo ti Biblia, nagpateg nga isaludsodtayo iti bagitayo, ‘Ania ti isurona daytoy kaniak maipapan ken Jehova?’a

8. No mas am-ammuentayo ni Jehova, ania ti epekto dayta iti pannakigayyemtayo kenkuana? (Salmo 73:​24-28)

⁸ No mas am-ammuentayo ni Jehova, nasingsingedtayo met kenkuana. Kas pagarigan, ania ti mariknam ken Jehova kalpasan a binasam ti Biblia iti kada aldaw, binuyam ti binulan a broadcasting, wenno nakiasamblea wenno nakikombensionka? Saan kadi a mas simmingedka iti nailangitan nga Amatayo? Apay? Ngamin, mas naam-ammom isuna. Isu a matignayka a mangidaydayaw ken agyaman kenkuana. Marikriknatayo ti kas iti narikna ni Asaf idi pinampanunotna ti panangaywan ni Jehova kenkuana. Imbagana: “Ti Dios ti mangpapigsa iti pusok, ti dakkel a bato a pagkamangak. Isu ti agnanayon a bingayko.” (Basaen ti Salmo 73:​24-28.) Isu a no mas am-ammuem ni Jehova, ad-adu met ti rasonmo nga agyaman kenkuana gapu ta nakasaysayaat isuna a gayyem.

9. Ania ti pagsayaatanna no ‘ikabilangantayo’ ni Jehova kadagiti desisiontayo? Mangted iti pagarigan.

⁹ Ibagbaga ti Biblia nga ‘ikabilangantayo’ ni Jehova. (Prov. 3:​5, 6) Ania ti kayatna a sawen dayta? Masapul a panunotentayo dagiti nasursurotayon maipapan kenkuana ken no ania ti epekto kenkuana dagiti aramidentayo. Iti kasta, makaaramidtayo kadagiti nasayaat a desision. Panunotem daytoy: Adu dagiti kakabsat a mangikabkabil iti piktiur ti asawada iti lamisaanda, iti wallet-da, wenno iti selponda. Apay? Makatulong ngamin dayta tapno kanayon a malaglagipda ti asawada ken no kasano kauneg ti ayatda iti asawada. Ngem saan la a dayta. Makatulong met tapno makaaramidda kadagiti desision a mangparagsak iti asawada ket saanda a makaaramid iti pakasaktanda. Kasta met laeng kadatayo. No kanayontayo a panunoten ni Jehova, makatulong dayta tapno makaaramidtayo kadagiti desision a mangparagsak kenkuana.—Sal. 19:​13, 14.

10. Ania ti kayatayo nga aramiden no am-ammuentayo ni Jehova?

¹⁰ Naparsuatayo a kaladladawan ni Jehova, isu a kayatayo a tuladen dagiti kualidadna. (Gen. 1:26) Ket no ad-adu ti ammotayo maipapan kadagiti kualidadna, mas ammotayo met no kasanotayo a tuladen isuna. Saan a kasta ti inaramid dagiti eskriba ken Fariseo isu a krinitikar ida ni Jesus. Agpayso a kabesadoda uray dagiti babassit a detalye ti Linteg, ngem imbaga ni Jesus a ‘saanda a tungtungpalen dagiti napatpateg a banag iti Linteg kas iti kinahustisia, asi, ken kinamatalek.’ (Mat. 23:23) Saantayo a kayat a tuladen ida. Ania ngarud ti aramidentayo? Ikagumaantayo a tarusan dagiti kualidad ni Jehova a makita kadagiti linteg ken prinsipiona. No aramidentayo dayta, matuladtayo dagiti nagsasayaat a kualidadna.—1 Juan 4:​8, 11.

KASANOTAYO A MAS MAAM-AMMO NI JEHOVA?

11. Asino ti nangiyam-ammo kenka ken Jehova?

¹¹ Asino ti nangiyam-ammo kenka ken Jehova? Baka dagiti Saksi a nagannakmo. Mabalin nga inyestoriada dagiti salaysay ti Biblia ken insuroda ti maipapan kadagiti pinarsua ni Jehova tapno maammuam dagiti nagsasayaat a kualidadna. Wenno baka nagpayadalka iti Biblia iti maysa kadagiti Saksi ni Jehova. Mabalin nga inusaryo ti libro nga Agbiagka a Naragsak iti Agnanayon! tapno maawatam dagiti salaysay ti Biblia ken no ania ti masursurom iti nakaparsuaan maipapan kadagiti nagpipintas a kualidad ni Jehova.b (Neh. 8:8; Ara. 14:17) Pagsasaritaantayo itan no kasanotayo a maitultuloy a maam-ammo ni Jehova.

12-13. Ania ti masursurotayo maipapan ken Jehova no basbasaentayo ti Biblia? Mangted iti pagarigan. (Jeremias 39:​15-18) (Kitaen met ti ladawan.)

¹² Umuna, mas maam-ammotayo ni Jehova no basaen ken adalentayo ti Saona. No dadduma, direkta nga ibaga ti Biblia dagiti kualidad ti Dios. (Ex. 34:​6, 7) Ngem kaaduanna a maammuantayo dagita iti napasamak kadagiti tattao ken kadagiti inaramidda. Isu a no basbasaem dagita a salaysay, panunotem no ania ti isuro dagita kenka maipapan ken Jehova.

¹³ Kas pagarigan, basbasaem ti Jeremias 38:​6-13. Naammuam nga insalakan ti Etiope a ni Ebed-melec ni propeta Jeremias. Mabalin a napanunotmo a dagus no kasanom a matulad ti kinamanagsakripisio, kinatured, ken ayat nga impakita ni Ebed-melec iti padana nga agdaydayaw. Ngem adda met kadi dagiti kualidad ni Jehova a nasursurom iti dayta a salaysay? (Basaen ti Jeremias 39:​15-18.) Kas pagarigan, ania a bersikulo ti mangipakita a ni Jehova ket manangapresiar? Patas? Ken saan a mangidumduma? Ania pay dagiti kualidad ni Jehova a nasursurom? No basbasaem ti Biblia, kitaem dagiti kualidad ni Jehova a masursurom iti basbasaem. Kalpasanna, saanmo a liplipatan ti agyaman kenkuana ken ibagam nga ay-ayatem isuna gapu kadagiti nagpipintas a kualidadna.

14. Ania ti aramidentayo tapno mas makasursurotayo kadagiti parsua ni Jehova?

¹⁴ Maikadua, mas maam-ammotayo ni Jehova no utobentayo dagiti parsuana. (Sal. 145:​9, 10) Siempre, saan nga umanay a paliiwentayo laeng dagiti pinarsuana. Ngamin, dadduma ti nangusar iti intero a biagda a nangadal iti maysa nga animal wenno mula. Ngem saanda man la a binigbig ti nangparsua iti dayta ken dagiti kualidadna. Insurat ni apostol Pablo a “dagiti di makita a kualidad [ti Dios] ket nalawag a makita manipud idi pinarsuana ti lubong ken agpatpatuloy, ta maawatan dagita babaen ti bambanag a naaramid.” (Roma 1:20) Ibaga ti maysa a patarus ti Biblia iti daytoy a bersikulo a no agpanunot a naimbag ti maysa, makitana dagiti kualidad ti Dios. Ania ngarud ti masapul nga aramidentayo? Agsardengtayo ken utobentayo no ania dagiti kualidad ni Jehova a masursurotayo kadagiti parsuana.

15. Ania ti inaramid ni Patrick tapno mas maam-ammona ni Jehova, ken kasanotayo a matulad ti inaramidna? (Kitaen met ti ladawan.)

¹⁵ Adu kadatayo ti aggigian iti siudad isu a manmano laeng a mula wenno animal ti makitatayo. No kasta ti situasionmo, posible kadi a makasursuroka latta kadagiti parsua ni Jehova? Wen! Kitaentayo ti inaramid ni Patrick a taga-Brazzaville a maysa a dakkel a siudad iti Republic of the Congo. Imbagana: “No addaak iti terrace-mi, ob-obserbarak dagiti parsua ni Jehova. Makakitaak no kua kadagiti babassit nga insekto wenno billit. Nakabis-busy-da nga agbirok iti makan wenno pagyananda. Naminsan, nakakitaak kadagiti billit. Agal-alada kadagiti usarenda a pagaramid iti umokda a pagpessaanto dagiti itlogda. Nakapimpintas ti inaramidda nga umok!” Ngem kasta la kadi ti inaramid ni Patrick? Saan. Pinanunotna met no ania ti masursurona iti Namarsua. Imbagana: “Talaga a nakaay-ayat ni Jehova ta ipapaayna dagiti kasapulan uray dagiti kababassitan a parsuana. Isu a masiguradok nga ipatpategnak met ni Jehova ken saan nga agmintis a mangipaay iti kasapulak.”

16. Ania ti nakatulong ken Maria nga ina ni Jesus tapno mas maam-ammona ni Jehova, ken kasanotayo a matulad isuna? (Kitaen met ti ladawan.)

¹⁶ Maikatlo, mas maam-ammotayo ni Jehova no utobentayo no kasanonatayo a tultulongan. Kasta ti inaramid ni Maria nga ina ni Jesus. Agpayso nga am-ammonan a naimbag ni Jehova ken ‘pinaraburan ti Dios.’ (Luc. 1:30) Ngem idi nakaawat iti narigat nga asaynment nga agbalin nga ina ti Anak ti Dios, pinabileg ken impanamnama ni Jehova kenkuana a tulonganna isuna. Kasano? Inusarna ni anghel Gabriel ken ti kabagianna a ni Elisabet a mangaramid iti dayta. Idi agangay, inut-utob ni Maria no ania ti masursurona maipapan ken Jehova iti kapadasanna. Ad-adda a nakitana a mannakabalin ni Jehova, naasi, saan a mangidumduma, ken maseknan kadagiti nanumo. (Luc. 1:​46-55) Nagyamyaman ni Maria idi tinulongan ti Dios. Kasta met laeng kadatayo. Agyamyamantayo no tulongannatayo ni Jehova “iti umiso a tiempo.” (Heb. 4:16) Isu a kada tulongannaka ni Jehova, isaludsodmo iti bagim: ‘Ania ti isuro daytoy kaniak maipapan ken Jehova? Ania dagiti kualidadna nga impakitana kaniak?’

DITAYTO PULOS SUMARDENG A MANGAM-AMMO KEN JEHOVA

17-18. Apay a maibagatayo a ditayto pulos sumardeng a mangam-ammo ken Jehova?

¹⁷ Inton baro a lubong, mas maam-ammotayto pay ni Jehova. Makaawattayto kadagiti baro a lukot a naglaon kadagiti instruksionna tapno agtultuloytayo nga agbiag. (Apoc. 20:12) Mas maam-ammotayto pay ni Jehova ta maenjoytayo a makalangen ti amin a parsuana. (Isa. 11:​6-9) Ken adunto pay dagiti baro a pamay-an a mas maam-ammotayo ni Jehova. Kas pagarigan, inton pagungarenna dagiti natay a gagayyemtayo ken kapamiliatayo, ken inton tulongannatayo nga in-inut nga agbalin a perpekto.

¹⁸ Ditayto pulos sumardeng a mangam-ammo ken Jehova. Apay? Nabayagen nga adda ni Jehova isu nga “awan limitasion ti pannakaawatna.” (Sal. 90:2; 147:5) Ken ‘saantayto a pulos matarusan ti aramid ti pudno a Dios manipud rugi agingga iti ngudona.’ (Ecl. 3:11) Isu a kasanotay man kabayag nga agserserbin ken Jehova, sapay koma ta gundawayantayo ti tunggal oportunidad a mas am-ammuen ti naayat ken nadungngo nga Amatayo!