No Kasano nga Ipakita ti Urnos Maipapan iti Kinapadi nga Ay-ayatennatayo ni Jehova

1. Apay a maibagatayo nga agkasapulan unay iti tulong dagiti tattao?

KASAPULANTAYO amin ti tulong! Apay? Gapu iti natawidtayo a basol. Manipud nagbasol da Adan ken Eva, naisinan ti tao iti Dios. Naputeden ti nasinged a relasiontayo kenkuana. (Efe. 2:12; Col. 1:21) Gapu iti basol, kas man la naperdi ti rangtay a mangikonkonektar iti tao iti Dios. Ket uray no ania ti ar-aramidentayo, saantayo a kaya a matarimaan dayta a datdatayo. Dayta ti rason a kasapulantayo ti tulong. Ngamin, no saan a maisubli ti nadekket a relasiontayo iti Dios, awan serserbi ti biagtayo. Awan ti namnamatayo iti masanguanan. Ngem gapu ta ay-ayatennatayo ni Jehova, adda ti tulong nga impaayna. Ania dayta?

2. Ania ti usigentayo iti daytoy nga artikulo?

² Tapno maisubli ti nasayaat a relasiontayo ken Jehova, impaayna ti nakasaysayaat nga urnos maipapan iti kinapadi. Adda daytan nga urnos sipud pay iti nagkauna a nasion ti Israel ken idi agangay, nagtultuloy dayta iti kongregasion Kristiano agingga ita. Iti daytoy nga artikulo, pagsasaritaantayo no kasano a nakatulong kadagiti nagkauna nga Israelita ti urnos maipapan iti kinapadi. Kitaentayo met no kasano a pagsayaatantayo ita ken iti masanguanan dayta nga urnos. Ken maudi, kitaentayo no kasano nga ipakita ti urnos maipapan iti kinapadi nga ay-ayatennatayo ni Jehova.

KASANO A NAKATULONG KADAGITI ISRAELITA TI URNOS MAIPAPAN ITI KINAPADI?

3. Kasano a nakatulong ti urnos maipapan iti kinapadi kadagiti talaga a mayat nga agdayaw ken Jehova? (Hebreo 5:1) (Kitaen met ti ladawan.)

³ Inlawlawag ni apostol Pablo no apay nga impaay ni Jehova kadagiti nagkauna nga Israelita ti urnos maipapan iti kinapadi. (Basaen ti Hebreo 5:1.) Kayat ngamin ida a tulongan ni Jehova a maaddaan manen iti nasayaat a relasion kenkuana. Ti nangato a padi ti dinutokanna nga “agserbi iti Dios maigapu iti tattao.” Iti kasta, awatenna ti panagdaydayaw dagiti tattao a talaga a mayat a mangparagsak kenkuana uray no managbasolda. Isu a dagiti padi ket nagserbi nga arig rangtay iti nagbaetan ti Dios ken ti tattao.

4. Kasano a nagserbi dagiti papadi kas pannakabagi ti Dios kadagiti tattao?

⁴ Kasano a nakatulong dagiti papadi kadagiti Israelita tapno makaadanida ken Jehova ken makapagdaydayawda kenkuana iti pamay-an nga awatenna? Adda ti dua a pamay-an. Umuna, nagserbi dagiti papadi kas pannakabagi ti Dios kadagiti tattao babaen ti panangisuroda iti maipapan ken Jehova. Kasano? Kuna ti Malakias 2:7: “Masapul a saluadan ti bibig ti padi ti pannakaammo, ken rumbeng a sapulen dagiti umili ti linteg manipud iti ngiwatna, ta isu ti mensahero ni Jehova a panguluen dagiti armada.” Isu a dagiti papadi ti nangisuro kadagiti Israelita iti maipapan iti Linteg ni Moises tapno maawatanda dayta ken masurotda. Kas pagarigan, idi kaaldawan ni Nehemias, 13 nga agduduma a Levita ti timmulong iti padi a ni Esdras a mangilawlawag a naimbag iti kaipapanan ti Linteg. Tinulonganda dagiti umili a mangtarus iti naibasa. Gapu iti dayta, nasurot dagiti Israelita dagiti linteg ti Dios ken simmingedda kenkuana.—Neh. 8:​2, 3, 6-8.

5. Kasano a nagserbi dagiti papadi kas pannakabagi dagiti tattao iti Dios, ken ania ti isuro dayta maipapan ken Jehova?

⁵ Maikadua, nagserbi dagiti papadi kas pannakabagi dagiti tattao iti Dios. Kasano? Isuda ti agdaton para kadagiti tattao. Ammo dagiti Israelita nga inaldaw nga agbasbasol ken agkamkamalida. Isu a naawatanda a kasapulanda ti tulong tapno mapakawan dagiti basolda. (Sal. 51:9) Tapno agbalin a posible dayta, impaay ni Jehova dagiti papadi nga agidaton para kadakuada. Nakaragragsak la ketdi dagiti agbabbabawi nga Israelita ta ammoda a napakawanen dagiti basolda! Ania ti isuro daytoy nga urnos maipapan ken Jehova? Ipakitana nga isu ket nakaay-ayat, nakaas-asi, ken talaga a kayatnatayo a tulongan a maaddaan iti nasayaat a relasion kenkuana ken maisalakan.

TI AKEM TI PADI—IDI, ITA, KEN ITI MASANGUANAN

6. Idi panawen dagiti patriarka, ania ti ar-aramiden ti ulo ti pamilia a kas iti ar-aramiden ti maysa a padi?

⁶ Sakbay pay nga impaay ni Jehova ti urnos maipapan iti kinapadi, kayatnan a maaddaan dagiti adipenna iti nasayaat a relasion kenkuana. Kasano? Idi panawen dagiti patriarka, gagangay idi nga agidaton dagiti ulo ti pamilia kadagiti animal para iti bagida ken iti pamiliada. Kas pagarigan, idi rimmuar ni Noe ken ti pamiliana iti daong, nagidaton kadagiti animal kas panagyaman. (Gen. 8:20) Nangaramid met ni Abraham kadagiti altar a pagdatonan para ken Jehova. (Gen. 12:​7, 8) Nagpuor met ni Job kadagiti daton a para kadagiti annakna. (Job 1:5) Isu a sakbay pay a naadda ti urnos maipapan iti kinapadi, addan dagiti lallaki nga aw-awagan ni Jehova kas papadi. Imbagana: “Dagiti papadi [dagiti ulo ti pamilia] a kanayon nga umas-asideg ken Jehova pagbalinenda a nasantuan ti bagida, tapno saan ida a papatayen ni Jehova.”—Ex. 19:22.

7. Asino ni Melkisedek, ken kasano nga iladladawanna ti Mesias?

⁷ Ni Melkisedek ti umuna a naawagan iti Biblia a kas padi. (Gen. 14:18) Ngem saan laeng a nagserbi kas padi no di ket nagbalin met nga ari. Kas ken Melkisedek, inkari ni Jehova a ti Mesias ket agbalinto nga ari ken padi. Ngem ti panagari ti Mesias ket pakagunggonaanto ti amin a tattao iti agnanayon.—Sal. 110:4; Heb. 7:17.

8. Sigun iti Mosaiko a Linteg, asino dagiti agserbi a papadi iti Israel, ken ania ti aramidenda?

⁸ Kas naammuantayon, impaay ni Jehova ti urnos maipapan iti kinapadi kadagiti Israelita. Impaayna met ti Mosaiko a Linteg kadakuada a naglaon kadagiti instruksion maipapan iti dayta nga urnos. Ania ti dadduma kadagita? Ti agserbi kas papadi ket ti kabsat ni Moises a ni Aaron ken dagiti kaputotanna. (Ex. 40:​12-15) Ania ti dadduma kadagiti aramidenda? Inted ni Jehova a responsabilidad dagiti papadi ti panagidaton. Ti nangato a padi ti kangrunaanna nga agidaton para iti intero a nasion. Dagiti met papadi ti agdaton para iti tunggal Israelita. Ti met dadduma a lallaki manipud iti tribu ni Levi ti tumulong kadagiti papadi iti nagduduma a pamay-an. Nangipaay met ni Jehova kadagiti espesipiko nga instruksion no ania dagiti maidaton, no apay a maidaton dagita, ken no kasano a maidaton dagita. Adda kadi ti dakdakkel a kaitungpalanna dayta nga urnos? Kitaentayo.

9-10. Siasino dagiti kakadua ni Jesus nga agserbi kas papadi bayat ti Sangaribu a Tawen a Turay?

⁹ Idi nabautisaran ni Jesus, nagserbi isunan a kas Nangato a Padi iti naespirituan a templo ni Jehova. (Heb. 8:1) Kalpasan ti tallo ket kagudua a tawen, indatonna ti perpekto a biagna tapno naan-anay a maabbongan ti basol dagiti tattao. Ti indatonna ket adayo a nasaysayaat ngem iti aniaman nga animal nga indaton dagiti papadi iti Israel. Agingga ita, agserserbi ni Jesus kas Nangato a Padi tapno agparang iti sanguanan ti Dios para kadatayo. (Heb. 9:24) Siasino dagiti kakadua ni Jesus nga agserbi kas ar-ari ken papadi iti Pagarian ti Dios? Ti 144,000 a dinutokan ti espiritu. (1 Ped. 1:​3, 4; 2:9) Makipagtrabahodanto iti Dios ken iti Kristo tapno agbalinto a perpekto dagiti natulnog a tattao ken pagbalinenda a paraiso ti daga. Magagaranka kadin a makakita a mapasamak amin dagita?

¹⁰ Kas naammuantayon, impaay ni Jehova ti urnos maipapan iti kinapadi tapno maaddaan dagiti tattao iti nasayaat a relasion kenkuana manipud pay idi agingga iti masanguanan. Ipakita dagiti daton dagiti papadi a kasapulan dagiti Israelita ti adayo a nasaysayaat a daton—ti perpekto a biag ni Jesus. Bayat ti Sangaribu a Tawen a Turay, agserbinto ni Jesus ken ti 144,000 kas papadi, agingga nga agbalinen a perpekto ti amin a matalek a tattao. Kalpasan dayta, saanton a kasapulan dagiti tattao ti urnos maipapan iti kinapadi ta naisublinton ti nasayaat a relasionda iti Dios. Kasano a makatulong daytoy nga urnos tapno mas sumingedtayo ken Jehova?

KASANO A MAKATULONG TI URNOS MAIPAPAN ITI KINAPADI TAPNO SUMINGEDTAYO KEN JEHOVA?

11. Kasano nga ipakita ti urnos maipapan iti kinapadi a talaga a kayat ni Jehova a maaddaantayo iti nasinged a relasion kenkuana?

¹¹ Ipakita ti urnos maipapan iti kinapadi a talaga a kayat ni Jehova a maaddaantayo iti nasinged a relasion kenkuana. Sipud idi nagbasol da Adan ken Eva, nayadayon dagiti tattao ken Jehova. Ngem kayatna a mayasidegtayo manen kenkuana, makasarita ken maparagsaktayo isuna, agbalintayo a nasinged a gayyemna, ken agbiagtayo iti agnanayon. (2 Cor. 5:18) Apay? Ammona ngamin a biktimatayo laeng iti natawidtayo a basol. Naasian kadatayo isu a nangaramid iti pamay-an tapno maaddaantayo iti nasinged a relasion kenkuana. No panunotem dayta, saan kadi nga ad-adda pay nga ayatem isuna?

12. Apay a makatukay iti puso a maammuan nga agpakpakaasi ti Nangato a Padi a ni Jesus para kenka? (Hebreo 7:25) (Kitaen met ti ladawan.)

¹² Kayat met ni Jesus a maaddaantayo iti nasinged a relasion ken Jehova. Kas Nangato a Padi, agserbi ni Jesus kas ‘katulongantayo a kadua ti Ama.’ Isu ti agpakaasi ken Jehova tapno pakawanennatayo no nakabasoltayo. (1 Juan 2:1; basaen ti Hebreo 7:25.) Ania ti dadduma a mabalin nga ikabkabilangan ni Jesus sakbay nga agpakaasi ken Amana para kenka? Mabalin nga ikabkabilanganna ti nalikudam, ti pannakapadakkelmo, ti salun-atmo, ken ti emosionmo. Mabalin a pampanunotenna met dagiti nagsasayaat a kualidadmo ken dagiti maar-aramidam, kasta met ti matalek a panagserbim. Ammo met ni Jesus ti pampanunotem ken marikriknam. Ammona no mamin-anokan a dumawdawat ken Jehova iti pammakawan. Ammona met a talaga nga ikarkarigatam nga aramiden ti umiso. Masiguradotayo a denggen ni Jehova ti panagpakpakaasi ni Kristo para kadatayo ta isu ket nakaas-asi ken sisasagana a mangpakawan. (Sal. 86:5) Apay a masiguradotayo dayta? Gapu ta ni Jehova a mismo ti nangdutok ken Jesus nga agpakpakaasi para kadatayo.

13. Ania ti ipaspasigurado kadatayo ti urnos maipapan iti kinapadi, ken ania ti epektona dayta kadatayo no agkararagtayo ken Jehova? (Hebreo 4:16)

¹³ Ipaspasigurado ti urnos maipapan iti kinapadi a kayat ni Jehova a nawayatayo a makisarita kenkuana no agkararagtayo. (Basaen ti Hebreo 4:16.) Dayta ti maysa a rason nga inted ni Jehova ni Jesus kas Nangato a Paditayo. Maragragsakan ni Jehova a dumngeg kadatayo no agkarkararagtayo. Ipakpakitatayo ngamin nga agtaltalek ken agpapaiwanwantayo kenkuana. Ngem no dadduma, mabalin a ditay ammo no ania ti ikararagtayo. Mabalin a gapu ta madandanagantayo wenno adda problematayo. (Roma 8:26) Ngem uray no kasta, masiguradotayo nga ammo ni Jehova ti kayattayo nga ibaga. Maaw-awatannatayo ken tulongannatayo. Isu a no adda ti banag a saan a mangpaturog kenka, dika koma agpangadua a mangibaga dayta ken Jehova. Ikagumaam. Laglagipem nga ay-ayatennaka ken maseknan kenka.

14. Ania ti inaramid ni Jehova a mangipakita a kayatna nga agbiagtayo iti agnanayon?

¹⁴ Ipakita ti urnos maipapan iti kinapadi a kayat ni Jehova nga agbiagtayo iti agnanayon. (Ezek. 33:11) Saan idi a naan-anay a naabbongan dagiti daton nga animal ti basol dagiti agdaydayaw iti Dios. (Heb. 7:19) Ngem nakatulong dagita tapno maawatanda a kasapulanda ti nasaysayaat a daton—ti perpekto a biag ni Kristo Jesus. Gapu iti dayta, posiblen a naan-anay a mapakawan dagiti basoltayo. Maaddaan met iti gundaway dagiti natulnog a tattao nga agbiag iti agnanayon. Anian a yamantayo ken Apo Jehova ta isu ti nangaramid iti pamay-an tapno agbiagtayo iti agnanayon!—1 Juan 4:10.

15. Kasano a makita ti ayat ni Jehova kadagiti pinilina nga agserbi kas papadi iti Pagarian?

¹⁵ Makita ti ayat ni Jehova kadagiti pinilina nga agserbi kas papadi. Kas ken Jesus, masapul nga agtalinaed a matalek dagiti dinutokan ti espiritu agingga a matayda. (Fil. 2:8; Apoc. 2:10) Iti kasta, mapaneknekanda iti amin a matalekda ken Jehova. Ania ti ipasigurado dayta kadatayo? Masiguradotayo a siaayat a tulongandatayo nga umawat kadagiti bendision nga iyeg ti daton ni Jesus. Tulongandatayo a maagasan ken mawayawayaan manipud iti natawidtayo a basol ken in-inut nga agbalin a perpekto. Ket bayat ti Sangaribu a Tawen a Panagturay ni Kristo, itultuloyda nga aramiden dayta agingga a matungpal ti panggep ni Jehova nga agbalin a perpekto dagiti tattao ken agbalin a paraiso ti daga.—Apoc. 22:​1, 2.

16. Apay a ni Jesus ti kasayaatan nga agserbi kas Nangato a Padi para kadatayo? (Hebreo 4:15)

¹⁶ Aniaman a mapadpadasam ita, maawatannaka ti Nangato a Padi a ni Jesus ta nagbiag met idi kas tao. (Basaen ti Hebreo 4:15.) Kas pagarigan, mabambannogka kadi no dadduma? Uray ni Jesus, nabannog met. (Juan 4:6) Napadasam kadin ti mabisinan ken mawaw? Napadasan met dayta ni Jesus. (Mat. 4:2; Juan 19:28) Mabusbusorka kadi ken pabpabainandaka gapu iti pammatim? Kasta met ti nakaipasanguan ni Jesus. (Isa. 50:6; Juan 15:20) Natayanka kadi iti ipatpateg iti biag? Malagipmo nga uray ni Jesus, natay met ti gayyemna a ni Lazaro, ken agparang nga uray ti pannakaamana a ni Jose. Isu nga aniaman a mapadpadasam ita, masiguradom a maawatannaka ti Nangato a Paditayo a ni Jesus. Ammona ti eksakto a tulong a kasapulam.

17. Apay a masiguradotayo a maawatandatayto met ti 144,000 inton tulongandatayo nga agbalin a perpekto?

¹⁷ Masiguradotayo a maawatandatayto met ti 144,000 bayat a makipagtrabahoda ken Jesus a tumulong kadatayo nga agbalin a perpekto. Apay? Ngamin, idi addada ditoy daga, imperpektoda ken managbasolda met. Isu nga ammoda ti rikna ti makaaramid iti kamali ken makonsiensia. Napadasanda met ti agsakit, agdanag, ken agproblema. Nagbiagda met iti agduduma a tiempo. Dimmakkelda iti agduduma a lugar ken pamilia ken agduduma ti napadasanda. Isu nga aniaman ti kapadasam iti biag, adda nga adda ti maysa a miembro ti 144,000 a makaawatto kenka.

18. Ania ti masursurotayo maipapan ken Jehova iti urnos maipapan iti kinapadi, ken ania ti mariknam maipapan kenkuana?

¹⁸ Isuro kadatayo ti urnos maipapan iti kinapadi a ni Jehova ket nakaay-ayat, nakaas-asi, ken maawatanna dagiti mapaspasarantayo. Talaga a naiduma unay ken Satanas a kanayon nga agbirbirok kadagiti kamalitayo. (Apoc. 12:10) Iti daytoy nga artikulo, naammuantayo a nakaad-adu ti inaramid ni Jehova tapno maaddaantayo manen iti nasinged a relasion kenkuana, agbalintayo a gayyemna, ken tapno maipasiguradona a maparparagsaktayo isuna. Isu nga ania itan ti mariknam maipapan ken Jehova? Saan kadi a nalaklakamon a patien nga ay-ayatennaka ken talaga a kayatnaka a pakawanen?

19. Ania ti makitkita ni Jehova kadatayo uray no dagiti kamali ken pagkapuyantayo ti makitkitatayo iti bagitayo?

¹⁹ No dadduma, mabalin a mariknatayo a saannatayo nga ay-ayaten ni Jehova ken kasla puro laengen kamali ti maar-aramidantayo. Ngem iti daytoy nga artikulo, impasigurado kadatayo ni Jehova a maaw-awatannatayo. Ammona a kasta ti marikriknatayo gapu ta imperpektotayo. Silalagip a tapoktayo. (Sal. 103:14) Isu a no adda dagiti tiempo a dagiti laengen kamali ken basolmo ti makitkitam iti bagim, laglagipem koma no ania ti makitkita ni Jehova kenka: Saan a dagiti kamalim, no di ket dagiti nasayaat a maar-aramidam. Makitkitana daydiay ikarkarigatam a pagbalinan ken daydiay sika inton perpektokan. Saanmo koma a liplipatan a ‘dakdakkel ni Jehova ngem ti pusotayo ken ammona ti amin a banag.’—1 Juan 3:20.

20. Apay nga agyamyamanka unay iti urnos maipapan iti kinapadi, ken ania ti kayatmo nga aramiden tapno maipakitam ti panagyamanmo?

²⁰ Iti daytoy nga artikulo, naammuantayo nga impaay ni Jehova ti urnos maipapan iti kinapadi tapno awatenna ti panagdaydayawtayo uray no managbasoltayo. Talaga a kayatna a maaddaantayo iti nasayaat a relasion kenkuana. Isu nga anian a yamantayo ta daytoy ti nagbalin nga arig rangtay tapno mayasideg dagiti imperpekto a matalek a tattao ken Jehova. Aramidentayo ngarud koma ti iparparegta ti Hebreo 4:16: “Umasidegtayo ngarud iti trono ti nagpaiduma a kinaimbag ken siwayawaya nga agsaotayo iti panagkararagtayo tapno maawattayo ti asi ken magun-odantayo ti nagpaiduma a kinaimbag a makatulong kadatayo iti umiso a tiempo.”