Ikaskasabatayo ti Naimbag a Damag iti “Amin a Lengguahe Kadagiti Nasion”

1. Apay a nagpateg a kasabaantayo dagiti tattao iti mismo a lengguaheda? (Roma 10:​13, 14)

ITI umuna a libro ti Biblia, mabasatayo ti maipapan iti panagrebelde dagiti tattao ken Jehova. Ania ti inaramidda? Nagaramidda iti dakkel a torre. Ngem pinagduduma ni Jehova ti lengguaheda tapno mapasardengna ida. Ket idi saandan a maawatan ti maysa ken maysa, nagsisinada. Nagkakadua dagiti agkakalengguahe ket nagnaedda iti nagduduma a paset ti lubong. (Gen. 11:​6-9) Ngem iti maudi a libro ti Biblia, imbaga ni Jehova a pagkaykaysaenna ti “dakkel a bunggoy . . . manipud iti amin a nasion, tribu, puli, ken lengguahe” ket isalakannanto ida bayat ti dakkel a rigat ken agbiagda iti baro a lubong. (Apoc. 7:​9, 10, 14) Bayat ti dakkel a rigat, awaganto ti dakkel a bunggoy ti nagan ni Jehova. Kasano nga agbalin a posible dayta? Agbalin laeng a posible dayta no makasabaanda iti mismo a lengguaheda. (Basaen ti Roma 10:​13, 14.) Isu a talaga a nagdakkel a pribilehio ti makipaset iti daytoy a makaispal iti biag a trabaho!

2. Ania ti impadto ni propeta Zacarias?

² Ginasut a tawen sakbay nga insurat ni apostol Juan ti libro nga Apocalipsis, impaipadto ni Jehova ken propeta Zacarias nga “adu a nasion ti agdaydayawto ken Jehova, ken agbalindanto a [tattaona].” (Zac. 2:11) Imbaga pay ni propeta Zacarias: “Kuna ni Jehova a panguluen dagiti armada, ‘Kadagita nga aldaw, . . . ti 10 a tattao manipud iti amin a lengguahe kadagiti nasion . . . kumpetdanto a naimbag iti bado ti maysa a Judio, nga ibagbagada: “Kayatmi ti kumuyog kadakayo ta nangngegmi nga adda kadakayo ti Dios.”’” (Zac. 8:23) Anian a makaparagsak ta makitkitatayon a matungtungpal dayta a padto iti kaaldawantayo! Ngem ania ti paset ti tunggal maysa kadatayo iti pannakatungpal dayta a padto? Kitaentayo.

PANANGASABA ITI “10 A TATTAO MANIPUD ITI AMIN A LENGGUAHE”

3. Siasino ita ti ireprepresentar ti “Judio,” ken siasino met ti ireprepresentar ti “10 a tattao”?

³ Ti “Judio” iti padto ni Zacarias irepresentarna dagiti dinutokan ti Dios babaen ti nasantuan nga espiritu. Maawaganda met iti “Israel ti Dios.” (Gal. 6:16) Isuda dagiti “naayaban a mapan idiay langit.” (Heb. 3:1) Ti met “10 a tattao” irepresentarna dagiti nasingpet a tattao nga addaan iti namnama nga agbiag nga agnanayon iti Paraiso a daga. Naggapuda iti agduduma a puli, nasion, ken lengguahe.

4. Ania ti napasamak kalpasan a dinutokan ni Jesus ti “matalek ken masirib nga adipen” idi 1919?

⁴ Idi dinutokan ti Kristo ti “matalek ken masirib nga adipen” idi 1919, nabigbig dagiti lallaki a mangbukel iti dayta a grupo a masapul a maikasaba ti naimbag a damag iti intero a lubong. Nakitada a masapul a maipatarus ti mensahe ti Biblia iti agduduma a lengguahe. (Mat. 24:45) Ngem sakbay ti 1919, ikaskasaban ti ili ti Dios ti naimbag a damag. Us-usarenda ti inaramidda a video a “Photo-Drama of Creation” ken ipabpabuyada dayta iti agduduma a tattao iti agduduma a lengguahe. Ngem nakita ti matalek nga adipen nga adu pay ti masapul a maaramid. Isu nga idi 1921, nairuar ti libro a The Harp of God. Dayta a libro ket nakatulong kadagiti tattao tapno mas maawatanda ti Biblia. Idi agangay, naipatarus dayta iti 36 a lengguahe. Idi 1935, naawatan ti matalek ken masirib nga adipen a ti “dakkel a bunggoy” ket dagiti tattao nga aggapu iti agduduma a nasion nga agserbinto ken Jehova iti agnanayon ditoy daga. Isu a makitatayo a kadagiti tawen kalpasan ti 1919, tinulongan ni Jehova ti matalek nga adipen a mangorganisar iti trabaho a panangasaba tapno maipakaammo ti naimbag a damag iti adu a lengguahe, kas kaitungpalan ti padto ni Zacarias.

“SISASAGANANTO DAGITI TATTAOM NGA AGBOLUNTARIO”

5-6. Kasano a matungtungpal ita ti Isaias 2:​2-4? (Kitaen met ti ladawan.)

⁵ Kas impakpakauna ni Isaias, adu a tattao iti intero a lubong ti mayat a mangam-ammo ken Jehova ken agserbi kenkuana. Isu nga itultuloy ti ili ti Dios nga ikasaba ti naimbag a damag iti intero a lubong. (Basaen ti Isaias 2:​2-4.) Ket tapno maam-ammo dagitoy a tattao ni Jehova, ‘sisasagana dagiti adipenna nga agboluntario’ a mangasaba. Ngem saan laeng a dayta ti ar-aramidenda. Agipatpatarus, agim-imprenta, ken agipatpatulodda kadagiti publikasion iti adu a lengguahe iti intero a lubong. (Sal. 68:11; 110:3) Kasta met, adu a kakabsat a kas kadagiti adda ti ammona iti computer programming ti nangaramid ken mangpaspasayaat iti jw.org ken iti JW Library^®. Maus-usar dagitoy tapno maammuan ti adu a tattao nga agsasao iti agduduma a lengguahe ti ad-adu pay maipapan iti Biblia.

⁶ Adu a tattao iti intero a lubong, a pakairamanan dagiti agsasao kadagiti lengguahe a manmano laeng ti mangus-usar, ti mabmabsog kadagiti naespirituan a taraon nga ipapaay ti matalek ken masirib nga adipen. Ti maysa a pamay-an nga ipakpakitada ti apresasionda ket ti panagdonasionda tapno masuportaran ti trabaho a panangasaba iti intero a lubong. Gapu kadagita a donasion, magun-odanen dagiti publikasiontayo iti nasurok a 1,100 a lengguahe. Ania ti resulta dayta? Kada tawen, ginasut a ribu a tattao ti mababautisaran.

7. Ania ti epektona kadatayo gapu ta makitkitatayon a matungtungpal ti Apocalipsis 14:6?

⁷ Maipapaayantayo ita kadagiti tool a makatulong kadatayo tapno makasabaantayo dagiti tattao nga agsasao iti agduduma a lengguahe. Tultulongandatayo met dagiti anghel tapno agkaykaysatayo a mangikasaba iti “agnanayon a naimbag a damag . . . iti tunggal nasion ken tribu ken lengguahe ken ili.” (Basaen ti Apocalipsis 14:6.) Gapu ta makitkitatayo a matungtungpalen ti impadto da Zacarias ken Juan, ad-adda nga agtalektayo a matungpal ti amin nga impadto ti Biblia. Determinadotayo met a saan a pumampanaw iti organisasion nga us-usaren ni Jehova a mangipakaammo iti naimbag a damag.

MAYSA A MILAGRO ITI KAALDAWANTAYO

8. Ania ti milagro nga inaramid ni Jehova idi Pentecostes 33 C.E.?

⁸ Idi Pentecostes 33 C.E., nangaramid ni Jehova iti milagro tapno mabaliwan dagiti epekto ti napasamak iti Torre ti Babel. Pinagsaona dagiti adalan ni Jesus iti agduduma a lengguahe a dati a saanda nga ammo. (Ara. 2:​4-10) Apay nga inaramidna dayta? Ngamin, adu a tattao a naggapu iti nagduduma a paset ti lubong ti adda idiay Jerusalem tapno agdayawda iti Dios idiay templo. Ket kayat ni Jehova a mangngeg dagitoy a tattao dagiti ‘nakaskasdaaw nga aramidna’ iti bukodda a lengguahe. (Ara. 2:11) Ita met ngay? Babaen kadagiti publikasiontayo, arigna makapagsaotayo iti mismo a lengguahe dagiti interesado.

9. Kasanotayo a makasabaan dagiti tattao a naiduma ti lengguaheda kadatayo?

⁹ Nakapatpateg unay a maammuan dagiti tattao ti naimbag a damag iti mismo a lengguaheda. Apay? Kitaem daytoy a pagarigan. Adda maysa a tao a napan iti sabali a pagilian. Nagsakit iti nakaro ket kasapulanna ti agpadoktor. Ngem saanna nga ammo ti lengguahe iti dayta a pagilian. Isu a kasapulanna ti mangipatarus iti instruksion ti doktor tapno umimbag isuna. Iti umasping a pamay-an, adu a tao ita ti masakit iti naespirituan ken emosional. Kasapulanda ti namnama ken liwliwa a masarakan iti Biblia. Ket matulongantayo ida nga umimbag no ilawlawagtayo ti mensahe ti Biblia iti mismo a lengguaheda. Isu a no adda makasaritatayo a naiduma ti lengguahena, usarentayo ti Biblia tapno matulongan isuna a mangbirok iti solusion kadagiti problemana. Mabalintayo nga ikkan kadagiti publikasion wenno pabuyaan iti video iti lengguahena.

10-11. Ania ti masursurom iti kapadasan ti brother a ni Robert ken ti kapadasan iti kahon a “Naaddaan iti Namnama ti Maysa a Refugee”?

¹⁰ Kasanotayo a mausar dagiti publikasiontayo ken ti JW Library app tapno makasabaantayo dagiti tattao a naiduma ti lengguaheda? Kitaentayo ti kapadasan ni Robert nga agsasao iti English. Bayat a makipaspaset iti harbor witnessing, nakasaritana ti maysa a lalaki a taga-Türkiye nga agtrabtrabaho iti barko ken saan unay a nalaing nga ag-English. Ngem inawatna ti broshur a Naimbag a Damag Manipud iti Dios iti lengguahena a Turkish. Kabesado la unay ni Robert ti linaon ti broshur. Isu nga ammona dagiti espesipiko a parapo nga ipabasana iti lalaki iti broshur a Turkish. Idi kuan, nagadu ti saludsod ti lalaki maipapan kadagiti mapaspasamak iti lubong. Isu nga inusar ni Robert ti JW Library app tapno ipakitana ti sungbat dagiti saludsodna iti Turkish a Biblia. Kalpasan dayta, imbaga ti lalaki: “Kasla ammom ti lengguahek, a.” Imbaga ni Robert: “Dandani maysa nga oras a nagtungtongkami. Bayat ti panagsaritami, nakitak nga immuneg ti respeto ken pannakaawat ti lalaki iti mensahe ti Biblia.” Talaga a nagdakkel a pribilehio a tulongan dagiti tattao a mangammo iti mensahe ti Biblia iti mismo a lengguaheda!

¹¹ Posible a matulongantayo ti maysa a tao uray no ikkantayo laeng iti tract wenno ipakitatayo kenkuana ti maysa nga artikulo iti jw.org iti mismo a lengguahena. Isu nga inton adda makasaritam a naiduma ti lengguahena, baka kayatmo nga aramiden daytoy a pamay-an tapno makasabaam isuna.

PANANGYAM-AMMO ITI NAGAN NI JEHOVA KADAGITI NASION

12. Ania ti epektona iti ili ni Jehova ti panangbasa ken panangadal iti New World Translation?

¹² Adun a tawen a maipatpatarus ti Biblia.a Ket ar-aramiden dagiti translator ti amin a kabaelanda a mangipatarus iti dayta tapno maammuan dagiti tattao ti mensahe ti Dios iti bukodda a lengguahe. Dayta ti rason a mabasatayo itan ti Biblia iti lengguahe a maawatantayo. Nagdakkel ti naitulong dagiti patarus ti New World Translation of the Holy Scriptures iti panagkaykaysa ti ili ni Jehova. Kastoy ti kinuna ti maysa a panglakayen a taga-Nepal maipapan iti dayta a patarus: “Bayat a basbasaek dayta iti lengguahek, kasla makisarsarita kaniak ni Jehova. Isu a natulongannak daytoy nga ad-adda pay a suminged kenkuana ken tumibker ti pammatik.” Mabasan ti intero wenno ti dadduma a paset ti New World Translation iti nasuroken a 300 a lengguahe. Umiso ken nalaka a maawatan ti pannakaipatarusna iti tunggal lengguahe ken isursurona ti kinapudno maipapan ken Jehova. Kas resultana, maymaysa ti patpatien ken ikaskasaba ti ili ni Jehova iti amin a tattao aniaman ti lengguaheda. (1 Cor. 1:10) Ngem adda pay ti dadduma a rason no apay a nakapatpateg ti New World Translation.

13. Apay a manmano a patarus ti Biblia ti mangus-usar iti nagan ti Dios?

¹³ Ti New World Translation ti maysa kadagiti manmano a patarus ti Biblia ita a mangus-usar iti nagan ni Jehova. Rinibu a daras a makita dayta iti daytoy a patarus. Agarup 100 a tawenen ti napalabas, mabirokan pay ti nagan ni Jehova iti adu a Biblia, aglalo iti Hebreo a Kasuratan. Ngem adu a lider ti relihion a mangibagbaga a Kristianoda ti saan a mangayat a mangusar iti nagan ni Jehova. Saanda pay ketdi a kayat a maammuan dayta dagiti tattao. Kas pagarigan, inikkat dagiti papadi a Katoliko ti nagan ti Dios kadagiti Bibliada ken iti dadduma pay a libro.b Inikkat met ti dadduma a relihion ti nagan ti Dios kadagiti patarusda iti Biblia. Ngem iti amin a lengguahe a nakaipatarusan ti New World Translation, naisubli ti nagan ni Jehova kadagiti teksto a rumbeng a pagparanganna. Apay a nakapatpateg dayta?

14. Sigun iti Biblia, apay a nagpateg a maammuan ken usarentayo ti nagan ti Dios?

¹⁴ Isursuro ti Biblia a nagpateg a maammuan ken usarentayo ti nagan ti Dios. Kas pagarigan, iparparegta ti salmista kadatayo nga ‘idaydayawtayo ti nagan ni Jehova.’ (Sal. 135:1) Idi isursuro ni Jesus dagiti adalanna no kasano ti agkararag ken Jehova, imbagana kadakuada nga ikararagda: “Masantipikar koma ti naganmo.” Idi met nagkararag ken Amana, imbagana: “Impakaammok . . . ti naganmo.” (Mat. 6:9; Juan 17:26) Kinotar met ni apostol Pablo ti insurat ni propeta Joel: “Maisalakanto ti amin nga umawag iti nagan ni Jehova.” (Roma 10:13) Ngem gapu ta adu a patarus ti Biblia ti nangikkat iti nagan ti Dios, adu a tattao ita ti saan a makaammo a nagpateg a maammuan ken usarenda ti nagan ti Dios.

15. Ania ti epektona kadatayo ta mabasatayo ti nagan ti Dios iti New World Translation?

¹⁵ Mabasa ti kaaduan a Saksi ni Jehova ti New World Translation iti mismo a lengguaheda. Tumultulong dayta kadakuada tapno maammuanda ti kinapudno maipapan ken Jehova, ayatenda isuna, agtalekda kenkuana, ken idaydayawda ti naganna.—Prov. 18:10; Isa. 56:6.

16. Apay a nagpateg nga am-ammuentayo ni Jehova itan? (Juan 17:3)

¹⁶ Ibaga ti Biblia nga iti asidegen a masanguanan, makigubat ni Jehova “kadagiti ari iti intero a daga.” (Apoc. 16:14) Iti dayta a tiempo, dinto baybay-an ni Jehova dagidiay makaam-ammo kenkuana ken mangidaydayaw iti naganna. (Sal. 9:10; basaen ti Juan 17:3; kitaen ti study note a “their coming to know you.”) Ngem anianto ngay ti mapasamak kadagidiay saan a mangam-ammo ken Jehova ken saan a mangibilang kenkuana kas Ama ken Diosda? Mapilitandanto a mangam-ammo kenkuana. Kuna ni Jehova: “Sigurado nga itan-okkonto ti bagik, ipakitakto a nasantuanak, ken ipakaammokto ti bagik iti adu a nasion; ket maammuandanto a siak ni Jehova.” (Ezek. 38:23) Nakaragragsaktayto ta am-ammotayo ni Jehova ken maibilangtayo a Gayyemna, saan a kabusorna.—Mal. 3:16.

17. Ania ti nagsayaat a pribilehiotayo?

¹⁷ Anian a nagsayaat a pribilehio ti maaddaan iti uray bassit laeng a paset iti pannakatungpal ti padto iti Zacarias 8:23! Pribilehiotayo ti makipagtrabaho a sangsangkamaysa saan laeng a kadagiti kakabsat, no di ket uray kadagiti anghel nga us-usaren ni Jehova a mangiturong iti trabaho a panangasaba iti adu a lengguahe. Agyamyamantayo met ta ipapaay ni Jehova ti aniaman a kasapulantayo tapno makasabaantayo ti amin a tattao iti tunggal nasion ken tribu ken lengguahe. Isu a sapay koma ta itultuloytayo nga usaren dagita tapno matulongantayo dagiti tattao a mangam-ammo ken agbalin a gayyem ti naasi, naanus, ken saan a manangidumduma a Dios a ni Jehova. Talaga a nagsayaat a pribilehio ti makipaset iti daytoy a trabaho agingga a masantipikaren ti nagan ni Jehova ditoy daga!—Luc. 11:2.