Ammoyo Kadi?
Ania idi ti bado dagiti soldado a Guardia a Pretorio?
DAGITI Guardia a Pretorio ket maysa a grupo dagiti nalalaing a soldado a nagbalin a guardia dagiti emperador ti Roma. Nangrugi dayta idi 27 B.C.E. idi nagturay ni Cesar Augusto. Isuda ti mangprotektar iti emperador ken iti pamiliana.
Kannigid: Guardia a Pretorio a nakabado iti tunika Kannawan: Guardia a Pretorio a nakabado iti tunika ken kagay
No adda idiay Roma dagiti Guardia a Pretorio, kaaduanna a pangsibilian ti badoda. Karaman iti dayta ti tunika ken kagay a gagangay idi a maus-usar idiay Roma. Makatulong met dayta tapno nalaklaka a makagaraw dagiti soldado. No met guardiaanda ti emperador iti uneg ti siudad ti Roma, mabalin a toga ti badoda a gagangay a maus-usar kadagiti pormal nga okasion.
Mailasin dagiti Guardia a Pretorio babaen kadagiti armasda. Sigun iti Brill’s New Pauly: Encyclopaedia of the Ancient World: “No adda dagitoy a soldado idiay Roma nga agguarguardia, nakabadoda iti pangsibilian ken adda armas ken kalasagda iti sikiganda.” Mabalin a karaman kadagita ti espada ken imuko a nakabarikes iti kannawan ken kannigid a sikiganda.
Dagiti Guardia a Pretorio a nakabado iti toga kadagiti pormal nga okasion, kas koma no bantayanda dagiti opisial ti gobierno
Posible a dagiti Guardia a Pretorio ti nangbantay ken apostol Pablo iti dua a tawen bayat nga ur-urayenna ti pannakabistana iti Roma. Iti dayta a tiempo, nakapupok ni Pablo iti ab-abanganna a balay. Isu a mabalin a bisitaen isuna dagiti tattao. Kinasabaan ida ni Pablo. Inusarna ti Kasuratan tapno ilawlawagna a ni Jesus ti Mesias ken ti Pagarian ti Dios ti mangted iti namnama kadagiti tattao.—Ara. 28:16, 23, 30, 31.
Imbaga ni Pablo: “Ti pannakaibaludko maigapu ken Kristo ket naammuan ti amin a Guardia a Pretorio.” (Fil. 1:12, 13) Nakaskasdaaw dayta gapu ta rinibu ti Guardia a Pretorio. Inikkan ni Jehova ni apostol Pablo iti gundaway a makapangasaba uray no nakabalud, ket ginundawayanna dayta tapno ad-adu pay a tattao ti makasabaanna.