Kasanoka nga Agbalin a Kontento Uray no Narigat ti Biag?

“GAPU ta ngimmina dagiti magatgatang ken saanmi nga ammo ti mapasamak iti masanguanan, nagdesisionkami ken baketko nga agabrod tapno agbirok iti nasaysayaat a trabaho. Implanomi met nga isarunomi nga alaen ti dua nga annakmi. Ngem saan a napasamak dagiti ninamnama ken implanomi. Ngamin, rimmigat ti biagmi ken saanmin a maala dagiti annakmi. Makapaladingit ta imbaga pay dagiti kakabsat iti lugarmi a manmanon a makigimong ken mangasaba dagiti annakmi.”—Samuel.a

Adu nga adipen ti Dios ti aggigian kadagiti lugar a narigat ti makabirok iti trabaho wenno narigat pay ketdi ti biag. Gapu kadagita a situasion, dadduma ti nagaramid iti desision a panagkunada ket mangpasayaat iti biagda. Ngem ti rigatna, saanda a pinanunot ti amin a resulta ti desisionda. Adda pay ketdi dagiti nagabrod tapno agbirok iti nasaysayaat a trabaho. Ngem imbatida ti asawa wenno dagiti babassit pay nga annakda. Dadduma met ti simrek kadagiti negosio nga alisto kano ti bumaknang ngem adda kakuykuyogna a panagkusit. Ngem ti resultana, lallaloda a nalugi. No madandanaganka ta marigrigatanka a mangyanay iti bassit a kuartayo, kasanoka a makaaramid iti nasayaat a desision?

TI SEKRETO TI PANAGBALIN A KONTENTO

Nasursuro ni apostol Pablo “ti sekreto” ti panagbalin a kontento uray narigat ti kasasaadna. Insuratna: “Ammok no kasano ti agbiag iti bassit ken iti adu. Nasursurok ti sekreto ti panagbalin a kontento iti amin a banag ken kasasaad, mabmabsogak man wenno mabisbisinak, aduanak man wenno agkurkurang ti kasapulak.”—Fil. 4:11, 12.

No nasiputam, masapul idi a sursuruen ni Pablo ti agbalin a kontento. Kasanom a matulad ti inaramidna? Kitaem ti uppat a prinsipio ti Biblia a makatulong kenka.

Prinsipio ti Biblia: “Iti panagbiagyo, saanyo nga ayaten ti kuarta, no di ket kontentokayo koman kadagiti agdama a bambanag. Ta imbagana: ‘Saankanto a pulos panawan ken saankanto a pulos baybay-an.’”—Heb. 13:5.

Ti maitulongna. Ti panagayat iti kuarta ti mabalin a mangrubrob iti tarigagay ti maysa a mangikompara iti adda kenkuana iti adda iti sabsabali. Dayta ti mangikkat iti talna ti panunotna ken mangtignay kenkuana a maaddaan iti ad-adu pay a bambanag. Ngem no saanmo nga ayaten ti kuarta ken sursuruem nga apresiaren dagiti adda kenka, agbalinka a kontento ken natalna ti panunotmo.

Ti mabalinmo nga aramiden. Imbes nga agpokuska iti biag a kasla im-imasen ti dadduma, agpokuska ketdi iti adda kenka ken iti kayam laeng a gatangen. Laglagipem, no ti kapatgan iti biagmo ket ti panagserbim ken Jehova, ikarkarina nga ipaayna ti amin a kasapulam. (Mat. 6:24, 33) Ngem saan nga ikarkari dayta ni Jehova kadagiti tattao a ti kapatgan iti biagda ket ti panagbirok iti kuarta. Kanayonka koma met nga agyaman ken Jehova kadagiti ipapaayna kenka. Insurat ni Pablo: “Kontentotayo koman no adda taraon ken badotayo.”—1 Tim. 6:8.

Agassawa a nakatakder iti abay ti cart iti igid ti kalsada. Kasasao ti brother ti maysa a lumablabas iti dalan. — Pagbalinem a kapatgan iti biagmo ti panagserbim ken Jehova

Prinsipio ti Biblia: “Dikay . . . maringgoran nga ibagayo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagbadomi?’ Ta dagitoy ti nangnangruna a sapsapulen dagiti tattao iti lubong. Ammo ni Amayo idiay langit a kasapulanyo amin dagitoy.”—Mat. 6:31, 32.

Ti maitulongna. No agtalekka ken Jehova nga aywanan ken tulongannaka, saanka unay a madanagan iti mabalin a mapasamak iti masanguanan. Kas pagarigan, saanmo a panunoten, “Kasanon no rumigat ti biag?” wenno “Kasanon no saanko a maipaay ti kasapulan ti pamiliak?” Inamin ni Eric a taga-Ghana a kasta idi ti kapanunotanna. Ngem ita, binalbaliwannan dayta. Imbagana: “No kontentoka, saanna a kayat a sawen a saankan a marigrigatan. Imbes ketdi, uray no narigat ti biag, pilpiliem ti agpokus no ania laeng ti maaramidam, ken ikagkagumaam ti agbalin a managyaman.”

Ti mabalinmo nga aramiden. Ikararagmo ken Jehova dagiti espesipiko a kasapulam, ken dawatem nga ikkannaka iti sirib. (Sant. 1:5) Makisaritaka met kadagiti nataengan iti naespirituan a kakabsat, sa ibagam ti mapaspasaram. Ammuem no ania ti inaramidda idi napadasanda met dayta. (Prov. 20:18) Paliiwem no kasano nga ipapaay ni Jehova dagiti kasapulam iti kada aldaw. Makatulong dayta tapno saanka unay a madanagan iti mapasamak iti masanguanan. Makatulong met dayta tapno ti laeng panunotem ket dagiti agdama a kasapulam. (Mat. 6:25-30, 34) Saanmo koma a liplipatan ti imbaga ni salmista David: “Adu ti rigat daydiay nalinteg, ngem manipud amin kadagita, isu ket ispalen ni Jehova.”—Sal. 34:19.

Prinsipio ti Biblia: “Makita ti masirib a tao ti peggad ket aglemmeng, ngem agdiretso latta ti awanan kapadasan ket agsagaba.”—Prov. 27:12.

Ti maitulongna. No marigrigatanka nga agbirok iti kuarta, baka nalakaka laeng a masulisog kadagiti adbertismen ken post iti social media nga alisto a panguartaan. Ngem adu kadagiti simrek kadagita nga alisto a panguartaan ti nadismaya. (Prov. 18:11; 1 Tim. 6:9) Maliklikam a mapasamak dayta kenka no agbalinka a masirib.

Ti mabalinmo nga aramiden. Ibagbaga ti Biblia: “Patien ti awan ammona ti tunggal sao, ngem panunoten ti masirib ti tunggal addangna.” (Prov. 14:15) Isu nga agannadka koma no adda ti mangikarkari kenka nga alistoka a bumaknang no sumrekka iti maysa a trabaho wenno negosio. Ag-research-ka a naimbag sakbayka a sumrek iti dayta. Kasanonto man karigat ti biag, dimo ipalubos a masiluan ti pusom kadagiti nalaka a panguartaan wenno kadagiti trabaho nga adda kakuykuyogna a panagkusit.—Prov. 28:6, 20; Jer. 17:9.

Lalaki a nakauniporme iti pangtrabaho nga agma-mop iti agdan. — Saanka koma a mabain a mangaramid kadagiti ibilang ti dadduma a nababa a trabaho

Prinsipio ti Biblia: “Asino kadakayo ti mayat a mangbangon iti torre ti saan nga agtugaw nga umuna ket kuentaenna ti magastos tapno makitana no adda umanay a pangleppasna?”—Luc. 14:28.

Ti maitulongna. No makabirokka iti trabaho, mabalin a masolbar ti dadduma a problemam. Ngem baka adda met tumaud a sabali a problema. Isu a sakbay nga awatem dayta, panunotem a naimbag dagiti pagimbagan ken pagdaksanna. Iti kasta, makaaramidka iti nasayaat a desision ken maliklikam dagiti dakes a resulta ti nadarasudos a panagdesision.

Ti mabalinmo nga aramiden. Panunotem a naimbag dagiti trabaho a mabalinmo a serkan. Kas pagarigan, no agabrodka, agpayso a dakkel ti sueldom. Ngem baka dakkel met ti gastosem no agyanka iti dayta a lugar. Kasta met, no ibatim ti asawam wenno dagiti annakmo, panunotem: ‘Anianto ngata ti mariknada? Komustanto ti espiritualidadda?’ Panunotem met no anianto ti epekto dayta iti relasionmo ken Jehova. Makapagserbikanto pay ngata iti “amin a kararua”?—Luc. 10:27.

Ti isu met la a brother iti rugi a mangidadaulo iti family worship kaduana ti asawana ken ti ubbing pay nga annakda. — Maprotektaram ti pamiliam no agkakaduakayo

DAGITI BENDISION TI PANAGBALIN A KONTENTO

No sursuruentayo ti sekreto ti panagbalin a kontento, ad-addanto nga agbalintayo a kombinsido nga ayaten ken aywanannatayo amin ni Jehova. (Sal. 34:8) Lallalonto met nga agyamantayo kadagiti ipapaayna ken ti naayat a panangaywanna kadatayo iti inaldaw.

Imbaga ni Samuel a nadakamat iti rugi daytoy nga artikulo nga agpaypayso dayta. Kunana: “Nagkararagkami ken Jehova nga ikkannakami iti sirib. Kalpasan dayta, nagdesisionkami ken baketko nga agawidkamin. Nagsublikami iti dati a trabahomi tapno maaywananmi dagiti annakmi. Ita, regularen a mayad-adalanmi iti Biblia dagiti annakmi ken maitugtugotmi idan kadagiti gimong ken panangasaba. Gapu ta inyun-unami ti panagserbimi ken Jehova, saanak unayen nga agdandanag. Ket maibagami a saanminto a pulos pagbabawyan ti desisionmi nga agawid.”

Ditay liplipatan nga agserserbitayo iti “naragsak a Dios,” ken ti nasantuan nga espirituna ti mangtulong kadatayo nga agbalin a naragsak, aniaman ti situasiontayo. (1 Tim. 1:11; Gal. 5:22, 23) Asidegen nga ipaay ni Jehova ti nasaysayaat a biag—iti lubong a sadiay addanton ti amin a kasapulantayo.—Sal. 72:16; 145:16.

a Nabaliwan ti dadduma a nagan.