Naidadanesda Gaput’ Panangibaga ti Kinapudno
SAAN a supsuportaran dagiti Saksi ni Jehova ti pampammati ken ar-aramid ti Kimbilikiti, ta daytoy ket maikontra kadagiti prinsipio a Nainkasuratan. Dagiti Saksi nawayawayaandan babaen iti kinapudno a masarakan idiay Biblia a Sao ti Dios. (Juan 8:31, 32) Gapuna, madida kayat a palubosan dagiti annakda a lallaki a makugit sigun iti seremonia iti Kimbilikiti. Madi met dagiti Saksi a mangted ti taraon, kuarta, wenno sansanikua a dawdawatenda bayat iti panawen iti seremoniada, ket dagiti babbaida dida kayat a makiraman iti kapilitan a panagkammel a naorganisar a maipaay iti dayta a panggep.
Makapainteres, maitunos iti pannakapapatay dagiti Saksi nga immuna a naisalaysayen, daytoy ti kinuna ti abogado ti estado a mangbisbista a rekomendasionna iti korte: ‘Dadduma a Warenga nga iti napalabas nakiramraman iti seremonia ti Kimbilikiti ken makaammo kadagiti palimedna naitimpuyoda itan kadagiti Saksi ni Jehova. Impanayagda dagiti palimed, nangnangruna dagidiay maipapan iti kinaawan ti espiritu a makunkuna a Kimbilikiti. Mainayon pay, imbutaktakda ti kinaulbod dagiti datdaton a dawdawaten dayta makunkuna nga espiritu a, sigun kadagiti Saksi ni Jehova, ket maysa a nagdakkel a panangallilaw nga inorganisar dagiti lallakay a mangiturturong kadagiti seremonia.’
Bayat a dagiti indibidual manipud tribo ti Rega inawatda dagiti pudpudno a sursuro ti Biblia, ti panagan-anito ken panagbuteng ken patay ti nasuktanen iti kinapudno ken ti namnama iti panagungar. (Juan 5:28, 29) Ti panangisulto kadagiti inna, assawa a babbai, ken kakabsat a babbai ti nasukatanen iti panagraem a maipaay kadagiti babbai.—Efeso 5:21–6:4; 1 Timoteo 5:1, 2.
Maisupadi unay iti dayta, dagiti adu nga iglesia ken mision ti Kakristianuan pinalubosanda dagiti kamkamengda nga agtungpal iti relihion ti tribo iti sidong iti naingpis a pammarang a makunkuna a Kinakristiano. Ti kinaagpaysona, adu a papadi ken nangato a papadi ti Kimbilikiti ti makunkuna a nasungdo, madaydayaw a kamkameng dagiti nadumaduma nga iglesia. Anian ti pannakaiduma iti kababalin ni apostol Pablo! Insuratna: “Saankay a makikadua iti sangol dagiti saan a mammati. Ta ania ti pakikaduaan ti kinalinteg iti kinakillo? Wenno ania ti pakikaduaan ti silaw ken ti sipnget? . . . Ken ania ti pakainugotan dagiti ladladawan a didiosen iti templo ti Dios?”—2 Corinto 6:14-16.
Masansan, dagidiay addaan ti napigsa a pannakaisinggalut agpadpada iti Kimbilikiti ken kadagiti kadawyan nga ig-iglesia isuda ti nangkiwkiw iti riribuk a maipaay kadagiti Saksi ni Jehova. Dagitoy a manangbusor ti umas-asping unay kadagiti managaramid ladladawan iti kadaanan nga Efeso. Nakitada a ti negosioda ti pagpegpeggaden ni Pablo, a nangpaneknek a ‘saan a didiosen dagiti inaramid ti im-ima.’ (Aramid 19:23-28) Ti isu met laeng a prinsipio ti agaplikar iti kinapudno a ti espiritu ti Kimbilikiti ket awan biagna.
Marikna dagiti Saksi ni Jehova ti obligasion nga ipakaammoda dagiti kakasta a kinapudno kas kadagitoy. Siempre, gaput’ panagsaoda iti kinapudno, nagsagabada iti pannakaidadanes. Ngem aniat’, intay maadal manipud iti matalek a panagibturda?