Nagtalinaed ti Kinapudno ken Pammati
DETERMINADO dagiti Saksi ni Jehova nga agdaydayaw ti Dios “iti espiritu ken kinapudno.” (Juan 4:23, 24) Wen, ti mensahe ti Biblia nga iwarwaragawagda ti mangibutaktak iti kinaulbod, ngem kas ken apostol Pablo isaludsodda: ‘Nagbalinkami aya a kabusoryo gapu iti panangibagami kadakayo ti kinapudno?’ (Galacia 4:16) Siempre saan! Dagitoy a Kristiano inayatda dagiti kaarrubada ket kayatda met a tagiragsakenda ti naespirituan a wayawaya a ti laeng kinapudno ti mamagbalin a posible dayta.—Juan 8:32.
Determinado met dagiti Saksi a mangtaginayon iti napigsa a pammati uray no maidadanesda gaput’ panagsaoda iti kinapudno. Pudno unay, ti pammati dagiti napakumbaba a Kristiano idiay Pangi ti mangted pammaneknek a babaen ti tulong ni Jehova dagiti ad-adipenna masalimetmetanda ti kinatarnawda kenkuana agingga iti panungpalan. Mabalin a dayta ti panungpalan daytoy dakes a sistema dagiti bambanag wenno ti ipapatay ti maysa iti kinamatalek, nalabit iti imatang ti nadawel, narelihiusuan ti pannakatignayna a panangidadanes.—Mateo 24:13.
Pammati nga Agtigtignay
Dagidiay a managayat iti kinapudno a napapatay idiay probinsia ti Kivu ket saan nga is-isuda laeng ti mangiparparangarang iti napigsa a pammati. Kas pangarigan, usigenyo ni Bingimeza Bunene, maysa a nataengan a kabsat a babai. Dua kadagiti annakna a lallaki, ni Malala Ramazani ken Akilimali Walugaba, nairamanda kadagidiay a napapatay idiay Pangi. Mainayon pay, dagiti panglakayen ti tribo ti nangallukoy ken lakayna a makikadua kadagiti manangpapatay iti kaanakanna, ni Amisi Melende. Wen idi a dagiti dua nga annakna a lallaki ken ti kaanakanna napapatayda, isu ti pinanawan ti intero a pamiliana, agraman ken lakayna. Nupay kasta, isut’ naliwliwa kadagiti sasao ti salmista: “No da ama ken ina baybay-andak, ni ngad Jehova pidutennakto.” (Salmo 27:10) Dagiti kakabsatna iti pammati a lallaki ken babbai ti nangawat ken nangliwliwa kenkuana, a buyogen ti naayat a panangipalpalagip iti nakaskasdaaw a namnama ti panagungar.
Ti asawa daytoy kabsat a babai, a ni Ramazani Musombwa, ti naibalud gaput’ pannakairamanna iti ipapatay ti kaanakanna, ngem idi agangay isut’ nawayawayaan. Kalpasanna, inaminna nga isut’ nagsiddaaw iti natured a takder ni baketna ken ti ayat nga impakita dagiti padana a Saksi ken kadagiti maladingitan a mamanugangna a babbai. Itan iyebkasnan ti dakkel a panagbabawina ket kumuykuyogen ken ni baketna iti panaggigimong dagiti Saksi ni Jehova. Gapu iti naan-anay a panagbalbaliwna, isut’ nagbalin a puntiria met ti nakaro a pannakababalaw ken pannakalalais ngem isut’ determinado nga agserbin ken ni Jehova manipud itan.
Amin dagiti dadduma a maladingitan nga agtutubo pay met a balo a babbai ti linaksid dagiti pampamiliada gaput’ panagbuteng iti ipapatay kadagiti im-ima ni Kimbilikiti. Dagitoy agtutubo a babbai nagtakderda a sititibker ket madida kayat a tallikudan ti pammatida ken Jehova. Isuda ti inaklon dagiti padada a namati ket napasaranda ti padto ni Jesus a kinunana: “Awan ti tao a nangpanaw ti balay wenno kakabsat a lallaki wenno babbai wenno ama weno ina wenno asawa wenno annak wenno dagdaga gapu kaniak ken gapu iti naimbag a damag a dinto umawat ita itoy nga aldaw iti maminsangagasut a balbalay ken kakabsat a lallaki ken babbai ken inna ken annak ken dagdaga, agraman kadagiti pannakaidadanes, ket iti sistema dagiti bambanag nga umay biag nga agnanayon.”—Marcos 10:29, 30.
Ti Pammati ken Kinapudno Nagtalinaedda
Itan, ti kasasaad dagiti Saksi ni Jehova idiay Pangi nagsublin iti dati. Amin dagiti maladingitan ken dagiti interesado a tattao a napilitan nga agkamang kadagiti dadduma a purpurok ken il-ili nagsublidan kadagiti pagtaenganda. Maminsan manen dagiti Saksi ti mangikaskasaba ti mensahe ti Pagarian sadiay, a buyogen ti napabaro a rikna ken ti determinasion. Agpapan pay amin a sinagabada, kaaspingda ‘dagiti kakabsat idi a napakiredda gapu kadagiti pannakarepreppet ni Pablo ket ad-adda pay ti turedda nga agsao ti sao ti Dios nga awan butbutengna.’—Filipos 1:14.
Siempre, adda met panagladingit gaput’ pannakapapatay amin dagiti walo a matalek a Kristiano a lallaki iti Kongregasion iti Pangi. Ngem ti maysa a payunir a ministro ti agserserbi itan kas mamangulo a manangaywan, ket ti ili ni Jehova iti dayta a paset ti Africa addaandan panagtalek iti ayat ti Dios kadakuada baeten ken Kristo, kas naiyebkas kadagiti sasao ni Pablo: “Siasino ti mangisinanto kadatayo iti ayat ni Kristo? Tinto ladingit wenno ti rigat wenno ti pannakaidadanes wenno ti bisin wenno ti kinalamolamo wenno ti peggad wenno ti kampilan? . . . Saan, no di ket kadagiti amin a bambanag, agballigitayo a naan-anay gapu iti daydiay nagayat kadatayo.”—Roma 8:35-39.
Nupay kasta, apay nga ipalubos ni Jehova ti pannakapapatay dagiti matalek a Saksina? Iti daytoy naranggas a lubong ita, nagadun dagiti kaskaso a nalawag a sinalsalakniban ni Jehova ti ilina. Iti panangaramidna iti dayta, indemostrana no kasano a maiyegna a sitatalged ida a lumasat iti “dakkel a rigat.” (Mateo 24:21; Isaias 26:20) Ngem, kas kinuna ni Jesus idiay Juan 16:1-3, addada okasion a mabalin nga ipalubosna a dagiti bumusbusor agtungpalda iti aktual a panangpapatay kadagiti indibidual kadagiti Saksi ni Jehova. Ti panangsalimetmetda iti kinatarnawda kadagita a kasasaad, kas ti inaramid dagiti matalek a kakabsattayo idiay probinsia ti Kivu, nagserbi kas pammaneknek ken pangsaksi a dagiti ad-adipen ti Dios determinadoda a mangsalimetmet iti kinatarnawda agingga ken patay.—Job 27:5; Proverbio 27:11.
Maipalagip met kadatayo ti dakkel a pammaneknek nga imbunga ti ipapatay daydi immuna-siglo a martir a ni Esteban. (Aramid 8:1-8) Gapuna nalabit a dagidiay nakabutbuteng a panangpapatay ti mangtignay kadagiti adu iti tribo ti Rega ken dadduma pay idiay Zaire ken iti dadduma pay a luglugar a pagpanunotan a siinget dagiti kinapudno ti Biblia. Anian a ragsak dagiti Saksi ni Jehova a makatulong kadagiti kakasta a nasingpet panagpuspusona a tattao a lumapsot manipud panagbutbuteng ken panagan-anito a nainaig iti relihion ti Kimbilikiti! Ken anian a wayawaya ti tagiragsakento amin a mangabrasa kadagiti nakaskasdaaw a kinapudno ti Dios!