Pakasaritaan ti Biag

Panagyaman ken Jehova​—Babaen ti Amin-Tiempo a Serbisio!

KAS INSALAYSAY NI STANLEY E. REYNOLDS

Nayanakak idiay London, Inglatera, idi 1910. Kalpasan ti Gubat Sangalubongan I, immakar dagiti dadakkelko iti bassit a purok idiay Wiltshire a naawagan Westbury Leigh. Idi bumaritoak, masansan nga ut-utobek, ‘Siasino ti Dios?’ Awan makaibaga kaniak. Ket diak pulos ammo no apay a ti nagbassit a purokmi kasapulanna ti dua a kapilia ken maysa a simbaan a pagdayawan iti Dios.

IDI 1935, uppat a tawen sakbay ti rugi ti Gubat Sangalubongan II, nagbisikletakami ken ni adingko a Dick a napan idiay Weymouth iti makin-abagatan a kosta ti Inglatera tapno ag-camping. Bayat a nakatugawkami iti uneg ti toldami nga agdengdengngeg iti bayakabak ti tudo ken agpampanunot no ania ti aramidenmi, maysa a lakay ti immasideg ken nangitukon kaniak iti tallo a katulongan ti panagadal iti Biblia​—The Harp of God, Light I, ken Light I1. Innalak dagitoy ket maragsakanak ta adda pagpalabasak iti oras. Dagus a nagustuak ti nabasak, ngem diak pinanunot idi a balbaliwanna a naan-anay ti biagmi nga agkabsat.

Idi nagawidak, imbaga kaniak ni nanangko nga addada umasping a literatura ti Biblia nga inwaras ni Kate Parsons nga agnanaed iti purokmi. Nupay medio bumaketen, isu ket nalatak gapu ta sarsarungkaranna dagiti tattao iti agaaddayo a balbalay ti komunidadmi babaen ti bassit a motorsiklo. Pinasiarko ket siraragsak nga intedna kaniak dagiti libro a Creation ken Riches agraman ti dadduma pay a publikasion ti Watch Tower Society. Imbagana met kaniak nga isut’ maysa kadagiti Saksi ni Jehova.

Idi nabasak dagiti libro ken ti Bibliak, naammuak a ni Jehova ti pudno a Dios, ket kayatko ti agdayaw kenkuana. Nagsuratak ngarud iti simbaanmi tapno ibagak nga umikkatakon ket rinugiak ti timmabuno kadagiti panagadal iti Biblia iti pagtaengan da John ken Alice Moody. Agnanaedda idiay Westbury, ti kaasitgan nga ili kadakami. Pitokami laeng nga agtataripnong. Sakbay ken kalpasan dagiti gimong, tokaren ni Kate Parsons ti harmonium bayat a sibabara a kantaenmi dagiti kanta ti Pagarian!

Immuna nga Al-aldaw

Makitak idin nga agbibiagtayo kadagiti napeggad a tiempo, ket kayatko ti makiraman iti trabaho a panangasaba a naipadto iti Mateo 24:14. Insardengko ngarud ti panagsigariliok, gimmatangak iti bagko, ket nagdedikarak iti Naindaklan a Dios, ni Jehova.

Idi Agosto 1936, immay iti Glasgow, Scotland, ni Joseph F. Rutherford, ti presidente idi ti Watch Tower Society, tapno agpalawag maipapan iti suheto nga “Armagedon.” Nupay agarup 600 a kilometro ti kaadayo ti Glasgow, desididoak a mapan sadiay ken mabautisaran iti dayta a kombension. Kurang idi ti kuartak, isu nga inluganko ti bisikletak iti tren ket napanak idiay Carlisle, maysa nga ili iti pagbeddengan ti Scotland, ket nagbisikletaak manipud sadiay iti 160 a kilometro a nagpaamianan. Kaaduanna a nagbisikletaak met idi nagawidak, isu a nabambannogak iti pisikal ngem napabilegak iti naespirituan.

Manipud idin, agbisikletaak a mapan mangiranud iti pammatik kadagiti tattao kadagiti kabangibang a purok. Kadagidi nga aldaw, tunggal Saksi ti addaan iti kard a naglaon iti Nainkasuratan a mensahe tapno basaen dagiti bumalay. Patokarenmi met kadagiti mabitbit a ponograpo dagiti naiplaka a Naimbibliaan a palawag ti presidente ti Sosiedad. Ket siempre, kanayon nga adda awitmi idi a bag a naglaon kadagiti magasin,a a pakailasinanmi kas Saksi ni Jehova.

Panagpayunir iti Tiempo ti Gubat

Nabautisaran ti kabsatko idi 1940. Nangrugi ti maikadua a gubat sangalubongan idi 1939, ket nariknami ti naganat a panagkasapulan kadagiti amin-tiempo a manangaskasaba. Iti kasta, insubmitirmi ti aplikasion nga agpayunir. Nagyamankami ta agpadakami a naibaon iti pagtaengan dagiti payunir idiay Bristol a yan da Edith Poole, Bert Farmer, Tom ken Dorothy Bridges, Bernard Houghton, ken dadduma pay a nabayagen nga ap-apresiarenmi ti pammatida a payunir.

Di nagbayag, immaynakami innala ti maysa a bassit a van a napatak a nasuratan kadagiti sikiganna iti sasao a “SAKSI NI JEHOVA.” Ni Stanley Jones ti drayber, a nagmisionero idi agangay idiay China sa naibartolina iti pito a tawen gapu iti panangaskasabana.

Bayat a dimmegdeg ti gubat, manmano la a diretso ti turogmi iti rabii. Agkanalbuong dagiti bomba iti aglikmut ti pagtaenganmi a payunir, ket masapul a siputanmi a nalaing dagiti sopistikado a missile. Maysa a rabii, naggapukami iti sentro ti Bristol kalpasan ti maysa a naragsak nga asamblea a tinabunuan ti 200 a Saksi ket nakaawidkami a sitatalged uray kaskasano iti laksid ti arig tudo a busak manipud kadagiti igam.

Kabigatanna, nagsublikami ken Dick iti siudad tapno alaenmi ti sumagmamano a banag a nabatimi. Naklaatkami. Awan ti nagmamaayan ti Bristol. Narbek ken napuoran ti intero a siudad. Ti Park Street a nagsaadan ti Kingdom Hall-mi nagbalinen a bunton ti agas-asuk a mukumok. Nupay kasta, awan ti Saksi a natay wenno nadangran. Makaparagsak ta imbunongmi a nasaksakbay dagiti literatura ti Biblia nga adda iti Kingdom Hall kadagiti pagtaengan dagiti kakabsat iti kongregasion. Nagyamankami ken Jehova gapu kadagita.

Di Ninamnama a Wayawaya

Addaan idin iti 64 a ministro ti Kongregasion ti Bristol a nagserbiak kas mamangulo a manangaywan idi naawatko dagiti papeles a mangkalikagum kaniak iti serbisio militar. Adu a Saksi ti naibalud gapu ta neutralda, ket ninamnamak a maikkat metten ti wayawayak a mangasaba. Nabistaak iti lokal a Bristol Tribunal ket nagbalin a pannakangiwatko ni Kabsat Anthony Buck, dati nga opisial iti pagbaludan. Natured ken manangitandudo iti kinapudno a masarakan iti Biblia. Gapu iti nasayaat a panangidepensana kaniak, di ninamnama a napalubosanak a maipuera a naan-anay iti serbisio militar iti kondision nga itultuloyko ti amin-tiempo a ministeriok!

Naragsakanak iti wayawayak, ket inkagumaak nga inaramat dayta a nangasaba agingga iti ipalubos ti kasasaad. Idi naawaganak nga agreport iti sanga nga opisina idiay London tapno makisarita ken Albert D. Schroeder, ti manangaywan ti sanga, natural la a nagpanunotak no ania ti agur-uray kaniak. Iladawanyo ti siddaawko idi naawisak a mapan idiay Yorkshire tapno agserbi kas agdaldaliasat a manangaywan, a sumarungkar iti nadumaduma a kongregasion kada lawas tapno tumulong ken mangpabileg kadagiti kakabsat. Kasla diak maikari iti kasta a rebbengen, ngem naipueraak iti serbisio militar ket nawayaak a mapan. Situtulok ngarud a napanak iti nangiturongan ni Jehova kaniak.

Inyam-ammonak ni Albert Schroeder kadagiti kakabsat iti maysa nga asamblea idiay Huddersfield, ket idi Abril 1941, rinugiak ti baro nga annongek. Anian a ragsakko a makaam-ammo kadagita a maipatpateg a kakabsat! Gapu iti ayat ken kinasingpetda, ad-adda a naapresiarko ti kaadda ti ili ni Jehova nga addaan iti naipamaysa a debosion kenkuana ken ayat iti maysa ken maysa.​—Juan 13:35.

Dagiti Kanayonan a Pribilehio iti Serbisio

Naangay ti nakallalagip a lima-aldaw a nasional a kombension idi 1941 iti De Montfort Hall idiay Leicester. Nupay mairasion ti taraon ken limitado ti panagbiahe iti pagilian, dimmanon ti bilang dagiti timmabuno iti Domingo iti 12,000 nupay nasurok la a 11,000 dagiti Saksi iti pagilian iti daydi a panawen. Napatokar dagiti naiplaka a palawag ti presidente ti Sosiedad, ket nairuar ti libro a Children. Di pagduaduaan a dayta a kombension ket nagpateg nga okasion iti nateokratikuan a historia ti ili ni Jehova idiay Britania, nangnangruna ta naangay dayta kabayatan ti Gubat Sangalubongan II.

Di nagbayag kalpasan daytoy a kombension, naawisak nga agserbi kas kameng ti pamilia ti Bethel idiay London. Nagtrabahuak sadiay kadagiti departamento ti shipping ken packing, sa iti opisina a mangtamtaming iti bambanag mainaig kadagiti kongregasion.

Masapul nga anusan ti pamilia ti Bethel ti di agsarday a panangraut dagiti eroplano iti London, agraman ti naynay a panangrekisa dagiti autoridad kadagiti responsable a kakabsat nga agtartrabaho sadiay. Naibalud amin da Pryce Hughes, Ewart Chitty, ken Frank Platt gapu iti neutral a takderda. Idi agangay, napaawid ni Albert Schroeder idiay Estados Unidos. Iti laksid dagitoy a pakarigatan, nagtultuloy ti nasayaat a pannakaasikaso dagiti kongregasion ken intereses ti Pagarian.

Agturong iti Gilead!

Idi nagpatingga ti gubat idi 1945, nagaplikarak iti Watchtower Bible School of Gilead a mangsansanay kadagiti agbalin a misionero ket naawatak iti maikawalo a klase idi 1946. Inyurnos ti Sosiedad ti panagbiahe ti sumagmamano kadakami manipud iti pagdaklisan a puerto ti Fowey idiay Cornwall. Karaman ditoy da Tony Attwood, Stanley Jones, Harold King, Don Rendell, ken Stanley Woodburn. Maysa a Saksi iti dayta a lugar ti nangyurnos iti panagbiahemi iti bassit a barko a nagkarga iti china clay. Nakail-ilet ti kuartomi, ket gagangay a malayus ti ayanmi a tukad. Anian a bang-armi idi nakadanonkami met laeng iti sangladan ti destinomi, ti Philadelphia!

Nagsayaat ti lugar ti eskuelaan ti Gilead idiay South Lansing iti makin-amianan a paset ti New York, ket nagpateg kaniak ti pannakasanayko sadiay. Naggapukami nga estudiante iti 18 a pagilian. Dayta ti damo a naaddaan ti Sosiedad iti kasta kaadu a ministro manipud sabali a pagilian, ket nagbalinkami a nasinged nga aggagayyem. Nagustuak unay ti ugali ti kakuartok a ni Kalle Salavaara a taga Finland.

Napartak a naglabas ti tiempo. Iti ngudo ti lima a bulan, simmangpet ti presidente idi ti Sosiedad a ni Nathan H. Knorr manipud iti hedkuarter idiay Brooklyn tapno iyawatna dagiti diploma-mi ken ibagana dagiti pakaibaonanmi. Kadagidi a panawen, sa la maipakaammo kadagiti estudiante ti destinoda iti graduation ceremony. Napasubliak idiay London Bethel tapno ituloyko ti trabahok sadiay.

Panagsubli Idiay London

Narigat dagiti tawen kalpasan ti gubat idiay Britania. Nagtultuloy a mairasion ti taraon ken ti adu pay a kasapulan a kas iti papel. Ngem naanduranmi dayta ket rimmang-ay ti intereses ti Pagarian ni Jehova. Malaksid iti panagtrabaho idiay Bethel, nagserbiak kadagiti distrito ken sirkito nga asamblea ken binisitak dagiti kongregasion, agraman ti sumagmamano idiay Ireland. Pagragsakak met a naam-ammo ni Erich Frost ken ti dadduma a kakabsat manipud Europa ken ti pannakangngegko kadakuada maipapan iti kinatarnaw dagiti pada a Saksi a nakapasar kadagiti nakaam-ames a kasasaad kadagiti kampo konsentrasion dagiti Nazi. Pudno a nagsayaat a pribilehio ti agserbi iti Bethel.

Sangapulo a tawen idin nga am-ammok ni Joan Webb, special pioneer idiay Watford, maysa nga ili iti amianan ti London. Nagkasarkami idi 1952. Agpada a kayatmi ti agtultuloy iti amin-tiempo a serbisio, isu a naragsakankami idi nadutokanak nga agserbi kas manangaywan ti sirkito kalpasan ti iruruarko iti Bethel. Ti umuna a nagserbianmi a sirkito ket iti makin-abagatan a kosta ti Inglatera, idiay Sussex ken Hampshire. Saan a nalaka ti agserbi iti sirkito kadagidi nga aldaw. Kaaduanna nga ag-bus, agbisikleta, wenno magmagnakami. Adu a kongregasion ti addaan kadagiti teritoria a nalalawa nga away. Masansan a narigat a danonen dagitoy, ngem nagtultuloy nga immadu ti bilang dagiti Saksi.

Idiay New York City idi 1958

Idi 1957, adda manen naawatko nga imbitasion manipud Bethel: “Kayatyo kadi ti umay ditoy opisina ket tumulongkayo iti pannakayurnos ti biahe agpaay iti um-umay nga internasional nga asamblea a maangay iti Yankee Stadium ken iti Polo Grounds idiay New York City inton 1958?” Di nagbayag, okupadokamin ken ni Joan a mangas-asikaso kadagiti aplikasion dagiti kakabsat para kadagti inarkila ti Sosiedad nga eroplano ken barko. Daytoy ti nalatak a Divine Will International Assembly a tinabunuan ti 253,922 a nakaad-adu a tao. Iti daytoy a kombension, 7,136 ti nangisimbolo iti dedikasionda ken Jehova babaen ti pannakaitaneb​—nasurok a doble iti bilang ti nabautisaran iti nakallalagip nga okasion idi Pentecostes 33 K.P., kas nailanad iti Biblia.​—Aramid 2:41.

Diminto pulos malipatan ken Joan ti kinaimbag ni Kabsat Knorr idi isu a mismo ti nangawis kadakami a tumabuno iti asamblea tapno makatulongkami iti pannakaasikaso dagiti delegado a sumangpet iti New York City manipud iti 123 a pagilian. Naragsak ken makapnek dayta a kapadasan kadakami a dua.

Dagiti Gunggona ti Amin-Tiempo a Serbisio

Apaman a nakaawidkami, intuloymi ti trabaho kas agdaldaliasat a manangaywan agingga a dimteng dagiti parikut iti salun-at. Nayospital ni Joan, ket naistrokak nupay saan unay a serioso. Nagbalinkami nga special pioneer sa apagbiit a nagserbikami manen iti sirkito. Idi agangay, nagsublikami idiay Bristol ket nagtalinaedkami sadiay iti amin-tiempo a serbisio. Agnanaed ni kabsatko a Dick ken ti pamiliana iti asidegmi, ket masansan a lagipenmi ti napalabas.

Naaddaanak iti di maagasan nga an-annayen iti mata idi 1971. Sipud idin, marigatanak nga agbasa, isu a para kaniak, nagsayaat a probision ni Jehova dagiti literatura ti Biblia a nairekord iti cassette tape. Mangikonkonduktakami pay la ken Joan kadagiti panagadal iti Biblia iti pagtaengan. Iti naglabas a tawtawen, agarup 40 a tao ti natulonganmi a nakaammo iti kinapudno, agraman ti maysa a pamilia a buklen ti pito.

Idi indedikarmi ti biagmi ken Jehova nasurok nga 60 a tawenen ti naglabas, tinarigagayanmi ti sumrek iti amin-tiempo a serbisio ken agtalinaed iti dayta. Anian a yamanmi a naaddaan iti bileg nga agtultuloy nga agserbi ken ni Naindaklan a Jehova. Daytoy ti kakaisuna a pamay-an a makapagyamankami iti kinaimbagna kadakami ken iti adu a tawen a naragsak a panagkaduami kas agassawa!

[Footnote]

[Ladawan iti panid 25]

Kaduak ni Dick a kabsatko (adayo a kannigid; nakatakder ni Dick) ken dadduma a payunir iti sanguanan ti pagtaengan dagiti payunir idiay Bristol

[Ladawan iti panid 25]

Ti pagtaengan dagiti payunir idiay Bristol idi 1940

[Dagiti Ladawan iti panid 26]

Idi kasar da Stanley ken Joan Reynolds, Enero 12, 1952, ken ita