Agtalekka ken Jehova, “ti Dios ti Amin a Liwliwa”

“Bendito koma ti Dios ken Ama ni Apotayo a Jesu-Kristo, ti Ama dagiti nadungngo nga asi ken ti Dios ti amin a liwliwa.”​—2 COR. 1:3.

 1. Ania ti kasapulantayo amin?

MANIPUD pannakayanaktayo, kasapulantayo ti liwliwa. Agsangit ti maladaga tapno ipakaammona a kasapulanna ti liwliwa. Nalabit mabisin wenno kayatna ti agpaubba. Uray no nataengantayon, kasapulantayo latta ti liwliwa. Nangnangruna no narigat ti kasasaadtayo.

 2. Apay a masiguradotayo a liwliwaen ni Jehova dagidiay agtalek kenkuana?

² Masansan a liwliwaendatayo dagiti kapamilia ken gagayyemtayo. Ngem didatayo maliwliwa iti amin a sagsagabaentayo. Ti laeng Dios ti makaliwliwa kadatayo, kasano man karigat ti kasasaadtayo. Ipanamnama kadatayo ti Saona: “Ni Jehova asideg kadagidiay amin nga umaw-awag kenkuana, . . . ken ti panagpatulongda denggennanto.” (Sal. 145:18, 19) Wen, “dagiti mata ni Jehova situturongda kadagidiay nalinteg, ket dagiti lapayagna situturongda iti panagpatulongda.” (Sal. 34:15) Ngem masapul nga agtalektayo iti Dios tapno tulongan ken liwliwaennatayo. Impakita dayta ni salmista David idi inkantana: “Ni Jehova agbalinto a natalged a kamang maipaay iti asinoman a nailupitlupit, natalged a kamang kadagiti tiempo ti riribuk. Ket agtalekto kenka dagidiay makaam-ammo iti naganmo, ta pudno unay a saanmonto a baybay-an dagidiay mangbirbirok kenka, O Jehova.”​—Sal. 9:9, 10.

 3. Kasano nga inyilustrar ni Jesus ti panangipateg ni Jehova iti ilina?

³ Ipatpateg ni Jehova dagiti agdaydayaw kenkuana. Kinuna ni Jesus: “Saan kadi a ti lima a billit-tuleng mailako iti dua a sinsilio a bassit ti pategna? Kaskasdi awan uray maysa kadakuada ti malipatan iti sanguanan ti Dios. Ngem uray dagiti buok ti ul-uloyo nabilang aminen. Dikay agbuteng; napatpategkayo ngem iti adu a billit-tuleng.” (Luc. 12:6, 7) Babaen ken propeta Jeremias, kinuna ni Jehova kadagiti Israelita: “Buyogen ti ayat nga agingga iti tiempo a di nakedngan inayatka. Dayta ti makagapu nga inyasidegka babaen ti naayat a kinamanangngaasi.”​—Jer. 31:3.

 4. Apay a makapagtalektayo kadagiti kari ni Jehova?

⁴ Maliwliwatayo iti tiempo ti rigat no agtalektayo ken ni Jehova ken kadagiti karina. Gapuna, agtalektayo koma iti Dios kas ken Josue, a nagkuna: “Awan napaay a maysa a sao manipud iti amin a naimbag a sasao a sinao kadakayo ni Jehova a Diosyo. Pimmudnoda amin maipaay kadakayo. Awan uray maysa a sao kadakuada ti napaay.” (Jos. 23:14) Ken masiguradotayo nga uray no narigat ti kasasaadtayo, ‘matalek ti Dios’ ken dina pulos baybay-an dagiti nasungdo kenkuana.​—Basaen ti 1 Corinto 10:13.

 5. Kasanotayo a maliwliwa ti sabsabali?

⁵ Ni apostol Pablo tinukoyna ni Jehova kas “Dios ti amin a liwliwa.” Kaipapananna a liwliwaen wenno bang-aran ni Jehova dagidiay agsagsagaba ken malmalday. (Basaen ti 2 Corinto 1:3, 4.) Awan ti makalapped iti nailangitan nga Amatayo a mangipaay iti liwliwa kadagidiay mangay-ayat kenkuana. Maliwliwatayo met ngarud dagiti kapammatiantayo nga agpaspasar iti “aniaman a kita ti rigat.” Maaramidtayo dayta ‘babaen ti liwliwa a pinangliwliwa kadatayo ti Dios.’ Awanen ti kasayaatan a mangliwliwa kadagiti malmaldaang no di ni Jehova!

Pakaigapuan Dagiti Pakarigatan

 6. Ania ti sumagmamano a pakaigapuan ti pakarigatan?

⁶ Kasapulantayo ti liwliwa aniaman ti kasasaadtayo. Ti maysa a kangrunaan a pakaigapuan ti kinaliday ket ti ipapatay ti maysa nga ipatpategtayo, nangruna no asawa wenno anak. Agkasapulan met iti liwliwa ti maysa a biktima ti panangidumduma, dagiti nakapuy ti salun-atda, lallakay ken babbaket, napanglaw, addaan parikut iti panagasawa, wenno dagiti marirriribukan gapu iti kasasaad ti lubong.

 7. (a) Ania a liwliwa ti kasapulantayo kadagiti narigat a kasasaad? (b) Ania ti aramiden ni Jehova tapno maimbagan daydiay “nadunor ken naidagel” ti pusona?

⁷ Kadagiti narikut a tiempo, kasapulantayo ti liwliwa a mangbang-ar iti puso, panunot, emosion, salun-at, ken ti espiritualidadtayo. Kas pagarigan, usigentayo ti puso. Bigbigen ti Sao ti Dios a mabalin a ‘madunor ken maidagel ti pusotayo.’ (Sal. 51:17) Sigurado a kabaelan ni Jehova a ‘paimbagen dagidiay nasnaayan ti pusona, ket bedbedanna dagiti naut-ot a pasetda.’ (Sal. 147:3) Uray kadagiti nakarigrigat a kasasaad, bang-aran ti Dios ti nadudog a puso no agkararagtayo buyogen ti naan-anay a pammati ken tungpalentayo dagiti bilinna.​—Basaen ti 1 Juan 3:19-22; 5:14, 15.

 8. Kasano a makatulong ni Jehova no mariribukan ti panunottayo?

⁸ No dadduma, agkasapulan ti panunottayo iti liwliwa gapu iti adu a pakasuotan. Ditay mapagballigian dagita a pakasuotan ti pammati no iti kabukbukodantayo laeng. Ngem inkanta ti salmista: “Idi a ti mangrirriribuk a pampanunotko immaduda iti unegko, dagiti bukodmo a pangliwliwa rinugianda a sappuyoten ti kararuak.” (Sal. 94:19) Insurat pay ni Pablo: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.” (Fil. 4:6, 7) Dakkel ti maitulong ti panagbasa ken panangutob iti Kasuratan tapno maliwliwa ti mariribukan a panunottayo.​—2 Tim. 3:15-17.

 9. Kasanotayo a mapagballigian ti negatibo nga emosion?

⁹ No dadduma, napalalo ti pannakaupaytayo nga uray la malapunostayo iti negatibo nga emosion. Nalabit mariknatayo a ditay kabaelan nga ibaklay ti responsabilidadtayo iti kongregasion. Matulongan ken maliwliwanatayo met ni Jehova iti daytoy a banag. Kas panangyilustrar: Idi nabilin ni Josue a mangidaulo kadagiti Israelita maibusor kadagiti nabileg a kalabanda a nasion, kinuna kenkuana ni Moises: “Bumilegka ken pumigsaka . . . ni Jehova ti agmartsa iti sangom. Isu agtultuloyto a kaduam. Saannakanto a baybay-an wenno panawan a naan-anay. Dika agbuteng wenno agkullayaw.” (Deut. 31:7, 8) Iti tulong ni Jehova, naidauluan ni Josue ti ili ti Dios nga agturong iti Naikari a Daga, ken naparmekda amin a kabusorda. Kasta met a tulong ti impaay ni Jehova ken ni Moises idi bumallasiwda iti Nalabaga a Baybay.​—Ex. 14:13, 14, 29-31.

10. No apektado ti salun-attayo gapu kadagiti problema, ania a tulong ti manamnamatayo?

¹⁰ Saan a nasayaat ti epektona iti salun-attayo dagiti narigat a kasasaad. Siempre, makatulong ti umiso a pannangan, umdas nga inana ken ehersisio, ken panagtalinaed a nadalus. Ngem makatulong met iti salun-attayo no panunotentayo ti kuna ti Biblia maipapan iti masanguanan. Gapuna, no agproblematayo, nasayaat a laglagipentayo ti kapadasan ken pammaregta ni Pablo: “Maimammamegkami iti tunggal pamay-an, ngem saan a mailetan a di makagunay; mariribukankami, ngem saan a naan-anay nga awanan ruaran; maidadaneskami, ngem saan a nabaybay-an iti rigat; maituangkami, ngem saan a nadadael.”​—2 Cor. 4:8, 9.

11. Ania ti aramidentayo no kumapuy ti espiritualidadtayo?

¹¹ Mabalin a makadangran iti espiritualidadtayo ti dadduma a pakasuotan. Matulongannatayo manen ni Jehova iti daytoy a banag. Ipanamnamana: “Ni Jehova mangipaay iti saranay kadagiti amin a mapasag, ket patakderenna ti isuamin a maparukob.” (Sal. 145:14) No mariknatayo a kumapuy ti pammatitayo masapul nga agpatulongtayo kadagiti panglakayen. (Sant. 5:14, 15) Ken ti kanayon a pananglaglagip iti Nainkasuratan a namnama a biag nga agnanayon pabilgennatayo no masuot ti pammatitayo.​—Juan 17:3.

Dagiti Liniwliwa ti Dios

12. Kasano a ni Jehova liniwliwana ni Abraham?

¹² Kinuna ti salmista ken Jehova: “Lagipem ti sao iti adipenmo, a maipaay iti dayta pinaguraynak. Daytoy ti liwliwak iti rigatko, ta ti bukodmo a sasao tinaginayonnak a sibibiag.” (Sal. 119:49, 50) Addaantayo ita iti naisurat a Sao ni Jehova a naglaon kadagiti pagarigan no kasano a liniwliwa ti Dios dagiti adipenna. Kas pagarigan, nariribukan ni Abraham idi naammuanna a dadaelen ni Jehova ti Sodoma ken Gomorra. Insaludsodna iti Dios: “Pudno kadi a punasemto ti nalinteg a mairaman iti nadangkes?” Isu ket liniwliwa ni Jehova babaen ti panangipanamnamana a no adda 50 a nalinteg, saanna a dadaelen ti Sodoma. Ngem naminlima pay a nagsaludsod ken Jehova: Kasanon no adda 45 a nalinteg? 40? 30? 20? 10? Tunggal saludsodna, siaanus ken siaasi nga impanamnama ni Jehova a dina dadaelen ti Sodoma. Uray no awan ti sangapulo a nalinteg iti dayta a lugar, inispal latta ni Jehova da Lot ken ti babbalasangna.​—Gen. 18:22-32; 19:15, 16, 26.

13. Kasano nga impakita ni Anna ti panagtalekna ken Jehova?

¹³ Ni Anna nga asawa ni Elcana napalalo nga ayatna a maaddaan iti anak. Ngem lupes isu a mariribukan. Inkararagna dayta ken Jehova, ket kinuna kenkuana ti Nangato a Padi a ni Eli: “Ited koma ti Dios ti Israel ti dawatmo.” Daytoy ti nangliwliwa ken Anna isu a “saanen a nagdanag ti rupana.” (1 Sam. 1:8, 17, 18) Intalek ni Anna ti problemana ken Jehova. Nupay dina ammo ti pagbanagan dayta, naaddaan iti talna ti panunot. Idi agangay, sinungbatan ni Jehova ti kararagna. Nagsikog ken nangipasngay iti lalaki a pinanagananna iti Samuel.​—1 Sam. 1:20.

14. Apay a kasapulan ni David ti liwliwa, ken asino ti nagpatulonganna?

¹⁴ Ti maysa pay a liniwliwa ti Dios ket ni Ari David iti nagkauna nga Israel. Mabasa ni Jehova ‘ti linaon ti puso,’ isu nga idi pinilina ni David nga agbalin nga ari ti Israel, ammona a napasnek daytoy ken matalek iti pudno a panagdayaw. (1 Sam. 16:7; 2 Sam. 5:10) Ngem idi agangay, nakikamalala ken ni Bat-seba ken pinadasna nga ilemmeng ti basolna babaen ti panangpapatayna ken Urias. Idi nabigbig ni David ti kadagsen ti basolna, inkararagna ken Jehova: “Maitunos iti kinaruay dagiti asim punasem dagiti salungasingko. Naan-anay a bugguannak iti biddutko, ket dalusannak uray pay iti basolko. Ta siak ammok dagiti salungasingko, ket ti basolko adda a patinayon iti sanguanak.” (Sal. 51:1-3) Naimpusuan ti panagbabawi ni David isu a pinakawan ni Jehova. Ngem inapitna ti bunga ti basolna. (2 Sam. 12:9-12) Nupay kasta, naliwliwa ni David iti kinaasi ni Jehova.

15. Ania a tulong ti impaay ni Jehova ken ni Jesus sakbay ti ipapatayna?

¹⁵ Idi adda ni Jesus ditoy daga, adu a rigat ti napasaranna. Impalubos ti Dios dagita a pakasuotanna ngem nagtalinaed a natarnaw. Kas perpekto a tao, kanayon a nagtalek ken nagtulnog ken Jehova kas Soberano. Idi dandanin maliputan ken mapapatay, inkararagna ken Jehova: “Saan koma a ti pagayatak, no di ket ti pagayatam ti maaramid.” Maysa nga anghel ti nagparang ken nangpabileg ken Jesus. (Luc. 22:42, 43) Impaay ti Dios ti liwliwa, bileg, ken tulong a kasapulan ni Jesus.

16. Kasano a tulongannatayo ni Jehova no agpeggad ti biagtayo gapu iti pammatitayo?

¹⁶ Uray no agpeggad ti biagtayo gapu iti natibker a takdertayo kas Kristiano, sigurado a tulongannatayo ni Jehova nga agtalinaed a matalek kenkuana. Maliwliwatayo met iti namnama a panagungar. Ken segseggaantayo ti tiempo inton ti maudi a kabusor, ni patay “mapukawto”! (1 Cor. 15:26) Saan a malipatan ti Dios dagiti natay a matalek nga adipenna ken ti dadduma pay isu a pagungarennanto ida. (Juan 5:28, 29; Ara. 24:15) No maidadanestayo, makaliwliwa ken mangyeg iti pudno a namnama ti kari ni Jehova a panagungar.

17. Kasano a maliwliwanatayo ni Jehova no adda matay nga ipatpategtayo?

¹⁷ Anian a makaliwliwa a maammuan a dagiti ipatpategtayo a natay mapagungardanto iti baro a lubong nga awanan rigat ken panagsagaba! Ken anian a pribilehio para kadagiti adipen ni Jehova a kameng ti “dakkel a bunggoy” a makalasat iti panungpalan ti dakes a sistema ti bambanag tapno abrasaen ken isuroda dagiti mapagungar ditoy daga!​—Apoc. 7:9, 10.

Tapayaennaka Dagiti Agnanayon a Takiag ti Dios

18, 19. Kasano a liniwliwa ti Dios dagiti maidaddadanes nga adipenna?

¹⁸ Insurat ni Moises ti makapabileg ken makaliwliwa a kanta para kadagiti Israelita: “Ti Dios ti kanayon a nangsalsalaknib kadakayo, dagiti agnanayon a takkiagna ti mangtapaya kadakayo.” (Deut. 33:27, Ti Baro a Naimbag a Damag Biblia) Idi agangay, kinuna kadakuada ni propeta Samuel: “Dikay sumiasi iti isusurot ken Jehova, ket masapul nga agserbikayo ken Jehova buyogen ti isuamin a pusoyo. . . . Saanto a panawan ni Jehova ti ilina maipagapu iti naindaklan a naganna.” (1 Sam. 12:20-22) Agingga a matalektayo nga agserserbi ken Jehova, dinatay baybay-an. Kanayonnatayo a tulongan.

¹⁹ Kanayon a tulongan ken liwliwaen ti Dios dagiti adipenna bayat dagiti napeggad a maudi nga al-aldaw. Rinibu a kakabsattayo ita iti intero a lubong ti maidaddadanes ken maibalbalud gapu iti panagserbida ken Jehova. Ipakita ti kapadasanda a pudno a liwliwaen ni Jehova dagiti adipenna iti tiempo ti rigat. Kas pagarigan, maysa a kabsat a lalaki nga agnanaed iti dati a Soviet Union ti naibalud iti 23 a tawen gapu iti pammatina. Ngem nakaawat latta iti naespirituan a taraon a nangpabileg ken nangliwliwa kenkuana. Kinunana: “Bayat dagidi a tawtawen, nasursurok ti agtalek ken Jehova ket pinabilegnak.”​—Basaen ti 1 Pedro 5:6, 7.

20. Apay a masiguradotayo a dinatay baybay-an ni Jehova?

²⁰ Aniaman ti mapasarantayo, laglagipentayo ti makaliwliwa a sasao ti salmista: “Saanto a baybay-an ni Jehova ti ilina.” (Sal. 94:14) Nupay kasapulantayo ti liwliwa, pribilehiotayo met a liwliwaen ti sabsabali. Ipakita ti sumaganad nga artikulo a mabalintayo a liwliwaen dagidiay malmaldaangan iti daytoy nariribuk a lubong.

Ania ti Sungbatyo?

• Ania ti sumagmamano a pakaigapuan ti pakarigatantayo?

• Kasano a liwliwaen ni Jehova dagiti adipenna?

• No agpeggad ti biagtayo, ania ti makaliwliwa kadatayo?

[Kahon/Dagiti Ladawan iti panid 25]

NO KASANO A MAPAGBALLIGIAN TI BAMBANAG A MANGAPEKTAR ITI . . .

▪ puso Sal. 147:3; 1 Juan 3:19-22; 5:14, 15

▪ panunot Sal. 94:19; Fil. 4:6, 7

▪ emosion Ex. 14:13, 14; Deut. 31:6

▪ salun-at 2 Cor. 4:8, 9

▪ espiritualidad Sal. 145:14; Sant. 5:14, 15