Salsaludsod Dagiti Agbasbasa

Iti kasta a situasion, matmatan ti kongregasion ti dati a panagasawa ti lalaki kas nagpatinggan no nangasawa manen ken ibilangda a balido ti panagasawana manen. Tapno maawatantayo daytoy, usigentayo ti imbaga ni Jesus maipapan iti diborsio ken panagasawa manen.

Kas mabasa iti Mateo 19:9, tinukoy ni Jesus ti kakaisuna a Nainkasuratan a pakaibatayan ti panagpatingga ti panagasawa. Kinunana: “Asinoman a mangidiborsio ken baketna, a saan a nakaaramid iti seksual nga immoralidad, sa mangasawa iti sabali, makabasol iti pannakikamalala.” Kadagita nga imbaga ni Jesus, naammuantayo (1) a ti seksual nga immoralidad ti kakaisuna a Nainkasuratan a pakaibatayan ti panagdiborsio ken (2) makabasol iti pannakikamalala ti lalaki a mangidiborsio ken baketna a saan a naibatay iti dayta a Nainkasuratan a rason sa mangasawa manen.a

Kayat kadi a sawen ni Jesus a ti lalaki a makabasol iti seksual nga immoralidad ken mangidiborsio ken baketna ket nawaya a mangasawa manen sigun kadagiti prinsipio ti Biblia? Saan met ketdi. No mapasamak ti pannakikamalala, mabalin nga ikeddeng ti inosente nga asawa no pakawanenna wenno saan ti nakabasol nga asawana. No saannan a pakawanen ti asawana ket inkeddengna ti makidiborsio, agpada a mabalinda manen ti makiasawa apaman a legal a maaprobaran ti diborsio.

Iti sabali a bangir, mabalin a kayat a talaga ti inosente nga asawa a pagtalinaeden ti panagasawada ken inyebkasna a sidadaan a mangpakawan iti nakabasol nga asawana. Ngem kasano ngay no saan nga awaten ti nakikamalala nga asawa ti pammakawan ni baketna ken kayatna latta ti makidiborsio? Gapu ta sidadaan a pakawanen ni baketna tapno agtultuloy ti panagasawada, awan ngarud ti Nainkasuratan a wayawayana a mangasawa manen. No ituloy ti lalaki ti di Nainkasuratan a desisionna ken mangasawa iti sabali uray no saan nga ipalubos ti Kasuratan nga aramidenna dayta, nakabasol manen iti pannakikamalala. Gapu iti dayta, mangbukel manen dagiti panglakayen iti hudisial a komite a mangtaming iti dayta a kaso.—1 Cor. 5:1, 2; 6:9, 10.

No mangasawa manen ti lalaki nga awanan iti Nainkasuratan a wayawaya, ania ti panangmatmat ti kongregasion iti dati a panagasawana ken iti panagasawana manen? Maibatay iti Kasuratan, saan pay kadi a nawaswas ti dati a panagasawana? Mabalin pay kadi nga agdesision ti inosente nga asawa no pakawanenna wenno saan ti dati nga asawana? Maibilang kadi a pannakikamalala ti panagasawa manen dayta a lalaki?

Idi, ibilang ti kongregasion a pannakikamalala ti panagasawa manen no ti inosente nga asawa ket sibibiag pay, saan a nakiasawa manen, ken saan a nakaaramid iti seksual nga immoralidad. Nupay kasta, saan a dinakamat ni Jesus ti inosente nga asawa idi inlawlawagna ti maipapan iti diborsio ken panagasawa manen. Imbes ketdi, imbagana a ti lalaki a mangidiborsio ken baketna nga awan ti Nainkasuratan a rason ken mangasawa manen ket makabasol iti pannakikamalala. Iti kasta, ti pannakidiborsio ken panagasawa manen ket ibilang ni Jesus a pannakikamalala ken pagpatinggaenna ti dati a panagasawa.

No agpatingga ti panagasawa gapu iti diborsio ken panagasawa manen, ti panangpakawan wenno di panangakseptar ti inosente nga asawa ket saanen a posible. Saanen ngarud a masapul a mangaramid ti asawa a babai iti narigat a desision no pakawanenna wenno saan ti dati nga asawana. Kasta met, ti panangmatmat ti kongregasion iti panagasawa manen ket saan a nakadepende no ti inosente nga asawa ket natayen, nakiasawa manen, wenno nakabasol iti seksual nga immoralidad.b

Iti inusigtayo a pagarigan, nakabasol iti pannakikamalala ti lalaki, a nagresulta iti diborsio. Kasano ngay no saan a nakikamalala ti lalaki ngem nakidiborsio ken nangasawa manen? Wenno kasano no ti asawa a lalaki ket saan a nakabasol iti seksual nga immoralidad sakbay ti diborsio, ngem nakaaramid iti kasta kalpasan ti diborsio sa nangasawa manen uray no sidadaan ni baketna a mangpakawan kenkuana? Kadagita a pagarigan, ti pannakidiborsio ken panagasawa manen ket maibilang a pannakikamalala, isu a pagpatinggaenna ti dati a panagasawa. Maibilang ngarud a legal ti panagasawa manen. Kuna ti Mayo 15, 1980, a ruar Ti Pagwanawanan, panid 31, ‘ita ta nangasawa manen, dina basta maipatingga dayta sa agsubli iti dati nga asawana; ti immuna a panagasawana ket nagpatinggan gapu iti diborsio, pannakikamalala, ken panangasawana manen.’

Daytoy limmawag a pannakaawattayo dina binaliwan ti kinasagrado ti panagasawa wenno dina pinalag-an ti kinaserioso ti pannakikamalala. Ti lalaki a mangidiborsio ken baketna nga awan ti Nainkasuratan a rason sa mangasawa manen uray no saan a Nainkasuratan a siwayawaya a mangaramid iti dayta ket masapul a tamingen ti hudisial a komite gapu ta nakaaramid iti pannakikamalala. (No maysa met a Kristiano ti baro nga asawana, masapul met a tamingen ti hudisial a komite ta nakabasol met iti pannakikamalala.) Nupay ti panagasawana manen ket saan a maibilang a pannakikamalala, ti lalaki ket saan a makualipikar kadagiti espesial a pribilehio iti panagserbi iti kongregasion iti uneg ti adu a tawen ken agingga nga adda pay laeng dagiti maitibkol wenno mangbabalaw kenkuana gapu iti dakes nga inaramidna. Karaman kadagiti ikabilangan dagiti panglakayen dagiti agdama a kasasaad ti naliputan a dati nga asawa ken dagiti menor de edad nga annak a mabalin a binaybay-an ti nakabasol nga asawa.—Mal. 2:14-16.

Gapu kadagita a saan a nasayaat a resulta ti di Nainkasuratan a panagdiborsio ken panagasawa manen, nainsiriban ngarud a tuladen dagiti Kristiano ti panangmatmat ni Jehova a ti panagasawa ket sagrado.—Ecl. 5:4, 5; Heb. 13:4.