Salsaludsod Dagiti Agbasbasa

Ania ti maadaltayo iti panangiparit a masarakan iti Exodo 23:19: “Dika ilambong ti maysa nga urbon a kalding iti gatas ti inana”?

Dayta a bilin iti Mosaiko a Linteg, a namitlo a nagparang iti Biblia, matulongannatayo a mangtarus iti kinamanangngaasi ni Jehova, iti kinadungngona, ken iti panangmatmatna no ania ti maiparbeng. Itampokna met ti pananggurana iti palso a panagdayaw.​—Exodo 34:26; Deuteronomio 14:21.

Ti panangilambong iti maysa nga urbon a kalding wenno iti sabali nga animal iti gatas ti inana ket maikontra iti nakaparsuaan nga impasdek ni Jehova. Ti Dios impaayna ti gatas ti ina tapno mangtaraon iti urbon ken mangpadakkel iti dayta. Ti panangluto iti urbon iti gatas ti mismo nga inana ket, kas panangikuna ti maysa nga eskolar, “panangibabain iti relasion nga impasdek ken sinantipikar ti Dios iti nagbaetan ti nagannak ken ti anak.”

Kanayonanna, adda dagiti mangisingasing a ti panangilambong iti urbon iti gatas ti inana ket mabalin a maysa idi a pagano a ritual a naaramid tapno agtudo. No maysa dayta a pagano a ritual, ti panangiparit ket nagserbi a pannalaknib kadagiti Israelita manipud iti minamaag ken naulpit a narelihiosuan a kaugalian dagiti kabangibang a nasnasion. Ti Mosaiko a Linteg espesipiko nga imparitna kadagiti Israelita ti panangannurot kadagiti paglintegan dagiti nasnasion.​—Levitico 20:23.

Kas maudi, makitatayo iti daytoy a partikular a linteg ti nadungngo a kinamanangngaasi ni Jehova. Kinapudnona, naglaon ti Linteg iti adu nga umasping a bilbilin maibusor iti kinaulpit kadagiti animal ken agserbi a proteksion maibusor iti aramid a maikontra iti naikasigudan dagiti bambanag. Kas pagarigan, ti Linteg inramanna dagiti bilin a nangiparit iti panangidaton iti animal nga awan pay pito nga aldawna iti denna ti inana, aggiddan a panangparti iti animal ken iti urbonna iti maymaysa nga aldaw, ken panangala agpadpada iti ina ken kadagiti itlog wenno sibongna manipud iti umok.​—Levitico 22:27, 28; Deuteronomio 22:6, 7.

Nalawag, ti linteg ket saan a basta komplikado a pakabuklan dagiti bilbilin ken panangiparit. Naglaon met dayta kadagiti prinsipio a mangipasagepsep kadatayo iti panangannurot iti nangato a moral a pagalagadan a pudno a mangyanninaw kadagiti nakaskasdaaw a galad ni Jehova.​—Salmo 19:7-11.

[Picture Credit Line iti panid 31]

© Timothy O’Keefe/Index Stock Imagery