Ania Dagiti Galad ti Nailangitan nga Amatayo?

KABESADO ti adu a tattao ti Amami, wenno ti Kararag ti Apo, ti pagtuladan a kararag nga insuro ni Jesus kadagiti adalanna. (Mateo 6:9-13) Kada ikararagda dayta, awaganda ti Dios iti “Amami.” Ngem mano ngata ti makaibaga nga am-ammoda unay ti Dios?

Sika ngay? Am-ammom kadi unay ti Dios? Nasingedka kadi kenkuana, agkarkararagka kadi ken ibagbagam kenkuana dagiti pakaragsakam ken pagladladingitam? Ania kadi a talaga ti kaipapanan ti panangammo iti maipapan kenkuana?

“Jehova ti Naganna”

Ti mabalin nga ammo laeng ti maysa nga ubing nga agsursuro a magna maipapan ken tatangna ket isu daydiay aw-awaganna iti Papa. Ngem bayat a dumakdakkel, maammuanna ti nagan ken reputasion ni tatangna ket ipagpannakkelna la ketdi. Ti ngay met nailangitan a nangted iti biagtayo? Ammom kadi ti personal a naganna ken ti kaipapanan dayta?

Nupay adu ti mangulit-ulit iti sasao a “Madaydayaw koma ti naganmo” no ikararagda ti Amami, mabalin a dida masungbatan ti saludsod nga, “Ania dayta a nagan?” (Ti Biblia, Philippine Bible Society) Ti namituen a langit, nangayed a bantay, namaris a baknad ti korales a napnuan iti nagadu a kita ti biag ket paneknekanda nga adda Dios ngem saanda a maibaga kadatayo ti nagan ti Dios. Tapno maammuantayo ti nagan ti Dios, masapul a sukimatentayo ti Biblia. Kastoy ti nalawag a kunaenna: “Jehova ti naganna.”​—Exodo 15:3.

Kayat ti Dios a maam-ammotayo isuna babaen iti naganna a Jehova. Apay? Agsipud ta ti naganna ti mangirepresentar iti kinasiasinona. Dayta a nagan ket literal a kayuloganna ti “Pagbalinenna.” Iti sabali a pannao, ti Dios ket kabaelanna ti agbalin iti aniaman a nasken a pagbalinanna tapno matungpalna ti panggepna. Panunotem daytoy: Tapno maaywanan ti maysa nga ama ti pamiliana, masapul nga agbalin a manangisakad, mamagbaga, manangikeddeng, negosiador, mannalaknib, ken mannursuro, depende kadagiti kasapulan ken kasasaad ti pamiliana. Iti umasping a wagas, ipasigurado kadatayo ti nagan a Jehova a kabaelan ti Dios nga ibanag ti pagayatanna agpaay a pakabendisionan dagiti amin nga agserserbi kenkuana, aniaman ti mapasamak.

Usigentayo ti nadumaduma nga akem a pagbalinan ti naayat a Diostayo maitunos iti kayulogan ti naganna. Dayta ti makatulong kenka a mangapresiar iti kinadios ni Jehova ken mangammo iti nasken nga aramidem tapno makaadanika kenkuana.

“Ti Dios ti Ayat ken ti Talna”

Ni apostol Pablo inawaganna ti Namarsua kadatayo kas “ti Dios ti ayat ken ti talna.” (2 Corinto 13:11) Apay? Immunan a kinuna ni Jesu-Kristo: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Maigapu iti kasta unay a panagayat ti Dios iti sangatauan, intedna ti dungdungnguenna nga Anak kas subbot, tapno dagidiay mangpaneknek iti pammatida kenkuana ket maaddaan iti biag nga agnanayon nga awanan iti ut-ot ken panagsagaba nga imbunga ti basol. Dayta ti gapuna a kinuna met ni Pablo: “Dagiti isupapak ti basol isu ti ipapatay, ngem ti sagut nga ipaay ti Dios isu ti agnanayon a biag babaen ken Kristo Jesus nga Apotayo.” (Roma 6:23) Saan kadi a dayta ti mangtignay kadatayo nga agayat iti Dios ken umadani kenkuana?

Saan laeng a ti intero a sangatauan ti ay-ayaten ti Dios no di ket uray met ti tunggal maysa kadagiti matalek kenkuana. Ni Moises kinunana kadagiti nagkauna nga Israelita a masansan a simmukir iti Dios: “Maipaay kadi ken Jehova nga ar-aramidenyo ti kastoy, O ili a maag ken saan a masirib? Saan kadi nga isu ti Amam a nangpataud kenka, isu a nangaramid kenka ken nangted kenka iti kinatibker?” (Deuteronomio 32:6) Maawatam kadi ti kinapateg dayta nga imbagana? Nupay ammona dagiti pagkurkurangan ti ilina, maseknan latta ni Jehova kadakuada kas ti naayat nga Amada. Impaayna ti amin a talaga a kasapulanda iti material, emosional, ken naespirituan.

Mapasarantay amin ti nadumaduma a panagbalbaliw iti biag isu nga addada gundaway a marigatan ken lumdaangtayo pay ketdi. Kasapulantayo ti maysa a tumulong kadatayo a maaddaan iti umiso a pannakaawat maipapan kadagiti kasasaad ken parikuttayo. Asino ti makatulong kadatayo? Babaen ti Biblia a Saona, pampaneknekan ni Jehova nga isu ket naayat a Mamagbaga ken Manangaywan. Dayta a Sagrado a Libro ti mangilawlawag no apay a mapaspasarantayo ti nakaro a panagsagaba ken no kasano a mapagballigiantayo dayta. No kasano a siaayat a tulongan ti maysa nga ama ti natumba ken nadunor nga anakna, kayariganna nga agdumog met ni Jehova gapu iti napalalo a panagayatna tapno tulongannatayo. Wen, saan nga ababa ti ima ni Jehova kadagidiay mangpampaneknek nga adda pammatida kenkuana.​—Isaias 59:1.

Ipakpakita met ti Dios ti panagayatna kadatayo babaen ti panagbalinna a “Managdengngeg iti kararag.” (Salmo 65:2) Kasano? Inlawlawag ni apostol Pablo: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.” (Filipos 4:6, 7) No naimpusuan nga agkararagka iti Dios ken agpaiwanwanka iti Saona, masagrapmo met “ti talna ti Dios a mangringbaw iti isuamin a panunot.”

“Dios ti Pannakaammo”

Ni Jehova a Dios ket nadeskribir iti Biblia kas daydiay ‘naan-anay ti pannakaammona.’ Awan ti asinoman nga ad-adda a makaawat kadagiti tattao ken makaammo kadagiti kasapulanda no di ni Jehova ta isu ti “Dios ti pannakaammo.” (Job 36:4; 1 Samuel 2:3) Impakaammona babaen ken adipenna a Moises a “saan a babaen iti tinapay laeng nga agbiag ti tao no di ket babaen iti tunggal ebkas ti ngiwat ni Jehova nga agbiag ti tao.” (Deuteronomio 8:3; Mateo 4:4) Kaipapanan dayta a saan laeng a dagiti material a banag ti kasapulantayo tapno maaddaantayo iti pudno a pannakapnek iti biag.

Ti Namarsua kadatayo ket mangipapaay iti napateg a panangiwanwan ken pammagbaga babaen iti Saona a ti Biblia. No adalentayo ti Biblia ken iyaplikartayo ti pammagbagana iti biagtayo, mabenepisiarantayo iti “tunggal ebkas ti ngiwat ni Jehova.” Kas pagarigan, maipapan iti biag ti pamiliana, kastoy ti kinuna ti maysa a Kristiano nga agnagan iti Zuzanna: “Timmibker ti relasionmi nga agassawa babaen ti panagkaduami a mangbasa iti Biblia, tumabuno kadagiti Nakristianuan a gimong, ken mangiranud kadagiti naadalmi. Gapu iti panangiwanwan kadakami ti Dios, naaddaankami iti agpada a kalat iti biag ken natibtibker a relasion.”

Kayatmo met kadi ti mabenepisiaran iti naespirituan a pammagbaga ken panangiwanwan nga ipapaay ti Dios? No regular nga adalem ti Biblia ken iyaplikarmo dagiti balakadna, masagrapmonto ti adu a bendision manipud kenkuana.​—Hebreo 12:9.

‘Dios ti Pannakaisalakan’

Ti lubong ita ket napno iti riribuk. Ditay ammo no ania ti mapasamak inton bigat. No agnanaedka iti pagilian a pakapaspasamakan ti gubat, mabalin nga il-iliwem ti talna. Iti adu a paset ti lubong, mabutbuteng dagiti tattao gapu iti krimen ken kinaranggas, di natalged nga ekonomia, ken kadagiti aramid dagiti terorista. Asino ti makaisalakan kadatayo manipud kadagita? Ad-adda a kasapulan ita ti sangatauan ti pannalaknib ken pannakaisalakan.

“Ti nagan ni Jehova ket napigsa a torre. Iti dayta nga agtaray ti nalinteg ket maipaayan iti salaknib,” kuna ti Biblia. (Proverbio 18:10) No ammotayo ti nagan ti Dios ken agpannuraytayo iti dayta, matignaytayo a mangpanunot kadagiti naaramidannan ken aramidennanto pay tapno maisalakan dagidiay mangpampaneknek nga adda pammatida kenkuana. Naan-anay a pinaneknekanen ni Jehova a kabaelanna nga isalakan ti ilina. Kas pagarigan, insalakanna ti Israel babaen ti panangdadaelna kadagiti buyot ken karuahe a pakigubat ni Faraon. Pinaneknekan ni Jehova nga isu ti Dios ti kinamatalek, ti Dios a silalagip kadagiti agsagsagaba ken sidadaan a tumulong kadakuada.​—Exodo 15:1-4.

Ti agnanayon a masanguanantayo ket agpannuray met iti pammatitayo ken Jehova a Dios kas ti Manangisalakan. Ni Ari David iti nagkauna nga Israel, a nangdaer iti adu a rigat, impakitana dayta a kita ti pammati idi insuratna maipapan ken Jehova: “Sika ti Dios ti pannakaisalakanko.” (Salmo 25:5) Buyogen iti panagtalek a kinuna ni apostol Pedro: “Ammo ni Jehova no kasano ti mangispal kadagiti tattao nga addaan nadiosan a debosion manipud iti pannakasuot.”​—2 Pedro 2:9.

Kastoy ti inkari ti Dios iti daydiay agtalek iti tulongna: “Salaknibakto agsipud ta naammuanna ti naganko.” (Salmo 91:14) Mapaspasaran dagiti adipen ti Dios ita ti kinapudno dayta a kari. Ni Henryk a taga-Poland ket 70 a tawenen a simamatalek nga agserserbi ken Jehova iti laksid dagiti rigat ken pannakaidadanes. Idi agtawen laeng ni Henryk iti 16, naibalud ni tatangna iti kampo konsentrasion idiay Auschwitz. Ni Henryk ken ni manongna ket naibalud iti koreksional para kadagiti agtutubo. Kalpasan dayta, isu ket nayakar iti nadumaduma a kampo konsentrasion. No maipapan kadagiti napasamak kadagidi a tiempo, kastoy ti malagip ni Henryk: “Kadagiti amin a napasarak a rigat, dinak pulos binaybay-an ni Jehova. Kanayon a tinulongannak nga agtalinaed a matalek, nupay namin-adun a dandaniak natay.” Wen, patpatibkeren ken pabpabilgen ni Jehova ti pammati dagiti adipenna tapno makapagibturda.

Iti din agbayag, paneknekanton ti Dios nga isu ti Manangisalakan iti amin a mangpampaneknek iti pammatida kenkuana ken agtaltalek iti panangispalna. Kinunana: “Siak ni Jehova, ket malaksid kaniak awan ti manangisalakan.” (Isaias 43:11) “Iti gubat ti naindaklan nga aldaw ti Dios a Mannakabalin-amin,” ikisapnanto dagiti nadangkes ditoy daga ket isalakanna dagiti nalinteg. (Apocalipsis 16:14, 16; Proverbio 2:21, 22) Ipanamnama kadatayo ni Jehova: “Dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”​—Salmo 37:11.

Panagbalin nga “Annak ti Dios”

Idi kaaldawan ni propeta Malakias, ibagbaga dagiti Israelita a ni Jehova ti Amada. Ngem no maipapan iti panangpadayaw ken debosionda kenkuana, nagidatonda kadagiti tinapay a narugitan ken animal a bulsek ken pilay. Dayta ti gapuna a sinaludsodan ida ni Jehova: “No maysaak nga ama, sadino ti ayan ti dayaw a maipaay kaniak?”​—Malakias 1:6.

Saanmo koma nga ar-aramiden ti biddut dagidiay a di matalek nga Israelita. Imbes ketdi, paregtaendaka a mangammo iti maipapan ken Jehova a Dios ken umadanika kenkuana. Indagadag ni adalan a Santiago: “Umadanikayo iti Dios, ket isu umadaninto kadakayo.”​—Santiago 4:8.

Maaddaanka kadagiti responsabilidad no pagbalinem ni Jehova nga Amam. Ngem no ikagumaam a padayawan ti Dios babaen ti sisusungdo a panangtungpalmo kadagiti pagalagadanna iti tunggal aspeto ti biagmo, dinanto pulos lipaten dagiti panagreggetmo. Imbes ketdi, tulongannaka a magna iti nalinteg a dana nga agturong iti inkarina a baro a lubong nga “awanton ni patay, awanto metten ti panagleddaang wenno panagsangit wenno ut-ot.” (Apocalipsis 21:4) Iti dayta a tiempo, amin a natulnog a tattao ket “mawayawayaanto iti pannakaadipen iti panagrupsa ken maaddaan iti nadayag a wayawaya ti annak ti Dios.”​—Roma 8:21.

[Blurb iti panid 5]

Kayat ti Dios a maam-ammotayo isuna babaen iti naganna a Jehova, a ti literal a kayulogan dayta ket “Pagbalinenna”

[Blurb iti panid 6]

“Kadagiti amin a napasarak a rigat, dinak pulos binaybay-an ni Jehova.”​—HENRYK

[Blurb iti panid 7]

“Timmibker ti relasionmi nga agassawa babaen ti panagkaduami a mangbasa iti Biblia, tumabuno kadagiti Nakristianuan a gimong, ken mangiranud kadagiti naadalmi.”​—ZUZANNA