“Dikay Agbuteng, Bassit nga Ipastoran”

“Dikay agbuteng, bassit nga ipastoran, agsipud ta ni Amayo inanamonganna ti panangited kadakayo iti pagarian.”​—LUCAS 12:32.

 1. Aniat’ nakaibatayan ti sasao ni Jesus a: “Dikay agbuteng, bassit nga ipastoran”?

‘AGTULTULOY a sapulenyo ti pagarian [ti Dios].’ (Lucas 12:31) Idi imbaga daytoy ni Jesus kadagiti adalanna, inyebkasna ti maysa a prinsipio a mangiturturong iti panagpampanunot dagiti Kristiano manipud idi kaaldawanna agingga iti tiempotayo. Masapul a yun-unatayo ti Pagarian ti Dios iti biagtayo. (Mateo 6:33) Nupay kasta, iti salaysay ni Lucas, intuloy ni Jesus ti nangisawang kadagiti agkakapateg ken makaliwliwa a sasao iti maysa a naisangsangayan a grupo dagiti Kristiano. Kinunana: “Dikay agbuteng, bassit nga ipastoran, agsipud ta ni Amayo inanamonganna ti panangited kadakayo iti pagarian.” (Lucas 12:32) Kas ti Nasayaat a Pastor, ammo ni Jesus nga agur-uray kadagiti nasinged nga adalanna dagiti nariribuk a tiempo. Ngem awan ti rumbeng a pagbutnganda no itultuloyda a biroken ti Pagarian ti Dios. Gapuna, ti balakad ni Jesus ket saan a naulpit a bilin. Ngem ketdi, maysa dayta a naayat a kari a mangipaay iti talged ken tured.

 2. Siasino ti mangbukel iti bassit nga ipastoran, ken apay a naparaburanda unay?

² Kasarsarita idi ni Jesus dagiti adalanna, ket inawaganna ida iti “bassit nga ipastoran.” Kasarsaritana met dagidiay ‘pangtedanto [ni Jehova] iti pagarian.’ No maidilig iti nakaad-adu a tattao a nangawat ken Jesus kadagiti naud-udi a tiempo, pudno a nagbassit ti bilang daytoy a grupo. Naibilangda met a napateg agsipud ta napilida a maipaay iti naisangsangayan a masakbayan, a mausarda iti naarian a serbisio. Inayaban ti Amada, ti Naindaklan a Pastor, ni Jehova, ti bassit nga ipastoran tapno awatenda ti nailangitan a tawid a mainaig iti Mesianiko a Pagarian ni Kristo.

Ti Bassit nga Ipastoran

 3. Ania a nadayag a sirmata maipapan iti bassit nga ipastoran ti nakita ni Juan?

³ Ngarud, siasino ti mangbukel iti daytoy bassit nga ipastoran nga addaan iti kasta a nakaskasdaaw a namnama? Dagiti pasurot ni Jesu-Kristo a pinulotan ti nasantuan nga espiritu. (Aramid 2:1-4) Iti pannakakitana kadakuada kas nailangitan a kumakanta a nakaiggem kadagiti arpa, insurat ni apostol Juan: “Nakitak, ket, adtoy! ti Kordero nga agtaktakder iti Bantay Sion, ket kaduana ti sangagasut uppat a pulo ket uppat a ribo nga addaan iti naganna ken ti nagan ni Amana a naisurat kadagiti mugingda. Dagitoy isuda dagidiay di nangtulaw kadagiti bagbagida iti babbai; iti kinapudnona, birhenda. Dagitoy isuda dagidiay agtultuloy a sumursurot iti Kordero iti uray sadino a papananna. Nagatang dagitoy manipud iti sangatauan kas umuna a bungbunga iti Dios ken iti Kordero, ket awan nasarakan a kinaulbod kadagiti ngiwatda; awan pakapilawanda.”​—Apocalipsis 14:1, 4, 5.

 4. Aniat’ akem ti bassit nga ipastoran ditoy daga itatta?

⁴ Manipud idi Pentecostes 33 K.P., agserserbi dagitoy a napulotan, nayanak iti espiritu a tattao kas embahador ni Kristo ditoy daga. (2 Corinto 5:20) Itatta, manmano laengen kadakuada ti natda, nga agserserbida a sangsangkamaysa kas ti klase matalek ken masirib nga adipen. (Mateo 24:45; Apocalipsis 12:17) Nangnangruna manipud idi tawen 1935, tumiptipon kadakuada dagiti “sabsabali a karnero,” dagiti Kristiano nga addaan naindagaan a namnama, a riniwriw itan ti bilangda. Tumultulong dagitoy iti pannakaikaskasaba ti naimbag a damag iti intero a daga.​—Juan 10:16.

 5. Aniat’ kababalin dagiti natda [a kameng] ti bassit nga ipastoran, ket apay a di rumbeng nga agbutengda?

⁵ Aniat’ kababalin dagiti natda iti daytoy bassit nga ipastoran nga adda pay laeng ditoy daga? Tangay ammoda nga awatendanto ‘ti maysa a pagarian a di mabalin a gunggonen,’ mangipapaayda iti sagrado a panagserbi buyogen ti nadiosan a buteng ken panagamak. (Hebreo 12:28) Sipapakumbaba a bigbigenda nga addaanda iti nakapatpateg a pribilehio a mangyeg iti aglaplapusanan a rag-o. Nasarakanda ti “maysa a perlas a nangato ti pategna” a nadakamat ni Jesus idi nagsao maipapan iti Pagarian. (Mateo 13:46) Bayat nga umas-asideg ti dakkel a rigat, awanan buteng a sitatakder dagiti pinulotan ti Dios. Iti laksid ti mapagtengto iti lubong ti sangatauan iti mabiit kabayatan “ti dakkel ken nangayed nga aldaw ni Jehova,” awan ti pagbutnganda iti masanguanan. (Aramid 2:19-21) Apay koma a mabutengda?

Bumasbassit ti Bilangda

6, 7. (a) Apay a nagbassit ti bilang ti bassit nga ipastoran nga adda pay laeng ditoy daga? (b) Kasanot’ rumbeng a panangmatmat ti tunggal maysa iti namnamana?

⁶ Kadagiti kallabes a tawen, nagbassiten ti bilang ti bassit nga ipastoran nga adda pay laeng ditoy daga. Mapaneknekan daytoy iti report ti Panglaglagip idi 1994. Iti agarup 75,000 a kongregasion ti ili ni Jehova iti intero a lubong, 8,617 laeng ti nangiparangarang a kameng ida ti natda babaen ti pannakiramanda kadagiti emblema. (Mateo 26:26-30) Maigidiat iti dayta, agdagup iti 12,288,917 ti timmabuno. Ammo dagiti napulotan a Kristiano a manamnama daytoy. Sangagasut uppat a pulo ket uppat a ribo laeng ti bilang nga inkeddeng ni Jehova a mangbukel iti bassit nga ipastoran, ken ur-urnongenna dagitoy manipud pay idi Pentecostes 33 K.P. Gapuna, agpatingga ti panangayab iti bassit nga ipastoran no ti bilangda ket asidegen a makompleto, ket ipakita ti pammaneknek a nagpatingga ti pannakaurnong dagitoy naparaburan unay a tattao idi 1935. Nupay kasta, naipadto nga umadunto dagiti sabsabali a karnero iti panawen ti panungpalan ket agbalindanto a “dakkel a bunggoy, nga awan ti tao a makabael a mangbilang, manipud kadagiti isuamin a nasion ken kadagiti tribo ken kadagiti il-ili ken kadagiti pagsasao.” Manipud idi 1935, daytoy dakkel a bunggoy, a ti namnamada ket agbiag nga agnanayon iti paraiso a daga, ti ad-adda nga ur-urnongen ni Jehova.​—Apocalipsis 7:9; 14:15, 16; Salmo 37:29.

⁷ Agtawen itan iti 70’s, 80’s, ken 90’s ti kaaduan a kameng ti bassit nga ipastoran nga adda pay laeng ditoy daga. Nalab-awanen ti sumagmamano ti maika-100 a tawen ti panagbiagda. Amin dagitoy, aniaman ti edadda, ammoda a babaen ti nailangitan a panagungar, maikaykaysadanto kamaudiananna ken ni Jesu-Kristo ket makipagturaydanto kenkuana iti nadayag a Pagarianna. Agbalinto a naindagaan nga iturayan ni Kristo nga Ari dagidiay kameng ti dakkel a bunggoy. Agrag-o koma ti tunggal maysa iti insagana ni Jehova kadagidiay agayat kenkuana. Saan a datayo ti agpili no ania a namnama ti kayattayo. Ni Jehova ti mangikeddeng iti dayta. Agpada a pagrag-oan dagitoy a grupo ti namnamada iti naragsak a masakbayan, iti man nailangitan a Pagarian wenno iti paraiso a daga iti sidong dayta a Pagarian.​—Juan 6:44, 65; Efeso 1:17, 18.

 8. Kasanot’ irarang-ay ti pannakaselio ti 144,000, ket aniat’ mapasamak inton mairingpas dayta?

⁸ Ti 144,000 a bassit nga ipastoran isu “ti Israel ti Dios,” a nangsandi iti natural nga Israel iti pangpanggep ti Dios. (Galacia 6:16) Gapuna, ti natda ti mangbukel kadagiti nabatbati iti dayta a naespirituan a nasion nga adda pay laeng ditoy daga. Maselselioan dagita a natda a maipaay iti kamaudianan a pananganamong ni Jehova. Iti maysa a sirmata, nakita ni apostol Juan ti pannakaaramid daytoy, ket impadamagna: “Nakitak ti sabali nga anghel nga umul-uli manipud ti leleggakan ti init, nga addaan iti selio ti sibibiag a Dios; ket nagikkis a buyogen ti natbag a timek kadagiti uppat nga anghel a napalubosan a mangdangran iti daga ken iti baybay, a kunkunana: ‘Dikay dangran ti daga wenno ti baybay wenno dagiti kayo, agingga a malpasmi a selioan dagiti adipen ti Diostayo kadagiti mugingda.’ Ket nangngegko ti bilang dagidiay naselioan, sangagasut uppat a pulo ket uppat a ribo, naselioan manipud iti tunggal tribo dagiti annak ti [naespirituan nga] Israel.” (Apocalipsis 7:2-4) Yantangay nalawag a dandanin malpas daytoy a panangselio iti naespirituan nga Israel, agparang nga asideg met ngaruden a dumteng dagiti makapagagar a pasamak. No kasta, talaga a nakaas-asidegen “ti dakkel a rigat,” inton maibulos iti rabaw ti daga dagiti uppat nga angin ti pannakadadael.​—Apocalipsis 7:14.

 9. Kasanot’ panangmatmat ti bassit nga ipastoran iti umad-adu a bilang ti dakkel a bunggoy?

⁹ Riniwriw itan ti bilang dagiti kameng ti dakkel a bunggoy a naurnongen. Anian a makaparagsak daytoy iti natda! Nupay agtultuloy a bumasbassit ti bilang dagiti kameng ti bassit nga ipastoran nga adda pay laeng ditoy daga, nasanay ken naisaganadan dagiti kualipikado a lallaki iti dakkel a bunggoy a mangibaklay kadagiti responsabilidad a mainaig iti dumakdakkel nga organisasion ti Dios ditoy daga. (Isaias 61:5) Kas impasimudaag ni Jesus, addanto makalasat iti dakkel a rigat.​—Mateo 24:22.

“Dikay Agbuteng”

10. (a) Ania nga iraraut ti maisayangkatto maibusor iti ili ti Dios, ket mangiturongto dayta iti ania? (b) Aniada a saludsod ti naiturong iti tunggal maysa kadatayo?

¹⁰ Naigarangugongen ni Satanas ken dagiti demoniona iti kaparanget ti daga. Maimanmaniobra [ni Satanas] ken ti buyotna a mangiwayat iti naan-anay nga irarautda iti ili ni Jehova. Nailadawan daytoy nga iraraut, a naipadto iti Biblia, kas ti iraraut ni Gog ti Magog. Siasino ti kangrunaan a rauten ti Diablo? Saan kadi a dagiti maudi a kameng ti bassit nga ipastoran, ti naespirituan nga Israel ti Dios, a sitatalna nga agnanaed “iti tengnga ti daga”? (Ezequiel 38:1-12) Wen, ngem maimatanganto ti natda iti klase matalek a napulotan, agraman dagiti nasungdo a kakaduada, ti sabsabali a karnero, no kasano a kellaat a mangiturong ti iraraut ni Satanas iti dramatiko a panagtignay ni Jehova a Dios. Bumallaetto tapno salaknibanna ti ilina, ket daytoyto ti mamagbettak iti “dakkel ken nakakigkigtot nga aldaw ni Jehova.” (Joel 2:31) Itatta, itungtungpal ti matalek ken masirib nga adipen ti maysa a napateg, makaispal-biag a serbisio, nga ipakpakdaarna daytoy sumungsungad nga ibaballaet ni Jehova. (Malakias 4:5; 1 Timoteo 4:16) Siaaktibo kadi a supsuportaranyo dayta a serbisio, a makiramramankayo iti panangikaskasaba iti naimbag a damag ti Pagarian ni Jehova? Itultuloyyo kadi nga aramiden dayta kas natured a manangiwaragawag iti Pagarian?

11. Apay a nasken ti kinatured ita?

¹¹ Gapu iti agdama a kasasaad ti lubong, anian a naintiempuan nga ipangag ti bassit nga ipastoran ti sasao ni Jesus a naiturong kadakuada: “Dikay agbuteng, bassit nga ipastoran”! Nasken ti kasta a kinatured gapu iti amin a mapaspasamak ita a maitunos iti panggep ni Jehova. Bigbigen ti tunggal maysa iti bassit nga ipastoran ti pannakasapul nga agibtur agingga iti panungpalan. (Lucas 21:19) Kas ken Jesu-Kristo, ti Apo ken Akinkukua iti bassit nga ipastoran, a nagibtur ken nagtalinaed a matalek agingga iti ngudo ti naindagaan a panagbiagna, masapul met nga agibtur ken agtalinaed a matalek ti tunggal maysa iti natda.​—Hebreo 12:1, 2.

12. Kas ken Jesus, kasano a binalakadan ni Pablo dagiti napulotan a Kristiano a saanda nga agbuteng?

¹² Masapul a ti panangmatmat dagiti amin a napulotan ket kas iti panangmatmat ni apostol Pablo. Paliiwenyo no kasano a maitunos dagiti saona kas napulotan a publiko a manangiwaragawag iti panagungar iti pammagbaga ni Jesus a di agbuteng. Insurat ni Pablo: “Laglagipem a ni Jesu-Kristo napagungar kadagiti natay ken nagtaud iti bin-i ni David, sigun iti naimbag a damag nga ikaskasabak; a pagsagsagabaak iti dakes agingga iti punto a pannakaparparaut iti pagbaludan kas maysa a managaramid iti dakes. Nupay kasta, ti sao ti Dios di naparautan. Gapu itoy itultuloyko nga ibturan ti isuamin a bambanag maipagapu kadagiti napili, tapno magun-odanda met ti pannakaisalakan a naikaykaysa ken Kristo Jesus agraman ti agnanayon a dayag. Matalek ti pagsasao: Pudno unay a no nataytayo a sangsangkamaysa, agbiagtayto met a sangsangkamaysa; no agtultuloytayo nga agibtur, agturaytayto met a sangsangkamaysa kas ar-ari; no ilibaktayo, ilibaknatayto met; no saantayo a matalek, isu agtalinaed a matalek, ta dina mabalin nga ilibak ti bagina.”​—2 Timoteo 2:8-13.

13. Ania a natibker a pammati ti ik-ikutan dagiti kameng ti bassit nga ipastoran, ket tignayenna ida daytoy a mangaramid iti ania?

¹³ Kas ken apostol Pablo, situtulok dagiti natda a kameng ti napulotan a bassit nga ipastoran nga agibtur iti panagsagaba bayat nga iwarwaragawagda ti nabileg a mensahe a nailanad iti Sao ti Dios. Nauneg ti pannakairamut ti pammatida bayat nga itultuloyda ti agtalek iti inkari ti Dios a pannakaisalakan ken panangawatda iti “balangat ti biag” no agtalinaedda a matalek agingga ken patay. (Apocalipsis 2:10) Babaen ti giddato a panagungar ken panagbalbaliwda, maikaykaysadanto ken Kristo, tapno makipagturay kenkuana kas ar-ari. Anian a panagballigi gapu iti kinatarnawda kas manangparmek iti lubong!​—1 Juan 5:3, 4.

Naisangsangayan a Namnama

14, 15. Kasano a naisangsangayan ti namnama iti panagungar ti bassit nga ipastoran?

¹⁴ Naisangsangayan ti namnama iti panagungar a mapasaran ti bassit nga ipastoran. Kadagiti ania a pamay-an? Umun-una a mapasamak dayta ngem ti pangkaaduan a panagungar “dagiti nalinteg ken dagiti nakillo.” (Aramid 24:15) Kinapudnona, adda masnup nga urnos ti panagungar dagiti napulotan sigun iti kinapateg, kas silalawag nga ipakita dagitoy a sasao a masarakan iti 1 Corinto 15:20, 23: “Ni Kristo napagungaren kadagiti natay, ti umuna a bungbunga kadagidiay nakaturog ken patay. Ngem tunggal maysa iti bukodna a saad: ni Kristo ti umuna a bungbunga, kalpasanna dagidiay kukua ni Kristo kabayatan ti kaaddana.” Babaen ti kaadda ti kita ti panagibtur ken pammati a kas iti imparangarang ni Jesus, ammo ti bassit nga ipastoran no aniat’ agur-uray kadakuada inton maturposda ti biagda ditoy daga, nangruna nanipud immay ti pudno nga Apo iti templona idi 1918 tapno mangukom.​—Malakias 3:1.

¹⁵ Ikkannatay ni Pablo iti kanayonan a rason a mangmatmat iti daytoy a panagungar kas naisangsangayan. Kas nailanad iti 1 Corinto 15:51-53, insuratna: “Adtoy! Ibagak kadakayo ti maysa a sagrado a palimed: Ditayto maturog amin ken patay, no di ket mabaliwantayto amin, iti apagkanito, iti panagkirem ti mata, kabayatan ti kamaudianan a trumpeta. . . . Ta daytoy nga agrupsa masapul nga agkawes iti di panagrupsa, ket daytoy nga addaan ipapatay masapul nga agkawes iti kinaawan ipapatay.” Agaplikar dagitoy a sasao kadagidiay kameng ti bassit nga ipastoran a matay kabayatan ti kaadda ni Kristo. Tangay di kasapulan a maturogda ken patay iti napaut a tiempo, makawesanda iti imortalidad, “iti apagkanito, iti panagkirem ti mata.”

16, 17. Maipanggep iti namnamada iti panagungar, kasano a naparaburan unay dagiti napulotan a Kristiano itatta?

¹⁶ Iti lawag daytoy a pannakaawat, matarusantayo ti kaipapanan dagiti sasao ni apostol Juan a masarakan iti Apocalipsis 14:12, 13. Insuratna: “‘Ditoy a kaipapananna ti panagibtur dagiti sasanto, dagidiay mangalagad kadagiti bilin ti Dios ken iti pammati ken Jesus.’ Ket nangngegko ti maysa a timek manipud langit a kunana: ‘Isuratmo: Naragsak dagiti natay a matay a maikaykaysa iti Apo manipuden itoy a tiempo. Wen, kuna ti espiritu, bay-anyo ida nga aginana manipud kadagiti panagbannogda, ta dagiti bambanag nga inaramidda kumuyog a mismo kadakuada.’”

¹⁷ Anian a naisangsangayan a gunggona ti agur-uray kadagiti natda iti bassit nga ipastoran! Insigida ti panagungarda, kalpasan la unay ti pannaturogda ken patay. Anian a nakaskasdaaw a panagbalbaliw ti mapasaranda inton awatenda ti annongenda iti lugar dagiti espiritu! Gapu iti kasta nga agdama a pannakaipadayag ti bassit nga ipastoran ken iti asidegen a pannakatungpal dagiti kangrunaan a padto ti Biblia, pudno a ‘di [rumbeng] nga agbuteng’ dagiti maudi a natda a kameng ti bassit nga ipastoran. Ket ti kinaturedda agserbi a pammaregta kadagiti kameng ti dakkel a bunggoy, a nasken met a di agbuteng bayat nga ur-urayenda ti pannakaispalda inton dumteng ti kadadaklan a tiempo ti riribuk ditoy daga.

18, 19. (a) Apay a nagpateg ti tiempo a pagbibiagantayo? (b) Apay a di rumbeng nga agbuteng agpadpada dagiti napulotan ken dagiti sabsabali a karnero?

¹⁸ Ti panangisarsarita kadagiti aktibidad ti bassit nga ipastoran tulonganna ida ken ti dakkel a bunggoy nga agtultuloy nga agbuteng iti pudno a Dios. Dimtengen ti oras a panangukomna, ket nagpateg ngarud ti natda a nasayaat a tiempo. Kinapudnona, bassiten ti tiempo a panagtignay dagiti dadduma. Nupay kasta, ditay mabuteng a mapaayto ti panggep ti Dios. Sigurado nga agballiginto dayta!

¹⁹ Mangmangngeganen ti natbag a timek sadi langit nga agkunkuna: “Ti pagarian ti lubong nagbalinen a pagarian ni Apotayo ken ni Kristona, ket agturayto kas ari iti agnanayon ken awan inggana.” (Apocalipsis 11:15) Wen, iturturong ti Naindaklan a Pastor, ni Jehova, dagiti amin a karnerona kadagiti “dana ti kinalinteg a gapu iti naganna.” (Salmo 23:3) Awan biddut a maiturturong ti bassit nga ipastoran iti nailangitan a gunggonada. Ket maispalto a sitatalged dagiti sabsabali a karnero iti dakkel a rigat tapno tagiragsakenda ti biag nga agananayon iti naindagaan a sakup ti nadayag a Pagarian ti Dios iti sidong ti panagturay ni Kristo Jesus. Gapuna, nupay naiturong dagiti sasao ni Jesus iti bassit nga ipastoran, awan duadua nga adda rason dagiti amin nga adipen ti Dios ditoy daga a mangipangag iti sasaona a: “Dikay agbuteng.”

Mailawlawagyo Kadi?

◻ Apay a namnamaentayo a bumassit ti bilang dagiti natda [a kameng] ti bassit nga ipastoran?

◻ Aniat’ kasasaad dagiti napulotan a natda itatta?

◻ Apay a di rumbeng nga agbuteng dagiti Kristiano, iti laksid ti umas-asideg nga iraraut ni Gog ti Magog?

◻ Apay a naisangsangayan ti namnama iti panagungar dagiti 144,000, nangnangruna itatta?