Biag Idi Tiempo ti Biblia​—Ti Mannalon

“Idin kinuna [ni Jesus] kadagiti adalanna: ‘Wen, dakkel ti anien, ngem bassit dagiti trabahador. Ngarud, ipakaasiyo iti Apo ti panagani a mangibaon kadagiti trabahador iti panaganina.’”​—MATEO 9:37, 38.

MASANSAN a nangdakamat ni Jesus kadagiti pamay-an ken alikamen ti panagtalon tapno iyilustrarna dagiti napapateg a sursuro. (Mateo 11:28-30; Marcos 4:3-9; Lucas 13:6-9) Apay? Panagtalon ngamin ti kangrunaan a trabaho dagiti kalugaranna. Adu kadagiti dimngeg kenkuana ti mangsursurot kadagiti nabayagen a pamay-an ti panagtalon. Natarusanda ti imbagana idi tinukoyna ti inaldaw nga ar-aramiden ti mannalon. Maawatanna ti kasasaadda isu a natignayda kadagiti punto nga insurona.​—Mateo 7:28.

Nalaklaka a matarusantayo dagiti ilustrasion ni Jesus ken ti dadduma pay a salaysay iti Biblia no adda ammotayo maipapan iti panagtalon idi umuna a siglo​—dagiti immulada, dagiti alikamen nga inaramatda, ken dagiti napasaranda a rigat.

Buyaem ti maysa a mannalon a mangas-asikaso iti trabahona. Basaem dagiti naisitar a teksto, ken kitaem no ania ti masursurom.

Tiempo ti Panagmula

Agtaktakder ti mannalon iti ruanganna ken saysay-upenna ti angin bayat a linglingdanna dagiti matana iti siray ti sumingsingising nga init. Limmuknengen ti natangken a daga gapu iti tudo. Panawenen ti panagarado. Ibaklay ti mannalon ti aradona ket sumalog iti talonna.

Ukodenna dagiti bakana, ipakona ida, ken iruginan ti agarado. Ipakanna ti aradona iti natangken a daga ngem narabaw laeng ti araduenna (1). Siguraduen ti mannalon a nalinteg dagiti gulisna isu a saan a tumaliaw iti likudan. (Lucas 9:62) Saan a lumbes iti tambak ket awan sayangenna iti bassit a talonna.

Nakasaganan a mamulaan ti naarado a talon. Mangawit ti mannalon iti sangasupot a sebada ket ipuruakna dagiti bin-i (2). Siguraduenna a saan a maregreg dagiti bin-i iti natangken a daga a mapagpagnaan no di ket iti “naimbag a daga.”​—Lucas 8:5, 8.

Kalpasanna, masagád ti daga. Mangala ti mannalon iti siitan a sangsanga nga iparingguyod dagiti bakana iti talon. Sakbay a magaburan dagiti bin-i, umarak dagiti tumatayab a mangtuktok iti dadduma a bukel. Inton agangay, agusar ti mannalon iti gabion (3) tapno maburak ti daga ken maparut dagiti ruot a mangleppes kadagiti nakatubon a bin-i.​—Mateo 13:7.

Tiempo ti Panagani

Limmabas ti sumagmamano a bulan ket agtudon. Maipalpallayog dagiti natangkenanen a sebada a mamagbalin a kasla puraw ti buya ti taltalon.​—Juan 4:35.

Okupado ti mannalon ken ti pamiliana bayat ti panagani. Petpetan ti agani dagiti pinuon ti sebada ket gapasenna babaen iti iggemna a kumpay (4). Adda met mangummong kadagiti nagapas, reppetenda dagita (5), iluganda kadagiti asno wenno kareson (6) tapno maipan kadagiti pagirikan.

No agmatuonen, aginana biit ken aglinong ti pamilia iti sirok ti kayo nga higos. Agkakatawa ken agsasaritada bayat a mangaldawda iti tinapay, nakirog a bukbukel, olibo, nabilag nga higos, ken pasas, sadanto uminum iti nalamiis a danum ti ubbog.​—Deuteronomio 8:7.

Iti kaabayna a talon, adda dagiti agádas iti naggapasan (7). Dadduma ti napanglaw ken awanan iti daga.​—Deuteronomio 24:19-21.

Kalpasanna, iti pagirikan ti purok, iwaras ti mannalon ti binettek a sebada iti nasedsed a daga. Guyoden ti baka ti nadagsen a pasagad bayat nga agrikusrikus iti pagirikan (8). (Deuteronomio 25:4) Maputedputed dagiti nagapas gapu kadagiti natadem a bato ken landok a naikapet iti sirok ti pasagad.

Urayen ti mannalon ti pul-oy ti angin iti sardam. (Ruth 3:2) No sumipngeten, mangala iti dakkel a kayo a tinidor wenno ‘suplad a pagtaep’ (9), ket ipallatokna iti angin dagiti nairik nga ungkay. (Mateo 3:12) Matinnag dagiti irik ngem mayangin dagiti garami. Ulit-ulitenna dayta agingga a madalusan amin nga irik.

No sumingisingen ti init, agyakayaken ti ina ken ti annakna a babbai (10). Maregreg iti labba dagiti binukel ti sebada, ngem maibelleng dagiti taep. Adu ti apit, isu a maikabil dagiti sobra a binukel kadagiti burnay (11). Maidulin ti dadduma nga apit kadagiti abut a pagurnongan iti bukbukel.

Iti pagirikan, tumakder ti mannalon tapno unnatenna ti bukot ken dagiti nabannog a piskelna. Saripatpatanna dagiti talon iti aglawlaw ket maragsakan a makakita kadagiti naggapasan, nga ebidensia iti adu nga aldaw a panagbannogna. Buyaenna met dagiti trabahador a mangas-asikaso kadagiti kaubasan ken kaolibuan, agraman dagiti kayo a granada ken higos. Kumablaaw kenkuana ti maysa nga agtartrabaho iti asideg a pagmulaan iti natnateng​—kas iti pipino, lentehas, bukbukel, kutsay, garbansos, ken lasona. Agsarimadeng ti mannalon, kumita iti tangatang, ket naimpusuan nga agkararag kas panagyamanna iti naimbag a sagut ti Dios kenkuana.​—Salmo 65:9-11.

[Dagiti Ladawan iti panid 28-30]

(Kitaem ti publikasion)