Awaten Tulong ti Dios a Mangparmek kadagiti Nalimed a Basbasol

“Mabalinak dagiti amin a bambanag gapu iti daydiay mamapigsa kaniak.”​—FILIPOS 4:13.

 1. Ania a kalikagum ti inaramid ti maysa a maseknan nga ama?

TI AGTUTUBO a lalaki ket epeliptiko.a Naglabutab ti bibigna, agkumbolsion pay, ket no maminsan matnag iti danum wenno iti apuy. Ti aburido nga amana ti nangsapul ti maysa a tao nga agdindinamag iti panangagasna kadagiti masakit. Idi a kasla adda panagkurang iti talekna iti abilidad daydi a lalaki, nagikkis ti ama: “Mamatiak! Tulongam ti kurang ti pammatik!”

 2. Kasanotay a makasiguro a kayat ti Dios a tulongannatayo a mangparmek kadagiti basbasoltayo?

² Makaadaltayo manipud iti daytoy nga ama a nangsapsapul ti tulong ni Jesus. Inamin ti ama a ti pammatina ti mabalin nga agkurang; isut’ makasiguro met a kayat ni Jesus ti tumulong. Mabalin a kasta met kadatayo, bayat a maipasangotayo kadagiti kabukbukodantayo a biddut​—agraman dagiti nalimed​—ken padpadasentay a parmeken. Mabalintay ti agtalek a ni Jehova a Dios kayatna ti tumulong kadatayo, kas panangtulongna kadagiti dadduma kadagiti napalabas nga aldaw. (Idiligyo ti Marcos 1:40-42.) Isu, kas pangarigan tinulonganna ni apostol Pablo a nangparmek kadagiti biddutna a timmaud gapu iti kinaaglaplapusanan wenno iti panagkurang. Ti tao a napanglaw mabalin a tarigagayanna ti kinabaknang; ti biddut ti maysa a tao a nabaknang mabalin a gapu iti sitatangsit a panagtalekna iti balligina ken ti nababa a panagkitana kadagidiay napanglaw. (Job 31:24, 25, 28) Kasano a pinarmek wenno liniklikan ni Pablo dagita a biddut? Kunana: “Mabalinak dagiti amin a bambanag gapu iti daydiay mamapigsa kaniak.”​—Filipos 4:11-13.

 3. Apay a nainsiriban kadatayo ti panangpadpadas a parmeken dagiti pagkapuyantayo?

³ Babaen ti pannakabalin ti Dios, nainsiribantayo no intay itrabaho ti panangparmek kadagiti bidbidduttayo, a ditay laglag-anen ida gapu laeng ta iti agdama dagitat’ mailimed. Kuna ti salmista ken Jehova: “Ta isu ammona dagiti palimed ti puso.” (Salmo 44:21) No ditay parmeken dagiti bidduttayo, mabalin a tumpuardanto nga agpaay iti dakdakkel a pakadangranantayo. Agaplikar ti prinsipio a: “Dagiti basbasol dagiti dadduma a tattao addada a nalawagen, a mangiturong kadakuada iti pannakaukom, ngem kadagiti dadduma sumarunoda maiparangarangdanto met.” (1 Timoteo 5:24) Usigentayo dagiti dua a gagangay a biddut a maikari iti atension dagiti Kristiano a tarigagayanda ti agbalin a makaay-ayo ken Jehova.

Ti Nalimed a Biddut a Ramanenna ti Seksual a Tarigagay

 4, 5. (a) Ti Biblia idatagna ti ania a natimbeng a panangmatmat iti seksual a tarigagay? (b) Ania a pakdaar ti masarakantayo iti Kasuratan maipapan iti seksual a tarigagay?

⁴ Maysa kadagiti kasasayaatan a sagut ti Dios isu ti panagasawa. agraman ti abilidad ken tarigagay nga agpaadu. (Genesis 1:28) Ti seksual a tarigagay a maiyebkas iti relasion ti panagasawa ket natural ken nadalus. Komendaran ti Biblia ti panangsapul ti seksual a panagragsak babaen iti asawa ti maysa. (Proverbio 5:15-19) Nupay kasta, ti seksual a tarigagay ket saan a mabalin a palubosan a di mamedmedan. Kas maysa a panangidilig, usigenyo ti tarigagaytayo iti taraon. Saan a gapu ta addaantay ti agsubsubli a tarigagay wenno gana dina kayat a sawen a rebbeng a mangpataudtayo iti aglaplapusanan a panagtarigagay iti taraon, wenno saantayon a medmedan no kaano, sadino, ken no kasano ti pannangantayo.​—Proverbio 25:16, 27.

⁵ Nalabit a naminsan nangasawa ni Pablo ket ammona a ti normal a panangyebkas iti nagbaetan dagiti agassawa ti maiyanatup. (1 Corinto 7:1-5) Gapuna nalabit adda banag a tuktukoyenna a sabali idi nga insuratna: “Papatayenyo, ngarud, dagiti kamkamengyo nga adda iti rabaw ti daga nga isuda ti pannakikamalala, ti kinarugit, dagiti derrep, dagiti dakes a tarigagay, ken ti agum.” (Colosas 3:5) Nalabit kayatna a sawen dagiti seksual a panangiyebkas iti ruar ti umiso nga urnos ti panagasawa ken ti kabaelan ti maysa. Kuna pay met ti apostol: “Tunggal maysa kadakayo ammona koma a salimetmetan ti bagina met laeng a mabuyogan ti kinasanto ken kinadayaw, saan a ti tarigagay ti derrep.” (1 Tesalonica 4:4, 5) Daytoy a prangkesa, napaltiingan a balakad ti makagunggona nga agpadpada kadagiti Kristiano nga addaan asawa wenno agwaywayas.

 6. Apay a nainkalintegan ti panangliklik dagiti Kristiano iti panangabuso iti bagi?

⁶ Maysa a pamay-an a ti kasta a “derrep ti nailasagan a tarigagay” (1 Tesalonica 4:5, The New Testament for English Readers, ni Henry Alford) masansan maiyebkas babaen ti panangparasuk ti maysa a lalaki wenno babai ti kabukbukodanna a seksual a mabagbagi a maipaay iti ganas a ramanenna. Daytoy ti maaw-awagan masturbesion, wenno panangabuso iti bagi. Daytat’ gagangayen kadagiti babbaro ken babbalasang. Ngem daytat’ ar-aramiden met dagiti adu a kasado a tattao. Gaput’ kinagagangayna daytat’ nangiturong kadagiti adu a doktor a nagkuna a daytat’ normal ken makagunggona pay. Nupay kasta, daytoy nga aramid ti maikontra iti balakad ti Dios maipapan ti “tarigagay ti derrep.” Ad-adda a maapresiartay no apay, ken no apay a rebbeng a parmeken dagiti Kristiano dayta a bisio babaen ti panangusig ti dadduma a balakad nga inted ni Jesus.

 7. Kasano a ti Mateo 5:28 mangipaay iti kanayonan a rason iti intayo iyaadayo manipud masturbesion?

⁷ Kinuna ni Jesus: “Uray siasino a mangmatmat iti maysa a babai tapno gartemanna, nakiabigen kenkuana iti pusona.” (Mateo 5:28) Ammona a dinederrep a pampanunot ti pannakikamalala ti masansan a pangrugrugian dagiti imoral nga ar-aramid. Kaskasdi, uray pay dagidiay laglag-anenda wenno palubosanda ti masturbesion admitirenda a masansan ramanen dayta dagiti seksual a panagar-arapaap. Kalpasan ti panagsaona maipapan kadagiti agtutubo a “gagaraenda ti ganas nga iyeg ti masturbesion kadakuada,” ti libro a Talking With Your Teenager innayonna: “Mabalin a pampanunotenda dagiti bagbagida nga addada iti maysa a nakaro a seksual a kasasaad wenno kadagiti kadua ti isu met laeng a sekso wenno dagiti natataengan a tattao a kas dagiti mannursuro, kabagian, wenno uray pay dagiti [nagannakda]. Mabalin nga adda panagar-arapaapda maipapan iti seksual a kinaranggas. Amin daytoy naan-anay a normalda.” Ngem agpayso aya daytoy? Kasano a maibilang dagiti Kristiano dagita nga ar-arapaap ken ti masturbesion a “normal” iti lawag dagiti pakdaar ni Jesus maipapan iti ‘pannakikamalala iti puso’ wenno ti balakad ni Pablo a maibusor iti “tarigagay ti derrep”? Saan, dagita nga ar-arapaap ken ti panangabuso iti bagi​—agtutubo man wenno nataengan, ti agwaywayas wenno ti kasado​—masapul a maparmek.

Panangparmek iti Daytoy Pribado a Basol

 8, 9. Ti panangapresiar kadagiti ania a kinapudno ti makatulong ti maysa a tao a mangparmek iti bisio ti masturbesion?

⁸ No ti maysa a Kristiano addaan iti daytoy nalmeng a basol, aniat’ maaramidanna a mangparmek iti dayta, “tapno salimetmetanna ti bagina met laeng a mabuyogan iti kinasanto ken kinadayaw”? (1 Tesalonica 4:4) Babaen iti Saona, mangipaay ti Dios kadagiti napateg a tulong.

⁹ Umuna nasken a bigbigen a ni Jehova addaan kadagiti pagalagadan. Pinagbalinna a nabatad iti kinadakes iti sekso iti ruar ti panagasawa, agpadpada ti pannakiabig ken pannakikamalala. (Hebreo 13:4) Gapuna, no patientayo a dagiti daldalanna ti kasayaatan, sapulentayo ti makapnek a gunggona iti seksual a panangiyebkas laeng iti las-ud ti panagasawa. (Salmo 25:4, 5) Ti libro nga Adolescence, ni E. Atwater, itudona a ti masturbesion, masansan dagiti agtutubo ‘saanda a matagtagari, mababainda ken agdandanag.’ Maysa a rason a naited a ta ‘ti kinasinged ti relasion ti ayat a mabuyogan iti seksual a panagdenna ti kurang iti masturbesion.’ Wen, adda gunggona iti panangmedmed iti seksual a tarigagay agingga a daytoy ti maiyebkas iti naayat a relasion ti panagasawa.

10. Aniat’ sumagmamano nga addang a maala ti maysa a Kristiano a mangtulong iti bagina a mangparmek iti dayta nga aramid?

¹⁰ Mangipaay met ti Sao ti Dios ti kanayonan a tulong babaen ti panangibalakadna: ‘Aniaman a bambanag a napudno, aniaman a bambanag a nadayaw, aniaman a bambanag nalinteg, aniaman a bambanag a nadalus, aniaman a bambanag a makaay-ayo, aniaman a bambanag a naimbag ti damagda, no adda aniaman a kinasingpet, ken no adda aniaman a kinadayaw, panunotenyo dagitoy a bambanag.’ (Filipos 4:8) Nalawag, dagiti makapaderrep a ladladawan ken dagiti narugit a nobela saanda a ‘nadalus ken saanda a makaay-ayo.’ Kaskasdi dagitoy a bambanag ti masansan taraon dagiti manangabuso ti bagida. Asinoman a determinado a mangparmek iti daytoy a basol masapul, ngarud, a liklikanna a naan-anay dagita makapaderrep a material. Pinaneknekan ti kapadasan a no ti tartarigagay ti maysa a tao mangrugin a mangallukoy iti kinaderrep iti pamay-an nga iti napalabasen nagbunga iti masturbesion, ti determinado a panangipamaysa iti panunotna iti banag a nalinteg ken nadalus ti mangpalamiis kadagita a tartarigagay. Nangnangruna a napateg daytoy no ti maysa a tao ket agmaymaysa wenno adda iti nasipnget a lugar, inton dagiti nalmeng a basol ti panangabuso ti bagi ti gagangay.b​—Roma 13:12-14.

11. Ilawlawag dagiti kanayonan a bambanag a napaneknekan a makagunggona iti panangparmek iti daytoy a basol.

¹¹ Ti mainaig pay a tulong isut’ panagbalin nga aktibo maitunos iti pammagbaga a: “Kitaenyo ngarud a siaannad no kasano ti pannagnayo, saan a kasla nakuneng no di ket kasla masirib, a kailalaanyo ti gundaway a panagaramid ti naimbag, ta dagiti al-aldaw dakesda.” (Efeso 5:15, 16) Agsaludsodkayo iti maysa a nataengan a Kristiano a mabalinyo a pagtalkan a maipaay kadagiti singasing kadagiti positibo a bambanag nga aramiden. (Isaias 32:2) Adu kadagiti nakaparmek kadagitoy a basol admitirenda a ti pannakaammoda iti maysa a maseknan a Kristiano nga isu ti agsitarto kadakuada maipapan iti irarang-ayda ti nakatulong kadakuada a nakapataud iti panagteppel. Siempre, Daydiay rebbeng nga asitgan koma a pagmatalkantayo isu ni Jehova. Gapuna nasken ti agturong kenkuana iti kararag, a biruken ti tulongna. (Filipos 4:6, 7) No daydiay makidangdangadang iti daytoy a basol iti sumagmamano a panawenen ket “maitibkolto,” mabalinna a dawaten ti pannakabalin ti Dios, kalpasanna mabalinnanto a pabaruen ti panagreggetna ket nalabit agballiginto manen, a maipaay iti mabaybayag a tiempo.​—Hebreo 12:12, 13; Salmo 103:13, 14.

Pannakidangadang iti Panangabuso iti Alkohol

12. Ania ti Nakristianuan a panangmatmat kadagiti inumen a de alkohol?

¹² ‘Ti arak liwliwa ti Dios ken kadagiti tattao,’ kuna ti maysa a bersikulo ti Biblia. (Oc-ocom 9:13) Nalabit umanamongkayo, ta ti inumen a de alkohol maysa a katulongan iti pannakainana ken gubuayan ti ragsak para kadagiti adu. (Salmo 104:15) Mammano ti mangilibak, nupay kasta, a ti panagusar ti alkohol ti mangisarang nga agpadpada kadagiti pisikal ken moral a peggad. Ti kangrunaan a problema isu ti nakaro a panagbartek. Daytoy a basol ti serioso unay ta ti Dios namakdaar a dagiti mammartek maikkatdanto manipud iti kongregasion ket didanto makastrek iti Pagarian. (1 Corinto 5:11-13; Galacia 5:19-21) Silalagip dagiti Kristiano iti daytoy ket umanamongda a masapul a liklikanda ti pannakabartekda. Ngem, malaksid iti pannakabartek, kasano a ti panagusar ti alkohol ket agbalin a maysa a nalmeng a basol?

13. Iyilustraryo no kasano a tumanor ti panagpannuray iti alkohol.

¹³ Ti Kristiano mabalinna ti uminum a sititimbeng, kaskasdi mabalin nga addaan iti nalmeng a basol. Usigenyo ti kapadasan ti maysa a lalaki nga awagantayo ti Heinz.

Isu, ti asawana, dagiti annakna nagbalinda a pudno a Kristiano ken aktiboda unay iti lokal a kongregasion. Idi agangay nadutokan ni Heinz a panglakayen ket nagbalin a mamatmatmatan kas ‘sadiri’ kadagiti kongregasion ti siudad. (Galacia 2:9) Kaawatan, isut’ naipasango kadagiti adu a rigat iti panangpadakkel ti pamilia ken panagagawa iti panangaywan ti arban. (2 Corinto 11:28) Ti trabahona, nupay kasta, ti nangyeg kenkuana ti adu a danag agsipud ta ti kompania a pagtartrabahuanna ket dakkel ket kayat ti amona nga isut’ mangtaming kadagiti nagadu a parparikut ken pangngeddeng.

Adu a rabii ni Heinz ti medio madanagan. Nasarakanna a ti isusukmon maminsan wenno mamindua ti makatulong kenkuana nga agkalma. Siempre, kas nataengan a Kristiano siaannad a lisianna ti panaginumna ti nalabes wenno ti mabartek. Numan pay isu ti umin-inum tapno kumalma no dumanon ti rabiin, saanna a kasapulan ti alkohol bayat ti aldaw, wenno saan met nga agin-inum iti kaaduan kadagiti pannangan. Isut’ saan a pagaammo a ‘managinum ti adu nga arak.’​—1 Timoteo 3:8.

Pagaammuan latta a ni Heinz naospital a maipaay iti gagangay nga operasion. Addada nagparang a karkarna a sintomas. Ania ti makagapu kadagita? Saan a nabayag nga inkeddeng ti kameng medikal a ni Heinz aglaklak-am iti withdrawal symptoms. Wen, ti bagina nagbalinen a managpannuray iti alkohol. Dimteng daytoy a kas kellaat iti pamiliana, ngem nagtitinnulongda ket sinuportaranda ti pangngeddengna a liklikannan a naan-anay ti alkohol.

14. Aniat’ mabalin a mangiturong iti panagbalin a marabrabak babaen iti inumen a de alkohol?

¹⁴ Dadduma naawatanda a ti alkohol ti nangalan iti karkarna a paset iti panagbiagda, gapuna padpadasenda nga ilemmeng ti panaginumda, a dida kayat nga ipakaammo kadagiti pamiliada ken gagayyemda no kasano kaadu ti in-inumenda wenno kasano kasansan. Mabalin a marikna dagiti dadduma a saanda met a managpannuray iti alkohol, kaskasdi, ti panaginum ket nagbalinen a sentro ti agmalem a panagbiagda. Dagidiay adda kadagitoy a kategoria addada iti dakkel a risgo iti panaginum iti aglablabes iti dadduma nga okasion wenno ti panagbalinda a nalimed nga alkoholiko. Usigenyo daytoy a proverbio: “Ti arak mangrabrabak, ti naingel nga inumen managringringgor, ket siasinoman a mailaw-an kenkuana saan a masirib.” (Proverbio 20:1) Ti punto a ta ti nalabes a panaginum pagbalinenna ti maysa a tao nga agtignay kas managringgor ken agbalin a pagkakatawaan. Nupay kasta, ti arak mabalin a rabrabakenna ti maysa iti sabali pay a kaipapanan. Ti tao maikari iti panangrabrabak no panunotenna a ti panaginumna mailingedna iti Dios.

15. Kasano a dagiti sasao ni Pablo idiay 1 Corinto 9:24-27 adda kaipapananna iti panagusar ti Kristiano iti alkohol?

¹⁵ Maysa kadagiti bunga iti espiritu ti Dios isu ti panagteppel, ket kasapulantay dayta iti amin a paset ti panagbiag. (Galacia 5:22, 23) Inyarig ni Pablo ti Kristiano iti maysa a tumataray. Iti normal wenno gagangay a lumba ti tumataray “agparbeng kadagiti isuamin a bambanag” tapno “magun-odanna ti maysa a balangat nga agrupsa.” Umas-asping met, kasapulan nga ipamatmat dagiti Kristiano ti “panagparbeng kadagiti isuamin a bambanag” tapno magun-odanda ti gunggona a dakdakkel ti pategna​—ti BIAG. Impaganetget ni Pablo nga ‘iturongtay dagiti bagbagitayo kas maysa nga adipen’ tapno masiguro a ‘kalpasan ti panangaskasabatayo kadagiti dadduma ditayto met mapagtalaw,’ gapu iti nalmeng a basol a ramanenna ti alkohol.​—1 Corinto 9:24-27.

16. Kasano a maikeddeng ti maysa a tao no ti alkohol ket nagbalinen a basol iti kasona?

¹⁶ Aniat’ makatulong iti maysa a Kristiano a mangtaming iti daytoy a basol? Makatulong ti panangapresiar a numan pay mailemmeng ti panaginumna manipud kadagiti dadduma a tattao, dina mailinged dayta iti Dios. (1 Corinto 4:5) Gapuna, sipupudno​—iti imatang ti Dios​—ti maysa a tao panunotenna koma ti maipapan kadagiti ugalina iti panaginum. (Kayatmi a sawen ti panaginum a maipaay iti panagragragsak wenno epektona, saan a ti bassit a kantidad a kas gagangay nga inumen a kadua ti pannangan.) Dadduma, nupay kasta, mabalin a kunaenda, ‘Ngem saanak met nga agin-inum. Pagragragsakak dayta; daytat’ mamagkalma kaniak. Mabalinko a sardengan dayta no kayatko.’ Bueno, gapu kadagiti manamnama a peggad ti nalabes a panaginum wenno panagpannuray iti alkohol, apay a dikay aramiden dayta uray iti maysa wenno dua? Wenno, yantangay adda ti napigsa a pagannayasan a mangilibak nga adda ti problema, ikeddengyo nga iti makabulan lisianyo dayta no ti panaginum ket gagangayen a banag. Kas pangarigan, ti tao a masansan nga aginum kalpasan trabahona, sakbay a maturog, wenno kadagiti sosial a panagtataripnong maliklikan dayta. Ket mabalinna a makita no kasano ti panagriknana. No narigat dayta, wenno dina ‘mabalin ti agkalma,’ isut’ addaan iti serioso a basol.

17. Apay a ti Kristiano nga addaan ti nalmeng a basol a ramanenna ti alkohol pagreggetanna a parmeken dayta?

¹⁷ Apaman a mabigbig iti maysa a napasnek a Kristiano iti imatang ti Dios nga isut’ addaan iti biddut a ramanenna ti alkohol, nalaklaka para kenkuana a parmeken dayta. Mabalin nga ammona ti kuna ti Biblia a ti ‘nanengneng’ irasrasonna a ‘dagiti tinakaw a danum nasam-itda, ket ti tinapay [wenno alkohol] nga innala a sililimed​—daytat’ naimas.’ Nupay kasta, dagiti kakasta, kuna ti Proverbio, ti mabalin nga agtungpal nga awan gawgawayda ken patay. Maisupadi iti dayta, ti nasirib ayatenna ti pannakatubngar, ket siraragsak a ‘panawanna ti kinanengneng ket agtultuloy a sibibiag babaen ti pannagnana a sililinteg iti dana ti pannakaawat.’ (Proverbio 9:1, 6, 8, 13-18) Wen, tulongannatayo ti Dios a mangparmek kadagiti nalmeng a basol babaen ti panangipakaammona kadatayo no ania ti adda iti masanguanantayo, no ania dagiti pagbanagan nga iyegna.

Gunggonaan ti Dios dagiti Pribado nga Ar-aramid

18. Bayat a parparmekentayo dagiti nalmeng a basbasoltayo, iti ania ti mabalintay a pagtalkan? (Proverbio 24:12; 2 Samuel 22:25-27)

¹⁸ Dadduma a tattao agbibiagda a sibubuteng a dagiti dakes nga ar-aramidda ti maduktalanto, babaen iti tao wenno babaen iti Dios. Saan koma a kasta kadatayo. Imbes ketdi, agbiagtayo koma a sipupuot nga awan ti mailingedtayo Kenkuana, “ta ti pudno a Dios iyegnanto ti tunggal aramid iti pannakaukom agraman tunggal nailemmeng a banag no isut’ naimbag wenno dakes.” (Eclesiastes 12:14) Awatentay koma ti tulong ni Jehova tapno maparmekna dagiti basbasoltayo, uray pay no dayta nailemmengda. Mabalintayto ti kumita iti masanguanan inton maipanayagto iti lawag “dagiti nailemmeng a banag iti sipnget” ken “iparangarangdanto ti panagem dagiti puspuso.” “Ket iti dayta addanto dayaw iti tunggal maysa iti Dios.”​—1 Corinto 4:5; Roma 2:6, 7, 16.

[Dagiti Footnote]

Malagipyo Pay Aya?

◻ Kasanot’ panagrikna ti Dios maipapan kadagiti nalmeng a basbasol a mabalin nga ar-aramidentayo?

◻ Ania a Nainkasuratan a balakad ti mangipamatmat a ti panangabuso iti bagi ti rebbeng a liklikan?

◻ Kasano a maparmek ti maysa a Kristiano ti ugali a panangabuso ti bagi?

◻ Yantangay ti Biblia saanna a kondenaren dayta, kasano a ti panagusar ti alkohol agbalin a nalmeng a basol?

◻ Ania a nainsiriban nga addang ti mabalin nga alaen no tamingen ti pribado a basol a ramanenna dagiti inumen a de alkohol?

[Kahon iti panid 17]

Naparmekna ti Panangabuso ti Bagi

KAS MAYSA NGA AGTUTUBO A LALAKI, ni C​——— ti addaan normal a seksual a rikrikna, ngem addaan met ti problema. Manipud agtawen ti 13 addaanen ti bisio a mangabuso ti bagina, masansan iti kinalimed ti kuartona. Isut’ mababain bassit iti dayta, ngem impagarupna nga awan met ti madangdangran nga asinoman.

Idi agtawenen ti 19, ti ugali ti naipasagepsepen. Iti naminsan ni C​——— impudnona dayta iti padida, ngem naibaga kenkuana a nupay dayta ti di umiso, saan unay a serioso dayta. Idi ni C​——— naawagan iti militaria, isut’ saan a makapagmaymaysa. Gapuna, mammano nga agtungpal iti panangabuso iti bagina, a mainayon iti dayta, ipamatmatna a ti napalabas nga ugalina ket saan a resulta ti di mamedmedmedan a kinaderrep.

Idi rimmuaren iti militaria, ni C​——— nagsublin idiay balayda. Rinugianna ti naggatang kadagiti pornograpiko a magasin ket, gaput’ pannakagargarina kadagitoy, isut’ nagsubli manen iti dati nga aramidna. Idi agbibiag nga agmaymaysa, naglakana ti mangala kadagiti babasaen a makagargari kenkuana iti sekso. Masansan isut’ agsalsal a mamin-ano a daras iti agmalem.

Kalpasanna isut’ nangrugi a makipagadal iti Biblia a kadua ti maysa a ministro dagiti Saksi ni Jehova. Bayat a maad-adalna ti panangmatmat ti Dios iti imoralidad, narikna ni C​——— ti panagbain gaput’ pananggatangna kadagiti pornograpiko a materiales, ket kayatna a maisardeng ti bisio ti panangabuso iti bagina. Pinadpadasna. Kalpasan ti maysa wenno dua a lawas isut’ makarikna iti seksual a kinairteng, isut’ agsardeng iti maysa a paglakuan iti pagiwarnakan, ket isu ti magargari manen kadagiti imoral a material. No adda idiay balaydan, patienna a yantangay isut’ napaayen, nasayaat nga isu ti agtultuloyen, Kalpasanna, umay manen ti panagbabawi. Mabalinannanto aya a sardengan daytoy dakes nga ugali?

Kamaudiananna ni C​——— nakisao iti naespirituan a panglakayen iti kongregasion. Daytoy a ministro mannakaawat ken nangtulong kenkuana a nangsapul kadagiti naibatay iti Biblia a materiales a makatulong kenkuana a mangparang-ay iti panagteppelna. Inlawlawag met ti ministro:

‘Panunotem ti tarigagay a kas maysa a kadena. Ti umuna a kawing ti bassit ken narasi. Ngem tunggal agsasaruno a kawing ti dumakkel a dumakkel ken tumangtangken. Kasta met dagiti rikna nga agturong iti masturbesion. Gapuna masapul a sardengan ti rikna apaman a posible. Bayat a bumaybayag dayta, ad-adda met a pumigsa ti tarigagaymo. Kamaudiananna, daytanto ti ngangngani din maisardeng. Wen, padpadasem a parmeken ti kadena iti umuna a kawingna. Apaman a mariknamon nga umayen ti riknam a kasta, AGARAMIDKA TI MAYSA A BANAG! Tumakderka ket baliwam ti posisionmo, bitunem dagiti sapatosmo, ibellengmo ti basura​—aniaman a banag a mangdadael iti umuna a kawing. Mabalinmo ti agbasa ti maysa a banag a sipipigsa, kas ti Biblia wenno ti maysa a Nakristianuan a publikasion a mangiturong ti pampanunotmo kadagiti nadalus a bambanag.’

Daytoy a ministro ti agsaludsodto ken ni C​——— idiay paggigimongan no kasano dagiti bambanag, ket regular nga isut’ komendaranna ken paregtaen iti pangngeddengna. Iti pito a lawas ni C​——— nagballigin. Kalpasanna, no isut’ mapaay ken maupay manen gapu iti sabali a parikut, isut’ matnag manen, a gumatang manen kadagiti makapaderrep a pagbasaan. Dayta ti mangiturong iti panagkapuyna. Dagita a pasamak isu dagiti panagsanudna, ngem igunamgunam ti ministro kenkuana ti panangitultuloyna a makidangadang. Nagin-inot dagiti baetna ti nawatiwaten agingga iti 9 a lawas, kalpasanna 17 a lawas, kalpasanna nabaybayag pay. Nagin-inot a dimmakkel ti panagtalekna agingga a naparmekna ti nalmeng a parikutna.

Kamaudiananna ni C​——— sinangona ti kinapudno nga ammo ni Jehova amin dagita nga ar-aramidenna. Gapuna, no tarigagayanna ti agserbi iti Dios a buyogen iti naan-anay a nadalus a konsiensia, masapul nga ikkatenna daytoy nga aramid nga interamente manipud biagna. Naaramidanna dayta! Itan dina pay malaglagipen no kasano kabayag dayta. Kas maysa a mapagulidanan a Kristiano ni C​——— naikkanen ti rebbengen iti kongregasion, ket isut’ agpalplanon a mangparang-ay iti serbisiona a pakaidayawan ti Dios. Isut’ maysa a naiduman a tao.