Dagiti Manangaywan a Mangipastor iti Arban

BAYAT ti ministerio ni Jesus ditoy daga, pinaneknekanna nga isu ket “nasayaat a pastor.” (Juan 10:11) Idi nakitana ti bunggoy a sumursurot kenkuana, “naasian . . . ta nalalatan ken naiwarawarada a kasla karnero nga awanan pastor.” (Mat. 9:36) Napaliiw ni Pedro ken ti dadduma nga apostol ti pannakaseknanna. Talaga a naiduma ni Jesus kadagiti palso a pastor iti Israel a binaybay-anda ti arban isu a naiwarawara dagiti karnero ken nabisinanda iti naespirituan! (Ezek. 34:7, 8) Nagsayaat ti ulidan ni Jesus iti panangisuro ken iti panangasikasona kadagiti karnero nga uray la impaayna ti biagna para kadakuada. Gapu iti dayta, nasursuro dagiti apostol no kasano a tulongan dagidiay addaan iti pammati nga agsubli ken ni Jehova, ti ‘pastor ken manangaywan kadagiti kararuada.’​—1 Ped. 2:25.

² Idi naminsan a nakisao ni Jesus ken Pedro, impaganetgetna ti kinapateg ti panangpakan ken panangipastor kadagiti karnero. (Juan 21:15-17) Natignay la ketdi ni Pedro iti imbaga ni Jesus, isu a pinaregtana idi agangay dagiti panglakayen iti nagkauna a kongregasion Kristiano: “Ipastoranyo ti arban ti Dios a naitalek kadakayo, nga agserbikayo kas manangaywan, saan a mapilpilit, no di ket aramidenyo a situtulok iti sanguanan ti Dios; saan a gapu iti panagayat iti naagum a gunggona, no di ket sigagagar; a saanyo nga iturayan dagidiay kukua ti Dios, no di ket agbalinkayo nga ulidan iti arban.” (1 Ped. 5:1-3) Agaplikar met dagiti sasao ni Pedro kadagiti manangaywan iti kongregasion ita. Kas panangtuladda ken Jesus, masapul nga agserbi dagiti panglakayen a situtulok ken sigagagar. Mangipakitada met iti ulidan ken idauluanda ti arban nga agserbi ken Jehova.​—Heb. 13:7.

³ Agyamantayo kadagiti dinutokan ti espiritu a manangaywan iti kongregasion. Adu ti magunggonatayo iti panangaywanda. Kas pagarigan, parparegtaen ken as-asikasuenda ti tunggal maysa iti kongregasion. Linawas a sigagaget nga idadauluanda dagiti gimong ti kongregasion a pakapabilgantayo iti pammati. (Roma 12:8) Ti panagreggetda a mangsalaknib iti arban kadagiti makadangran nga impluensia, kas kadagiti dakes a tattao, ti mangyeg kadatayo iti naespirituan a kinatalged. (Isa. 32:2; Tito 1:9-11) Ti panangidauloda iti ministerio ti mangpabpabileg kadatayo nga agtalinaed nga aktibo a mangikasaba iti naimbag a damag iti binulan. (Heb. 13:15-17) Impaay ni Jehova dagitoy a “lallaki a kas sagut” tapno mapabileg ti kongregasion.​—Efe. 4:8, 11, 12.

⁴ Tapno maaywanan a naimbag ti kongregasion, masapul a maragpat dagiti lallaki a madutokan nga agserbi kas manangaywan dagiti kualipikasion a nadakamat iti Sao ti Dios. Maikuna laeng a dinutokan ida ti nasantuan nga espiritu no maragpatda dagiti kualipikasion. (Ara. 20:28) Nangato dagiti Nainkasuratan a pagalagadan para kadagiti Kristiano a manangaywan gapu ta nadagsen ti responsabilidad ti maysa a manangaywan. Ngem dina kayat a sawen a nangato unay dagitoy a pagalagadan a saan a kabaelan a ragpaten dagiti Kristiano a lallaki a talaga a mangay-ayat ken Jehova ken situtulok nga agpausar kenkuana. Makita koma ti amin a dagiti manangaywan ket iyap-aplikarda ti balakad ti Biblia iti inaldaw a panagbiagda.

⁵ Dinakamat ni apostol Pablo iti umuna a suratna ken ni Timoteo ken iti suratna ken ni Tito dagiti kangrunaan a Nainkasuratan a kualipikasion para kadagiti manangaywan. Mabasatayo iti 1 Timoteo 3:1-7: “No ikagkagumaan ti maysa a lalaki ti agbalin a manangaywan, kayatna ti makiraman iti nasayaat nga aramid. Masapul ngarud nga awan pakababalawan ti manangaywan, asawa ti maymaysa a babai, natimbeng ti ugalina, nasimbeng ti panunotna, naurnos, managpadagus, kualipikado a mangisuro, saan a mammartek, saan a naranggas, no di ket nainkalintegan, saan a mannakiriri, saan a managayat iti kuarta, lalaki a nasayaat ti panangidaulona iti sangakabbalayanna, addaan iti annak nga agpaspasakup ken nasingpet (ta no saan nga ammo ti maysa a lalaki nga idauluan ti sangakabbalayanna, kasanonto a maaywananna ti kongregasion ti Dios?), saan a baro a manamati, ta amangan no agtangsit ken agpannakkel ket maukom a kas iti pannakaukom ti Diablo. Kanayonanna, masapul met a nasayaat ti reputasionna kadagiti tattao iti ruar ti kongregasion, tapno saan a maumsi ken matnag iti silo ti Diablo.”

⁶ Nagsurat ni Pablo ken ni Tito: “Imbatika idiay Creta tapno asikasuem ti bambanag a masapul a mailinteg ken mangdutokka kadagiti panglakayen iti tunggal siudad, kas imbilinko kenka: no adda lalaki nga awan pakababalawanna, asawa ti maymaysa a babai, addaan iti manamati nga annak a saan a naakusaran iti naalas a panagbiag wenno kinarebelioso. Ta kas mayordomo ti Dios, ti manangaywan ket masapul nga awan pakababalawanna, saanna nga ipilit ti kaykayatna, saan a nalaka nga agpungtot, saan a mammartek, saan a naranggas, saan a naagum iti material a gunggona, no di ket managpadagus, managayat iti kinaimbag, nasimbeng ti panunotna, nalinteg, napudno, managteppel, sursurotenna a naimbag ti mapagtalkan a sao iti pamay-an ti panangisurona, tapno kabaelanna ti mangparegta babaen ti nasayaat a pannursuro ken matubngarna dagidiay kumontra.”​—Tito 1:5-9.

⁷ Nupay iti damo, kasla narigat a ragpaten dagiti Nainkasuratan a kualipikasion para kadagiti manangaywan, saan a daytoy ti manglapped kadagiti Kristiano a lallaki a mangragpat kadagitoy a kualipikasion. No ipakpakitada dagiti nasayaat a Nakristianuan a galad a makalikaguman kadagiti manangaywan, parparegtaenda ti dadduma iti kongregasion a mangaramid met iti kasta. Insurat ni Pablo a naipaay dagiti “lallaki a kas sagut . . . tapno mailinteg dagiti nasantuan a tattao, tapno agserbi iti sabsabali, tapno mapabileg ti bagi ti Kristo, agingga nga agkaykaysatayo iti pammati ken iti umiso a pannakaammo maipapan iti Anak ti Dios, nga agbalintayo a nataengan, a kas iti kinanataengan ti Kristo.”​—Efe. 4:8, 12, 13.

⁸ Dagiti manangaywan ket saan nga agtutubo wenno baro a manamati, no di ket addaandan iti kapadasan kas Kristiano, adu ken nauneg ti pannakaammoda iti Biblia, ken pudpudno ti panagayatda iti kongregasion. Naturedda nga agsao ken mangilinteg kadagiti dakes nga aramid tapno masalakniban ti arban iti siasinoman a manggundaway kadakuada. (Isa. 32:2) Pagaammo koma ti kongregasion a dagiti manangaywan ket nataengan iti naespirituan ken pudpudno a maseknan iti arban ti Dios.

⁹ Dagiti kualipikado nga agbalin a manangaywan ipakpakitada a nainsiriban ti panangtamingda iti bambanag. No adda asawa ti manangaywan, masapul nga an-annurotenna ti pagalagadan dagiti Kristiano iti panagasawa, kayatna a sawen, asawa ti maymaysa a babai, ken lalaki a nasayaat ti panangidaulona iti sangakabbalayanna. No ti manangaywan ket addaan iti manamati nga annak nga agpaspasakup ken nasingpet ken saan a naakusaran iti naalas a panagbiag wenno kinarebelioso, nalaka nga asitgan ti kongregasion tapno agpabalakadda maipapan iti biag ti pamilia ken iti panagbiag kas Kristiano. Awan met pakababalawanna, ken nasayaat ti reputasionna uray kadagiti tattao iti ruar ti kongregasion. Masapul nga awan ti maipabasol kenkuana a di umiso a kababalin a mangdadael iti reputasion ti kongregasion. Saan a natubngar iti nabiit pay gapu iti nadagsen a basol. Matignay ti dadduma iti kongregasion a mangtulad iti nasayaat nga ulidanna ken italekda kenkuana ti espiritualidadda.​—1 Cor. 11:1; 16:15, 16.

¹⁰ Maaramid dagita a kualipikado a lallaki ti akemda iti kongregasion Kristiano a kas met laeng kadagiti panglakayen iti Israel a nadeskribir kas “nasaririt, masirib, ken aduan kapadasan.” (Deut. 1:13) Agkamali met dagiti panglakayen. Ngem pagaammoda iti kongregasion ken iti komunidad kas lallaki a nalinteg ken managbuteng iti Dios. Nabayagen nga ipakpakitada nga agbibiagda maitunos kadagiti prinsipio ti Dios. Gapu ta awan pakababalawanda, adda wayawayada nga agsao iti kongregasion.​—Roma 3:23.

¹¹ Dagiti lallaki a kualipikado a madutokan kas manangaywan ipakpakitada a natimbeng ti ugalida kasta met ti pannakilangenda iti sabsabali. Saanda a panatiko no di ket balanse ti panagbiagda, ken managteppel. Maipakitada a natimbengda iti pannangan, panaginum, panaglinglingay, ken dadduma pay. Natimbeng ti panaginumda iti arak tapno saanda a mababalaw kas managbarbartek wenno mammartek. No ti maysa ket nakainumen iti arak saanen a makapagteppel ken dinan maasikaso ti naespirituan a pagsayaatan ti kongregasion.

¹² Tapno maaywananna ti kongregasion masapul a naurnos ti maysa a lalaki. Makita dayta iti langana, pagtaenganna, ken iti inaldaw nga ar-aramidna. Saan a manangitantan, makitana no ania ti masapul a maaramid, ken agplano a maitunos iti dayta. Sursurotenna ti prinsipio ti Biblia.

¹³ Masapul a nainkalintegan ti maysa a manangaywan. Ammona ti makitunos ken makikooperar kadagiti padana a panglakayen. Rumbeng nga umiso ti panangmatmatna iti bagina ken saan a nalabes ti kalikagumanna iti dadduma. Kas nainkalintegan a tao, ti manangaywan dina ipilit ti kapanunotanna, nga ibilangna a nasaysayaat ti opinionna ngem kadagiti padana a panglakayen. Mabalin nga adda dagiti kualidad wenno abilidad nga adda iti dadduma nga awan kenkuana. Nainkalintegan ti maysa a panglakayen no ibatayna ti desisionna iti Biblia ken no ikagkagumaanna a tuladen ti ulidan ni Jesu-Kristo. (Fil. 2:2-8) Ti maysa a panglakayen ket saan a naranggas wenno mannakiriri no di ket raraemenna ti sabsabali nga ibilangna a nangatngatoda. Saanna nga ipilit ti kaykayatna, a kanayon a kayatna a masurot ti pamay-anna wenno kapanunotanna. Saan a nalaka nga agpungtot no di ket mannakikappia iti dadduma.

¹⁴ Kasta met, masapul a nasimbeng ti panunot ti maysa a kualipikado nga agserbi kas manangaywan iti kongregasion. Masapul a kalmado ken nainkalintegan, saan a nadarasudos a mangukom. Nasayaat ti pannakaawatna kadagiti prinsipio ni Jehova ken ti panangyaplikarna kadagita. Daydiay nasimbeng ti panagpampanunotna ket sidadaan nga umawat iti balakad ken panangiwanwan. Saan a managinsisingpet.

¹⁵ Impalagip ni Pablo ken ni Tito a ti maysa a manangaywan ket managayat iti kinaimbag. Masapul a nalinteg ken napudno. Maipakitana dagita iti pannakilangenna iti sabsabali ken itakderanna ti umiso ken naimbag. Saan nga agbalbaliw ti debosionna ken ni Jehova ken kanayon nga an-annurotenna dagiti nalinteg a prinsipio. Saanna nga ibaga iti sabsabali ti kompidensial a banag. Kasta met, managpadagus, sisasagana a tumulong, ken usarenna ti sanikuana para iti sabsabali.​—Ara. 20:33-35.

¹⁶ Tapno epektibo nga agserbi, masapul a kualipikado a mangisuro ti maysa a manangaywan. Sigun iti imbaga ni Pablo ken ni Tito, ti manangaywan ket “sursurotenna a naimbag ti mapagtalkan a sao iti pamay-an ti panangisurona, tapno kabaelanna ti mangparegta babaen ti nasayaat a pannursuro ken matubngarna dagidiay kumontra.” (Tito 1:9) Kabaelan ti manangaywan ti makirinnason, mangidatag iti ebidensia, ken manglawlawag kadagiti saan nga umanamong. Mayaplikarna met ti Kasuratan iti pamay-an a makaguyugoy iti sabsabali ken mangpabileg iti pammatida. Nasayaat man wenno narigat ti kasasaad, kabaelan latta ti manangaywan ti mangisuro. (2 Tim. 4:2) Masapul a naanus tapno matubngarna a siaalumamay daydiay nakaaramid iti di umiso ken makombinsirna daydiay agduadua. Kas resultana, matignay ti maysa nga agaramid iti naimbag a naibatay iti pammati. Ti panagbalin a kualipikado a mangisuro iti maysa a grupo wenno iti indibidual ket pammaneknek a naragpaten ti manangaywan daytoy napateg a kualipikasion.

¹⁷ Masapul a naregta met iti ministerio dagiti panglakayen. Makita koma nga ikagkagumaanda a tuladen ni Jesus a nangipangpangruna iti pannakaikasaba ti naimbag a damag. Maseknan ni Jesus kadagiti adalanna ken tinulonganna ida nga agbalin nga epektibo nga ebanghelisador. (Mar. 1:38; Luc. 8:1) No ikagumaan dagiti panglakayen ti makipaset iti ministerio uray okupadoda, matignay ti intero a kongregasion a mangtulad iti kinaregtada. No mangasaba dagiti panglakayen a kadua ti pamiliada ken dagiti miembro ti kongregasion, ‘makapagpipinnaregtada.’​—Roma 1:11, 12.

¹⁸ Mabalin a panunoten ti maysa a nangato unay dagiti pagalagadan a manamnama kadagiti agserbi kas manangaywan. Sigurado nga awan ti manangaywan a makaragpat a naan-anay iti nangato a pagalagadan a nailanad iti Biblia. Ngem awan koma kadagiti nadutokan a panglakayen iti kongregasion ti addaan iti dakkel a pagkurangan iti aniaman kadagitoy a galad a maibilang payen a pagkapuyan. Mabalin nga adda naisangsangayan a galad ti dadduma a panglakayen, idinto ta mabalin a nalalaing met ti dadduma iti sabali a banag. Kas resultana, ti bagi dagiti panglakayen ket addaan amin kadagiti nasayaat a galad a kasapulan tapno maaywanan a naimbag ti kongregasion ti Dios.

¹⁹ Kas maysa a grupo, no mangirekomenda dagiti panglakayen kadagiti lallaki a madutokan kas manangaywan, masapul a laglagipenda ti kinuna ni apostol Pablo: “Ibagak kadakayo amin dita a saankayo nga agpanunot iti nalablabes maipapan iti bagiyo ngem iti maiparbeng a panunotenyo. Ipakitayo ketdi a nasimbeng ti panunotyo maitunos iti pammati nga inted ti Dios iti tunggal maysa kadakayo.” (Roma 12:3) Tunggal panglakayen masapul nga ibilangna ti bagina a nababbaba. Awan koma ti agbalin a “nalinteg unay” no usigenna dagiti kualipikasion ti maysa a kabsat. (Ecl. 7:16) Gapu ta nalawag iti panunotda dagiti Nainkasuratan a kualipikasion para kadagiti manangaywan, kayat a siguraduen ti bagi dagiti panglakayen no ti kabsat nga irekomendada ket naragpatnan dagita a makalikaguman. No sipapanunotda kadagiti pagkapuyan ti tao ken awan pabpaboranda, maaramid dagiti panglakayen ti rekomendasionda iti pamay-an a mangipakita iti panagraemda kadagiti nalinteg a pagalagadan ni Jehova ken agpaay a pagimbagan ti kongregasion. Masapul nga ikararag dagiti panglakayen ti tunggal rekomendasion nga aramidenda ken agpaiwanwanda iti nasantuan nga espiritu ti Dios. Maysa daytoy kadagiti nadagsen a responsabilidadda ken masapul nga aramidenda daytoy a maitunos iti balakad ni Pablo: “Dika agdardaras a mangiparabaw iti imam iti asinoman a lalaki.”​—1 Tim. 5:21, 22.

²⁰ Masapul a makita iti panagbiag dagitoy a lallaki nga agpapaiwanwanda iti nasantuan nga espiritu. Ipakpakitada ti bunga ti espiritu. Dinakamat ni Pablo ti siam nga aspeto ti bunga ti nasantuan nga espiritu kas iti “ayat, rag-o, talna, kinaanus, kinaimbag, kinasayaat, pammati, kinaalumamay, panagteppel.” (Gal. 5:22, 23) No adda dagita a galad kadagiti manangaywan, makapabang-arda kadagiti kakabsat. Tumulong met dayta a mamagkaykaysa iti kongregasion a mangipaay iti sagrado a panagserbi. Ti ar-aramidda ken resulta ti trabahoda ipakitana a dinutokan ida ti nasantuan nga espiritu.​—Ara. 20:28.

²¹ Napateg nga agtitinnulong dagiti panglakayen tapno adda panagkaykaysa ti kongregasion. Mabalin a nagduduma ti personalidadda, ngem taginayonenda ti panagkaykaysada babaen ti siraraem a panagimdengda iti maysa ken maysa uray dida umanamong iti tunggal banag a pagsasaritaanda. No la ket ta awan ti masalungasing a prinsipio ti Biblia, situtulok koma ti tunggal maysa nga agpabus-oy ken mangsuporta iti desision ti bagi dagiti panglakayen. No managpabus-oy ti maysa ipakpakitana nga idaldalan ti “sirib manipud ngato,” a ‘mannakikappia ken nainkalintegan.’ (Sant. 3:17, 18) Saan a rumbeng a panunoten ti maysa a panglakayen nga isu ket natantan-ok ken awan koma kadakuada ti mangdominar iti dadduma. Dagiti panglakayen makitintinnulongda ken ni Jehova no agtitinnulongda kas bagi dagiti panglakayen para iti pagimbagan ti kongregasion.​—1 Cor., kap. 12; Col. 2:19.

²² Tarigagayan koma dagiti nataengan a Kristiano a lallaki ti agserbi kas manangaywan. (1 Tim. 3:1) Ngem ti panagserbi kas panglakayen ket agkasapulan iti panagregget ken panagsakripisio. Kaipapananna a sidadaan a mangasikaso kadagiti kasapulan dagiti kakabsat nga aywananna ti naespirituan a pagimbaganda. Ti panangragpat iti pribilehio kas manangaywan kaipapananna nga ikagumaan ti maysa a ragpaten dagiti kualipikasion nga adda iti Kasuratan.

²³ Ti maysa a kabsat a nabayagen nga agserserbi a simamatalek ket mabalin nga agsakit wenno saanen a makabael. Nalabit gapu iti kinalakay, saannan a kabaelan nga aywanan dagiti annongen ti maysa a manangaywan. Ngem maibilang ken maraem pay laeng kas panglakayen agingga nga isu ket nadutokan. Saan a masapul nga agikkat gapu kadagiti limitasionna. Maikari pay laeng iti dakkel a dayaw a maipapaay iti amin a nagaget a panglakayen a mangar-aramid iti amin a kabaelanda a mangipastor iti arban.

²⁴ Ngem no marikna ti maysa a kabsat a nasaysayaat no agikkat laengen gapu ta nagbaliw dagiti kasasaadna a manglimitar iti panagserbina, mabalinna nga aramiden dayta. (1 Ped. 5:2) Masapul latta a maipakitaan iti panagraem. Adu pay laeng ti maitulongna iti kongregasion, uray awanen dagiti annongen ken pagrebbenganna kas panglakayen.

²⁵ Nadumaduma ti annongen nga as-asikasuen dagiti panglakayen iti kongregasion. Adda ti koordineytor ti bagi dagiti panglakayen, sekretario, manangaywan iti serbisio, konduktor iti Panagadal iti Pagwanawanan, ken manangaywan iti Gimong a Panagbiag ken Ministerio. Adu a panglakayen ti agserserbi kas manangaywan iti grupo. Saan a maikeddeng ti kapaut ti panagakem dagiti panglakayen kadagitoy nga annongen. Siempre, no umakar ti maysa a kabsat, saannan a maasikaso dagiti annongenna gapu iti sakit, wenno saanen a kualipikado gapu ta dinan maragpat dagiti Nainkasuratan a kualipikasion, mangpili iti sabali a panglakayen a mangasikaso iti annongenna. Kadagiti kongregasion a manmano dagiti manangaywan, mabalin a saan la a maymaysa nga annongen ti asikasuen ti maysa a panglakayen agingga nga adda sabali a kakabsat a lallaki a kualipikado a madutokan kas panglakayen.

²⁶ Ti koordineytor ti bagi dagiti panglakayen ti agserbi kas tserman kadagiti miting ti bagi dagiti panglakayen. Sipapakumbaba a makipagtrabaho iti dadduma a panglakayen tapno maaywanan ti arban ti Dios. (Roma 12:10; 1 Ped. 5:2, 3) Masapul a nalaing nga agorganisar ken nagaget a mangidaulo.​—Roma 12:8.

²⁷ Asikasuen ti sekretario dagiti rekord ti kongregasion ken pakaammuanna dagiti panglakayen maipapan kadagiti napateg a surat. No kasapulan, mabalin a madutokan ti sabali a panglakayen wenno makabael a ministerial nga adipen a tumulong kenkuana.

²⁸ Ti manangaywan iti serbisio ti mangasikaso kadagiti urnos iti panagserbi iti tay-ak ken dadduma pay a banag a mainaig iti ministerio. Adda eskediulna a mangbisita iti amin a grupo ti panangasaba tapno iti maysa a ngudo ti lawas kada bulan, masarungkaranna ti sabali a grupo. Kadagiti babassit a kongregasion a manmano dagiti grupo, mabalin a bisitaenna ti tunggal grupo mamindua iti makatawen. Bayat ti panagbisitana, idauluanna ti taripnong sakbay ti panangasaba, kaduaanna ti grupo iti ministerio, ken tulonganna dagiti agibumbunannag nga agsarungkar ken mangyadal iti Biblia.

²⁹ Maysa kadagiti nagsayaat a pribilehio iti kongregasion ti agserbi kas manangaywan iti grupo. Karaman dagitoy kadagiti annongenna: (1) ipakitana a maseknan iti espiritualidad ti tunggal maysa nga adda iti grupona; (2) tulonganna ti tunggal maysa iti grupona a regular ken naragsak a makiraman iti ministerio; ken (3) tulonganna ken sanayenna dagiti ministerial nga adipen nga adda iti grupona tapno agbalinda a kualipikado kadagiti annongen iti kongregasion. Ti bagi dagiti panglakayen ti mangikeddeng no asino a kabsat ti ad-adda a kualipikado a mangaramid kadagitoy nga annongen.

³⁰ Gapu ta nadagsen daytoy nga annongen, no mabalin dagiti koma panglakayen ti madutokan nga agserbi kas manangaywan iti grupo. Ngem mabalin met a dutokan ti maysa a makabael a ministerial nga adipen agingga nga addanton panglakayen a mangaywan iti grupo. Ti ministerial nga adipen nga agserbi iti daytoy nga annongen ket maawagan iti group servant (adipen ti grupo) gapu ta saan nga agserserbi kas manangaywan iti kongregasion. Imbes ketdi, agserserbi babaen ti panangiwanwan dagiti panglakayen iti panangitungpalna iti annongenna.

³¹ Ti napateg a paset ti trabaho ti manangaywan iti grupo ket ti panangidaulona iti ministerio. Maparegta dagiti kakabsat iti grupona no regular, naregta, ken naganaygay. Gapu ta apresiaren dagiti agibumbunannag ti pammaregta ken tulong a magun-od babaen ti panagkakadua, nasayaat no adda eskediul a panangasaba ti grupo a praktikal iti kaaduan. (Luc. 10:1-16) Siguraduen ti manangaywan nga adda umdas a teritoria a trabahuenda. Idauluanna ti taripnong sakbay ti panangasaba ken organisarenna dagiti agibumbunannag para iti panangasaba iti dayta nga aldaw. No saan a makaruar, masapul a mangyurnos iti sabali a panglakayen, ministerial nga adipen wenno, no awan ti mabalin kadakuada, mangtuding iti kualipikado nga agibumbunannag a mangasikaso kadagitoy nga annongen tapno adda mangidaulo kadagiti agibumbunannag.

³² Masapul nga agplano a nasaksakbay ti manangaywan iti grupo para iti panagsarungkar ti manangaywan iti serbisio. Ipakaammona dayta kadagiti kagrupona tapno seggaanda ti makapabileg nga ibibisita ti manangaywan iti serbisio. No ammo ti grupona dayta nga urnos, sigagagar a suportaranda.

³³ Nairanta a bassit laeng ti mangbukel iti tunggal grupo. Tumulong daytoy iti manangaywan iti grupo tapno maam-ammona a naimbag dagiti kagrupona. Kas naayat a pastor, maseknan unay iti tunggal maysa. Ikagumaanna a tulongan ti tunggal maysa iti grupona ken paregtaenna ida tapno suportaranda ti ministerio ken dagiti gimong ti kongregasion. Aramidenna met ti amin a kabaelanna a tumulong iti tunggal agibumbunannag tapno agtalinaedda a nabileg iti naespirituan. Mapabileg dagiti masakit wenno malmalday no bisitaenna ida. Ti makapabileg a singasing wenno balakad ket mabalin a mangtignay iti sabsabali a mangragpat kadagiti kanayonan a pribilehio iti kongregasion tapno ad-adda a makatulongda kadagiti kakabsatda. Dagiti kagrupona ti kangrunaan a tulongan ti manangaywan iti grupo. Ngem kas panglakayen ken pastor, maseknan iti amin a miembro ti kongregasion ken sidadaan a tumulong iti siasinoman nga agkasapulan.​—Ara. 20:17, 28.

³⁴ Responsabilidad ti manangaywan iti grupo a kolektaen dagiti report iti ministerio dagiti kagrupona. Dagitoy a report ket maited iti sekretario. Matulongan ti tunggal agibumbunannag ti manangaywan iti grupoda no itedda a dagus kenkuana dagiti reportda iti ngudo ti tunggal bulan, wenno ikabilda iti kahon a pagikabilan iti report iti ministerio nga adda iti Kingdom Hall.

³⁵ Adda sumagmamano nga annongen ti Komite ti Serbisio ti Kongregasion (Congregation Service Committee), a buklen ti koordineytor ti bagi dagiti panglakayen, sekretario, ken manangaywan iti serbisio. Kas pagarigan, aprobaran ti komite ti serbisio ti pannakausar ti Kingdom Hall para kadagiti kasar ken pumpon ken no ania a grupo iti panangasaba ti pakaipanan dagiti agibumbunannag. Ti komite met ti mangaprobar iti aplikasion dagiti regular ken auxiliary pioneer ken dadduma pay a pribilehio ti panagserbi. Ti komite ti serbisio ket agserbi babaen ti panangiwanwan ti bagi dagiti panglakayen.

³⁶ Dagiti espesipiko nga annongen dagitoy a kakabsat, agraman ti konduktor iti Panagadal iti Pagwanawanan, manangaywan iti Gimong a Panagbiag ken Ministerio ken dadduma pay a mangbukel iti bagi dagiti panglakayen, ket naggapu iti sanga nga opisina.

³⁷ Regular nga agmimiting ti bagi dagiti panglakayen iti tunggal kongregasion tapno pagsasaritaanda dagiti banag a mainaig iti naespirituan a panagrang-ay ti kongregasion. Malaksid iti miting dagiti panglakayen bayat ti ibibisita ti manangaywan iti sirkito, agmimiting dagiti panglakayen tallo a bulan kalpasan ti tunggal ibibisita ti manangaywan iti sirkito. Siempre, mabalin nga agmiting dagiti panglakayen iti aniaman a tiempo no kasapulan.

³⁸ Imperpekto dagiti manangaywan, ngem masapul nga agpasakup kadakuada ti amin a miembro ti kongregasion gapu ta urnos dayta ni Jehova. Dagiti manangaywan manungsungbatda ken Jehova iti aramidda. Ireprepresentarda ti Dios ken ti teokratiko a turayna. Kuna ti Hebreo 13:17: “Agtulnog ken agpasakupkayo kadagiti mangidadaulo kadakayo, ta kanayon nga ay-aywanandakayo ket manungsungbatdanto gapu iti dayta. No kasta ti aramidenyo, naragsakda ken dida agladingit a mangaramid iti trabahoda, tapno saan nga agresulta dayta iti pagdaksanyo.” No kasano nga us-usaren ni Jehova ti nasantuan nga espiritu a mangdutok iti maysa a lalaki, dayta met laeng a nasantuan nga espiritu ti usarenna a mangikkat iti panagserbi ti maysa kas manangaywan no dina ipakpakita ti bunga ti espiritu ken saan nga agbibiag a maitunos kadagiti kualipikasion a nadakamat iti Biblia.

³⁹ Ap-apresiarentayo kadi ti kinagaget ken ti nasayaat nga ulidan dagiti manangaywan iti kongregasion? Idi nagsurat ni Pablo iti kongregasion idiay Tesalonica, binalakadanna dagiti kakabsat: “Kiddawenmi kadakayo, kakabsat, nga ipakitayo ti respeto kadagidiay agbambannog para kadakayo ken mangidadaulo kadakayo iti panagserbi iti Apo ken mangbalbalakad kadakayo; ken ipakitayo kadakuada ti naisangsangayan a konsiderasion ken ayat gapu iti trabahoda. Agbalinkayo a mannakikappia iti sabsabali.” (1 Tes. 5:12, 13) Nalaklaka ken naragragsak ti panagserbitayo iti Dios gapu iti kinagaget dagiti manangaywan iti kongregasion. Kasta met, iti umuna a suratna ken ni Timoteo, dinakamat ni Pablo ti kababalin a masapul nga ipakita ti tunggal maysa iti kongregasion kadagiti manangaywan, a kunana: “Maikari iti doble a dayaw dagiti panglakayen a nasayaat ti panangidauloda, nangnangruna dagidiay napinget iti panagsao ken panangisuro.”​—1 Tim. 5:17.

⁴⁰ No dadduma, madutokan dagiti napili a panglakayen nga agserbi kas miembro ti Patient Visitation Group. Dadduma ti agserbi iti Hospital Liaison Committee ken agsarungkar kadagiti ospital ken doktor tapno paregtaenda dagitoy nga itultuloyda ti mangagas kadagiti Saksi ni Jehova ken mangipaayda kadagiti impormasion maipapan iti alternatibo a panangagas a di agusar iti dara. Supsuportaran ti dadduma pay a manangaywan dagiti interes ti Pagarian babaen ti panangtulongda nga agibangon ken mangmantener kadagiti Kingdom Hall ken Assembly Hall wenno panagserbida kas miembro ti Convention Committee. Ti nagaget a panagtrabaho dagitoy a kakabsat ken ti situtulok a panagserbida iti kastoy a pamay-an ket apresiaren unay ti amin nga adda iti organisasion. Talaga nga ‘itultuloytayo nga ipateg dagiti kasta a kita ti tattao.’​—Fil. 2:29.

⁴¹ Iyurnos ti Bagi a Manarawidwid ti pannakadutok dagiti kualipikado a panglakayen nga agserbi kas manangaywan iti sirkito. Dinutokan dagitoy ti sanga nga opisina tapno bisitaenda dagiti kongregasion a mangbukel iti sirkitoda, gagangay a mamindua iti makatawen. Sagpaminsan a bisitaenda met dagiti payunir nga agserserbi kadagiti naiputputong a teritoria. Iyeskediulda ti panagbisitada ken pakaammuanda a nasaksakbay ti tunggal kongregasion tapno magunggonaanda a naan-anay iti dayta nga ibibisita.

⁴² Ti koordineytor ti bagi dagiti panglakayen ti mangidaulo iti panangorganisar kadagiti bambanag tapno makapabang-ar iti naespirituan ti panagbisita ti manangaywan iti sirkito. (Roma 1:11, 12) Kalpasan a maawatna ti pakaammo maipapan iti ibibisita ken dagiti kasapulan ti manangaywan iti sirkito ken ti asawana (no naasawaan), iyurnos ti koordineytor ti bagi dagiti panglakayen no asino a kabsat ti mangasikaso iti pagdagusan ken dadduma pay a napateg a bambanag. Siguraduenna a dagitoy nga urnos ket maipakaammo iti amin, agraman ti manangaywan iti sirkito.

⁴³ Ti manangaywan iti sirkito kontakenna ti koordineytor ti bagi dagiti panglakayen maipapan iti eskediul dagiti gimong, agraman dagiti taripnong sakbay ti panangasaba. Mayurnos dagitoy maitunos iti singasing ti manangaywan iti sirkito ken kadagiti instruksion manipud iti sanga nga opisina. Masapul a nasaksakbay a maipakaammo iti amin ti oras dagiti gimong iti kongregasion, miting dagiti payunir, ken dagiti panglakayen ken ministerial nga adipen, kasta met ti lugar ken oras a pakaangayan dagiti taripnong sakbay ti panangasaba.

⁴⁴ Iti malem ti Martes, sukimaten ti manangaywan iti sirkito dagiti Congregation’s Publisher Record, ti rekord ti bilang dagiti tumabtabuno kadagiti gimong, rekord iti teritoria, ken rekord iti kuenta. Makatulong daytoy kenkuana tapno maammuanna ti kasapulan ti kongregasion ken no kasanona a matulongan dagidiay mangas-asikaso kadagitoy a rekord. Iyurnos ti koordineytor ti bagi dagiti panglakayen a nasaksakbay a maited dagiti rekord iti manangaywan iti sirkito.

⁴⁵ Bayat ti ibibisitana, iwayaan ti manangaywan iti sirkito ti makisarita kadagiti kakabsat​—kadagiti gimong, pangasabaan, bayat ti pannangan, ken dadduma pay a tiempo. Kasta met, makimiting kadagiti panglakayen ken ministerial nga adipen a mangiranud kadagiti Nainkasuratan a balakad, singasing, ken pammaregta a tumulong kadakuada a mangibaklay kadagiti responsabilidadda a mangipastor iti arban nga adda iti aywanda. (Prov. 27:23; Ara. 20:26-32; 1 Tim. 4:11-16) Makimiting met kadagiti payunir tapno paregtaenna ida iti trabahoda ken tulonganna ida iti aniaman a parikut a pakaipaspasanguanda iti ministerio.

⁴⁶ No adda pay dagiti masapul a maasikaso, aramiden ti manangaywan iti sirkito ti amin a kabaelanna a tumulong bayat ti ibibisitana. No saan a malpas dagita bayat ti lawas nga ibibisitana, tulonganna dagiti panglakayen wenno dagiti indibidual a nairaman a mangbirok kadagiti agaplikar a prinsipio ti Biblia. No adda aniaman a masapul nga aramiden ti sanga nga opisina, mangted ti manangaywan iti sirkito ken dagiti panglakayen iti detalyado a report iti sanga nga opisina maipapan iti dayta a problema.

⁴⁷ Bayat a bumisbisita iti kongregasion, tumabuno ti manangaywan iti sirkito kadagiti gimong ti kongregasion. Mabalin a baliwan dagitoy maitunos kadagiti instruksion a naggapu iti sanga nga opisina. Mangipaay kadagiti palawag a mangparegta, mangtignay, mangisuro, ken mangpabileg iti kongregasion. Ikagumaanna nga ipakita ti ayat ken ni Jehova, ni Jesu-Kristo, ken iti organisasion.

⁴⁸ Ti maysa kadagiti kangrunaan a panggep ti ibibisita ti manangaywan iti sirkito ket tapno iparegtana ti regular a pannakiraman iti ministerio ken mangted iti praktikal a singasing. Binalbaliwan ti adu a kakabsat ti eskediulda tapno masuportaranda ti panangasaba iti dayta a lawas. Kas pagarigan, adda dagiti nag-auxiliary pioneer bayat ti bulan nga ibibisitana. Mabalin nga agpayeskediul ti asinoman a mayat a makikadua kenkuana wenno iti asawana iti ministerio. Adu ti pagsayaatanna no ikaduam ti manangaywan iti sirkito wenno ti asawana kadagiti iyad-adalam iti Biblia ken sarsarungkaram. Maapresiar unay ti panagreggetmo a mangsuporta iti daytoy a paset ti makalawas nga ibibisita.​—Prov. 27:17.

⁴⁹ Dua nga asamblea sirkito ti maangay iti kada tawen. Responsabilidad ti manangaywan iti sirkito nga organisaren daytoy nga asamblea. Mangdutok ti manangaywan iti sirkito iti manangaywan iti asamblea (assembly overseer) ken katulongan a manangaywan iti asamblea (assistant assembly overseer). Makitinnulongda kenkuana a mangorganisar iti asamblea. Makatulong daytoy iti manangaywan iti sirkito tapno maasikasona a naimbag dagiti programa ti asamblea. Mangpili met ti manangaywan iti sirkito kadagiti makabael a lallaki a mangasikaso iti nadumaduma a departamento. I-audit-na met ti kuenta ti sirkito kalpasan ti tunggal asamblea. Iti maysa nga asamblea sirkito, maysa a kabsat a pannakabagi ti sangay ti agserbi kas bumisbisita nga ispiker. Gapu iti kaadayo wenno bassit ti pagasambleaan, nabingay ti dadduma a sirkito iti dua a seksion. Adda maangay nga asamblea sirkito iti tunggal seksion.

⁵⁰ Ti manangaywan iti sirkito ti direkta a mangipatulod iti reportna iti ministerio iti sanga nga opisina iti ngudo ti kada bulan. No adda dagiti naggastuanna​—kas iti panagbiahe, taraon, pagdagusan, ken dadduma pay a kasapulanna tapno maitungpalna ti trabahona​—ken saan a naisubli dagitoy ti kongregasion a bisbisitaenna, mabalinna nga ipatulod dagita iti sanga nga opisina. Agtalek dagiti agdaldaliasat a manangaywan a maipaay dagiti material a kasapulanda no iyun-unada ti interes ti Pagarian ni Jehova, kas iti inkari ni Jesus. (Luc. 12:31) Ipakita koma dagiti kongregasion ti kinamanagpadagusda kadagitoy matalek a panglakayen nga agserserbi kadakuada.​—3 Juan 5-8.

⁵¹ Iti tunggal sanga nga opisina dagiti Saksi ni Jehova iti intero a lubong, tallo wenno ad-adu pay a kualipikado ken nataengan iti naespirituan a kakabsat ti agserbi kas Komite ti Sangay. Dagitoy a kakabsat ti mangiwanwan iti trabaho a panangasaba iti pagilian wenno kadagiti pagilian a masakupanda. Maysa kadagiti miembro ti komite ti agserbi kas koordineytor ti Komite ti Sangay.

⁵² Dagiti miembro ti Komite ti Sangay ti mangasikaso kadagiti banag a kasapulan ti amin a kongregasion a masakupan ti sangay. Siguraduen ti Komite ti Sangay a maikasaba ti naimbag a damag maipapan iti Pagarian iti intero a masakupan ti sangay, ken maorganisar dagiti kongregasion, ken sirkito tapno maipaay dagiti kasapulan iti teritoria. Asikasuen met ti Komite ti Sangay ti teritoria dagiti misionero, ken aktibidad dagiti special, regular, ken auxiliary pioneer. No adda dagiti asamblea ken kombension, ti komite ti mangaramid iti urnos ken mangted iti paset tapno ‘maaramid ti amin a banag iti desente a pamay-an ken sigun iti urnos.’​—1 Cor. 14:40.

⁵³ Iti dadduma a pagilian, adda madutokan a Komite ti Pagilian (Country Committee) babaen ti panangiwanwan ti Komite ti Sangay iti sabali a pagilian. Makatulong daytoy tapno nalaklaka a maaywanan ti trabaho iti lugar a pagserserbian ti Komite ti Pagilian. Asikasuenda dagiti bambanag iti Pagtaengan a Bethel (Bethel Home) ken iti opisina, dagiti surat ken report, ken dagiti aktibidad iti ministerio. Makitinnulong ti Komite ti Pagilian iti Komite ti Sangay para iti panagrang-ay iti interes ti Pagarian.

⁵⁴ Ti Bagi a Manarawidwid ti mangdutok kadagiti agserbi kas miembro dagiti Komite ti Sangay ken Komite ti Pagilian.

⁵⁵ Sagpaminsan, iyurnos ti Bagi a Manarawidwid nga adda kualipikado a kakabsat nga agbisita iti tunggal sangay iti intero a lubong. Ti kabsat nga agserbi iti daytoy nga annongen ket maawagan iti pannakabagi ti hedkuarter (headquarters representative). Ti kangrunaan a trabahona ket mangparegta iti pamilia ti Bethel ken tulonganna ti Komite ti Sangay kadagiti tumaud a parikut wenno saludsod mainaig iti trabaho a panangasaba ken panangaramid kadagiti adalan. Makimiting met daytoy a kabsat kadagiti napili a manangaywan iti sirkito ken sagpaminsan a makimiting kadagiti misionero. Kasaritana ida maipapan kadagiti parikut ken kasapulanda, paregtaenna ida maipapan iti kapatgan a trabahoda, ti panangikasaba iti Pagarian ken panangaramid kadagiti adalan.

⁵⁶ Interesado unay ti pannakabagi ti hedkuarter kadagiti magapgapuanan iti ministerio no maipapan iti panangikasaba iti Pagarian ken dadduma pay nga aktibidad ti kongregasion. No adda tiempona, bisitaenna dagiti remote translation office. No bisitaenna ti maysa a sangay, makiraman met iti trabaho a panangikasaba iti Pagarian no posible.

⁵⁷ Magunggonaantayo iti kinagaget ken naayat a panangaywan dagiti nataengan a Kristiano a lallaki. No itultuloytayo ti agpasakup kadagiti nadutokan a manangaywan a mangipastor iti arban, maikaykaysatayo iti Ulo ti kongregasion, ni Kristo Jesus. (1 Cor. 16:15-18; Efe. 1:22, 23) Kas resultana, agtignay ti espiritu ti Dios kadagiti kongregasion iti intero a lubong, ket ti Sao ti Dios ti mangiwanwan iti trabaho iti intero a daga.​—Sal. 119:105.