‘Panangaramat a Siuumiso iti Sao ti Kinapudno’

NAGLAON ti Sao ti Dios iti adu a prinsipio a napateg agpaay iti naballigi a biag. Matulonganna ti maysa a ministro a mangisuro, mangtubngar, ken mangilinteg. (2 Timoteo 3:16, 17) Nupay kasta, tapno naan-anay a magunggonaan manipud iti daytoy a giya nga inted ti Dios, masapul a surotentayo ti balakad ni apostol Pablo ken ni Timoteo: “Aramidem ti amin a kabaelam a mangiparang iti bagim a naanamongan iti Dios, maysa a mangmangged nga awan ti aniaman nga ibainna, nga aramatem a siuumiso ti sao ti kinapudno.”​—2 Timoteo 2:15.

Malaksid iti sabali pay a bambanag, mayasping ti Sao ti Dios iti makapasalun-at a gatas, nakired a taraon, makapabang-ar ken mangdalus a danum, maysa a pagsarmingan, ken natadem a kampilan. Ti panangtarus iti ipasimudaag dagitoy a termino tulonganna ti maysa a ministro a mangaramat a sisisigo iti Biblia.

Panangiranud iti Gatas ti Sao ti Dios

Ti gatas isu ti taraon a kasapulan dagiti kayyanak a maladaga. Bayat a dumakkel ti ubing, in-inut a pakanen daytoy iti natangken a taraon, ngem iti damo, ti laeng gatas ti kabaelanna a tunawen. Iti adu a pamay-an, kasla ubbing dagidiay bassit ti ammoda iti Sao ti Dios. Kabbaro man nga interesado ti maysa a tao iti Sao ti Dios wenno nabayag bassiten a naam-ammona daytoy, no ti laeng pagdamdamuan a pannakaawat iti kunaen ti Biblia ti ammona, isu ket maysa nga ubing iti naespirituan ken kasapulanna ti nalaka a matunaw a taraon​—naespirituan a “gatas.” Saanna pay a kabaelan a tunawen ti “nakired a taraon,” dagiti nauneg a bambanag iti Sao ti Dios.​—Hebreo 5:12.

Kastoy idi ti kasasaad iti kaipaspasdek a kongregasion idiay Corinto idi nagsurat ni Pablo kadakuada: “Tinaraonankayo iti gatas, saan nga iti maysa a banag a kanen, ta saan pay idi nga umdas ti kinapigsayo.” (1 Corinto 3:2) Kasapulan pay nga umuna nga adalen dagiti taga-Corinto dagiti “pagdamdamuan a bambanag dagiti sagrado a balbalikas ti Dios.” (Hebreo 5:12) Iti naragpatda a panagrang-ay, saanda pay a kabaelan a tunawen “dagiti nauneg a bambanag ti Dios.”​—1 Corinto 2:10.

Kas ken Pablo, ipakpakita itatta dagiti ministro a Kristiano ti pannakaseknanda kadagiti naespirituan nga ubbing babaen ti panangipaayda kadakuada iti “gatas,” a daytat’ panangtulong kadakuada a makapagtakder a sititibker kadagiti pamunganayan a Nakristianuan a doktrina. Paregtaenda dagiti kasta a kabbaro wenno di nataengan nga indibidual a ‘mangpatanor iti panagtarigagay iti awan lalaokna a gatas a kukua ti sao.’ (1 Pedro 2:2) Impakita ni apostol Pablo a nabigbigna ti naisangsangayan nga atension a kasapulan dagiti kabbaro idi insuratna: “Tunggal maysa a makiraman iti gatas di makaam-ammo iti sao ti kinalinteg, ta isu maysa nga ubing.” (Hebreo 5:13) Makalikaguman ti kinaanus, konsiderasion, pannakaawat, ken kinasingpet kadagiti ministro ti Dios bayat nga iburayda ti nasin-aw a gatas ti Sao kadagiti kabbaro ken awan pay kapadasanda babaen ti panangyadal iti Biblia iti pagtaengan ken iti kongregasion.

Panangaramat iti Nakired a Taraon a Sao ti Dios

Tapno rumang-ay nga agturong iti pannakaisalakan, kasapulan ti maysa a Kristiano ti ad-adda pay ngem ti “gatas.” No nabataden a natarusan ken inawatnan dagiti kangrunaan a kinapudno ti Biblia, sisasaganan a mangan iti ‘nakired a taraon nga agpaay kadagiti nataengan a tattao.’ (Hebreo 5:14) Kasanona a maaramidan daytoy? Umuna, babaen ti regular a rutina ti personal a panagadal ken pannakitimpuyog kadagiti Nakristianuan a gimong. Ti kasta a nasayaat nga ugali tulonganna ti maysa a Kristiano nga agbalin a napigsa, mataengan iti naespirituan, ken epektibo iti ministerio. (2 Pedro 1:8) Ditay koma liplipatan a malaksid pay iti pannakaammo, karaman met iti naespirituan a taraon ti panagaramid iti pagayatan ni Jehova.​—Juan 4:34.

Itatta, nadutokan ti “matalek ken masirib nga adipen” a mangtaraon kadagiti adipen ti Dios iti umiso a tiempo ken tumulong kadakuada a mangtarus iti “nagduduma unay a sirib ti Dios.” Babaen ti espirituna, ipalgak ni Jehova dagiti nauneg a kinapudno iti Kasuratan babaen iti daytoy nasungdo nga adipen, a simamatalek nga agipabpablaak iti naespirituan a ‘taraon iti umiso a tiempo.’ (Mateo 24:45-47; Efeso 3:10, 11; idiligyo ti Apocalipsis 1:1, 2.) Rebbengen ti tunggal Kristiano nga aramaten a naan-anay ti kakasta a naipablaak a probision.​—Apocalipsis 1:3.

Siempre, dadduma a banag iti Biblia ti “narigat a maawatan,” uray pay kadagiti nataenganen a Kristiano. (2 Pedro 3:16) Addada makaburburtia a sasao, padto, ken pangngarig nga agkasapulan iti adu a panagadal ken panagmennamenna. Gapuna, ti personal a panagadal ramanenna ti panagkali iti Sao ti Dios. (Proverbio 1:5, 6; 2:1-5) Nangruna nga addaan responsabilidad dagiti panglakayen iti daytoy a banag no mangisuroda iti kongregasion. Mangidadaulo man iti Panagadal iti Libro ti Kongregasion wenno ti Panagadal iti Pagwanawanan, mangipapaay kadagiti palawag publiko, wenno agserserbi iti aniaman a dadduma pay a rebbengen iti panangisuro, rumbeng a kabesado dagiti panglakayen ti materialda ken sisasagana a mangipaay iti atension iti ‘arte ti panangisuroda’ bayat nga iyallatiwda dagiti nakired a naespirituan a taraon iti kongregasion.​—2 Timoteo 4:2.

Danum a Mangpabang-ar ken Mangdalus

Imbaga ni Jesus iti Samaritana iti bubon nga ikkanna isuna iti mainum nga agbalin kenkuana “nga ubbog ti danum nga agburburayok a mangipaay iti agnanayon a biag.” (Juan 4:13, 14; 17:3) Daytoy a makaited-biag a danum ramanenna amin a probision ti Dios iti pananggun-od iti biag babaen ti Kordero ti Dios, ken nailawlawag dagitoy a probision iti Biblia. Kas tattao a mawaw iti dayta a “danum,” awatentayo ti awis ti espiritu ken ti nobia ni Kristo a ‘mangawat iti danum ti biag nga awan bayadna.’ (Apocalipsis 22:17) Ti iyiinum iti daytoy a danum mabalin a kaipapananna ti biag nga agnanayon.

Maysa pay, ipasdek ti Biblia dagiti moral ken naespirituan a pagalagadan para kadagiti pudno a Kristiano. Bayat nga iyaplikartayo dagitoy a pagalagadan nga impasdek ti Dios, dalusannatayo ti Sao ni Jehova, a ‘naugasanen a nadalus’ iti amin nga aramid a kagura ni Jehova a Dios. (1 Corinto 6:9-11) Gapu itoy, ti kinapudno a linaon ti naipaltiing a Sao ket maawagan iti ‘pangbuggo a danum.’ (Efeso 5:26) No ditay palubosan ti kinapudno ti Dios a mangdalus kadatayo iti kastoy a pamay-an, saanto a makaay-ayo kenkuana ti panagdaydayawtayo.

Makapainteres, nayasping met iti danum dagiti panglakayen a ‘mangaramat a siuumiso iti sao ti kinapudno.’ Kuna ni Isaias a ‘kaaspingda ti ay-ayus dagiti danum iti disso a namaga.’ (Isaias 32:1, 2) Maitungpal dagiti naayat a panglakayen daytoy a panangiladawan no sarungkaranda dagiti kakabsatda kas naespirituan a papastor, nga aramatenda ti makapabang-ar a Sao ti Dios a mangiburay iti makaparegta, makaliwliwa, naespirituan nga impormasion a mangpabileg ken mangpapigsa.​—Idiligyo ti Mateo 11:28, 29.a

Segseggaan dagiti kameng ti kongregasion ti isasarungkar dagiti panglakayen. “Ammok no kasano a makaliwliwa dagiti panglakayen, ket maragsakanak unay ta nangaramid ni Jehova iti kastoy a probision,” kuna ni Bonnie. Nagsurat ni Lynda, agsolsolo nga ina: “Babaen ti Nainkasuratan a pammaregta, tinulongandak dagiti panglakayen a makapagballigi. Dimngeg ken nangipakitada iti asi.” Kuna ni Michael: “Impariknada kaniak a pasetnak ti nadungngo nga organisasion.” “Ti isasarungkar dagiti panglakayen ti timmulong kaniak nga agballigi iti tiempo ti nakaro a panagleddaang,” kuna ti sabali pay. Ti makapasalun-at iti naespirituan nga isasarungkar ti maysa a panglakayen ket kas iti nalamiis, makapabang-ar nga inumen. Maliwliwa dagiti marakarnero a tattao bayat a tulongan ida dagiti naayat a panglakayen a mangtarus no kasano a mayaplikar dagiti Nainkasuratan a prinsipio iti kasasaadda.​—Roma 1:11, 12; Santiago 5:14.

Usarenyo ti Sao ti Dios kas Maysa a Pagsarmingan

No mangan ti maysa nga indibidual iti nakired a taraon, ti panggep ket saan laeng a tapno tagiragsaken ti raman. Imbes ketdi, namnamaenna a makagun-od iti sustansia a mangpakired kenkuana. No isu ket ubing, namnamaenna a tumulong ti taraon kenkuana a dumakkel tapno agbalin a nataengan. Umasping dayta iti naespirituan a taraon. Mabalin a makaparagsak ti personal a panagadal iti Biblia, ngem saan laeng a dayta ti makagapu tapno agadal. Ti naespirituan a taraon koma ti mangbalbaliw kadatayo. Tulongannatayo a mangilasin ken mangpataud kadagiti bunga ti espiritu ken tumulong kadatayo a mangikawes “iti baro a personalidad, a babaen ti umiso a pannakaammo mapabpabaro maitunos iti ladawan Daydiay namarsua iti dayta.” (Colosas 3:10; Galacia 5:22-24) Tulongannatayo met ti naespirituan a taraon a rumang-ay iti kinanataengan, a pagbalinennatayo a nasigsigo a mangyaplikar kadagiti Nainkasuratan a prinsipio iti panangtaming kadagiti parikuttayo ken iti panangtulong iti dadduma a mangtaming kadagiti parikutda.

Kasanotayo a maikuna no adda met laeng kasta nga epekto ti Biblia kadatayo? Usarentayo ti Biblia kas maysa a pagsarmingan. Kinuna ni Santiago: “Agbalinkayo a managtungpal iti sao, ket saan a managdengngeg laeng . . . No ti asinoman managdengngeg iti sao, ket di managaramid, daytoy a maysa umasping iti tao a kitkitaenna ti nakaisigudan a rupana iti maysa a pagsarmingan. Ta kitaenna ti bagina, ket isu mapan ket dagus a malipatanna no ania ti kitana a tao. Ngem ti mangsukimat iti perpekto a linteg a kukua ti wayawaya ken agtultuloy iti dayta, daytoy a tao, agsipud ta isu nagbalin, saan a maysa a mananglipat a managdengngeg, no di ket maysa a managaramid iti trabaho, naragsakto iti panangaramidna iti dayta.”​—Santiago 1:22-25.

‘Kumita[tayo]’ iti Sao ti Dios no sukimatentayo a naimbag dayta ken idilig ti kinataotayo iti kinatao a rumbeng a pagbalinantayo sigun kadagiti pagalagadan ti Dios. Iti panangaramid iti daytoy, agbalintayo a “managtungpal iti sao, ket saan a managdengngeg laeng.” Addanto nasayaat nga epekto ti Biblia kadatayo.

Ti Sao ti Dios kas Maysa a Kampilan

Kamaudiananna, tulongannatayo ni apostol Pablo a mangtarus no kasanotayo nga usaren ti Sao ti Dios kas maysa a kampilan. Idi pinakdaarannatayo maibusor “kadagiti gobierno, maibusor kadagiti turay, maibusor kadagiti agturay iti lubong daytoy a kinasipnget, maibusor kadagiti nadangkes nga espiritu a puersa kadagiti nailangitan a disso,” indagadagna kadatayo nga ‘awatentayo . . . ti kampilan ti espiritu, a dayta ti, sao ti Dios.’ (Efeso 6:12, 17) Ti Sao ti Dios ket napateg nga igam a pangikkattayo kadagiti aniaman a kapanunotan a “naibangon maibusor iti pannakaammo iti Dios.”​—2 Corinto 10:3-5.

Di pagduaduaan, “ti sao ti Dios nabiag ken adda bilegna.” (Hebreo 4:12) Makisarita ni Jehova iti sangatauan babaen kadagiti pinanid ti naipaltiing a Saona. Usarenyo a naimbag iti panangisuro kadagiti sabsabali ken iti panangibutaktak kadagiti ulbod a doktrina. Gundawayanyo ti panangaramat iti dayta tapno maparegta, mapabileg, mabang-aran, maliwliwa, magutugot, ken mapapigsayo dagiti dadduma iti naespirituan. Ket sapay koma ta ‘kabalannakayo [ni Jehova] iti tunggal naimbag a banag tapno aramidenyo ti pagayatanna,’ tapno kankanayon nga aramidenyo ti “makaay-ayo unay iti imatangna.”​—Hebreo 13:21.

[Footnote]

[Ladawan iti panid 31]

Paregtaen dagiti panglakayen ti dadduma, ‘nga aramatenda a siuumiso ti sao ti kinapudno’