KASURATAN, I

Kas naaramat iti Kristiano a Griego a Kasuratan, ti Griego a sao a gra·pheʹ (“maysa a surat”) tumukoy laeng iti sagrado a sursurat iti Biblia a Sao ti Dios. Adda pay dadduma a dokumento nga inaramat dagiti mannurat agpadpada iti Hebreo ken iti Griego a Kasuratan, kas kadagiti opisial a publiko a rekord ti kapuonan, pakasaritaan, ken dadduma pay, ngem saan a naibilang dagitoy kas naipaltiing wenno maipada iti sursurat a nabigbig kas kanonikal. Uray dagiti apostol mabalin a nangisuratda iti sabsabali pay a surat iti sumagmamano a kongregasion. Kas pagarigan, ti sasao ni Pablo iti 1 Corinto 5:9: “Iti suratko insuratko kadakayo,” ipamatmatna nga adda immun-unan a suratna kadagiti taga Corinto, maysa a surat nga awan itan. Ti kakasta a sursurat nabatad a saan nga intalimeng ti nasantuan nga espiritu ti Dios maipaay iti kongregasion Kristiano agsipud ta naskenda laeng kadagidiay nakaituronganda.

Ti Griego a sao a gramʹma, a mangipasimudaag iti maysa a letra, wenno karakter ti alpabeto, ket naadaw iti berbo a graʹpho. Yantangay naaramat nga addaan kaipapanan a “dokumento,” no dadduma naipatarus dayta kas “kasuratan” iti sumagmamano a patarus, “surat” iti dadduma. Iti Juan 5:47 ken 2 Timoteo 3:15, ti sao naaramat mainaig iti naipaltiing a “sursurat” ti Hebreo a Kasuratan.​—Kitaenyo ti HEBREO A KASURATAN; KRISTIANO A GRIEGO A KASURATAN.

Tinukoy ni Kristo ken Dagiti Apostol. Ni Jesu-Kristo ken dagiti mannurat ti Kristiano a Kasuratan masansan nga inaramatda ti sao a gra·pheʹ iti panangtukoyda iti sursurat ni Moises ken dagiti mammadto kas autoridadda maipaay iti panangisuroda wenno maipaay iti trabahoda, agsipud ta dagitoy a sursurat ket impaltiing ti Dios. Masansan a dagitoy a Hebreo a sursurat kas pakabuklan ket naawagan “Kasuratan.” (Mt 21:42; 22:29; Mr 14:49; Jn 5:39; Ara 17:11; 18:24, 28) No dadduma naaramat ti pangmaymaysa a porma a “Kasuratan” iti nakaisitaran ti maysa a teksto, a mangtuktukoy iti dayta kas paset ti intero a pakabuklan ti sursurat iti Hebreo a Kasuratan. (Ro 9:17; Ga 3:8) Manen, natukoy ti maysa a teksto kas “kasuratan,” a ti kaipapananna ket maysa dayta nga addaan autoridad a sasao. (Mr 12:10; Lu 4:21; Jn 19:24, 36, 37) Iti 2 Timoteo 3:16 ken 2 Pedro 1:20, da Pablo ken Pedro agparang a tukoyenda agpadpada ti naipaltiing a Hebreo ken Griego a sursurat kas “Kasuratan.” Ibilang ni Pedro ti sursurat ni Pablo kas paset ti “Kasuratan” iti 2 Pedro 3:15, 16.

Ti sasao a “naimpadtuan a kasuratan” (Ro 16:26) mabalin a tumukoy iti kasasaad ti intero a Hebreo a Kasuratan kas naimpadtuan.​—Idiligyo ti Apo 19:10.

Nailadawan kas Persona. Yantangay ti Kasuratan mabigbigbig kas impaltiing ti Dios, kas Saona, ti timek ti Dios​—arigna agsasao ti Dios​—no dadduma nailadawan kas persona a kasla agsasao buyogen ti nadibinuan nga autoridad (no kasano a ti nasantuan nga espiritu, wenno aktibo a puersa, ti Dios, ket inladawan ni Jesus kas persona, ken naikuna a mangisuro ken mangsaksi [Jn 14:26; 15:26]). (Jn 7:42; 19:37; Ro 4:3; 9:17) Maipaay iti isu met laeng a rason nadakamat ti Kasuratan a kasla agik-ikut iti kualidad a makakita iti masakbayan ken kinabileg a mangasaba.​—Ga 3:8; idiligyo ti Mt 11:13; Ga 3:22.

Nasken Kadagiti Kristiano. Yantangay ni Jesu-Kristo patinayon a tinukoyna ti Hebreo a Kasuratan tapno pasingkedanna ti sursurona, napateg kadagiti pasurotna a saanda a sumiasi manipud kadagita. Ipaganetget ni apostol Pablo ti pateg ken ti kinanasken dagita iti panangikunana: “Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg, tapno ti tao ti Dios naan-anay koma a makabael, naan-anay a nakabalan maipaay iti tunggal naimbag nga aramid.”​—2Ti 3:16, 17.