ARABA, NAAPRES A GINGET TI

Iti Amos 6:14, ti mammadto pinakdaaranna dagiti pagarian ti Juda ken Israel a ti daga irurumento ti ganggannaet a pannakabalin manipud “Hamat agingga idiay naapres a ginget ti Araba [Desierto a Tanap].” (Idiligyo ti 2Ar 14:25.) Nupay ti termino nga “Araba” ket nagaplikar iti intero a rehion ti Yuyeng a Ginget manipud Baybay ti Galilea agingga iti Nalabaga a Baybay, ditoy espesipiko a tumukoy dayta iti lugar manipud abagatan ti Natay a Baybay agingga iti Gulpo ti ʽAqaba. Gapuna, nupay ti sasao a “naapres a ginget ti Araba” nalabit tumukoy iti maysa a naapres a ginget, a kas ti naapres a ginget ti Zered, nga agayus iti abagatan nga ungto ti Natay a Baybay (“ti baybay ti Araba,” De 3:17), nakadkadlaw a ti sasao nga inusar ni Amos isu ti apag-isu a kaibatogan ti Arabiko a nagan a nayaplikar iti rehion manipud iti abagatan nga ungto ti Natay a Baybay agingga iti Gulpo ti ʽAqaba, nga isu ti “Wadi el-ʽArabah.” Impasimudaag ti padto ni Amos ti naan-anay a pannakasakup ti intero a daga a sigud nga inturayan ti Juda ken Israel, manipud amianan agingga iti abagatan. Bayat ti simmaganad a siglo, natungpal daytoy a padto kadagidi iraraut ti Asirio nga ar-ari, a pakairamanan da Tiglat-pileser III, Salmaneser V, Sargon II, ken Senaquerib.