მსაჯულები

21 დაიფიცეს ისრაელებმა მიცფაში,+ არცერთი ჩვენგანი არ მივათხოვებთ ჩვენს ასულებს ბენიამინელებსო.+ 2 მივიდა ხალხი ბეთელში,+ იქ ისხდნენ საღამომდე ღვთის წინაშე, ტიროდნენ და მოთქვამდნენ, 3 ამბობდნენ, იეჰოვა, ისრაელის ღმერთო, რატომ მოხდა ასეთი რამ ისრაელში, რატომ უნდა გამოაკლდესო დღეს ისრაელს ერთი ტომი. 4 მეორე დღეს ხალხი დილაადრიან ადგა; ააშენეს სამსხვერპლო და ზედ შესწირეს დასაწვავი და სამშვიდობო მსხვერპლი.+

5 იკითხეს ისრაელებმა, ვინ არ მოვიდაო ისრაელის ტომთაგან იეჰოვას წინაშე. მათ დაფიცებული ჰქონდათ, რომ მოეკლათ ის, ვინც არ ავიდოდა მიცფაში იეჰოვასთან. 6 შეებრალათ ისრაელებს მოძმე ბენიამინელები და თქვეს: „დღეს ისრაელიდან ერთი ტომი მოიკვეთა. 7 საიდან მოვუყვანოთ ცოლები ცოცხლად დარჩენილებს? ჩვენ ხომ შევფიცეთ იეჰოვას,+ რომ არ მივათხოვებდით მათ ჩვენს ასულებს!“+

8 იკითხეს, ვინ არ მოვიდაო ისრაელის ტომთაგან მიცფაში იეჰოვასთან.+ აღმოჩნდა, რომ იაბეშ-გალაადიდან არავინ იყო ასული ბანაკში, სადაც ხალხი შეკრებილიყო. 9 ხალხი რომ აღრიცხეს, ნახეს, რომ მათ შორის იაბეშ-გალაადიდან არავინ იყო. 10 გაგზავნა ხალხმა 12 000 მამაცი მებრძოლი და უბრძანა: „წადით და მახვილით დახოცეთ იაბეშ-გალაადის მკვიდრნი, ქალებიცა და ბავშვებიც!+ 11 ასე მოიქეცით: ამოწყვიტეთ ყველა კაცი და კაცთან ნაწოლი ყველა ქალი!“ 12 ნახეს იაბეშ-გალაადის მცხოვრებთა შორის 400 ქალწული, რომლებიც კაცთან არ წოლილან, და ქანაანში, შილოს+ ბანაკში, წამოიყვანეს.

13 შეუთვალა ხალხმა რიმონის კლდეზე+ მყოფ ბენიამინელებს, დავზავდეთო. 14 მაშინ დაბრუნდნენ ბენიამინელები. მისცეს მათ ცოცხლად დატოვებული იაბეშ-გალაადელი ქალები,+ მაგრამ ყველას არ შეხვდა. 15 შეებრალა ხალხს ბენიამინი,+ რადგან განხეთქილება ჩამოეგდო იეჰოვას ისრაელის ტომებს შორის. 16 ბოლოს ხალხის უხუცესებმა იკითხეს, რაღა ვუყოთ უცოლოდ დარჩენილებს, გაწყდნენო ბენიამინში ქალები. 17 თქვეს: „მემკვიდრეობა უნდა შერჩეთ გადარჩენილ ბენიამინელებს, რომ არ მოისპოს ტომი ისრაელიდან. 18 ჩვენ ვერ მივათხოვებთ მათ ჩვენს ასულებს, რადგან დავიფიცეთ ისრაელებმა და ვთქვით, წყეული იყოს ის, ვინც ბენიამინელს ასულს მიათხოვებსო“.+

19 ბოლოს თქვეს: „ყოველწლიურად იეჰოვასთვის დღესასწაული იმართება შილოში,+ ბეთელის ჩრდილოეთით, ბეთელიდან შექემში ამავალი გზის აღმოსავლეთით და ლებონის სამხრეთით“. 20 უბრძანეს ბენიამინელებს: „წადით და ვენახებში ჩასაფრდით! 21 როცა დაინახავთ საცეკვაოდ გამოსულ შილოელ ასულებს, თქვენც გამოდით ვენახებიდან, თითოეულმა მოიტაცეთ შილოელი ასული და დაბრუნდით ბენიამინის მიწაზე. 22 თუ გვიჩივლებენ მათი მამები ან ძმები, ჩვენ ვეტყვით, ჩვენი გულისთვის შეიწყალეთ ისინი, რადგან ომის შემდეგ ყველას ვერ ვარგუნეთ ცოლი,+ ხოლო თქვენი ნებით რომ მიგეცათ, დამნაშავეები იქნებოდით-თქო“.+

23 ასეც მოიქცნენ ბენიამინელები და ცოლად წაიყვანეს საცეკვაოდ გამოსული ქალები. წავიდნენ თავიანთ სამკვიდროში, აღადგინეს თავიანთი ქალაქები+ და იქ დასახლდნენ.

24 წავიდ-წამოვიდნენ ისრაელები თავ-თავიანთ ტომებსა და შტოებში; ყველა თავის სამკვიდროს დაუბრუნდა.

25 იმ დროს მეფე არ ჰყავდა ისრაელს+ და ვისაც რა მიაჩნდა სწორად, იმას აკეთებდა.