პეტრეს პირველი წერილი

1 პეტრე, იესო ქრისტეს მოციქული,+ პონტოში, გალატიაში, კაპადოკიაში,+ აზიასა და ბითინიაში მიმოფანტულ დროებით მცხოვრებთ, 2 მამის, ღვთის მიერ წინასწარი განჭვრეტით+ ამორჩეულთ და სულით განწმენდილთ,+ რათა იყოთ მორჩილნი და იესო ქრისტეს სისხლით ნასხურებნი:+

წყალობა და მშვიდობა არ მოგკლებოდეთ!

3 დიდება ჩვენი უფლის, იესო ქრისტეს, მამასა და ღმერთს, რომელმაც დიდი გულმოწყალებით გვშვა ხელახლა,+ რათა იესო ქრისტეს მკვდრეთით აღდგომის მეშვეობით+ უტყუარი იმედი+ გვქონოდა 4 და მიგვეღო უხრწნელი, წაუბილწველი და უჭკნობი მემკვიდრეობა.+ ის ზეცაში გენახებათ თქვენ,+ 5 ვინც რწმენის მეშვეობით ღვთის ძალით ხართ დაცულნი ხსნისთვის, რის შესახებაც უკანასკნელ დროს უნდა გაცხადდეს. 6 მართალია, ეს დიდად გახარებთ, მაგრამ განსაცდელების გამო ცოტა ხნით დამწუხრება მოგიწევთ,+ 7 რათა ასე გამონაცადი რწმენის წყალობით,+ რაც ბევრად ძვირფასია ცეცხლში გამობრძმედილ ოქროზე, რომელიც მაინც ისპობა, ქების, დიდებისა და პატივის ღირსად ჩაითვალოთ იესო ქრისტეს გამოცხადებისას.+ 8 თუმცა არასოდეს გინახავთ იგი, მაინც გიყვართ. ვერც ახლა ხედავთ, მაგრამ გწამთ და ენით აუწერელი, განუზომელი სიხარულით ხარობთ, 9 რადგან რწმენის საბოლოო მიზნისკენ, ხსნისკენ, ისწრაფვით.+

10 სწორედ ამ ხსნის შესახებ იკვლევდნენ გულმოდგინედ წინასწარმეტყველები, რომლებიც თქვენთვის განკუთვნილ წყალობაზე წინასწარმეტყველებდნენ.+ 11 ისინი იკვლევდნენ, თუ კონკრეტულად რა დროსა და რა ვითარებაზე მიანიშნებდა ღვთის სული ქრისტეს შესახებ,+ როცა წინასწარ უმხელდა მათ ქრისტეს ტანჯვისა+ და შემდგომი დიდების შესახებ. 12 ღმერთმა მათ გაუმჟღავნა, რომ ისინი საკუთარ თავს კი არა, თქვენ გემსახურებოდნენ და ახლა ეს ყოველივე თქვენ გეუწყათ მათი მეშვეობით, ვინც ზეციდან გამოგზავნილი წმინდა სულით სასიხარულო ცნობა გამცნოთ;+ ანგელოზებსაც სურთ, ჩასწვდნენ ამ ყველაფერს.

13 ამიტომ განეწყვეთ საქმისთვის,+ მუდამ იფხიზლეთ+ და იმ წყალობის იმედი გქონდეთ, რომელიც თქვენდამი იესო ქრისტეს გამოცხადებისას გამოვლინდება. 14 როგორც გამგონი შვილები, ნუღარ აჰყვებით უწინდელ სურვილებს, უმეცრების დროს რომ გქონდათ; 15 ყველაფერში წმინდები იყავით იმ წმინდასავით, რომელმაც მოგიხმოთ,+ 16 ვინაიდან დაწერილია: „იყავით წმინდები, რადგან წმინდა ვარ მე“.+

17 თუ უხმობთ მამას, რომელიც მიუკერძოებლად ასამართლებს+ თითოეულს თავისი საქმისამებრ, თქვენ, როგორც ხიზნებს, ღვთისმოშიშება გმართებთ,+ 18 რადგან იცით, რომ წინაპართა უსარგებლო ადათ-წესებისგან ხრწნადმა ვერცხლმა ან ოქრომ კი არ გაგათავისუფლათ,+ 19 არამედ თვით ქრისტეს+, როგორც უმანკო და უმწიკვლო კრავის,+ ძვირფასმა სისხლმა.+ 20 სანამ ქვეყნიერებას დასაბამი მიეცემოდა, უკვე ცნობილი იყო მის შესახებ,+ მაგრამ ის უკანასკნელ დროს მოგევლინათ.+ 21 თქვენ მისი მეშვეობით ირწმუნეთ ღმერთი+ — ის, ვინც მკვდრეთით აღადგინა+ და განადიდა იგი,+ რათა ღვთისადმი რწმენა და მისი იმედი გქონოდათ.

22 თქვენ ჭეშმარიტებისადმი მორჩილებით განიწმინდეთ და უთვალთმაქცო ძმათმოყვარეობას იჩენთ.+ ამიტომ მთელი გულით გიყვარდეთ ერთმანეთი.+ 23 ცოცხალი და მარადიული ღვთის სიტყვის მეშვეობით+ ხელახლა გშვათ+ არა ხრწნადმა, არამედ უხრწნელმა თესლმა.+ 24 დაწერილია: „ყოველი ხორციელი ბალახივითაა და მთელი მათი დიდება — მინდვრის ყვავილივით. ბალახი ხმება და ყვავილი სცვივა, 25 იეჰოვას სიტყვა კი მარადიულად რჩება“.+ ეს ის სიტყვაა, რომელიც გეხარათ.+