პირველი წერილი კორინთელების მიმართ

14 ისწრაფეთ სიყვარულისკენ, თუმცა სულის სხვადასხვა ძღვენსაც ესწრაფეთ, უპირატესად წინასწარმეტყველების ძღვენს.+ 2 ვინც უცხო ენაზე ლაპარაკობს, ადამიანებს კი არ ელაპარაკება, არამედ ღმერთს, და ვერავინ იგებს მის ნათქვამს,+ თუმცა სული აცხადებინებს წმინდა საიდუმლოს,+ 3 ხოლო ვინც წინასწარმეტყველებს, აღაშენებს, ამხნევებს და ანუგეშებს სხვებს თავისი საუბრით. 4 უცხო ენაზე მოლაპარაკე საკუთარ თავს აღაშენებს, ხოლო ის, ვინც წინასწარმეტყველებს — კრებას. 5 მინდა, რომ ყველა უცხო ენებზე ლაპარაკობდეთ,+ მაგრამ მირჩევნია, წინასწარმეტყველებდეთ.+ ის, ვინც წინასწარმეტყველებს, დიდია მასზე, ვინც უცხო ენებზე ლაპარაკობს, გარდა იმ შემთხვევებისა, როცა უცხო ენაზე მოლაპარაკე თარგმნის კიდეც თავის ნათქვამს კრების აღსაშენებლად. 6 ძმებო, რას გარგებთ, თუკი მოვალ და უცხო ენებზე დაგიწყებთ ლაპარაკს, და არაფერს გეტყვით გამოცხადებით,+ ცოდნით,+ წინასწარმეტყველებითა და სწავლებით?!

7 უსულო საგნებიც, სალამურიცა და ქნარიც, გამოსცემენ ხმას, მაგრამ, თუ მკაფიოდ არ გამოსცემენ სხვადასხვა ბგერას, როგორ გავიგებთ, რას უკრავენ სალამურსა და ქნარზე?! 8 და, თუ საყვირის ხმა არ ისმის მკაფიოდ, ვინ გაემზადება საბრძოლველად?! 9 ასევე თქვენც, თუ გაუგებარ სიტყვებს წარმოთქვამთ, ვინ გაიგებს თქვენს ნათქვამს?! სულ ტყუილად ილაპარაკებთ. 10 ენა კი ბევრია მსოფლიოში, მაგრამ ყველა გამოხატავს სათქმელს. 11 თუ ვერ ვიგებ მოსაუბრის ნათქვამს, უცხოელებივით ვიქნებით ერთმანეთისთვის. 12 ასევე თქვენც, რაკი ესწრაფვით სულის ძღვენს, ეცადეთ, რომ კრების აღსაშენებლად გქონდეთ უხვად ეს ძღვენი.+

13 ამიტომ უცხო ენაზე მოლაპარაკემ ილოცოს, რომ თარგმნაც შეძლოს,+ 14 რადგან, თუ უცხო ენაზე ვლოცულობ, სულის ძღვნით ვლოცულობ, მაგრამ ნათქვამს ვერ ვწვდები გონებით. 15 მაშ, რა ვქნა? მხოლოდ სულის ძღვნით კი არ ვილოცებ, არამედ ისე, რომ გონებით ჩავწვდე ნათქვამს. მხოლოდ სულის ძღვნით კი არ ვიგალობებ, არამედ ისე, რომ გონებით ჩავწვდე ნამღერს. 16 მაგრამ, თუ მხოლოდ სულის ძღვნით ასხამ ღმერთს ხოტბას, როგორ იტყვის „ამინს“ შენს მადლიერების სიტყვებზე თქვენთან მყოფი განუსწავლელი ადამიანი, თუკი ვერ მიხვდება, რას ამბობ?! 17 შენ კი სწირავ ღმერთს მადლობას, როგორც საჭიროა, მაგრამ ეს სხვას არ აღაშენებს. 18 მადლობას ვწირავ ღმერთს, რომ მე უფრო მეტ უცხო ენაზე ვლაპარაკობ, ვიდრე ყველა თქვენგანი, 19 მაგრამ კრებაში მირჩევნია ხუთი სიტყვა ვთქვა გააზრებულად, რათა სხვებსაც ვასწავლო, ვიდრე ათი ათასი სიტყვა — უცხო ენაზე.+

20 ძმებო, ნუ იაზროვნებთ ბავშვურად;+ ბოროტებისთვის ბავშვები იყავით,+ აზროვნებით კი — ზრდასრულნი.+ 21 კანონში წერია: «„უცხო ენებითა და უცხოთა ბაგეებით დაველაპარაკები ამ ხალხს და მაშინაც არ გამიგონებენ“, — ამბობს იეჰოვა*».+ 22 მაშასადამე, უცხო ენები ურწმუნოთათვისაა მტკიცებულება,+ რათა ირწმუნონ, და არა მორწმუნეთათვის, წინასწარმეტყველება კი — მორწმუნეთათვისაა და არა ურწმუნოთათვის. 23 ამიტომ, როცა მთელი კრება თავს მოიყრის და ყველა უცხო ენებზე ალაპარაკდება, და, თუ ამას განუსწავლელნი და ურწმუნონი შეესწრებიან, განა არ იტყვიან, შეშლილები არიანო?! 24 მაგრამ, თუ ყველა წინასწარმეტყველებთ და ურწმუნო ან განუსწავლელი შემოგესწრებათ, მოსმენილი ამხელს და განსჯის მას. 25 მაშინ ცხადი გახდება მისთვის საკუთარი გულის ზრახვები, პირქვე დაემხობა, ღმერთს თაყვანს სცემს და იტყვის, მართლა თქვენ შორის არისო ღმერთი.+

26 მაშ, რა უნდა ქნათ, ძმებო? როცა იკრიბებით, ერთმა ფსალმუნი იგალობოს, მეორემ — ასწავლოს, მესამემ — ღვთისგან გაცხადებულის შესახებ აუწყოს, მეოთხემ — უცხო ენაზე ილაპარაკოს, მეხუთემ — თარგმნოს;+ ყველაფერი აღსაშენებლად ხდებოდეს. 27 თუ ვინმე უცხო ენაზე ილაპარაკებს, ილაპარაკოს არა უმეტეს ორმა ან სამმა, თანაც რიგრიგობით, სხვამ კი თარგმნოს,+ 28 ხოლო, თუ მთარგმნელი არავინაა, ჩუმად იყვნენ კრებაში და გულში ელაპარაკონ ღმერთს. 29 ილაპარაკოს ორმა ან სამმა წინასწარმეტყველმა,+ სხვები კი მნიშვნელობას ჩასწვდნენ, 30 მაგრამ, თუ იქ მჯდომთაგან ვინმეს ღვთისგან გამოცხადება ექნება, ვინც საუბრობდა, გაჩუმდეს, 31 რათა ყველამ შეძლოთ რიგრიგობით წინასწარმეტყველება, რომ ყველამ ისწავლოს და ყველა გამხნევდეს.+ 32 სულის ძღვენი, რომელიც წინასწარმეტყველებს ეძლევათ, მათ თავად უნდა დაიმორჩილონ, 33 რადგან ღმერთი უწესრიგობის კი არა, მშვიდობის ღმერთია.+

როგორც წმინდათა ყველა კრებაშია, 34 ქალები ჩუმად იყვნენ, რადგან მათ ლაპარაკის უფლება არა აქვთ კრებაში.+ ამიტომ იყვნენ მორჩილები,+ როგორც ამას კანონი ამბობს. 35 თუ რაიმეს ვერ გაიგებენ, თავიანთ ქმრებს ჰკითხონ სახლში, რადგან ქალს არ შეშვენის კრებაში ლაპარაკი.

36 განა თქვენგან გავრცელდა ღვთის სიტყვა და განა მხოლოდ თქვენამდე მოაღწია?!

37 თუ ვინმე ფიქრობს, რომ წინასწარმეტყველია ან სულისგან აქვს ძღვენი ბოძებული, აღიაროს, რომ, რასაც გწერთ, უფლისგანაა. 38 ამის უარმყოფელი თავადაც უარყოფილი იქნება*. 39 ამიტომ, ჩემო ძმებო, ისწრაფეთ იმისკენ, რომ იწინასწარმეტყველოთ,+ თუმცა ნურც უცხო ენებზე ლაპარაკს აკრძალავთ,+ 40 ოღონდ ყველაფერი წესისა და რიგისამებრ ხდებოდეს.+