გამოსვლა

30 „დაამზადე სამსხვერპლო აკაციის ხისგან+ საკმევლის დასაწვავად.+ 2 სამსხვერპლო ოთხკუთხედის ფორმისა უნდა იყოს, სიგრძითაც და სიგანითაც 1 წყრთა*, ხოლო სიმაღლით 2 წყრთა. სამსხვერპლოს რქები უნდა ჰქონდეს; რქები კუთხეებიდან უნდა ამოდიოდეს.+ 3 სამსხვერპლო — მისი ზედაპირი, გვერდები და რქები — ხალასი ოქროთი მოავარაყე; თავზე ოქროს არშია შემოავლე. 4 არშიის დაბლა სამსხვერპლოს კეტების გასაყრელად და სატარებლად ორ მოპირდაპირე გვერდზე ორ-ორი ოქროს რგოლი გაუკეთე. 5 კეტებიც აკაციის ხისგან დაამზადე და ოქროთი მოავარაყე. 6 დადგი სამსხვერპლო მოწმობის კიდობნის+ მოპირდაპირედ, გამყოფი ფარდის აქეთ; ის უნდა იდგეს მოწმობის კიდობნის სახურავთან, სადაც გამოგეცხადები.+

7 აკმიოს მასზე+ აარონმა+ სურნელოვანი საკმეველი+ ყოველ დილით, როცა ლამპრებს გაამზადებს.+ 8 მან საკმეველი შებინდებისასაც* აკმიოს, როცა ლამპრებს აანთებს. ეს არის შესაწირავი, რომელიც ყოველდღიურად უნდა იწირებოდეს იეჰოვას წინაშე თაობიდან თაობამდე. 9 არ აღავლინოთ მასზე არც უკანონო საკმეველი,+ არც დასაწვავი მსხვერპლი, არც მარცვლეული შესაწირავი და არც დასაღვრელი შესაწირავი დაღვაროთ მასზე. 10 აარონმა ცოდვის შესაწირავის სისხლი+ სამსხვერპლოს რქებზე წელიწადში ერთხელ უნდა სცხოს,+ რათა განწმინდოს ის. ეს წესი თაობიდან თაობამდე წელიწადში ერთხელ უნდა სრულდებოდეს სამსხვერპლოს განსაწმენდად. სამსხვერპლო წმინდაა იეჰოვასთვის“.

11 შემდეგ იეჰოვამ მოსეს უთხრა: 12 „როცა აღრიცხავ ისრაელებს,+ აღრიცხვის დროს თითოეულმა თავისი სიცოცხლის* გამოსასყიდად შესაწირავი გაიღოს იეჰოვასთვის, რათა აღრიცხვისას უბედურება არ დაატყდეთ. 13 აი, რა უნდა გაიღოს თითოეულმა აღრიცხულმა: ნახევარი შეკელი* წმინდა ადგილის შეკელის* მიხედვით.+ 1 შეკელი 20 გერაა*. ნახევარი შეკელი იეჰოვასთვის გაღებული შესაწირავია.+ 14 თითოეულმა აღრიცხულმა, 20 წლიდან ზევით, გაიღოს შესაწირავი იეჰოვასთვის.+ 15 არც მდიდარმა უნდა გაიღოს ნახევარ შეკელზე მეტი და არც ღარიბმა — ნახევარ შეკელზე ნაკლები; ეს იეჰოვას შესაწირავია, რომელიც თქვენი სიცოცხლის გამოსასყიდად უნდა გაიღოთ. 16 აიღე გამოსასყიდი ვერცხლი ისრაელებისგან და შეხვედრის კარავში მსახურებისთვის გამოიყენე იეჰოვას წინაშე ისრაელთათვის სამახსოვროდ“.

17 შემდეგ იეჰოვამ მოსეს უთხრა: 18 „გააკეთე სპილენძის აუზი ხელ-ფეხის დასაბანად და გაუკეთე მას სპილენძისავე სადგამი;+ დადგი ის შეხვედრის კარავსა და სამსხვერპლოს შორის და შიგ წყალი ჩაასხი,+ 19 რომ აარონმა და მისმა ვაჟებმა ხელ-ფეხი დაიბანონ.+ 20 ვიდრე შეხვედრის კარავში შევლენ ან სამსხვერპლოსთან მსახურების შესასრულებლად მივლენ იეჰოვასთვის ცეცხლში დასაწვავი შესაწირავის დასაწვავად და ასაბოლებლად, დაიბანონ ხელ-ფეხი, რათა არ დაიხოცონ. 21 მათ უნდა დაიბანონ ხელ-ფეხი, რომ არ დაიხოცონ. ეს იქნება სამარადისო წესი მათთვის, აარონისა და მისი შთამომავლებისთვის, თაობიდან თაობამდე“.+

22 შემდეგ იეჰოვამ მოსეს უთხრა: 23 «აიღე საუკეთესო სანელებლები: 500 შეკელი გამაგრებული ზმირინი, 250 შეკელი სურნელოვანი დარიჩინი და 250 შეკელი სურნელოვანი კოთხუჯი, 24 500 შეკელი კასია წმინდა ადგილის შეკელის მიხედვით+ და 1 ჰინი* ზეთისხილის ზეთი. 25 დაამზადე მათგან წმინდა საცხები ზეთი, კარგად შეაზავე*.+ ეს წმინდა საცხები ზეთი უნდა იყოს.

26 სცხე ის შეხვედრის კარავსა+ და მოწმობის კიდობანს, 27 მაგიდასა და მთელ მის მოწყობილობას, სალამპრესა და მის მოწყობილობას, საკმევლის სამსხვერპლოს, 28 დასაწვავი შესაწირავის სამსხვერპლოსა და მთელ მის მოწყობილობას, აუზსა და მის სადგამს. 29 განწმინდე ეს ყველაფერი, რომ წმინდა გახდეს.+ განწმენდილი უნდა იყოს ის, ვინც მათ შეეხება.+ 30 სცხე აარონსა+ და მის ვაჟებს,+ განწმინდე ისინი, რომ მღვდლებად მემსახურონ.+

31 ისრაელებს გადაეცი: „ჩემთვის ეს წმინდა საცხები ზეთი იქნება თქვენს თაობებში.+ 32 სხვას არავის სცხოთ ის სხეულზე; არ დაამზადოთ მისი მსგავსი ნაზავი. ის წმინდაა და თქვენთვისაც წმინდა უნდა იყოს. 33 ვინც მსგავს ნაზავს დაამზადებს და სცხებს სხვას, უნდა მოკვდეს“».+

34 შემდეგ იეჰოვამ მოსეს უთხრა: „აიღე სურნელოვანი სანელებლები:+ შტახსი, ონიკა, ქალბანა და სუფთა გუნდრუკი, ყველაფერი თანაბრად. 35 დაამზადე მათგან საკმეველი,+ სურნელოვანი ნაზავი, კარგად შეაზავე. ის მარილმოყრილი,+ სუფთა და წმინდა უნდა იყოს. 36 ნაწილი წვრილად დაფხვენი და ფხვნილის ნაწილი მოწმობის კიდობნის წინ დადე შეხვედრის კარავში, სადაც გამოგეცხადები. ეს სურნელოვანი ნაზავი წმინდა უნდა იყოს თქვენთვის. 37 ამ შემადგენლობის საკმეველი თქვენთვის არ დაამზადოთ,+ რადგან წმინდაა ის იეჰოვასთვის. 38 ვინც მსგავს საკმეველს დაამზადებს, რომ ისიამოვნოს მისი სურნელებით, უნდა მოკვდეს“.