„იდინოს სამართალმა“ — ეს არის ღვთის ცოდნის სათავე

 1. რატომ გვაქვს სამართლიანობის გრძნობა?

ისტორიას მრავალი ისეთი ადამიანი ახსოვს, ვინც ყოველთვის აქტიურად უჭერდა მხარს სამართლიანობას. სამართლიანობა გვხიბლავს, რადგან ღვთის ანარეკლად ვართ შექმნილი. იეჰოვას სიამოვნებს სამართლიანობა. სწორედ ამიტომაა, რომ ჩვენც, მის ანარეკლად შექმნილებს, გვაქვს სამართლიანობის გრძნობა და გვსურს, რომ სხვებიც სამართლიანად გვექცეოდნენ (იერემია 9:24; დაბადება 1:27; ესაია 40:14).

2, 3. როგორ გვეხმარება თორმეტი წინასწარმეტყველური წიგნის განხილვა, რომ ჩავწვდეთ იეჰოვას სამართლიანობას?

² ბიბლიის წიგნებიდან ღვთის სამართლიანობას ვეცნობით, მაგრამ გაცილებით მეტს გავიგებთ ღვთის ამ თვისების შესახებ, თუ საფუძვლიანად გამოვიკვლევთ თორმეტ წინასწარმეტყველურ წიგნს. ამ წიგნებში იმდენადაა გამოკვეთილი სამართლიანობის თემა, რომ ბიბლიური საზოგადოების ერთ-ერთი გამოცემა, რომელშიც ოსიას, ამოსისა და მიქას წიგნებია წარმოდგენილი, ასეა დასათაურებული: „იყავით სამართლიანი!“ აი, რისი სურვილი ჩანს ამოსის სიტყვებში: „წყალივით იდინოს სამართალმა და სიმართლემ — უშრეტი მდინარესავით“. მიქა კი შემდეგზე ამახვილებს ყურადღებას: „რას ითხოვს იეჰოვა შენგან, თუ არა სამართლის ქმნას, სიკეთის სიყვარულსა და მოკრძალებულად სიარულს შენს ღმერთთან ერთად?!“ (ამოსი 5:24; მიქა 6:8)

³ თუ გვინდა, რომ უკეთ გავიცნოთ იეჰოვა და მივბაძოთ მას, უნდა გვესმოდეს იეჰოვას სამართლიანობის მნიშვნელობა. სამართლიანობა იეჰოვას ბუნების განუყოფელი ნაწილია. ჩვენ ვერ ვიტყვით, რომ ვიცნობთ მას, თუ არ გვესმის, რას ნიშნავს მისი სამართლიანობა. ძველ დროში მცხოვრებმა მისმა მსახურებმაც კარგად იცოდნენ, რომ „იეჰოვა სამართლიანობის მოყვარულია“ (ფსალმუნები 33:5; 37:28).

 4. ახსენით, უფრო მეტად როგორ გვარწმუნებს თორმეტი წინასწარმეტყველის სიტყვები ღვთის სამართლიანობაში?

⁴ ვიდრე იეჰოვა იერუსალიმზე განაჩენს აღასრულებდა, წინასწარმეტყველმა აბაკუმმა თქვა: „როდემდე უნდა გთხოვდე, იეჰოვა, შველას. . . დაეკარგა კანონს ძალა და ვეღარ ჭრის სამართალი. ბოროტები გარს ეხვევიან მართლებს, ამიტომაც გაუკუღმართდა სამართალი“ (აბაკუმი 1:2, 4). ერთგული აბაკუმი წმინდა წერილებიდან და საკუთარი გამოცდილებიდან იცნობდა იეჰოვას. ის ღრმად იყო დარწმუნებული იმაში, რომ ღმერთი თვითონაც სამართლიანი იყო და სხვებისგანაც იმავეს ითხოვდა. ამიტომაც უკვირდა აბაკუმს, რატომ უშვებდა იეჰოვა ბოროტებას. ღმერთმა დაარწმუნა აბაკუმი, რომ სამართლიანად მოექცეოდა ერთგულებს (აბაკუმი 2:4). თუ აბაკუმიც და სხვებიც დარწმუნებული იყვნენ ამაში, ჩვენ მით უმეტეს არ უნდა შეგვეპაროს ეჭვი. დღეს ხომ მთლიანი ბიბლია გვაქვს და უფრო მეტის გაგება შეგვიძლია იეჰოვას საქმეებისა და მისი თვისებების, მათ შორის სამართლიანობის შესახებ! ჩვენ შეგვიძლია, უკეთ გავეცნოთ იეჰოვას და დავრწმუნდეთ, რომ მისი სამართლიანობა სრულყოფილია.

 5. რამდენად ხშირად გვმართებს სამართლიანად მოქცევა?

⁵ იეჰოვა თავისი მაცნეების პირით ისრაელს სამართლიანობისკენ მოუწოდებდა (ესაია 1:17; 10:1, 2; იერემია 7:5—7; ეზეკიელი 45:9). თორმეტი წინასწარმეტყველის ერთ-ერთი ძირითადი დავალება სწორედ ეს იყო (ამოსი 5:7, 12; მიქა 3:9; ზაქარია 8:16, 17). მათი სიტყვებიდან ადვილად ვხედავთ, რომ ისინი მოუწოდებდნენ ხალხს, ყოველდღე სამართლიანად მოქცეულიყვნენ. ამ თორმეტი წიგნიდან ბევრის სწავლა შეგვიძლია, მაგრამ ამჯერად, მოდი, განვიხილოთ ის ორი სფერო, რაშიც წინასწარმეტყველთა სიტყვების თანახმად სამართლიანობის დაცვა გვმართებს, და შემდეგ ვნახოთ, პრაქტიკულად როგორ გამოვიყენოთ ნასწავლი.

6, 7. რატომ უნდა ვავლენდეთ სამართლიანობას საქმიან ურთიერთობებში?

⁶ იესომ თქვა: „კაცმა მხოლოდ პურით არ უნდა იცოცხლოს“ (ლუკა 4:4; მეორე კანონი 8:3). იესო იმას არ გულისხმობდა, რომ კაცს პური არ სჭირდებოდა; ჭამა აუცილებელია. ადამიანმა ოჯახის სარჩენად უნდა იმუშაოს. ასე იყო ძველად ღვთის მსახურთა შორის. ზოგს თავისი მეურნეობა ჰქონდა — მოჰყავდა მარცვლეული, ამზადებდა ტანსაცმელს, ავეჯს ან ჭურჭელს; ზოგიც დაქირავებული მუშა იყო, იღებდა მოსავალს, ფქვავდა მარცვლეულს, წურავდა ზეთისხილს და ყურძენს; ზოგი ვაჭრობდა, ყიდულობდა და ყიდდა; სხვები კი ხელოსნები ან მუსიკოსები იყვნენ (გამოსვლა 35:35; მეორე კანონი 24:14, 15; 2 მეფეები 3:15; 22:6; მათე 20:1—8; ლუკა 15:25).

⁷ ჰგავს მათი ცხოვრება თქვენს ცხოვრებას ან თქვენი მეგობრების თუ ნათესავების ცხოვრებას? მართალია, ტექნიკურმა მიღწევებმა ბევრი რამ შეცვალა, მაგრამ ღვთის თვალსაზრისი სამართლიანობაზე არ შეცვლილა; ამ მხრივ არც საქმიანი სფეროა გამონაკლისი. თორმეტი წინასწარმეტყველის მეშვეობით იეჰოვამ გვიჩვენა, რომ ის თავისი ხალხისგან სამართლიანობის დაცვას მოითხოვს საქმიან ურთიერთობებში. განვიხილოთ რამდენიმე მაგალითი და დავფიქრდეთ, როგორ უნდა გამოვავლინოთ ღვთისმოსაწონი სამართლიანობა (ფსალმუნები 25:4, 5).

8, 9. ა) რა სერიოზულ დანაშაულზე მიუთითებდა მალაქიას 3:5? ბ) ბიბლიის თანახმად რა გაწონასწორებული თვალსაზრისი უნდა ჰქონდეთ დამსაქმებელსა და დასაქმებულს?

⁸ მალაქიას პირით ღმერთმა განაცხადა: „მოვალ თქვენთან, რომ გაგასამართლოთ, და ვიჩქარებ, რომ დავამოწმო გრძნეულთა, მრუშთა, ცრუდ მოფიცართა და მათ წინააღმდეგ, ვინც თაღლითობს მოჯამაგირესთან. . . და ჩემი არ ეშინია“ (მალაქია 3:5). იეჰოვა განსჯიდა მათ, ვინც უსამართლოდ ექცეოდა თავის მუშებს. რამდენად სერიოზული იყო ეს დანაშაული? ღმერთმა მუშების ჩაგვრა სპირიტიზმს, მრუშობასა და სიცრუეს გაუტოლა. ქრისტიანებმა კარგად იციან, როგორ დასჯის ღმერთი „მეძავებს, სპირიტიზმის მიმდევრებსა. . . და ყველა მატყუარას“ (გამოცხადება 21:8).

⁹ საქმიან ურთიერთობაში ჩანდა, რამდენად იცავდა კაცი როგორც ზნეობრივ პრინციპებს, ისე იეჰოვას სამართლიანობას. ღმერთმა თქვა, რომ გაასამართლებდა იმ ვერაგ ხალხს, ვინც „მოჯამაგირესთან თაღლითობდა“, თუმცა მას არ უთქვამს, რომ დამქირავებელს მუშის ნებისმიერი სურვილი უნდა დაეკმაყოფილებინა. ვენახში სამუშაოდ დაქირავებული მუშების შესახებ იესოს იგავიდან კარგად ჩანს, რომ დამსაქმებელს უფლება ჰქონდა დაედგინა, რამდენს გადაუხდიდა მათ და რა პირობებში ამუშავებდა (მათე 20:1—7, 13—15). იესოს იგავში დამქირავებელმა სამუშაო დღის ხანგრძლივობის მიუხედავად ყველა მუშას თითო დინარი გადაუხადა. გარდა ამისა, იმასაც ვხედავთ, რომ დამსაქმებელი უპატიოსნოდ არ მოქცეულა მათი შრომის ხარჯზე მეტი მოგების მისაღებად (იერემია 22:13).

10. რატომ უნდა გვაღელვებდეს ის, თუ როგორ ვექცევით დასაქმებულებს?

¹⁰ თუ დამსაქმებელი ხართ და ხალხს ასაქმებთ ან გარკვეული სამუშაოს შესასრულებლად დროებით ვინმეს ქირაობთ, ითვალისწინებთ მალაქიას 3:5-ში ჩაწერილ სიტყვებს მათთვის გასამრჯელოს თუ სხვადასხვა მოთხოვნის დადგენისას? ამაზე ნამდვილად ღირს დაფიქრება. დასაქმებულის მიმართ უსამართლობას ქრისტიანულ-ბერძნული წერილებიც განსჯის. მათ საყურადღებოდ, ვინც ასეთ საკითხებში უსამართლოდ იქცევა, მოწაფე იაკობმა თქვა: „განა ის [იეჰოვა] არ გეწინააღმდეგებათ?“ (იაკობი 5:1, 4, 6) ამიტომ მართებულია, დავასკვნათ, რომ ვინც „მოჯამაგირეს“ უსამართლოდ ექცევა, არ იცნობს იეჰოვას, რადგან არ ჰბაძავს მას სამართლიანობაში.

11, 12. ა) რომელ უსამართლო მოქმედებაზეა საუბარი ოსიას 5:10-ში? ბ) როგორ უნდა გამოვიყენოთ ოსიას 5:10-ში მოცემული პრინციპი?

¹¹ მოდი, გავიხსენოთ, რატომ განსჯიდა იეჰოვა ოსიას თანამედროვე გავლენიან პირებს: „იუდას მთავრები მიჯნის გადამწევებს დაემსგავსნენ. წყალივით გადმოვღვრი მათზე ჩემს რისხვას“ (ოსია 5:10). რას განსჯიდა ოსია? იუდეველი გლეხი მიწის დოვლათით არჩენდა ოჯახს. მას მიწა სამანით ჰქონდა შემოსაზღვრული. „მიჯნის გადაწევა“ გლეხის მიწის ფართობს ამცირებდა და საარსებო წყაროს ნაწილს ართმევდა. იუდეველ მთავრებს, რომლებიც სამართლის სადარაჯოზე უნდა მდგარიყვნენ, ოსია მიჯნის გადამწევებს ადარებდა (მეორე კანონი 19:14; 27:17; იობი 24:2; იგავები 22:28).

¹² დღესაც ზოგი, ვინც უძრავი ქონების ყიდვა-გაყიდვით არის დაკავებული, მყიდველის მოსატყუებლად შეიძლება „მიჯნის გადაწევას“ ცდილობდეს. მსგავსადვე შეიძლება იქცეოდნენ ვაჭრები, დამსაქმებლები, დასაქმებულები ან კლიენტები, მათ შორის ისინი, ვისაც ხელშეკრულებით გათვალისწინებული ვალდებულებები აკისრიათ. საქმიანი ურთიერთობების დროს ზოგი თავს იკავებს ხელშეკრულების გაფორმებისგან იმ მიზნით, რომ მოგვიანებით სიტყვიერი შეთანხმება შეცვალოს და მეორე მხარეს ახალი მოთხოვნები წაუყენოს. მართალია, ზოგი აფორმებს ხელშეკრულებას, მაგრამ გარკვეულ დეტალებს ორაზროვნად წერს, რათა ის თავის სასარგებლოდ გამოიყენოს, თუნდაც ამით უსამართლოდ მოექცეს მეორე მხარეს და დააზარალოს. განა ამის მოქმედი, ვაჭარი, მომხმარებელი, დამსაქმებელი თუ დასაქმებული, იცნობს სამართლიანობის ღმერთს?! იეჰოვამ გარკვევით თქვა თავის სიტყვაში: „ნუ გადასწევ [უმამო ბავშვის]. . . მიჯნას, . . რადგან ძლიერია მისი გამომსყიდველი; ის თავად გამოესარჩლება მას შენ წინაშე“ (იგავები 23:10, 11; აბაკუმი 2:9).

13. რა უსამართლობა ხდებოდა ძველ დროს ღვთის ხალხს შორის, როგორც ეს მიქას 6:10—12-შია ჩაწერილი?

¹³ მიქას 6:10—12 უფრო მეტ შუქს ჰფენს სამართლიანობის აუცილებლობას: „კიდევ არის ბოროტის სახლში ბოროტების საგანძური და ეფის ნაკლული, დაწუნებული საწყაო? განა ვიქნები წმინდა არასწორი სასწორითა და მატყუარა ქვის საწონების აბგით?! . . მისი მკვიდრები სიცრუეს ლაპარაკობენ, მზაკვარი ენა აქვთ პირში“. მართალია, დღეს წონის ერთეულად ვიყენებთ არა ეფას, არამედ ლიტრსა და კილოგრამს, და აღარც ქვის საწონებით ვწონით, მაგრამ მიქას სიტყვებს აქტუალობა არ დაუკარგავს. მის დროს ვაჭრები და საქმოსნები თაღლითობდნენ, არ იყენებდნენ სტანდარტულ საწონებს და ხალხს უსამართლოდ ექცეოდნენ. ღმერთმა ბოროტები უწოდა მათ, ვინც „სიცრუეს ლაპარაკობდა“ აღებ-მიცემობის საქმეში.

14. მიქას გაფრთხილებისამებრ რა უსამართლო ქმედებას უნდა მოვერიდოთ?

¹⁴ როგორ უძღვებით თქვენს საქმეს ან როგორ მუშაობთ? ახდენს თუ არა თქვენზე გავლენას მიქას სიტყვები მატყუარა საწონებისა და საწყაოს შესახებ? ეს მართლაც დასაფიქრებელია, რადგან მომხმარებლებსა და კლიენტებს ხშირად ატყუებენ. მაგალითად, სამშენებლო ობიექტებს ზოგი ისეთი ბეტონით ამარაგებს, რომელშიც ცემენტის შემცველობა დადგენილ ნორმაზე ნაკლებია; ან შეკვეთაზე მუშაობისას ხელოსანი ნაკლებად გამოსაჩენ ადგილებში შეიძლება იაფფასიან მასალას იყენებს მაშინ, როცა შემკვეთს მეტს ახდევინებს; ზოგი გამყიდველი მეორად საქონელს ახალ საქონლად ასაღებს. შეიძლება მოგების მისაღებად გამიზნულ თაღლითობის სხვა ხერხებზეც გსმენიათ. თქვენც გააკეთებდით იმავეს? ახლახან გამოცემულ ერთ-ერთ წიგნში, რომელშიც კერძო პირის უფლებების დაცვაზეა საუბარი, აღნიშნულია, რომ იეჰოვას მოწმეებს „სწამთ შემოქმედის, რომელიც ყოველთვის ხედავს მათ, და ქურდობას სიკვდილი ურჩევნიათ“. მასში ასევე ნათქვამია: „ასეთი ხალხი სჭირდებათ ისეთ ბიზნესში, რომელშიც დიდი ფული ტრიალებს“. რატომ? ჭეშმარიტმა ქრისტიანებმა იციან, რომ იეჰოვა მათგან ყველაფერში „სამართლის ქმნას“ მოითხოვს, მათ შორის საქმიან ურთიერთობებში (მიქა 6:8).

15, 16. როგორ ექცეოდნენ მთავრები ხალხს მიქას დროს?

¹⁵ თორმეტი წინასწარმეტყველური წიგნიდან ვიგებთ, რომ ხალხი ზოგჯერ მეტისმეტად უსამართლოდ იქცეოდა. ძალაუფლებით აღჭურვილები, რომლებიც მისაბაძნი უნდა ყოფილიყვნენ სამართლის დაცვაში, ცუდ მაგალითს იძლეოდნენ (გამოსვლა 18:21; 23:6—8; მეორე კანონი 1:17; 16:18). მიქა მიმართავდა მათ: „ისმინეთ, იაკობის თავკაცებო და ისრაელის სახლის მეთაურებო! განა არ უნდა იცოდეთ სამართალი?! სიკეთის მოძულენი ხართ და ბოროტების მოყვარულნი, ტყავს აძრობთ ხალხს და ძვლებიდან ხორცს გლეჯთ“ (მიქა 3:1—3; ესაია 1:17).

¹⁶ ეს სიტყვები ალბათ გააოგნებდა მათ, ვინც კარგად ერკვეოდა სოფლის ცხოვრებაში. მაგალითად, მწყემსს უნდა ეზრუნა ცხვარზე და დაეცვა ის (დაბადება 38:12, 13; 1 სამუელი 25:4). მაგრამ „ისრაელის სახლის მეთაურები“, რომლებსაც უნდა „სცოდნოდათ სამართალი“, ექსპლუატაციას უწევდნენ ღვთის „საძოვრის ხალხს“, თითქოს ტყავს აძრობდნენ მათ და ძვლებიდან ხორცს გლეჯდნენ (ფსალმუნები 95:7). მიქას კიდევ ერთი მაგალითი მოჰყავს სოფლის ცხოვრებიდან და მთავრებს, რომლებიც „საჩუქრის მისაღებად ასამართლებდნენ“, ასკილის ბუჩქსა და ეკლის ღობეს ადარებს (მიქა 7:3, 4). წარმოიდგინეთ, რომ ასკილის ბუჩქებსა და ეკლიან ღობეებში გიწევთ გავლა. როგორ დაიკაწრებოდით, ტანსაცმელიც შემოგეხეოდათ! შეიძლება ითქვას, რომ მთავრები ასეთ მდგომარეობაში ყრიდნენ ღვთის ხალხს. სამართლიანად მოპყრობის ნაცვლად ისინი თავიანთ ძმებს ვერაგულად და მუხანათურად ექცეოდნენ (მიქა 3:9, 11).

17. როგორ არიან აღწერილი მთავრები სოფონიას 3:3-ში?

¹⁷ სოფონიაც იმავეს ამბობს: „მისი მთავრები მბრდღვინავი ლომები იყვნენ, მისი მსაჯულები კი — ბინდის მგლები, რომლებიც ხრავდნენ ძვლებს და დილამდე არ ტოვებდნენ“ (სოფონია 3:3). წარმოიდგინეთ, როგორ ამრუდებდნენ სამართალს ღვთის ხალხის მთავრები, რომლებიც თავიანთი საქციელით გაუმაძღარ ლომებს ჰგავდნენ; ან მსაჯულები, რომლებიც ხარბი, დამშეული მგლებივით ნთქავდნენ ყველაფერს, ისე რომ დილისთვის მხოლოდ ძვლებიღა რჩებოდა. ასეთ პირობებში რომელ სამართალზე შეიძლებოდა ლაპარაკი?! ეს მთავრები, რომლებიც ხალხზე ზრუნვის ნაცვლად მათზე ნადირობდნენ, შეიძლება ითქვას, ნაკუწ-ნაკუწ გლეჯდნენ სამართალს.

18. როგორ უნდა მოქცეოდნენ ისრაელში მსაჯულები ღვთის ხალხს?

¹⁸ აშკარაა, რომ ღვთისთვის მიძღვნილი ერის მთავრები არ იცნობდნენ ღმერთს. მათ რომ ცნობებოდათ ის, მაშინ ზაქარიას 8:16-ში ჩაწერილი სიტყვებისამებრ მოიქცეოდნენ: «აი რა უნდა გააკეთოთ: „ჭეშმარიტება ელაპარაკეთ ერთმანეთს, სიმართლითა და სამშვიდობო სამართლით განსჯიდეთ თქვენს კარიბჭეებთან“». უხუცესები ისრაელში ქალაქის კარიბჭესთან იკრიბებოდნენ ხოლმე და იქ არჩევდნენ სამართლებრივ საკითხებს, არა ნაჩქარევი დასკვნების ან პირადი მოსაზრების საფუძველზე, არამედ ღვთის თვალსაზრისის გათვალისწინებით (მეორე კანონი 22:15). იეჰოვას გაფრთხილებული ჰყავდა ისინი, რომ მიკერძოებულები არ ყოფილიყვნენ, მაგალითად, მდიდარი და გავლენიანი ხალხის სასარგებლოდ (ლევიანები 19:15; მეორე კანონი 1:16, 17). მსაჯულებს მშვიდობა უნდა აღედგინათ მოდავე მხარეთა შორის და „სამშვიდობო სამართალი“ უნდა აღესრულებინათ.

19, 20. ა) რისი სწავლა შეუძლიათ ქრისტიან უხუცესებს თორმეტი წინასწარმეტყველისგან? ბ) როგორ უნდა ცხადყონ უხუცესებმა, რომ იცნობენ იეჰოვას და მის სამართალს?

¹⁹ ზაქარიას 8:16-ში ჩაწერილ სიტყვებს პავლე მოციქული ქრისტიანებისთვის მიწერილ წერილში ციტირებდა (ეფესოელები 4:15, 25). ჩვენ ეჭვი არ გვეპარება, რომ თორმეტი წინასწარმეტყველის პირით გადმოცემული რჩევები და გაფრთხილებები სამართლის დაცვასთან დაკავშირებით დღესაც აქტუალურია ქრისტიანულ კრებაში. უხუცესები, ანუ ზედამხედველები, კარგად უნდა იცნობდნენ იეჰოვას, ბაძავდნენ მას სამართლიანობაში და ამით მაგალითს უნდა აძლევდნენ კრებას. ესაიას 32:1-ში ისინი აღწერილი არიან როგორც მთავრები, რომლებიც სამართლიანობისთვის მმართველობენ. რა უნდა გაითვალისწინონ უხუცესებმა თორმეტ წინასწარმეტყველურ წიგნში მოცემული რჩევებისა და გაფრთხილებების საფუძველზე?

²⁰ ქრისტიან უხუცესებს ყოველთვის უნდა ახსოვდეთ ბიბლიური ჭეშმარიტება და იეჰოვას თვალსაზრისი ამა თუ იმ საკითხზე. მათ თავიანთი გადაწყვეტილებები ბიბლიაზე უნდა დააფუძნონ და არა პირად მოსაზრებასა თუ ინტუიციაზე. ბიბლიიდან ჩანს, რომ შეიძლება იყოს უფრო რთული საკითხებიც, რომელთა გადაჭრაც მოითხოვს მეტ დროს, მომზადებას, ბიბლიის საფუძვლიან შესწავლასა და ბიბლიური ლიტერატურის გამოკვლევას, რომელშიც მოცემულია ერთგული და გონიერი მონის კლასის მიერ მოწოდებული ბრძნული რჩევები (გამოსვლა 18:26; მათე 24:45). როცა უხუცესები ასე იქცევიან, მათ უადვილდებათ, შეიძულონ ის, რაც ცუდია, და შეიყვარონ ის, რაც კარგია ღვთის თვალში. ეს დაეხმარებათ მათ, „სამართალი დაამკვიდრონ კარიბჭესთან“, რათა „ჭეშმარიტი სამართლით გაასამართლონ“ (ამოსი 5:15; ზაქარია 7:9).

21. რატომ უნდა იყვნენ უხუცესები მიუკერძოებლები, მაგრამ რის გამო შეიძლება ვერ გამოავლინონ ეს თვისება?

²¹ შეიძლება ბიბლია კარგად იცოდეს მან, ვინც მონაწილეობს სამართლებრივი საკითხების განხილვაში, მაგრამ მაინც მიკერძოებულად მოიქცეს. მალაქია წუხდა იმის გამო, რომ მღვდლები, რომლებსაც სხვებისთვის უნდა ესწავლებინათ, „მიკერძოებას ავლენდნენ კანონის დაცვისას“ (მალაქია 2:7—9). ეს როგორ? მიქა ამბობდა, რომ ზოგიერთი თავკაცი ქრთამისთვის ასამართლებდა, მღვდლები კი საფასურისთვის ასწავლიდნენ (მიქა 3:11). რა შემთხვევაში შეიძლება იგივე გააკეთოს უხუცესმა? მაგალითად, თუ ის ისეთი კაცის სამართლებრივი საკითხის განხილვაში მონაწილეობს, რომელსაც მისთვის სიკეთე გაუკეთებია, ან თუ ფიქრობს, რომ მომავალში ის რაღაცით დაეხმარება, ანდა მაშინ, როცა სამართლებრივი საკითხი მის ნათესავს ან მეუღლეს ეხება. რა გადაწონის: ნათესაური კავშირი თუ ბიბლიური პრინციპი? უხუცესი შეიძლება მიკერძოებულად მოიქცეს არა მარტო მაშინ, როცა ღვთის სამართლიანობა ირღვევა, არამედ მაშინაც, როცა წყდება, შეესაბამება თუ არა ესა თუ ის პიროვნება ბიბლიურ მოთხოვნებს კრებაში დამატებითი პასუხისმგებლობების მისაღებად (1 სამუელი 2:22—25, 33; საქმეები 8:18—20; 1 პეტრე 5:2).

22. ა) რა პასუხისმგებლობა აკისრიათ უხუცესებს სამართლიანობის დასაცავად? ბ) რომელი ღვთისმოსაწონი თვისებები უნდა გამოავლინონ უხუცესებმა შემცოდველებთან?

²² როდესაც ვინმე სერიოზულ ცოდვას სჩადის, კრების სულიერი მწყემსები ყველაფერს აკეთებენ იმისთვის, რომ სამწყსო მავნე, გამხრწნელი ზეგავლენისგან დაიცვან (საქმეები 20:28—30; ტიტე 3:10, 11). მაგრამ თუ შემცოდველი გულწრფელად ინანიებს, უხუცესები რბილად უდგებიან მას და გამოსწორებაში ეხმარებიან (გალატელები 6:1). ისინი გულგრილად და მკაცრად კი არ ექცევიან შემცოდველს, არამედ ითვალისწინებენ მითითებას: „ჭეშმარიტი სამართლით გაასამართლეთ და სიკეთითა და წყალობით მოეპყარით ერთმანეთს“ (ზაქარია 7:9). იეჰოვას მითითებებში, რის საფუძველზეც ძველ ისრაელში სამართლებრივი საქმეები უნდა გადაეწყვიტათ, მისი სამართლიანობა და გულმოწყალება ჩანს. დანიშნულ მსაჯულებს გადაწყვეტილებების მიღებისას გარკვეული თავისუფლება ჰქონდათ მიცემული; მათ შეეძლოთ გულმოწყალების გამოვლენა მდგომარეობისა და ცოდვისადმი შემცოდველის დამოკიდებულების გათვალისწინებით. ქრისტიანმა უხუცესებმაც „ჭეშმარიტი სამართლით“ უნდა გაასამართლონ, „სიკეთე და წყალობა“ უნდა გამოავლინონ და ამით ცხადყონ, რომ იცნობენ იეჰოვას.

23, 24. ა) როგორ შეუძლიათ უხუცესებს, ხელი შეუწყონ სამშვიდობო სამართალს? ბ) რა გავიგეთ თორმეტი წინასწარმეტყველის რჩევიდან სამართლიანობის დაცვასთან დაკავშირებით?

²³ გაიხსენეთ ზაქარიას 8:16-ის სიტყვები: „სიმართლითა და სამშვიდობო სამართლით განსჯიდეთ თქვენს კარიბჭეებთან“. რა მიზნით? „სამშვიდობო სამართლის“ აღსასრულებლად. მოციქულების დროს ზოგიერთ ქრისტიანს ერთმანეთში უთანხმოება და დავა ჰქონდა. როგორც მაშინ პავლე დაეხმარა ევოდიასა და სინტიქეს, ისე დღეს ეხმარებიან უხუცესები ქრისტიანებს (ფილიპელები 4:2—4). მათ ყველანაირად უნდა ეცადონ, რომ ხელი შეუწყონ სამშვიდობო სამართალს და ორ დაპირისპირებულ მხარეს შორის მშვიდობა აღადგინონ. ბიბლიურმა რჩევამ და რჩევის მიცემის ფორმამ ხელი უნდა შეუწყოს მშვიდობას როგორც კრებაში, ისე ღმერთთან ურთიერთობაში. უხუცესები ამით ცხადყოფენ, რომ ნამდვილად იცნობენ იეჰოვას და მის სამართალს.

²⁴ ზემოთ განხილული ორი სფეროდან დავინახეთ, რომ ძალზე მნიშვნელოვანია ყოველდღიურ ცხოვრებაში გამოვიყენოთ თორმეტი წინასწარმეტყველის რჩევა სამართლიანობის დასაცავად. მართლაც დიდი კურთხევაა, როდესაც ხელს ვუწყობთ იმას, რომ „იდინოს სამართალმა“!