Baebreo

4 Yo yina sambu lusilu ya kukota na kupema na yandi kele kaka, beto keba* kana ve muntu mosi na kati na beno ta fwana ve na kukota na kupema yina.+ 2 Sambu bo zabisaka beto mpi nsangu ya mbote,+ mutindu bo zabisaka bo mpi; kansi ndinga yina bo waka natilaka bo ve mambote, sambu bo vandaka ve ti lukwikilu ya mutindu mosi ti bantu yina waka. 3 Sambu beto bantu yina me kwikilaka, beto ke kota kibeni na kupema yina, mutindu yandi tubaka nde: “Yo yina mono zengaka kieleka na makasi na mono nde, ‘Bo ta kota ve na kupema na mono,’”+ ata bisalu na yandi manaka katuka na luyantiku ya nsi-ntoto.+ 4 Sambu na kisika mosi yandi tubaka mambu yai sambu na kilumbu ya nsambwadi: “Ebuna Nzambi pemaka na kilumbu ya nsambwadi na bisalu na yandi yonso,”+ 5 mpi awa diaka yandi ke tuba nde: “Bo ta kota ve na kupema na mono.”+

6 Yo yina, sambu yo me bikala nde bantu ya nkaka kukota na kupema yina, mpi nde bantu yina bo zabisaka ntete nsangu ya mbote kotaka ve na kupema yina sambu bo kondaka bulemfu,+ 7 yandi me tula diaka kilumbu mosi buna ntangu yandi ke tuba, ntangu mingi na nima, na nkunga ya Davidi nde, “Bubu yai”; mutindu bo tubaka ntete nde, “Bubu yai kana beno wa ndinga na yandi, beno kumisa ve bantima na beno ngolo.”+ 8 Sambu kana Yozue+ nataka bo na kisika mosi ya kupema, Nzambi zolaka kutubila diaka ve kilumbu ya nkaka. 9 Yo yina, kele kaka ti kupema ya kisabatu sambu na bantu ya Nzambi.+ 10 Sambu muntu yina me kota na kupema ya Nzambi me pema mpi na bisalu na yandi, mutindu Nzambi pemaka na bisalu na yandi.+

11 Yo yina beto sala ngolo kibeni sambu beto kota na kupema yina sambu ata muntu mosi ve kulanda mbandu yina ya kukonda bulemfu.+ 12 Sambu ndinga ya Nzambi kele ya moyo mpi ngolo+ mpi yo kele makasi kuluta konso mbele ya bitumba ya makasi zole+ mpi yo ke kotaka tii na kukabisa moyo* ti mpeve,* mpi binkoso ti butomfu, mpi yo lenda sala luswaswanu na kati ya mabanza mpi bangindu ya ntima. 13 Ata lugangu mosi ve kele ya kubumbana na meso na yandi,+ kansi bima yonso kele kinkonga mpi ke monikaka pwelele na meso ya muntu yina beto fwete vutula munoko.+

14 Yo yina, sambu beto kele ti nganga-nzambi ya nene ya kuluta nene mpi yina kotaka na zulu, Yezu Mwana ya Nzambi,+ beto landa kutubila lukwikilu yina beto ke tulaka na yandi.+ 15 Sambu beto kele ve ti nganga-nzambi ya nene yina lenda wila beto ve mawa sambu na bifu na beto,+ kansi beto kele ti nganga-nzambi ya nene yina bo mekaka na mambu yonso mutindu bo me mekaka beto, kansi yandi salaka ve disumu.+ 16 Yo yina, beto pusana ti masonga+ pene-pene ya kiti ya kimfumu ya ntima ya mbote ya nene, sambu Nzambi kuwila beto mawa mpi kumonisila beto ntima ya mbote ya nene sambu na kusadisa beto na ntangu ya mbote.