Bo Kemengaka Bo Kukonda Kikuma

“Bo mengaka mono [kukonda kikuma, NW].”​—YOANE 15:25.

1, 2. (a) Sambu na nki bantu mingi keyitukaka ntangu bantu yankaka ketubaka mambu ya mbi sambu na Bakristu, kansi sambu na nki mambu ya mutindu yina fwete yitukisa beto ve? (b) Inki ntendula ya ngogo ‘kumenga’ beto tatadila na disolo yai? (Tala noti na nsi ya lutiti)

BAMBANGI YA YEHOWA kesalaka ngolo na kuzitisa minsiku yina kele na Ndinga ya Nzambi. Yo yina, bo kevandaka na lukumu ya mbote na bansi mingi. Kansi, bantangu yankaka bantu kekusilaka bo makambu. Mu mbandu, mfumu mosi ya leta na mbanza Saint-Pétersbourg, na Russie, kuyibukaka nde: “Bantu kuzabisaka beto nde Bambangi ya Yehowa kele kadibundu mosi ya kinsweki, yina kevukanaka na bisika ya kubumbana, bayina kefwaka bana mpi kekudifwaka bo mosi.” Kansi na nima ya kusala ti Bambangi ya Yehowa sambu na kuyidika lukutakanu mosi ya bansi mingi, mfumu yango kutubaka nde: “Bantu ya mu mesala ti bo kele bantu ya mbote, ya kesekaka . . . Bo kele bantu ya ngemba mpi ya pima, mpi bo kezolanaka mingi bo na bo.” Yandi yikaka nde: “Mu kebakisaka mpenza ve sambu na nki bantu ketubaka mambu ya luvunu ya mutindu yina sambu na bo.” ​—1 Piere 3:16.

² Bansadi ya Nzambi kesepelaka ve mutindu bantu kekusilaka bo nde bo kele bantu ya mbi, kansi bo keyitukaka ve ntangu bantu ketubilaka bo mambu ya mbi. Yezu kukebisaka balongoki na yandi nde: “Kana bantu ya nsi-ntoto yai kumenga beno, beno fweti zaba nde bo mengaka mono ntete. . . . Mambu yina me bwa mpidina sambu mambu yai ya bo sonikaka na mikanda na bo ya Bansiku, yo kulunga: ‘Bo mengaka mono [kukonda kikuma, NW].’”a (Yoane 15:18-20, 25; Nkunga 35:19; 69:5) Na luyantiku, yandi zabisaka balongoki na yandi nde: “Kana bo me pesaka mfumu ya nzo zina nde Satana Belezebule, bo ta pesa bazina ya kuluta mbi na bantu ya nzo na yandi!” (Matayo 10:25) Bakristu kebakisaka nde kukanga ntima na mafingu ya mutindu yina kele na kati ya mambu yina bo fwete mona sambu na “nti ya mpasi” ya bo ndimaka na ntangu bo kumaka balongoki ya Kristu.​—Matayo 16:24, NW.

 3. Na nki kiteso bantu menyokulaka bansambidi ya kyeleka?

³ Minyoku ya bansambidi ya kyeleka meyantikaka ntama kibeni, banda na ntangu ya “Abele yina salaka mbi ve.” (Matayo 23:34, 35) Yo mesukaka ve kaka na mwa ndambu ya bantu. Yezu kutubaka nde “bantu yonso” “ta menga” balongoki na yandi sambu na zina na yandi. (Matayo 10:22) Dyaka, ntumwa Polo kusonikaka nde bansadi yonso ya Nzambi, disongidila konso muntu na kati na beto, fwete vingila nde bantu kumonisa yandi mpasi. (2 Timoteo 3:12) Sambu na nki yo fwete salama mutindu yina?

Kisika Kumenga ya Kukonda Kikuma Kekatukaka

 4. Inki mutindu Biblia kemonisa muntu yina kebasisaka bimbeni yonso ya kukonda kikuma?

⁴ Ndinga ya Nzambi ketuba nde banda na luyantiku, muntu mosi ya kemonanaka ve kemengaka bansambidi ya kyeleka. Tadila, Abele, muntu ya ntete ya lukwikilu, yina bo fwaka na nku. Biblia ketuba nde mpangi na yandi, Kaini, yina kufwaka yandi, “vandaka muntu ya Muntu ya Mbi,” Satana Dyabulu. (1 Yoane 3:12) Kaini kundimaka bangindu ya Satana, yo yina Dyabulu kusadilaka yandi sambu na kulungisa balukanu na yandi ya mbi. Biblia ketubilaka mpi mambu yina Satana kusalaka sambu na kumonisa Yobi ti Yezu Kristu bampasi ya ngolo. (Yobi 1:12; 2:6, 7; Yoane 8:37, 44; 13:27) Mukanda ya Kusonga kemonisa pwelele muntu yina vandaka kubasisa minyoku ya balongoki ya Yezu, ntangu yo ketuba nde: “Satana ta tula bantu ya nkaka na kati na beno na boloko sambu na kumeka beno.” (Kusonga 2:10) Ya kyeleka, Satana muntu kebasisaka kimbeni yonso ya kukonda kikuma yina kekuminaka bantu ya Nzambi.

 5. Sambu na nki Satana kemengaka bansambidi ya kyeleka?

⁵ Sambu na nki Satana kemengaka bansambidi ya kyeleka? Na komplo ya Satana kusalaka sambu na kumonisa nde yandi vandaka na lukumu ya kuluta nene, yandi tulaka ntembe ti Yehowa Nzambi, ‘Mfumu ya nene ya mvula na mvula.’ (1 Timoteo 1:17; 3:6) Yandi ketubaka nde Nzambi ketudilaka bigangwa na yandi bansiku mingi ya kukonda kikuma na luyalu na yandi mpi nde ata muntu mosi ve kesadilaka Yehowa ti mpusa ya masonga, kansi bantu kesalaka yo kaka sambu na mambote na bo mosi. Satana ketubaka nde kana bo pesa yandi nswa ya kumeka bantu, yandi lenda pukumuna bantu yonso na kuyambula kusadila Nzambi. (Kuyantika 3:1-6; Yobi 1:6-12; 2:1-7) Ntangu yandi kekusaka nde Yehowa kenyokulaka bantu, ketaka luvunu, mpi kelungisaka ve mambu ya yandi ketubaka, Satana kesosaka kudimona nde yandi mpi kele mfumu ya bima yonso bonso Yehowa. Yo yina, mpusa ya yandi kevandaka na yo ya kusosa nde bantu kusambila yandi kepusaka yandi na kuwila bansadi ya Yehowa makasi. ​—Matayo 4:8, 9.

 6. (a) Inki mutindu dyambu ya metala kimfumu ya Yehowa ketadila konso muntu na kati na beto? (b) Inki mutindu kubakisa dyambu yango kesadisaka beto na kutanina kwikama na beto? (Tala lupangu, na lutiti 12.)

⁶ Keti nge mebakisa nki mutindu dyambu yai ketadila luzingu na nge? Sambu nge kele nsadi ya Yehowa, ntembe kele ve nde nge mebakisaka nde ata kusala luzolo ya Nzambi kelombaka bikesa ya masonga, mambote ya nge mebakaka na kusala yo kele mingi kibeni. Kansi, inki nge tasala kana makambu yankaka ya nge kekutana ti yo na luzingu kesala nde nge kuka ve kulanda na kulemfuka na bansiku mpi minsiku ya Yehowa? Mpi nki nge tasala kana yo kemonana bonso nde kusadila Yehowa kenatila nge ve mambote? Keti nge tatuba nde kulanda na kusadila Yehowa kele mfunu ve? To keti zola sambu na Yehowa mpi ntonda ya mingi sambu na bikalulu na yandi ya kitoko tapusa nge na kulanda na kutambula na banzila na yandi yonso? (Kulonga 10:12, 13) Mutindu Yehowa kebikaka nde Satana kumonisa beto mwa mpasi mepesaka konso muntu na kati na beto okazio ya kupesa mvutu na ntembe yina Satana kubasisaka. ​—Bingana 27:11.

‘Kana Bo Kefinga Beno’

 7. Inki mayele Dyabulu kesadilaka sambu na kupusa beto na kubuya Yehowa?

⁷ Bika beto tadila ntangu yai na dikebi yonso mosi na kati ya mayele ya mbi yina Satana kesadilaka sambu na kundimisa mambu yina ya yandi kefundilaka Yehowa ti bansadi na yandi. Mayele yango kele kusadila luvunu. Yezu kubingaka Satana nde “tata ya luvunu.” (Yoane 8:44) Zina Dyabulu, yina ketendula “Muntu ya luvunu,” kemonisa muntu yango bonso muntu ya ntetentete ya ketubaka mambu ya luvunu sambu na Nzambi, na ndinga na yandi ya mbote, mpi na zina na yandi ya santu. Dyabulu kesadilaka luvunu ya nsi-nsi, mpi ya kimuntu-kimuntu sambu na kutula ntembe na kimfumu ya Yehowa, mpi yandi kesadilaka mayele ya mbi ya mutindu mosi sambu na kukusila bansadi ya kwikama ya Nzambi makambu. Na ntangu yandi kefulusaka mambu mingi ya luvunu sambu na kukusila Bambangi makambu, yandi lenda sala nde mpasi ya bantu kepesa bo kukuma dyaka ngolo kuluta.

 8. Inki mutindu Satana kufingaka Yobi, mpi nki mutindu yandi kudiwaka?

⁸ Tadila mambu yina kubwilaka Yobi, yina zina na yandi ketendula “Muntu ya Bo Memenga.” Katula kubebisa bima ya Yobi, kufwa bana na yandi, mpi kubebisa mavimpi na yandi, Satana kusalaka na mpila nde Yobi kumonana bonso nsumuki mosi ya Nzambi mepesa ndola. Ata bantu vandaka kupesa Yobi luzitu mingi, bo yonso kumaka kumona yandi mpamba, ata nkutu bampangi na yandi ti banduku na yandi ya ngolo. (Yobi 19:13-19; 29:1, 2, 7-11) Dyaka, na nzila ya bantu ya luvunu yina kwisaka kupesa yandi kikesa, Satana vandaka ‘kutubila Yobi bima yina kupesaka yandi mpasi na ntima.’ Ntetentete yandi kukusilaka Yobi nde yo lenda vanda nde yandi salaka masumu ya nene, mpi na nima yandi kubedisaka Yobi mbala mosi nde yandi kele muntu ya mbi. (Yobi 4:6-9; 19:2; 22:5-10) Mambu yai kupesaka mpenza Yobi mpasi na ntima!

 9. Inki Satana kusalaka sambu bantu kumona nde Yezu kele muntu ya masumu?

⁹ Sambu Mwana ya Nzambi kele muntu ya ntetentete ya kekotilaka kimfumu ya Yehowa, Satana kemengaka yandi ngolo kibeni. Ntangu Yezu kwisaka na ntoto, Satana kusosaka mpila ya kulembisa yandi na kimpeve, kaka mutindu yandi salaka na Yobi. Satana kuyidikaka mambu na mpila nde bantu kumona nde Yezu kele muntu ya masumu. (Yezaya 53:2-4; Yoane 9:24) Bantu vandaka kutubila yandi nde kisalu na yandi kaka kudya ti kunwa vinu mpi nde yandi ‘kele ti demo.’ (NW) (Matayo 11:18, 19; Yoane 7:20; 8:48; 10:20) Bo kusilaka yandi nde yandi kefinga Nzambi. (Matayo 9:2, 3; 26:63-66; Yoane 10:33-36) Dyambu yai kupesaka Yezu mpasi na ntima, sambu yandi zabaka nde yo vandaka kufingisa Tata na yandi kukonda kikuma. (Luka 22:41-44) Nsukansuka, bo fwaka Yezu na zulu ya nti bonso muntu mosi ya kefwaka bantu yina bo mesinga. (Matayo 27:38-44) Sambu yandi vandaka kaka ti kwikama ya kukuka, Yezu kukangaka mpenza ntima “na kimbeni yina ya bantu ya masumu.”​—Baebreo 12:2, 3.

10. Inki mutindu Satana kenwanisaka bapakulami yina mebikalaka na bilumbu na beto?

¹⁰ Na bilumbu na beto, Dyabulu kemengaka mpi balongoki ya kupakulama ya Kristu yina mebikalaka. Biblia kemonisa nde Satana ‘muntu kefundaka bampangi’ ya Kristu “mpimpa ti mwini . . . na meso ya Nzambi na beto.” (Kusonga 12:9, 10) Sambu bo mekulaka yandi na zulu mpi bo melosaka yandi na ntoto, Satana kesalaka bikesa mingi kibeni sambu bampangi ya Kristu kumonana bonso bantu ya kuluta mbi yina mefwana ve na kuzinga na kimvuka ya bantu. (1 Korinto 4:13) Na bansi mingi, bantu kekusilaka bo nde bo kele kadibundu ya kigonsa, kaka mutindu bo vandaka kubinga Bakristu ya mvu-nkama ya ntete. (Bisalu 24:5, 14; 28:22) Mutindu beto tubilaka yo na luyantiku, bo kekusilaka bo makambu na nzila ya bapropagande ya luvunu. Ata mpidina, na nzila ya ‘[nkembo, NW] ti nsoni’ na nzila ya ‘mambu ya mbi ti mambu ya mbote’ ya bo ketubilaka bo, bampangi ya kupakulama ya Kristu, ti banduku na bo “mameme ya nkaka” yina kepesaka bo maboko, kesalaka ngolo na kudikulumusa yonso sambu na ‘kuzitisa bansiku ya Nzambi mpi kusala kisalu ya kuta kimbangi na Yezu.’​—2 Korinto 6:8; Yoane 10:16; Kusonga 12:17, NW.

11, 12. (a) Bakristu lenda fingama sambu na nki kikuma? (b) Na nki mitindu Mukristu mosi lenda mona mpasi kukonda kikuma sambu na lukwikilu na yandi?

¹¹ Ya kyeleka, bansadi ya Nzambi kefingamaka ve ntangu yonso sambu na “mambu yina ya Nzambi ke zolaka.” (Matayo 5:10) Mafingu yankaka lenda vanda mbuma ya mambu yina beto mesala sambu na kukonda kukuka na beto mosi. Beto kele ata ti lukumu mosi ve kana beto “ke kanga ntima na fimbu yina ya bo ke bula [beto] sambu na mbi ya [beto] me sala.” Kansi, kana ‘bantu yankaka kepesa Mukristu mosi mpasi yina ya yandi lunga baka ve, kansi yandi kekanga ntima na mpasi yina sambu yandi zaba luzolo ya Nzambi, [yo kele dyambu mosi ya mbote, NW]’ na meso ya Yehowa. (1 Piere 2:19, 20) Inki ntangu Mukristu lenda kutana ti mambu yai yonso?

¹² Bo memonisaka bankaka mpasi ya ngolo sambu bo buyaka kulemfuka na bansiku ya bambuta ya kesalamaka na mafwa. (Kulonga 14:1) Bo kefingaka baleke yina kele Bambangi sambu bo kezitisaka minsiku ya Yehowa ya metala bikalulu ya mbote. (1 Piere 4:4) Bo kefundaka bibuti yankaka yina kele Bakristu nde “bo kezolaka ve bana na bo” na ntangu bibuti yango kelombaka nde bo sansa bana na bo kukonda kusadila menga. (Bisalu 15:29) Bo mebuyaka Bakristu na bampangi na bo ya kinsuni ti na bantu ya kartie kaka sambu bo mekumaka bansadi ya Yehowa. (Matayo 10:34-37) Bantu yai yonso kelandaka mbandu yina baprofete ti Yezu yandi mosi mebikilaka bo na mpila bo monaka mpasi kukonda kikuma.​—Matayo 5:11, 12; Yakobo 5:10; 1 Piere 2:21.

Beto Ndima Kukanga Ntima na Ntangu Bo Kefinga Beto

13. Inki lenda sadisa beto na kutanina bukatikati na beto ya kimpeve kana bo kefinga beto ngolo mpenza?

¹³ Kana bo kefinga beto ngolo mpenza sambu na lukwikilu na beto, beto lenda lemba nitu, bonso profete Yeremia, mpi kudiwa nde beto lenda landa dyaka ve na kusadila Nzambi. (Yeremia 20:7-9) Inki lenda sadisa beto na kutanina bukatikati na beto ya kimpeve? Sosa kutadila mambu mutindu Yehowa ketadilaka yo. Yandi kemonaka bantu yina kebikalaka ya kwikama na mimekamu nde bo menunga, kansi bo mebela ve. (Roma 8:37) Meka na kuyindula babakala ti bankento yina kukotilaka kimfumu ya Yehowa ata bo kutanaka ti mambu ya nku ya konso mutindu yina ya Dyabulu kusalaka bo, bonso Abele, Yobi, Maria mama ya Yezu, ti bantu yankaka ya kwikama ya ntama, mpi bansadi yankaka ya bilumbu na beto. (Baebreo 11:35-37; 12:1) Yindulula luzingu na bo ya kwikama. Kibuka yai ya nene ya bantu ya kwikama kebinga beto na kuvukana ti bo sambu na kubaka lusakumunu yina Nzambi mebumbilaka bantu yina kenunga inza na lukwikilu na bo.​—1 Yoane 5:4.

14. Inki mutindu bisambu ya ngolo lenda pesa beto kikesa ya kubikala ya kwikama?

¹⁴ Ntangu ‘bangindu na beto ya keyangisaka beto kekumaka mingi na kati na beto,’ beto lenda sala bisambu ya ngolo na Yehowa, ebuna yandi tasadisa mpi tapesa beto kikesa. (Nkunga 50:15; 94:​19, NW) Yandi tapesa beto mayele ya beto kele na yo mfunu sambu na kunwana ti mumekamu mpi yandi tasadisa beto na kutula dikebi yonso na dyambu ya nene, disongidila kimfumu ya Yehowa, yina bantu kemengilaka bansadi na yandi kukonda kikuma. (Yakobo 1:5) Yehowa lenda pesa beto mpi “ngemba ya Nzambi, ngemba yina me luta mambu yonso ya bantu ke yindulaka.” (Filipi 4:6, 7) Ngemba yai ya Nzambi kepesaka kesadisaka beto na kukonda kudiyangisa mpi na kubikala kaka ngolo na ntangu beto mekutana ti mpasi ya ngolo, mpi na kukonda kukuna badute to boma. Na nsadisa ya mpeve na yandi, Yehowa lenda sadisa beto na konso dyambu yina ya yandi kepesa nzila nde yo bwila beto. ​—1 Korinto 10:13.

15. Inki lenda sadisa beto na kubuya kukangila bantu makasi na ntangu beto kemona mpasi?

¹⁵ Inki lenda sadisa beto na kukonda kukangila bantu yina kemengaka beto kukonda kikuma makasi? Yibuka nde bambeni na beto ya ntetentete kele Satana ti bademo. (Efezo 6:12) Ata bantu yankaka kenyokulaka beto na luzolo yonso, bantu mingi yina kenwanisaka bantu ya Nzambi kesalaka yo sambu bo kebakisaka ve mambu to sambu bantu yankaka kepusaka bo. (Daniele 6:4-16; 1 Timoteo 1:12, 13) Luzolo ya Yehowa kele nde “bantu ya mitindu yonso” kuzwa dibaku ya “kuguluka mpi kubaka nzayilu ya sikisiki ya kyeleka.” (1 Timoteo 2:4, NW) Ya kyeleka, bantu yankaka yina vandaka kunwanisa beto mekumaka bampangi na beto Bakristu sambu bo monaka bikalulu na beto ya mbote. (1 Piere 2:12) Dyaka, beto lenda baka dilongi na mbandu ya Yozefi, mwana ya Yakobi. Ata Yozefi kunyokwamaka mingi kibeni sambu na bampangi na yandi ya kitata, yandi kangilaka bo ve makasi. Sambu na inki? Sambu yandi bakisaka nde Yehowa muntu vandaka kutwadisa mambu, mpi kuyidika yo sambu na kulungisa lukanu na Yandi. (Kuyantika 45:4-8) Mutindu mosi, Yehowa lenda sala na mpila nde konso mpasi ya kukonda kikuma yina beto lenda kutana na yo kukumisa zina na yandi. ​—1 Piere 4:16.

16, 17. Sambu na nki beto fwete tula ve basusi mingi kuluta na bikesa yina bambeni kesalaka sambu na kukangisa kisalu ya kusamuna?

¹⁶ Beto fwete tula ve basusi mingi kuluta kana na mwa nsungi mosi buna yo kemonana bonso nde bambeni kenunga na kukangisa nde nsangu ya mbote kuyela. Ntangu yai Yehowa ke na kunikisa makanda na nzila ya kimbangi ya beto kepesa, mpi bima ya mfunu ke na kukota. (Agai 2:7, NW) Kristu Yezu, Ngungudi ya Mbote, kutubaka nde: “Mameme na mono ke waka ndinga na mono; mono zaba bo, bo ke landaka mono. Mono ke pesaka bo moyo ya mvula na mvula; . . . Ata muntu mosi ve ta botula bo na maboko na mono.” (Yoane 10:27-29) Bawanzyo ya santu mpi kesalaka kisalu ya nene ya kubuka bambuma ya kimpeve. (Matayo 13:39, 41; Kusonga 14:6, 7) Yo yina, ata kima mosi ve ya bambeni ketubaka to kesalaka lenda kangisa lukanu ya Nzambi.​—Yezaya 54:17; Bisalu 5:38, 39.

¹⁷ Mbala mingi, bikesa yina bambeni kesalaka kebutaka ve bambuma ya mbote yina bo keyindulaka. Na insi mosi ya Afrika, bo kekusilaka Bambangi ya Yehowa mambu mingi, mu mbandu, nde bo kesambilaka Dyabulu. Yo yina, konso ntangu yina Bambangi vandaka kukwenda kutala Grace, yandi vandaka kutina na nima ya nzo na yandi mpi kubumbana tii kuna bambangi takwenda. Kilumbu mosi pastere ya dibundu na yandi kutombulaka mukanda na beto mosi mpi kubuyisaka bantu yonso yina kuvandaka pana nde bo tanga yo ve, nde kana ve bo tavidisa lukwikilu na bo. Dyambu yina kutedimisaka mpusa ya Grace ya kusosa kuzikisa. Na mbala ya nima yina Bambangi kwendaka kutala yandi, na kisika ya kubumbana, yandi solulaka ti bo mpi yandi bakaka kopi mosi ya mukanda yango. Yandi yantikaka kulonguka Biblia, mpi na mvu 1966 yandi bakaka mbotika. Ntangu yai Grace kesadila ntangu na yandi sambu na kusosa bantu yankaka yina lenda vanda nde bo mesongaka bo mambu ya luvunu na yina metala Bambangi ya Yehowa.

Kumisa Lukwikilu na Nge Ngolo Ntangu Yai

18. Sambu na nki beto fwete kumisa lukwikilu na beto ngolo na ntwala nde bampasi ya ngolo kubasika, mpi nki mutindu beto lenda sala yo?

¹⁸ Sambu Satana lenda basisa kimbeni ya kukonda kikuma na kintulumukina, yo kele mfunu nde beto kumisa lukwikilu na beto ngolo. Inki mutindu beto lenda sala yo? Rapore ya kukatukaka na insi mosi kisika bo vandaka kunyokula bantu ya Yehowa kutubaka nde: “Dyambu mosi kumonanaka mpenza pwelele: Bantu yina kuvandaka ti bikalulu ya mbote ya kimpeve mpi vandaka kubaka kyeleka ya Biblia na valere mingi kumonaka ve mpasi na kukangama ngolo na ntangu mimekamu kubasikaka. Kansi bayina vandaka kutina balukutakanu, kubasika ve mbala na mbala na kisalu ya bilanga, mpi kubwa na mambu ya fyoti-fyoti na ‘ntangu ya mbote,’ vandaka kubwa mingi na ntangu ya kumekama ya ‘ngolo.’” (2 Timoteo 4:2) Kana nge mebakisa bisika yina yo kelomba nde nge sungika bikalulu na nge, sala bikesa na kusala yo kukonda kusukinina. ​—Nkunga 119:60.

19. Kwikama ya bansadi ya Nzambi kelungisaka nki dyambu na ntangu bo kemengaka bo kukonda kikuma?

¹⁹ Kwikama ya bansambidi ya kyeleka na ntwala ya kimbeni ya ngolo ya Satana kele kidimbu ya nene ya kemonisa nde kimfumu ya Yehowa kele ya kyeleka, yo kele ti nswa ya kuyala, mpi nde yo kele ya lunungu. Kwikama na bo kepesaka ntima ya Nzambi kyese. Ata bantu lenda finga bo na kiteso mosi ya kulutana, muntu yina kele ti lukumu ya meluta ntoto ti zulu “ke mona nsoni ve kana bo ke binga yandi Nzambi na bo.” Ya kyeleka, sambu na bantu ya kwikama ya mutindu yina, beto lenda tuba mpenza nde: “Nsi-ntoto lungaka kuvanda ve” ya bo.​—Baebreo 11:16, 38.

[Noti na nsi ya lutiti]

Keti Nge Lenda Tendula?

• Kimbeni ya kukonda kikuma ya bansambidi ya kyeleka kekatukaka na nani?

• Inki mutindu Satana kusadilaka mafingu sambu na kubwisa kwikama ya Yobi ti ya Yezu?

• Inki mutindu Yehowa kepesaka beto kikesa ya kukangama ngolo na ntwala ya kimbeni ya Satana?

[Lupangu/Kifwanisu ya kele na lutiti 12]

Bo Bakisaka Dyambu ya Kyeleka

Mbangi mosi ya Yehowa na Ukraine, kisika bo buyisaka kisalu ya kusamuna Kimfumu na nsungi mosi ya bamvula kuluta 50, kutubaka nde: “Bambangi ya Yehowa fwete tadila ve mambu yina bo kutanaka na yo kaka na mambu yina bantu kusalaka bo. . . . Bamfumu mingi ya leta vandaka kulungisa kaka kisalu na bo. Ntangu luyalu kusobaka, bamfumu mpi kusobaka mambu yina bo vandaka kusala, kansi beto sobaka ve. Beto bakisaka nde Biblia memonisaka dezia kisika mpenza ya bampasi na beto kekatukaka.

“Beto vandaka kudimona ve nde beto kenyokwama kaka sambu na nku ya bantu. Kima kusadisaka beto na kukanga ntima kuvandaka nde beto vandaka kubakisa pwelele dyambu yina kubasikaka na kilanga ya Edeni, disongidila, dyambu ya metala nswa ya kuyala ya Nzambi kele na yo. . . . Beto ndimaka kunwanina dyambu mosi yina vandaka kutadila mambote ya bantu mpamba ve kansi mpi mambote ya Mfumu ya luyalanganu. Beto vandaka kubakisa mambu ya kyeleka yina bo vandaka kumengila beto. Kubakisa mambu yina kupesaka beto ngolo mpi yo sadisaka beto na kutanina kwikama na beto ata na mambu ya mpasi ya kuluta ngolo.”

[Kifwanisu]

Victor Popovych, kukotaka boloko na mvu 1970

[Kifwanisu ya kele na lutiti 9]

Kuvweza yina bo vwezaka Yezu vandaka kukatuka na nani?

[Bifwanisu ya kele na lutiti 11]

Yobi, Maria, ti bansadi ya Nzambi ya bilumbu na beto, bonso Stanley Jones, kukotilaka kimfumu ya Yehowa