Keti Bankaka Kebakilaka Nge Mabanza ya Mbi?

MVITA ya bikanda, kupona bampusu, kunyokula bankaka, nkabisa, kufwisana; inki kevukisa bima yai yonso? Bima yai yonso kele bitini ya kikalulu mosi ya meyalumukaka na bantu—mabanza ya mbi sambu na bankaka!

Mabanza ya mbi sambu na bankaka kele inki? Buku mosi ketendula yau bonso “ngindu mosi ya mebakama nkatu kubaka ntangu to kubanza sambu na kusambisa mbote.” Bonso bantu ya konda kukuka, beto kevandaka kaka ti kangindu mosi ya mabanza ya mbi sambu na bankaka. Mbala yankaka nge lenda yindula ntangu mosi ya nge sambisaka nkatu kuzaba kyeleka yonso ya mambu. Mabanza ya mbi sambu na bankaka ya mutindu yina, Biblia keswaswanisaka yau ti mutindu Yehowa Nzambi kesambisaka. Yau ketuba nde: “[Nzambi] ke talaka ve yina ke monika na meso. Muntu ke talaka yina ke monika na meso, kansi Mfumu Nzambi ke talaka ntima.”—1 Samuele 16:7.

Mabanza ya Mbi Lenda Kunata Nsoki

Nkatu ntembe, na ntangu mosi, konso muntu, bantu yankaka mebakilaka yandi bangindu ya mbi. (Fwanisa ti Longi 7:21, 22.) Na kimvuka, beto yonso bantu kevandaka na mabanza ya mbi sambu na beto. Kansi, kana beto melosa yau nswalu, mabanza ya mbi ya mutindu yina tasala nsoki fyoti to tasala yau mpi ve. Kansi kana nge mesansa mabanza ya mutindu yina, yau lenda kunata nsoki. Yau lenda pukumuna beto na kubanda kukwikila luvunu. Mu mbandu, na bupusi ya mabanza ya mbi sambu na bankaka, bantu yankaka kekwikilaka na masonga yonso nde muntu lenda vanda na kindila, bumolo, buzoba, to lulendo kaka sambu yandi kele na kati ya dibundu yai, na ndinga yina, to na insi yina.

Bantangu mingi, bangindu ya mbi ya mutindu yina kebutaka munyokudi ya mbi, kukonda lunungu to nkutu kufwa bankaka. Bantu mingi mefwaka na mubulu, kufwisana, kugondana kikanda mosi ti yankaka, to mitindu yankaka ya mabanza ya kuluta mbi sambu na bankaka.

Na ntoto ya mvimba, baluyalu menwanisaka mabanza ya mbi sambu na bankaka na kutulaka nsiku ya muntu lenda kulula ve na yina metala nswa ya kimpwanza, ya lutaninu, mpi kubaka bantu yonso kiteso mosi. Kana nge metanga mukanda ya bansiku ya insi na nge, ntembe kele ve nde nge tamona ba artikle yina mesalamaka sambu na kutanina banswa ya basitwaye, nkatu kulanda mpusu na bau, nkabisa ya nkento to bakala, to dibundu na bau. Kansi, mabanza ya mbi sambu na bankaka ti kunyokula bankaka meyalumukaka ngolo kibeni na ntoto ya mvimba.

Keti bankaka kele na mabanza ya mbi sambu na nge? Keti bau ketadilaka nge bonso muntu ya kindila, bumolo, buzoba, to ya lulendo kaka sambu nge kele muntu ya mpusu, mvula, insi, to dibundu yankaka; to sambu nge kele nkento to bakala. Keti dibaku kepesamaka ve na nge na kuvanda na ndongolo, kisalu, nzo, to lusadisu ya kimvuka sambu na mabanza ya mbi ya bankaka? Kana nde ee, inki mutindu nge lenda nunga yau?

[Kifwanisu ya kele na lutiti 3]

Kusansa mabanza ya mbi sambu na bankaka kebutaka kimbeni na kati ya bampusu

[Bangogo ya kemonisa kisina ya foto]

Nina Berman/Sipa Press