‘Beno Landa na Kubuta Bambuma Mingi’

“Beno [landa na kubuta] bambuma mingi, mpidina ke songa nde beno kele balonguki na mono.”​—YOANE 15:8.

 1. (a) Inki mukumba ya balongoki fwete lungisa yina Yezu kuzabisaka na bantumwa na yandi? (b) Inki ngyufula beto fwete kudiyula?

YO VANDAKA na nkokila, na ntwala ya lufwa na yandi. Yezu kubakaka ntangu ya kufwana sambu na kusyamisa bantumwa na yandi na disolo mosi ya yandi solulaka ti bo na masonga mpenza. Ntangu yai, yo fwete vanda nde midi ya mpimpa meluta dezia, kansi zola yina ya Yezu kele na yo sambu na banduku na yandi ya ngolo, kepusa yandi na kutuba kaka. Ebuna, na katikati ya disolo, yandi yibusaka bo dyambu yankaka ya yandi kelomba na bo nde bo fwete lungisa sambu na kulanda kuvanda balongoki na yandi. Yandi ketuba nde: “Lukumu ya Tata ke monikaka mutindu yai: Kana beno [landa na kubuta] bambuma mingi, mpidina ke songa nde beno kele balonguki na mono.” (Yoane 15:8) Keti bubu yai beto kelungisa mukumba yai ya bo kelomba na balongoki? “Kubuta bambuma mingi” ketendula inki? Sambu na kubaka mvutu, bika beto tadila dyaka disolo ya bo solulaka na nkokila yina.

 2. Inki kingana ya ketala bambuma Yezu kutaka na nkokila mosi na ntwala ya lufwa na yandi?

² Ndongisila yina metala kubuta bambuma, Yezu kutubilaka yo na kingana mosi ya yandi telaka bantumwa na yandi. Yandi tubaka nde: “Mono kele nti ya vinu ya kieleka. Tata na mono kele muntu ke salaka bilanga ya vinu. Yandi ke zengaka konso lutangu yina kele na mono ke butaka bambuma ve. Yandi ke bongisaka konso lutangu yina ke butaka bambuma sambu yo kuma mbote, yo buta diaka bambuma ya kuluta mingi. Malongi ya mono vandaka kupesa beno, yo me bongisaka beno dezia. Beno zinga kaka na kimvuka ti mono, bonso mono kele na kimvuka ti beno. Lutangu ya nti ya vinu yo mosi lenda buta bambuma ve, kana yo me vukanaka ve na nti yina; mutindu mosi, beno mpi lenda buta bambuma kaka kana beno ke zinga na kimvuka ti mono. ‘Mono kele nti ya vinu, beno kele balutangu. . . . Lukumu ya Tata ke monikaka mutindu yai: Kana beno [landa na kubuta] bambuma mingi, mpidina ke songa nde beno kele balonguki na mono. Mono ke zolaka beno mutindu Tata ke zolaka mono; beno zinga na kuzola na mono. Kana beno landa bansiku na mono, beno ta zinga na kuzola na mono, mutindu mono me landaka bansiku ya Tata na mono ti ke zingaka na kuzola na yandi.”​—Yoane 15:1-10.

 3. Inki balongoki ya Yezu fwete sala sambu na kubuta bambuma?

³ Na kingana yai, Yehowa kele Muntu ya ke salaka bilanga, Yezu kele nti ya vinu, ebuna bantumwa yina Yezu vandaka kutubila kele balutangu. Ntangu yonso ya bantumwa vandaka kusala ngolo na “kuvanda na kimvuka” ti Yezu, bo zolaka kubuta bambuma. Ebuna, Yezu kutendulaka nki mutindu bantumwa lendaka kununga na kutanina bumosi yai ya mfunu: “Kana beno landa bansiku na mono, beno ta zinga na kuzola na mono.” Na nima, ntumwa Yoane kusonikilaka bampangi na yandi Bakristu bangogo ya mutindu mosi: “Konso muntu yina ke landaka bansiku ya [Yezu], yandi ke vandaka na kimvuka ti [yandi].”a (1 Yoane 2:24; 3:24) Yo yina, ntangu balongoki vandaka kulanda bansiku ya Kristu, bo vandaka kuzinga na kimvuka ti yandi, mpi bumosi yango, zolaka mpi kusadisa bo na kubuta bambuma. Bambuma yango ya beto fwete buta kele ya nki mutindu?

Dibaku ya Kuyela

 4. Inki dilongi beto lenda baka mutindu beto mezaba nde Yehowa “ke zengaka” konso lutangu yina kebutaka ve bambuma?

⁴ Na kingana ya nti ya vinu, Yehowa “ke zengaka” lutangu kana yo kebuta ve bambuma. Yo kesonga beto inki? Yo kesonga beto kaka ve nde balongoki yonso fwete buta bambuma kansi mpi nde beto yonso mefwana na kubuta bambuma, ata luzingu na beto to bandilu na beto kele ya nki mutindu. Ya kyeleka, yo tawakana ve ti zola ya Yehowa kana yandi ‘zenga’ to kubuya longoki mosi ya Kristu sambu longoki yango mekuka ve na kulungisa mukumba yina kulutaka kiteso ya ngolo na yandi.​—Nkunga 103:14; Kolosai 3:23; 1 Yoane 5:3.

 5. (a) Inki mutindu kingana ya Yezu kemonisa nde beto lenda yela sambu na kubuta bambuma? (b) Inki mitindu zole ya bambuma beto tatadila?

⁵ Kingana ya Yezu ya ketubila nti ya vinu kemonisa nde beto balongoki, na kiteso ya ngolo na beto, beto fwete sosa mitindu ya kuyedisa kisalu na beto. Tala mutindu Yezu ketendula yo: “Yandi ke zengaka konso lutangu yina kele na mono ke butaka bambuma ve. Yandi ke bongisaka konso lutangu yina ke butaka bambuma sambu yo kuma mbote, yo buta diaka bambuma ya kuluta mingi.” (Yoane 15:2) Na nsuka ya kingana na yandi, Yezu kelongisila balongoki na yandi na kubuta “bambuma mingi.” (Verse 8) Inki yo kelonga beto? Beto balongoki na yandi, beto fwete kuma ve bamolo ata fyoti to kukonda kudibanza sambu na kisalu. (Kusonga 3:14, 15, 19) Kansi, beto fwete sosa mitindu ya kuyela sambu na kubuta bambuma. Bambuma ya nki mutindu beto fwete sala kikesa na kubuta yo kuluta mingi? Bambuma yango yo yai: (1) “bambuma ya mpeve” ti (2) bambuma ya Kimfumu.​—Galatia 5:22, 23, NW; Matayo 24:14.

Bambuma ya Bikalulu ya Bukristu

 6. Inki mutindu Yezu Kristu kumonisaka mfunu ya mbuma ya ntete ya bo ketanga na ndonga ya bambuma ya mpeve?

⁶ Zola kele kima ya ntete ya bo ketanga na ndonga ya “bambuma ya mpeve.” Mpeve santu ya Nzambi kebutaka zola na kati ya Bakristu, sambu bo kelemfukaka na ntuma ya Yezu kupesaka ntangu fyoti na ntwala ya kuta kingana ya nti ya vinu yina kebutaka bambuma. Yandi tubilaka bantumwa na yandi nde: “Nsiku mosi ya mpa ya mono ke pesa beno yo yai: Beno zolana beno na beno.” (Yoane 13:34) Ya kyeleka, na disolo na yandi ya mvimba ya yandi salaka na mpimpa ya nsuka ya luzingu na yandi na ntoto, Yezu kuyibusaka bantumwa mbala mingi mfunu ya kumonisa kikalulu yai ya zola.​—Yoane 14:15, 21, 23, 24; 15:12, 13, 17.

 7. Inki mutindu ntumwa Piere kumonisaka nde kubuta bambuma kewakana ti kumonisa bikalulu bonso ya Kristu?

⁷ Piere, yina kuvandaka pana na mpimpa yango, kubakisaka nde zola ya kufwanana na yina ya Kristu mpi bikalulu yankaka ya kewakana ti yo fwete monana na kati ya balongoki ya kyeleka ya Kristu. Na nima ya bamvula, Piere kusyamisaka Bakristu na kuyedisa bikalulu bonso kudiyala, kuzola bampangi ti zola. Yandi yikaka nde kusala mutindu yina tatanina beto na “kukonda kukuma bantu yina kesalaka dyaka kisalu ve to ya kebutaka ve bambuma.” (2 Piere 1:5-8, NW) Ata luzingu na beto kele ya nki mutindu, beto mefwana mpenza na kumonisa bambuma ya mpeve. Yo yina, bika beto sala kikesa sambu na kumonisa zola, bumbote, mawete, mpi bikalulu yankaka yina mefwanana na yina ya Kristu na kiteso mosi ya kuluta dyaka, sambu “mambu yina yonso bansiku ke buyaka yo ve,” to yo kele na ndilu ve. (Galatia 5:23) Ya kyeleka, bika beto buta “bambuma mingi.”

Kubuta Bambuma ya Kimfumu

 8. (a) Inki kuwakana kele na kati ya bambuma ya mpeve ti bambuma ya Kimfumu? (b) Inki ngyufula mefwana nde beto tadila yo mbotembote?

⁸ Bambuma ya ntomo mpi ya kulere ya kitoko kesalaka nde bantu kumona nti na yo kitoko mpenza. Kansi, valere ya bambuma ya mutindu yina kesukaka kaka ve na kitoko yina. Bambuma kevandaka mpi mfunu sambu na kukuna dyaka nti yango na nsadisa ya bankeni na yo. Mutindu mosi mpi, bambuma ya mpeve kesalaka mambu mingi kuluta kukumisa kimuntu na beto ya Bukristu kitoko. Bikalulu bonso zola ti lukwikilu kepusaka beto mpi na kumwanga nsangu ya Kimfumu ya mefwanana na bankeni yina kele na Ndinga ya Nzambi. Simba mutindu ntumwa Polo kenyata ngindu yai ya mfunu ya kemonisa kuwakana yina kele pana. Yandi ketuba nde: “Beto mpi kiteso mosi, beto ke tulaka ntima [yina kele mosi na kati ya bambuma ya mpeve], . . . yo yina beto ke tubaka.” (2 Korinto 4:13) Na kulandaka ntendula yai, mutindu ya zole ya bambuma yina beto fwete monisa kele yina ya Polo ketendula ntangu yandi ketuba dyaka nde beto “kepesaka na Nzambi makabu ya lukumu, disongidila, mbuma ya bikobo.” (Baebreo 13:15, NW) Beto bansamuni ya Kimfumu ya Nzambi, keti beto kele na mpila ya kubuta dyaka bambuma yankaka, to nkutu kubuta “bambuma mingi” na luzingu na beto?

 9. Keti kubuta bambuma ketendula kukumisa bantu balongoki? Tendula.

⁹ Sambu na kupesa mvutu ya mbote, beto fwete bakisa ntete ntendula ya bambuma ya Kimfumu. Keti yo tavanda kyeleka na kutuba nde kubuta bambuma ketendula kukumisa bantu balongoki? (Matayo 28:19) Keti bambuma ya beto fwete buta ketendulaka ntetentete bantu yina ya beto kesadisaka na kubaka mbotika mpi na kukuma bansambidi ya Yehowa? Ve. Kana yo vandaka mutindu yina, nga Bambangi yonso ya beto kezolaka mingi yina kesamunaka nsangu ya Kimfumu na kwikama yonso tuka bamvula mingi na bateritware yina bantu kebuyaka nsangu yango lenda lemba mpenza nitu na kuwa dyambu ya mutindu yina. Ya kyeleka, kana bambuma ya Kimfumu ya beto fwete buta ketendula kaka balongoki ya mpa, Bambangi ya kikesa ya mutindu yina zolaka kuvanda bonso balutangu ya kebutaka ve bambuma yina Yezu ketubila na kingana na yandi! Yo kele pwelele nde yo kele mutindu yina ve. Ebuna, mbuma ya ntete ya kisalu na beto ya Kimfumu kele inki?

Bo Kebutaka Bambuma na Kumwanga Nsangu ya Kimfumu

10. Inki mutindu kingana ya Yezu ya muntu yina kekunaka bankeni mpi bantoto ya kuswaswana kemonisa nki bambuma ya Kimfumu ketendula mpi nki yo ketendula ve?

¹⁰ Kingana ya Yezu yina ketadila muntu ya kekuna mpi mitindu ya kuswaswana ya ntoto kepesa mvutu na ngyufula yina, mpi mvutu yango kepesa mpenza kikesa na bayina ketaka kimbangi na bateritware yina bantu mingi kebuyaka nsangu. Yezu kutubaka nde nkeni kele nsangu ya Kimfumu yina kele na Ndinga ya Nzambi, mpi nde ntoto kele ntima ya kifwani ya muntu. Bankeni yankaka ‘kwendaka kubwa na ntoto ya mbote. Yo menaka, ebuna konso kimenina butaka bambuma.’ (Luka 8:8) Inki kele bambuma yango? Kana nkeni ya ble memena mpi yo meyela, yo kebutaka bambuma, yo kebutaka ve bankeni ya fyoti yina bo kunaka, kansi bankeni ya mpa. Mutindu mosi mpi, Mukristu kebutaka bambuma, yo kelombaka ve nde bambuma yango kuvanda kaka balongoki ya mpa, kansi bankeni ya mpa ya Kimfumu.

11. Inki mutindu beto lenda tendula bambuma ya Kimfumu?

¹¹ Yo yina, na kutadila ntendula yai, bambuma kele ve balongoki ya mpa to bikalulu ya mbote ya Bukristu. Sambu nkeni yina beto kekunaka kele nsangu ya Kimfumu, bambuma ya kebutukaka fwete vanda kaka bambuma mingi ya nkeni yina mosi. Kubuta bambuma na mutindu yai ketendula kutuba mambu yina metala Kimfumu. (Matayo 24:14) Keti beto lenda kuka na kubuta bambuma ya Kimfumu ya mutindu yina, disongidila, kusamuna nsangu ya mbote ya Kimfumu, ata luzingu na beto kele ya nki mutindu? Ee, beto lenda kuka! Kaka na kingana yina mosi Yezu ketendula kikuma.

Beto Pesa Bima na Beto ya Kuluta Mfunu Sambu na Lukumu ya Nzambi

12. Keti Bakristu yonso lenda kuka na kubuta bambuma ya Kimfumu? Tendula.

¹² Yezu kutubaka nde: “[Yina kubwaka, NW] na ntoto ya mbote . . . butaka bambuma: bankaka nkama, bankaka makumi sambanu, bankaka makumi tatu.” (Matayo 13:23) Mbutu ya bambuma yina bo kekunaka na bilanga keswaswanaka na kutadila mutindu yo meyedila. Mutindu mosi mpi, mambu yina beto lenda sala na kusamuna nsangu ya mbote lenda swaswana na kulandaka luzingu ya muntu na muntu, mpi Yezu kumonisaka nde yandi kubakisaka dyambu yai. Bamosi lenda vanda na mabaku mingi; bankaka lenda vanda na mavimpi ya kuluta mbote mpi na ngolo mingi. Yo yina, mambu ya beto kekuka kusala lenda vanda mingi to fyoti kana beto fwanisa yo ti yina ya bankaka kesala, kansi kana kiteso ya beto kesala mefwana na ngolo na beto, Yehowa kesepelaka na yo. (Galatia 6:4) Ata kimununu to kimbefo kesala nde beto kuka ve kusamuna mingi, ntembe kele ve nde, Tata na beto ya mawa, Yehowa, tamona beto bonso bantu yina ‘kelanda na kubuta bambuma mingi.’ Sambu na inki? Sambu beto kepesa yandi ‘yonso ya beto kele na yo,’ disongidila, beto kesadila yandi na moyo na beto ya mvimba.b​—Marko 12:43, 44; Luka 10:27.

13. (a) Inki kikuma ya ntete kepusaka beto na “kulanda” kubuta bambuma ya Kimfumu? (b) Inki tasadisa beto na kulanda kubuta bambuma na bateritware yina bantu kezolaka ve kundima nsangu? (Tala lupangu yina kele na lutiti 29.)

¹³ Ata konso nki kiteso yina beto kekuka kubuta bambuma ya Kimfumu, beto tawaka mpusa ya kulanda “kubuta bambuma” kana beto keyibuka ntangu yonso kikuma ya kepusaka beto na kusala kisalu yango. (Yoane 15:16) Yezu kutubilaka kikuma ya kuluta nene ya fwete pusaka beto: “Lukumu ya Tata ke monikaka mutindu yai: Kana beno [kelanda na kubuta] bambuma mingi.” (Yoane 15:8) Ya kyeleka, kisalu na beto ya kusamuna kesantisaka zina ya Yehowa na ntwala ya bantu yonso. (Nkunga 109:30) Honor, Mbangi mosi ya nkento yina kele na bamvula 70 na ndambu, ketuba mutindu yai: “Ata na bateritware yina bantu mingi kebuyaka nsangu, yo kele dibaku mosi ya nene na kutuba na zina ya Muntu ya Kuluta Kuzanguka.” Ntangu bo yulaka mpangi Claudio, yina kesalaka kisalu ya kusamuna na kikesa yonso tuka na mvu 1974, kikuma yina kepusaka yandi na kulanda kusamuna ata bantu mingi ve kendimaka nsangu na teritware na yandi, yandi vutukilaka mambu yina kele na Yoane 4:34, kisika beto ketanga bangogo yai ya Yezu: “Madia na mono kele yo yai: na kulanda luzolo ya muntu yina tindaka mono ti na kumanisa kisalu yina ya yandi me pesaka mono na kusala.” Claudio keyika nde: “Bonso Yezu, mono ndimaka kaka ve na kuyantika kusala kisalu na mono ya kusamuna Kimfumu kansi mono kezolaka mpi kumanisa yo.” (Yoane 17:4) Bambangi ya Yehowa ya ntoto ya mvimba kevandaka na dibanza ya mutindu mosi.​—Tala lupangu yina ketuba nde “Mutindu ya ‘Kubuta Bambuma ti Kukanga Ntima,’” na lutiti 29.

Kusamuna mpi Kulonga

14. (a) Inki balukanu zole Yoane Mbotiki ti Yezu kulungisaka? (b) Inki mutindu nge lenda tendula kisalu ya Bakristu kesalaka bubu yai?

¹⁴ Nsamuni ya Kimfumu ya ntete ya bo ketubila na Baevanzile kele Yoane Mbotiki. (Matayo 3:1, 2; Luka 3:18) Lukanu na yandi ya ntete kuvandaka ya kukuma “temwe,” mpi yandi salaka yo na lukwikilu mpenza mpi ti kivuvu nde “bantu kuwa malongi na yandi, ebuna bo ndima.” (Yoane 1:6, 7) Ya kyeleka, bantu yankaka yina kuwaka malongi ya Yoane kukumaka balongoki ya Kristu. (Yoane 1:35-37) Yo yina, beto lenda tuba nde Yoane kuvandaka nsamuni mpi yandi kumisaka bantu balongoki. Yezu mpi kuvandaka nsamuni mpi longi. (Matayo 4:23; 11:1) Ebuna, mpila ya kuyituka kele ve na kumona nde Yezu kutindaka balongoki na yandi na kusuka kaka ve na kusamuna nsangu ya Kimfumu kansi mpi na kusadisa bantu na kundima yo mpi bo kuma balongoki na yandi. (Matayo 28:19, 20) Yo yina, bubu yai beto kesukaka kaka ve na kusamuna kansi beto kelongaka mpi.

15. Inki kufwanana kemonana na mutindu bantu vandaka kundima to kubuya ntangu kisalu ya kusamuna vandaka kusalama na mvu-nkama ya ntete ya T.B. ti mutindu yo kesalamaka bubu yai?

¹⁵ Ntembe kele ve nde ntangu bantu ya mvu-nkama ya ntete ya T.B. kuwaka Polo kesamuna mpi kelonga, “Bantu ya nkaka tulaka ntima na mambu yina ya yandi vandaka kutubila bo, kansi bankaka ndimaka yo ve.” (Bisalu 28:24) Bubu yai, bantu kesalaka kaka mutindu mosi. Yo kele mawa mingi na kumona nde, bankeni ya Kimfumu mingi kebwaka na ntoto yina kebutaka ve bambuma. Ata mpidina, bankeni yankaka kebwaka mpenza na ntoto ya mbote, yo kebasisaka bansimbulu, mpi yo kemenaka, kaka mutindu Yezu kutubaka yo. Nkutu, konso mvula na inza ya mvimba, bantu kuluta 5 000 kekumaka balongoki ya kyeleka ya Kristu konso mposo! Balongoki yai ya mpa ‘ketulaka ntima na mambu yina ya bo ketubilaka bo,’ ata bantu yankaka kebuyaka kwa bo. Inki kesadisaka bantu yina na kukangula ntima na bo sambu na kundima nsangu ya Kimfumu? Mbala mingi kima kesalaka nde bantu yankaka kundima bankaka kubuya kele dikebi yina Bambangi ketudilaka bo, na kulosilaka masa na bankeni ya mpa ya bo kekunaka, na kutuba ya kifwani. (1 Korinto 3:6) Bambandu kele mingi kansi beto tadila kaka zole.

Kutula Muntu Dikebi Lenda Soba Yandi Mabanza

16, 17. Sambu na nki yo kele mfunu na kumonisa dikebi na bantu yina beto kekutanaka na bo na kisalu na beto ya kusamuna?

¹⁶ Karolien, leke mosi yina kele Mbangi na Belgique, kwendaka kutala nkento mosi ya mununu yina vandaka kusepela ve na nsangu ya Kimfumu. Sambu diboko ya nkento yango vandaka ya kukangisa bande, Karolien ti mpangi yina kubasikaka ti yandi kulombaka nkento yina nde, kana yandi mezola, bo lenda sadisa yandi, kansi nkento yango kubuyaka. Bilumbu zole na nima, Bambangi yina zole kuvutukaka dyaka na nzo ya nkento yina mpi bo yulaka yandi kana yandi vandaka kudiwa nki mutindu. Karolien kutubaka nde “mambu kusobaka. Yandi yitukaka na kumona nde beto vandaka kutudila yandi mpenza dikebi. Yandi lombaka beto na kukota na nzo na yandi, mpi beto yantikaka kulonguka Biblia ti yandi.”

¹⁷ Sandi, Mbangi mosi ya États-Unis, kemonisaka mpi dikebi na bantu yina yandi kelongaka. Yandi ketalaka lisiti ya bana yina kebutukaka na zulunalu ya bwala na bo, na nima yandi kenatilaka bibuti ya mebuta mwana ya mpa Mukanda ya Bankenda ya Biblia.c Sambu mbala mingi nkento ya mebuta kevandaka na nzo mpi na kyese ya kusonga mwana na yandi na bantu yina kekwisaka kutala yandi, mbala mingi disolo keyantikaka mbote. Sandi ketendula nde: “Mono kesongaka bibuti mfunu ya kutangila mwana sambu na kusala ti yandi kinduku ya ngolo. Na nima, mono kemonisaka bo bampasi yina bantu kekutanaka na yo na kusansa bana na inza ya bubu.” Ntama mingi ve, na kati ya bantu yina yandi vandaka kutala na mutindu yina, mama mosi ti bana sambanu yantikaka kusadila Yehowa. Kuvanda na dibanza ya kusala dyambu mosi mpi kumonisa dikebi lenda natila beto kyese ya mutindu mosi na kisalu na beto ya kusamuna.

18. (a) Sambu na nki beto yonso lenda kuka na kulungisa ntuma ya “kubuta bambuma mingi”? (b) Tanga mambu tatu ya Evanzile ya Yoane kelomba na balongoki yina nge ketula lukanu na kulungisa?

¹⁸ Beto kebaka mpenza kikesa na kuzaba nde beto mpi lenda kuka na ‘kulanda kubuta bambuma mingi’! Beto vanda bambuta to baleke, beto vanda na mavimpi ya mbote to ve, yo vanda nde beto kesamunaka na teritware yina bantu kendimaka mingi to fyoti, beto yonso lenda kuka na kubuta bambuma mingi. Inki mutindu? Na kumonisaka bambuma ya mpeve na kiteso mosi ya mingi mpenza mpi na kusamunaka nsangu ya Kimfumu ya Nzambi na kiteso ya ngolo na beto. Na ntangu ya beto kesala mutindu yina, beto fwete salaka mpi ngolo na ‘kulanda malongi ya Yezu’ mpi na ‘kuzolana beto na beto.’ Ya kyeleka, kana beto kelungisa mambu yai tatu ya mfunu ya Evanzile ya Yoane kelomba na balongoki, beto tamonisa nde ‘ya kyeleka beto kele balongoki ya Kristu.’​—Yoane 8:31; 13:35.

[Banoti na nsi ya lutiti]

Bangyufula ya Mvutukila

• Inki bambuma beto fwete buta mingi?

• Sambu na nki beto lenda tuba nde beto yonso lenda kuka na “kubuta bambuma mingi”?

• Tanga mambu tatu ya mfunu ya bo kelomba na balongoki yina beto metadila na Evanzile ya Yoane.

[Lupangu/Kifwanisu ya kele na lutiti 29]

MUTINDU YA “KUBUTA BAMBUMA TI KUKANGA NTIMA”

INKI kusadisaka nge na kulanda kusamuna nsangu ya Kimfumu na kwikama yonso na bateritware yina bantu kezolaka kundima yo ve? Mwa bamvutu yai kele awa ya bampangi kupesaka na ngyufula yai lenda sadisa nge.

“Banda mu mezabaka nde Yezu kesadisaka beto na mambu yonso, yo mepesaka mono mabanza ya mbote mpi yo mesadisaka mono na kukonda kulemba, ata bantu ya teritware na mono kendima to ve.”​—Harry, bamvula 72; yandi bakaka mbotika na mvu 1946.

“Verse ya 2 Korinto 2:17 kepesaka mono kikesa ntangu yonso. Yo ketuba nde beto kesalaka kisalu ya kusamuna na ‘meso ya Nzambi, mpi beto kele bantu ya Kristo.’ Ntangu mu kesalaka kisalu ya kusamuna, mu kevandaka na kyese ya kusala yo kumosi ti banduku na mono ya kuluta mbote.”​—Claudio, bamvula 43; yandi bakaka mbotika na mvu 1974.

“Na kuta masonga, kisalu ya kusamuna kele dyambu mosi ya mu kenwanaka na yo. Kansi, mu kebakisaka mpenza nde mambu yina Nkunga 18:30 ketubaka kele ya kyeleka: ‘Na ngolo ya Nzambi mono lenda kota-kota ata na balupangu.’”​—Gerard, bamvula 79; yandi bakaka mbotika na mvu 1955.

“Kana mu metanga ata verse mosi na kisalu ya kusamuna, yo kepesaka mono kyese mpenza na kumona nde muntu kundimaka nde Biblia kufimpa ntima na yandi.”​—Eleanor, bamvula 26; yandi bakaka mbotika na mvu 1989.

“Mu kelandaka na kumeka bametode mingi. Bametode yango kele mingi mpenza na mpila nde mu takuka ve na kusadila yo yonso na bamvula ya luzingu na mono yina mebikala.”​—Paul, bamvula 79; yandi bakaka mbotika na mvu 1940.

“Mu kewaka ve mpasi na ntima ntangu bantu kebuyaka nsangu. Mu kemekaka kusadila metode mosi ya lenda sala nde beto solula bonso banduku, na mpila nde mu solula ti bantu mpi mu wa bangindu na bo.”​—Daniel, bamvula 75; yandi bakaka mbotika na mvu 1946.

“Mu kutanaka ti bantu ya mekatuka kubaka mbotika yina kuzabisaka mono nde mono mpi, mu melosilaka bo mwa nkeni na kisalu na mono ya kusamuna yina mesadisaka bo na kukuma Bambangi. Mu mezaba bo ve, kansi bantu yankaka kulandaka na kulonguka Biblia ti bo mpi kusadisaka bo na kuyela. Yo kepesaka mono kyese na kuzaba nde kisalu na beto ya kusamuna kele kisalu mosi ya kimvuka.”​—Joan, bamvula 66; yandi bakaka mbotika na mvu 1954.

Inki kusadisaka nge na “kubuta bambuma ti kukanga ntima”?​—Luka 8:15.

[Bifwanisu ya kele na lutiti 28]

Kana beto kemonisa bambuma ya mpeve mpi beto kesamuna nsangu ya Kimfumu, beto tabuta bambuma mingi

[Kifwanisu ya kele na lutiti 31]

Inki Yezu zolaka kutuba ntangu yandi zabisaka balongoki na yandi nde: ‘Beno landa na kubuta bambuma mingi’?