Ndima na Ntonda Yonso Pesa na Ntima ya Mvimba

YEHOWA, Tata na beto ya zola yina kele na zulu, kekudibanzaka sambu na konso muntu na kati na beto. Ndinga ya Nzambi kendimisa beto nde yandi kekudibanzaka mpenza sambu na bansadi na yandi yonso. (1 Pie. 5:7) Mutindu mosi yina Yehowa kemonisaka dikebi na yandi kele na kupesaka beto lusadisu ya mutindu na mutindu sambu na kusadisa beto na kusadila yandi na kwikama yonso. (Yez. 48:17) Mingimingi ntangu beto kekutanaka ti mambu yina kepesaka beto mpasi, Yehowa kezolaka nde beto sadila lusadisu yina yandi kepesa beto. Nsiku ya Moize kemonisa kyeleka yai.

Na nsi ya Nsiku, Yehowa kubakaka ngidika ya zola sambu na kusadisa “bansukami,” bonso bana-nsyona, mifwidi, mpi banzenza. (Levi 19:9, 10; Kul. 14:29) Yandi mezaba nde bansadi na yandi yankaka lenda vanda ti mfunu ya lusadisu ya bampangi na bo Bakristu. (Yak. 1:27) Yo yina, ata nsadi na yandi mosi ve fwete buya kundima lusadisu ya kekatuka na bantu yina Yehowa mepusa na kupesa. Ata mpidina, ntangu beto kendima lusadisu, beto fwete sala yo ti nkadilu ya mbote.

Kaka na ntangu yina, Ndinga ya Nzambi kemonisaka nde bantu ya Nzambi kevandaka mpi ti dibaku ya kupesa. Yibuka disolo ya mufwidi mosi “ya nsukami” yina Yezu kumonaka na tempelo na Yeruzalemi. (Luka 21:1-4) Ntembe kele ve nde yandi bakaka mambote na bangidika ya zola yina Yehowa kubakaka sambu na mifwidi, mutindu yo kele na Nsiku. Kansi, ata yandi vandaka nsukami, beto keyibukaka ve mufwidi yina bonso muntu yina kubakaka, kansi bonso muntu yina kupesaka. Yo fwete vanda nde nkadilu na yandi ya kupesa kunatilaka yandi kyese sambu, mutindu Yezu kutubaka, “kiese ke vandaka mingi na kupesa, kansi na kubaka kiese ke vandaka fioti.” (Bis. 20:35) Ti kyeleka yai na mabanza, inki mutindu nge lenda “pesa makabu na bantu ya nkaka” mpi kubaka kyese?​—Luka 6:38.

“Nki Mono Lenda Pesa Mfumu Nzambi?”

Muyimbi-bankunga kudiyulaka nde: “Nki mono lenda pesa Mfumu Nzambi sambu na mambote yonso ya yandi salaka mono?” (Nk. 116:12) Inki mambote yandi bakaka? Yehowa kusadisaka yandi na ntangu ya “boma ti matekita.” Dyaka, Yehowa “gulusaka [yandi] na lufwa.” Ntangu yai, yandi vandaka ti mpusa ya ‘kupesa’ Yehowa kima na mutindu mosi buna. Muyimbi-bankunga lendaka kusala inki? Yandi tubaka nde: “Mono ta lungisa mambu ya mono silaka yandi.” (Nk. 116:3, 4, 8, 10-14) Yandi bakaka lukanu ya kulungisa balusilu yonso ya masonga yina yandi silaka Yehowa mpi na kulungisa mikumba na yandi yonso.

Nge mpi lenda sala mutindu mosi. Inki mutindu? Kana nge kezinga ntangu yonso na kuwakana ti bansiku mpi minsiku ya Nzambi. Yo yina, zikisa nde lusambu ya Yehowa kele kaka kima ya kuluta mfunu na luzingu na nge mpi nde nge kebika nde mpeve ya Nzambi kutwadisa nge na mambu yonso ya nge kesala. (Lo. 12:13; Gal. 5:16-18) Ya kyeleka, kele ve ti kima ya nge lenda pesa mpenza Yehowa sambu na mambu yonso ya yandi mesalaka sambu na nge. Ata mpidina, yo kepesaka ntima ya Yehowa “kiese” na kumona nde nge kekudipesa na ntima ya mvimba na kisalu na yandi. (Bing. 27:11) Kupesa Yehowa kyese na mutindu yai kele dibaku ya mbote mpenza!

Sala Dikabu na Nge Sambu na Mambote ya Dibundu

Ntembe kele ve nde nge tandima nde dibundu ya Bukristu mepesaka nge mambote na mitindu mingi. Na nzila ya dibundu, Yehowa kepesaka beto madya mingi ya kimpeve. Nge meyambaka kyeleka yina katulaka nge na kimpika ya malongi ya luvunu mpi na mpimpa ya kimpeve ya mabundu. (Yoa. 8:32) Na balukutakanu ya dibundu, na balukutakanu ya nene, mpi ya distrike yina “mpika ya kwikama mpi ya mayele” keyidikaka, nge bakaka nzayilu yina tanata nge na luzingu ya mvula na mvula na paladisu ya ntoto kisika mpasi tavanda dyaka ve. (Mat. 24:45-47, NW) Keti nge lenda yantika kutanga mambote yonso ya nge mebakaka, mpi yina nge tabaka na bilumbu kekwisa, na nzila ya dibundu ya Nzambi? Inki nge lenda vutudila dibundu?

Ntumwa Polo kusonikaka nde: “Na yandi bandambu yonso ya nitu me kangamaka mbote-mbote, sambu na yandi mpi madikulu yonso ya nitu ke simbaka nitu ya mvimba. Mpidina, kana konso ndambu ya nitu ke sala kisalu na yo, nitu ya mvimba fweti kula, yo mpi fweti kuma ngolo sambu kuzolana kele.” (Ef. 4:15, 16) Ata verse yai ketadila ntetentete kimvuka ya Bakristu ya kupakulama, munsiku yina kele na kati na yo ketadila mpi Bakristu yonso bubu yai. Ee, konso muntu na dibundu lenda sala dikabu na yandi sambu na mambote mpi kuyela ya dibundu. Na nki mitindu?

Beto lenda sala yo na kusalaka ngolo na kupesa bankaka kikesa mpi ngolo na kimpeve ntangu yonso. (Roma 14:19) Beto lenda sala mpi dikabu na beto sambu ‘nitu ya mvimba kukula,’ kana beto kekuna mbuma ya mpeve ya Nzambi na bangwisana na beto yonso ti bampangi na beto Bakristu. (Gal. 5:22, 23) Dyaka, beto lenda sosa mabaku ya kusala “bantu yonso mbote, nkutu bampangi na beto bakristo.” (Gal. 6:10; Baeb. 13:16) Bantu yonso na dibundu, bampangi-babakala mpi bampangi-bankento, baleke mpi bambuta, lenda sala dikabu na bo na ‘kukumisa nitu ngolo na zola.’

Dyaka, beto lenda sadila mayele na beto ya kubutukila, ngolo, mpi bima na beto ya kinsuni sambu na kusala kisalu ya kugulusa bantu yina dibundu kesalaka. Yezu Kristu kutubaka nde: “Beno me bakaka makabu ya ofele.” Inki beto fwete sala? Yandi tubaka nde: “Beno pesa mpi makabu ya ofele na bantu ya nkaka.” (Mat. 10:8) Yo yina, kudipesa ya mvimba na kisalu ya mfunu ya kusamuna nsangu ya Kimfumu mpi ya kukumisa bantu balongoki. (Mat. 24:14; 28:19, 20) Keti nge kele ti bandilu? Yibuka mufwidi ya nsukami yina Yezu kutubilaka. Yandi pesaka dikabu mosi ya fyoti mpenza. Kansi Yezu kutubaka nde yandi salaka kuluta bantu yonso yankaka. Yandi pesaka yonso yina luzingu na yandi vandaka kupesa yandi nzila na kupesa.​—2 Kor. 8:1-5, 12.

Baka ti Nkadilu ya Mbote

Kansi, bantangu yankaka nge lenda vanda na mfunu ya kubaka lusadisu ya dibundu. Kuvanda ve ata fyoti ti ketiketi na kundima konso lusadisu yina dibundu lenda pesa ntangu nge kesala ngolo na kunwana ti bupusi ya ngidika yai. Yehowa mepesaka babakala ya kufwana mpi ya ntima ya mbote sambu na ‘kukeba mbote-mbote Dibundu,’ sambu na kusadisa nge ntangu nge kekutana ti mimekamu mpi bampasi. (Bis. 20:28) Bankuluntu mpi bantu yankaka na dibundu kezolaka kulembika, kusadisa, mpi kutanina nge na bantangu ya mpasi.​—Gal. 6:2; 1 Tes. 5:14.

Kansi, zikisa nde ntangu nge kebaka mwa lusadisu yina nge kele na yo mfunu, nge kesala yo ti nkadilu ya mbote. Ntangu yonso ndima ti ntonda lusadisu ya nge kebaka. Tadila lusadisu ya mutindu yina ya bampangi Bakristu kepesa nge bonso mambote yina nge mefwana ve na kubaka ya Nzambi kemonisila nge. (1 Pie. 4:10) Sambu na nki yo kele mfunu? Sambu beto kezola ve kubaka na mutindu yina bantu mingi ya nsi-ntoto kebakaka​—kukonda kumonisa ata ntonda.

Vanda ti Bukatikati

Na mukanda yina yandi sonikilaka dibundu ya Filipi, Polo kusonikaka sambu na Timoteo nde: “Kaka yandi mpamba muntu ke na ngindu bonso ya mono, kaka yandi muntu ke yindulaka beno na ntima ya kieleka.” Kansi, Polo kuyikaka na nima nde: “Bantu ya nkaka ke yindulaka kaka mambu na bo mosi, kansi bo ke yindulaka mambu ya Kristo ve.” (Filp. 2:20, 21) Ti dyambu yai ya mfunu ya Polo kutubaka na mabanza, inki mutindu beto lenda buya bubu yai kuyindula mingi na ‘mambu na beto mosi’?

Beto fwete lutisa ve ndilu ntangu beto kelomba bankaka na dibundu na kupesa beto ntangu ti dikebi na bo sambu na kusadisa beto na kuyidika makambu na beto. Sambu na nki ve? Yindula dyambu yai: Ntembe kele ve nde beto tamonisa ntonda mingi mpenza kana mpangi mosi kupesa beto mwa lusadisu ya kinsuni sambu na kusadisa beto na dyambu mosi ya mebwila beto na kintulumukina. Kansi, keti beto fwete lomba yandi lusadisu yina ya kinsuni? Ve. Na mutindu mosi, ata bampangi na beto ya zola kevandaka ntangu yonso na kyese ya kusadisa beto, beto fwete vanda ti bukatikati na kiteso ya ntangu na bo yina beto kevingila nde bo pesa beto. Yo yina, konso kima yina bampangi na beto Bakristu kesala sambu na kusadisa beto na kunwana ti bampasi, beto tazola nde bo sadila beto yo na luzolo yonso.

Ntembe kele ve nde bampangi na nge Bakristu ya babakala ti ya bankento tavanda ntangu yonso ya kuyilama mpi ti luzolo ya kusadisa nge. Kansi, bantangu yankaka bo lenda kuka ve kulungisa bampusa na nge yonso. Kana yo salama, ndima mpenza nde Yehowa tasadisa nge na konso mpasi yina nge lenda kutana ti yo, mutindu yandi sadisaka muyimbi-bankunga.​—Nk. 116:1, 2; Filp. 4:10-13.

Yo yina, kuvanda ve ti ketiketi na kundima ti ntonda yonso konso ngidika yina Yehowa kebaka sambu na nge​—mingimingi na ntangu ya mpasi. (Nk. 55:23) Yandi kezola nde nge sala yo. Kansi, yandi kezola mpi nde nge ‘pesa ti kiese.’ Yo yina, vanda mpenza ti lukanu ya kupesa “mutindu [nge] me kana” na kupesa yonso yina luzingu na nge kepesa nge nzila sambu na kupesa maboko na lusambu ya kyeleka. (2 Kor. 9:6, 7) Na kusalaka mutindu yina, nge takuka kundima na ntonda yonso mpi kupesa na ntima ya mvimba.

[Lupangu/​Bifwanisu ya kele na lutiti 32]

“Nki mono lenda pesa Mfumu Nzambi sambu na mambote yonso ya yandi salaka mono?”​—Nk. 116:12

▪ Sosa mabaku ya ‘kusala bantu yonso mbote’

▪ Pesa bankaka kikesa mpi ngolo na kimpeve

▪ Kudipesa ya mvimba na kisalu ya kukumisa bantu balongoki na kiteso yina luzingu na nge kepesa nge nzila