មេរៀនទី៥១

តើអ្នកអាចនិយាយពាក្យសម្ដីបែបណាដែលធ្វើឲ្យព្រះយេហូវ៉ាពេញចិត្ត?

ឯកសារជាសៀវភៅ

ពេលព្រះយេហូវ៉ាបង្កើតយើង លោកបានឲ្យអំណោយដ៏វិសេសមួយដល់យើង ពោលគឺសមត្ថភាពនិយាយ។ តើរបៀបដែលយើងប្រើអំណោយនោះសំខាន់ចំពោះលោកទេ? ពិតជាសំខាន់ណាស់ចំពោះលោក! (សូមអាន យ៉ាកុប ១:២៦) ដូច្នេះ តើយើងអាចប្រើសមត្ថភាពនិយាយតាមរបៀបណាដែលនឹងធ្វើឲ្យព្រះយេហូវ៉ាពេញចិត្ត?

១. តើយើងគួរប្រើសមត្ថភាពនិយាយយ៉ាងដូចម្ដេច?

គម្ពីរប្រាប់យើងឲ្យ«បន្តលើកទឹកចិត្តគ្នាទៅវិញទៅមក ហើយពង្រឹងកម្លាំងគ្នាទៅវិញទៅមក»។ (ថែស្សាឡូនិចទី១ ៥:១១) តើអ្នកគិតថាអ្នកណាខ្លះប្រហែលជាត្រូវការការលើកទឹកចិត្ត? តើអ្នកអាចធ្វើអ្វីដើម្បីឲ្យពួកគាត់មានអារម្មណ៍ល្អជាង? សូមធ្វើឲ្យពួកគាត់ជឿជាក់ថា អ្នកយកចិត្តទុកដាក់ចំពោះពួកគាត់។ ម្យ៉ាងទៀត អ្នកអាចប្រាប់អំពីគុណសម្បត្តិរបស់ពួកគាត់ដែលអ្នកចូលចិត្ត។ តើអ្នកអាចគិតអំពីបទគម្ពីរណាមួយដែលនឹងលើកទឹកចិត្តមនុស្សដែលអ្នកស្គាល់ឬទេ? មានបទគម្ពីរជាច្រើនដែលអ្នកអាចជ្រើសរើសបាន។ សូមចាំថា របៀបដែលអ្នកនិយាយមានឥទ្ធិពលខ្លាំងដូចគ្នានឹងពាក្យសម្ដីដែលអ្នកប្រើ។ ដូច្នេះ សូមនិយាយដោយសប្បុរស និងទន់ភ្លន់ជានិច្ច។—សុភាសិត ១៥:១

២. តើយើងមិនគួរនិយាយពាក្យសម្ដីបែបណា?

គម្ពីរចែងថា៖ «កុំឲ្យពាក្យអាក្រក់ណាមួយចេញពីមាត់អ្នករាល់គ្នាឡើយ»។ (សូមអាន អេភេសូរ ៤:២៩) នេះមានន័យថាយើងមិនប្រើពាក្យអសុរោះ ឬពាក្យទ្រគោះបោះបោក និងពាក្យដែលធ្វើឲ្យអ្នកឯទៀតឈឺចិត្តឡើយ។ យើងក៏ត្រូវជៀសវាងពីការនិយាយបង្កាច់បង្ខូច និងការនិយាយដើមគេដែរ។—សូមអាន សុភាសិត ១៦:២៨

៣. តើអ្វីនឹងជួយយើងឲ្យនិយាយតាមរបៀបដែលលើកទឹកចិត្តអ្នកឯទៀត?

ជាញឹកញយ អ្វីដែលយើងនិយាយបង្ហាញឲ្យឃើញអ្វីដែលមាននៅក្នុងចិត្ត ឬអ្វីដែលយើងគិត។ (លូកា ៦:៤៥) ដូច្នេះ យើងត្រូវបង្ហាត់បង្រៀនខ្លួនឲ្យផ្ដោតអារម្មណ៍ទៅលើអ្វីៗដែលល្អ ពោលគឺអ្វីៗដែលសុចរិត អ្វីៗដែលបរិសុទ្ធ អ្វីៗដែលគួរឲ្យស្រឡាញ់ និងអ្វីៗដែលគួរឲ្យសរសើរ។ (ភីលីព ៤:៨) ដើម្បីផ្ដោតអារម្មណ៍ទៅលើអ្វីល្អៗទាំងនេះ យើងត្រូវចេះជ្រើសរើសការកម្សាន្តនិងចេះជ្រើសរើសមិត្តភក្តិ។ (សុភាសិត ១៣:២០) អ្វីល្អៗទាំងនេះក៏នឹងជួយយើងឲ្យគិតយ៉ាងដិតដល់ មុននឹងយើងនិយាយអ្វីមួយដែរ។ ជាឧទាហរណ៍ សូមគិតសិនថា តើពាក្យសម្ដីរបស់អ្នកនឹងមានឥទ្ធិពលយ៉ាងណាទៅលើអ្នកឯទៀត? គម្ពីរចែងថា៖ «ការនិយាយដោយឥតគិតពិចារណា ប្រៀបដូចជាការចាក់ដោយដាវ តែពាក្យពេចន៍របស់មនុស្សមានប្រាជ្ញានឹងជួយឲ្យជាសះស្បើយ»។—សុភាសិត ១២:១៨