“Tungunuk ni Kwendel mu Myand ya Biin-Biin”

1. I musangal kaay utudy nend bwa mutudy bashaal Batemw ba Yehow ha kulong “myand ya biin-biin”?

“I MUSHIND kaay ushaadil Temw a Yehow?” Biin-biin, ukaady mwaalabul diijooj eedy misang yivul. I dyumw dya ku majooj ma kuuhal matudyaakal twiihanguj mwiin-kweet mwaan mulum eecy mwaan mukaj hatukaakaam kumumanyik bilengel. Tudy bakat kumvw mudy biin kweet bafik kukumanyik ni kukukat Yehow, ni tudy bakat kwiibambil mushind ututaatal myand ya biin-biin. (Rom 1:11) Bu cihet, miisamb eey yituvuuvulwiij buseeb buvul budy naabw myand ya biin-biin. Tushaashaal cikwaabw biiswiik bwa ‘batuutungunuk ni kwendel mu myand ya biin-biin’​—i bwiin kuleeb neey, kutungunuk ni kwiikal ni shikacil udy mwa kulong bwa Yehow iitubenesh ni iitwanyish.​—3 Jah 4.

2. I biny bitwiiyiiy kwiisambil mu ciin bwaal eecy?

² Mu ciin bwaal eecy twiiyiiy kukontonon tubingil tudy twiitusak bwa kukat myand ya biin-biin. Twiiyiiy kukontonon cikwaabw mutudy mwa kutungunuk ni kuleej mutudy bakat cya bukish eecy. Biin-biin kukontonon kwa ciin bwaal eecy kwiiyiiy kulong bwa tuleej dyanyish divul kudy Yehow bwa mudyey mwiitukok kudyey mu myand ya biin-biin. (Jah 6:44) Biiyiiy kukashish cikwaabw lukat lwiitut bwa kudiil baat bakwaabw myand ya biin-biin.

3. I kabingil kaay katam kiitusaasak bwa kukat myand ya biin-biin?

³ Tudy bakat myand ya biin-biin bwa tubingil tuvul. Kabingil katam kady neey tudy bakat Yehow Mawej bwaal i yiy Mwiin myand ya biin-biin. Ku dyambulwiish dya Bibl Diiy dindiy, tudy biiy kumumanyik kiin teng neey Hang a diiwul ni bulab mwiin bukash boos, ki cikwaabw bu Taat iitut udy mu diiwul udy ni lukat ni wiitutaatabaleel. (1 Py. 5:7) Tudy bamanyik neey Mawej iitut “ufwiifwiilangan lus, udy micim yimwiit mund bwa mal mamoomon baat, wa ciineng mu kumvw kwa cinj, udy mulamacil ku kulong kwa myand yilengel yivul.” (Cim. 34:6) Yehow i mukat myand yiwaakan. (Ye. 61:8) Umvumvw bibiih hadyey wiitutal tukeng, ni udy habwiih​—Ing, i mukat menmen—​bwa kuful makab moos mu ciisang cidyey muman kulongolol. (Jer. 29:11) Ciiyiiy kwiikal ciisang cilengel cyeeh! Ki kamw ka ku tubingil kaloolong bwa tukat Yehow bikasakan!

4-5. Bwabiny mupostol Pool ufwaafwanyikijil kutakamin kwiitut ni malobw?

⁴ I kabingil kaay kakwaabw kiitusaasak bwa kukat myand ya biin-biin? Myaand ya biin-biin yituheehetesh musangal muvul. Twangat cileejel. Mu myand ya biin-biin yidy mu Bibl mudy cikwaabw kutakamin kwiitut bwa mafuk maciiyiiy. Bwa kumvwiij buseeb budy naak kutakamin ook, mupostol Pool ufundil neey: “Kwiin kutakamin ook, kuteeteek micim yiitut ha yikwaabw teng bu mudyaakal malobw ma bwaat miimanyik bwaat cyaab cyaakaabumw.” (Ebr. 6:19) Teng bu mudy malobw ma bwaat miimanyik bwaat bwa kaay maay kubiih, ki mudy kutakamin kwiitut kushimatil mu Bibl mwa kwiitwambulwiish bwa kubatamij micim yiitut hatutwiitwiilangan ni makab mu shikacil.

⁵ Hiinaah, Pool waakady wiisamb bwa kutakamin kwa kuy mu diiwul kudy naak Biin Krist bashing diisaby. Ki may aam mataatal cikwaabw biin Krist bady batakamin bwa kwiikal ni bwa mwendelel ha bulab bufutulul paradiiz. (Jah 3:16) Cya biin-biin, kulong habitaatal kutakamin kwa kwiikal ni buumy bwa mwendeleel i kulong bwa tutal neey buumy bwiitut budy ni kiihacil.

6-7. I musangal kaay uhetel Yvonne hakumanyik myand ya biin-biin habitaatal mfuk maciiyiiy?

⁶ Twangat cileejel cya mwiin-kweet mwaan-mukaj Yvonne. Kaakaadyoh bend mukasakeen mu cisak cya Batemw ba Yehow, ni hacyaakadyey mutofw waakady ni mooy bwa lufw. Uvuuvuluk hakubal cyambil cyaakadyey kay mwa kuvulamin: “Diifuk dikwaabw kakwaakwiikaloh bend mucy.” Uleeleeb neey: “May aam i maadingomw bwa kaay natabuluk bwa myand yiikal mwa kulongek mu mafuk maciiyiiy. Nady mulang neey: ‘Cya biin-biin kwiiyiiy kwiikal cikwaabw buumy.’ ‘Bwabiny nadyok?’ Cyaakady mukat bwa kufw!”

⁷ Hahitil mafuk, hanacyaakady sand, Yvonne uhetelangan ni Batemw ba Yehow. Uloolond neey: “Natwaadijil kwiitab neey nady mwa kwiikal ni kutakamin kwa kwiikal ni buumy buyiil mu Paradiiz ha bulab.” I mushind kaay waakady myand ya biin-biin yambulwiish mwiin-kweet mwaan mukaj? Uleeleeb cikwaabw neey: “Naakady bituh mu bufuk ni ciy mwa kwiitacishoh bwa kumanyik myand yiikal mwa kulongek mu mafuk maciiyiiy eecy bwa lufw.” Uw mwa kulangok, wiiyiiy kwiitab neey myand ya biin-biin yaakady ni buseb buvul kudy Yvonne, ni uhetel musangal muvul hakwambil baat bakwaabw myand yaakadyey mutakamin mu mafuk maciiyiiy.​—1 Tim. 4:16.

8-9. a) Mu kasumw katwaadil Yeez, i mushind kaay waakady muut kahand mwangat ni buseeb bihak biheteley? b) Bwiibuw, myand ya biin-biin yidy ni buseeb kaay kuwudy?

⁸ Mu myand ya biin-biin mudy cikwaabw musah mulengel habitaatal Bukaleng bwa Mawej. Yeez waakady mufwanyikij myand ya biin-biin habitaatal Bukaleng ni bihak bisokok. Mu Matewus 13:44, Yeez uleebel neey: “Bukaleng bwa mwiiwul i bufwaanakan ni bihak bisokok mu budimy. Muut mukwaabw ukiibisokolweel, waakiibisokok byend. Bwa musangal waakadyey nend uyiil waakahaan byoos byaakadyey naaby, waaland bwiin budimy aabw.” Manyik neey muut oow kaakadyoh bend ukaam bihak. Ki diib diib diibiheteley, ulongel mwindiy moos bwa kwiibihet. Biin-biin, uhanishil byoos byaakadyey naaby. Bwabiny ulongel nook? Bwaal waakady mumanyik ney bihak biheteley byaakady ni buseeb buvul. Kabyaakadyoh bend byelekeen ni biit byaakadyey mwa kuhanish.

⁹ I yiy mushind uwudyaakal umvw byeeb myand ya biin-biin eeny? Biin-biin ki mudyeby! Tudy bamanyik neey kakwiish ciit cidy ni buuseeb buvul mu bulongolody oomw citudy mwa kufwanyikij ni musangal utudy nend wa kukadil Yehow mudimw leeloow, ni kutakamin kwa buumy bwa mwendelel mu mafuk maciiyiiy mu bukaleng bwa Mawej. Dyaakatook ditudy naady i dya kulengej bikasakan bulund bwiitut ni Yehow budy buhitok myand yoos yitudy mwa kulong. Musangal muvul imwiin utudy nend i “kulong myand yimuleelengeleel.”​—Kol. 1:10.

10-11. I biny byaakady bisak bikasakan Michael bwa kufutukey bikasakan mu shikacil indiy?

¹⁰ Bavul ba kutudy i biikashishomw bwa kulek myand yivul yaakadyobw balong bwa kulong myand yidy Yehow mukat bwa iibanyish. Bakwaabw balekedyeel bakwaabw balekel midimw yaababw yaakady yilong bwa biibakish kaneemw kavul mu bulongolody oobw. Bakwaabw i balek kwiitweej bikasakan bwa kukaam bihak. Cikwaabw, shikacil a bavul i mushiituluk hadyobw biiy kumanyik Yehow. Ki cileebel Michael. Kaakadyobw bend mukasakeen mu cisak cya Batemw ba Yehow. Hacyaakadyey sand, waakady mulong mazab ma karateh. Uleeleeb neey: “byaakady ni buseeb buvul kundy bwa mim kwiikal makand ma nyeet malengel. Ha biisang aaby, natadil neey kakwaady muut waakady mwa kuukushil.” Ki hanatwaadijil kulong Bibl, Michael ulongel bwa kumanyik mudy Yehow utal myand ya cikis. (Mis. 11:5) Michael uleeleeb bwa biin maluw batemw balongel nend bibl neey: “Baakadyoh bend bayambil bwa kulek mazab ma karateh; batungunukil teng ni kuulongweesh myand ya biin-biin yidy mu Bibl.”

¹¹ Cikwaabw haakady Michael wend ni kulong myand habitaatal Yehow, cikwaabw lukat lwindiy bwa Yehow lwaakady lwend ni kukasakan. Cyaakady cimuteng menmen i lus lwaakady naalw bahambidil ba Yehow. Ciisang aacy, Michael utadiley neey byaakady bikaam angat dihandik bwa kushiitulul shikacil indiy. Uleeleeb neey: “Naakady mumanyik neey kulek diizab dya karateh bwaakady bukasakan menmen bunady ciy mwa kulong.” “Ki namanyikil cikwaabw neey mim mulek diizab eedy niiyiiy kusangeej Yehow, naakady mutwiishibw neey kumukadil mudil kudy ni buseeb kuhitok mudimw kaay woos.” Michael wanyishil buseeb bwa myand ya biin-biin yiheteley, ni kwanyish kwindiy kwaakady kumusak bwa kufulukey bikasakan mu shikacil indiy.​—Jak 1:25.

12-13. Myand ya biin-biin yidy mu Bibl yambulwiishil Mayli bicy?

¹² Bwa kuleej buseeb budy naabw myand ya biin-biin, Bibl ufwaafwanyikij myand ya biin-biin ni mudil a lampy utootookesh bufuk. (Mis. 119:105; Ef. 5:8) Mayli, wa mu Azerbaijan,wanyanyish bikasakan dyambulwiish didyey muhetel mu diiy dya Mawej. Baledy bindiy baakady basambil mu bitendeleel bishilangan. Taat indiy waakady Mizilmah, ni maam indiy naabw waakady mwiin Yuud. Uleeleeb neey: “Ki cyaakadyoh bend nalandul bwa kwiikalok kwa Mawej, naakady ni majooj mavul makwiihanguj. Naakady niyihanguj neey: ‘Bwabiny Mawej uhangil baat, ni bwabiny muut udy mwa kukab mu shikacil indiy woos, ni kuuyim wiiy ukeng cikwaabw mafuk moos mu Ifernoh wa mudil?’ Hanumvwiil baat baleeb neey: myand yoos yitufiifikil i lukat lwa Mawej, niiyihangujil bikasakan ni naleeb neey: ‘I Mawej uloolombol bulab ni mukat kutal baat bakeng eeny?’”

¹³ Mayli utungunukil ni kukaam maalabul ku majooj mindiy. Ciisang aacy, wiitabil bwa kulong Bibl study ni ushaadil Temw a Yehow. Uleeleeb neey: “Myand ya mu Bibl yaakady ya meej ni i yiyambulwiish bwa kwiikal ni musangal muvul mu shikacil aam.” “kumvw kulengel kunady muhet habitaatal Diiy dya Mawej i kuyambulwiish bwa kwiikal ni diitalal dya mu micim.” Teng bu Mayli, twaakakish tut boos Yehow lutumb, ‘wiitubikeen bwa kwiituful mu bufuk ni kwiitutweej mu munyiny indiy a biin-biin.’​—1 Py. 2:9.

14. I mushind kaay udy lukat lwiitut mwa kukasakan bwa myand ya biin-biin? (Tal cikwaabw kazubw ka neey: “Bileejel bikwaabw bya kufwanyikij.”)

¹⁴ Biin eeby i bileejel bikeeh bituh bileeeleej buseeb budy naabw myand ya biin-biin. Kakuy miland, udy mwa kulangil byeeb ha cilongel baat bakwaabw bavul aab. Bwabiny kwiin mwa kulongololok byeeb program bwa kumanyik tubingil tukwaabw tudy mwa kukusak bwa kukat myand ya biin-biin? Tut bakat bikasakan myand ya biin-biin, twiiyiiy cikwaabw kumanyik mishind yitudy mwa kuleej mutudy biyikat.

15. Teelok mushind utudy mwa kuleej mutudy bakaat myand ya biin-biin?

¹⁵ Tudy mwa kuleej tudy bakat myand ya biin-biin hakulong haciibidil Bibl ni mikand yikwaabw yimuumumvwiij. Kuunyim kwa byoos, ning tut biikal ba mafuk mafuk mu bulongolody bwa Mawej, bikaam tutungunuk teng ni kulong. Ciin bwaal cya kuuhal-hal cya cibij-bij eecy cileejel neey: “Kudy myand ya makos yivul mu bulongolody oobw, ni bidy mwa kukasakeen baat bakwaabw bwa kumanyik myand ya biin-biin. Uw mumanyik myand eey kwiish mwa kwiitab bend bwa kwiiyilek. . . . Iikaleby neey wiiyikaakaam, bikaam wiikashishomw bwa kwiiyimanyik. Kusangaloh bend teng bwa myand ya biin-biin yiwudy muhet.   . . Ki tungunuk ni kukaam myand ya biin-biin yikwaabw.” Kulong i mudimw mukasakan, ki i mudimw mulengel ni ukaakaam kwiikashishomw.

16. I mushind kaay wa kulong uwudy mutal mulengel? (Tusumw 2:4-6)

¹⁶ Kiin tut boos bady bakat kubal ni kulong. Ki Yehow wiitubiibiikan bwa kutungunuk ni ‘kukaam’ bwa kumanyik bilengel myand ya biin-biin. (Bal Tusumw 2:4-6.) Hatwiikaakashishomw, twiikaakal teng tuhet dyambulwiish. Habitaatal kulong kwa Bibl, Corey uleeleeb neey waakady wiimanyin ha verseh umw. Uleeleeb neey: “Niiyiiy nabal dimanyish dyoos didyobw baleej kuush kwa diibij, bwa kutal verseh yikwaabw yoos yidyobw balayidilok, ni nakaam mu byaab mudyobw bumvwiij verseh aaw. . . . Mushind oow uuyambambulwiish bwa kumanyik myand yivul!” Tut tukal mudimw ni mushind oow ecy mukwaabw, tuleeleej mutwanganghat myand ya biin-biin ni buseeb hatwangangat diib ni hatwiikakashishomw bwa kwiiyilong.​—Mus. 1:1-3.

17. Kulond myand ya biin-biin mu shikacil iitut kumvumvwiij biny? (Jak 1:25)

¹⁷ Biin-biin, tudy bamanyik neey kabiin bikaam teng ha myand ya biin-biin yitudy balong. Bwiitut kuhet dyaaakatook, biikam twiiyileej mu shikacil iitut, i bwiin kuleeb neey, twiiyilond hakwiiyileej mu shikacil iitut. Teng tut balong nook ki hady myand ya biin-biin yituhetesh musangal a biin-biin. (Bal Jak 1:25.) I mushind kaay utudy mwa kwiikal batwiishibw neey tudy mu myand ya biin-biin? Mwiin-kweet mwaan-mulum mukwaabw uleeleej neey tudy mwa kukontonon shikacil iitut bwa kutal ning tukokooyel myand yituloolong ni bwa kutal biikadil bikwaabw bikaakaam bwa tulongolol. Mupostol Pool uleebel neey: “Tuyaay teng kuy kuuhal mu njil utuciloolond teng ni kaabaak.”​—Fili. 3:16.

18. Bwabiny bikaam tulong mwiitut moos bwa “kwendel mu myand ya biin-biin”?

¹⁸ Langok ket bwa dyambulwiish ditudy bahet hatudy biikashishomw bwa “kwendel mu myand ya biin-biin”! Kabiin teng bwa musangal iitut kaayeet ki tuloolong bwa Yehow iikal ni musangal ni biin Krist neet kabidy. (Tus. 27:11; 3 Jah 4) Biin-biin, tudy mwa kwiikalok ni tubingil tutam tudy mwa kwiitusak bwa kukat myand ya biin-biin ni bwa kwiileej mu bilong biitut eeny?