Lyuk

21 We i es in ed ɔp, i si di mɔniman dɛn de put dɛn gift dɛn insay di mɔni bɔks dɛn. 2 Dɔn i si wan po uman we in man dɔn day de put tu smɔl kɔyn dɛn we nɔ gɛt bɛtɛ valyu.* 3 Na de i tɔk se: “Fɔ tru a de tɛl una se dis po uman we in man dɔn day, put pas dɛn ɔl. 4 Ɔl di ɔda wan dɛn we gi gift, na frɔm di ɛkstra we dɛn gɛt na de dɛn pul, bɔt dis uman, pan ɔl we i po, i put ɔl wetin i gɛt fɔ manej in layf.”

5 Leta we sɔm pipul dɛn bin de tɔk bɔt di we aw dɛn mek di tɛmpul wit fayn fayn ston dɛn ɛn wit tin dɛn we pipul dɛn gi to Gɔd, 6 i tɔk se: “As fɔ dɛn tin ya we una de si so, tɛm go kam we wan ston nɔ go lɛf pantap in kɔmpin ston we nɔ go fɔdɔm na grɔn.” 7 Dɔn dɛn aks am se: “Ticha, ustɛm rili dɛn tin ya go bi, ɛn us sayn go sho se dɛn tin ya go apin?” 8 I tɛl dɛn se: “Una tek tɛm mek dɛn nɔ ful una, bikɔs bɔku pipul dɛn go yuz mi nem ɛn tɔk se, ‘Na mi dis,’ ɛn ‘Di tɛm dɔn nia.’ Bɔt una nɔ fala dɛn. 9 Apat frɔm dat, we una yɛri we dɛn de fɛt wɔ ɛn yɛri bɔt kɔnfyushɔn, una nɔ fred, bikɔs dɛn tin ya go mɔs apin fɔs, bɔt di ɛnd nɔ go kam wantɛm wantɛm.”

10 Dɔn i tɛl dɛn se: “Wan neshɔn go fɛt ɔda neshɔn, ɛn wan kiŋdɔm go fɛt ɔda kiŋdɔm. 11 Big big atkwek dɛn go apin, tin fɔ it go shɔtin ɛn sik dɛn we de prɛd go de na difrɛn ples dɛn, fiaful tin dɛn go apin, ɛn pipul dɛn go si wɔndaful sayn dɛn na ɛvin.

12 “Bɔt bifo ɔl dɛn tin ya apin, pipul dɛn go ol una ɛn mek una sɔfa, ɛn dɛn go kɛr una go na di sinagɔg* dɛn ɛn prizin dɛn. Dɛn go kɛr una go bifo kiŋ ɛn gɔvnɔ dɛn bikɔs ɔf mi nem. 13 Dis go mek una prich to dɛn. 14 So una mekɔp una maynd nɔ fɔ praktis bifo tɛm wetin una go tɔk, 15 bikɔs a go tɛl una wetin fɔ tɔk ɛn gi una sɛns we go mek ɔl di wan dɛn we de agens una nɔ go ebul fɔ agyu ɔ tɔk ɛnitin. 16 Pantap dat, ivin una mama ɛn papa dɛn, brɔda dɛn, fambul dɛn, ɛn padi dɛn go an ova una, ɛn dɛn go kil sɔm pan una. 17 Ɛn ɔlman go et una bikɔs ɔf mi nem. 18 Bɔt ivin wan ia na una ed nɔ go lɔs. 19 We una bia, una go sev una layf.*

20 “Bɔt we una si sojaman dɛn de rawnd Jerusɛlɛm, una no se di tɛm fɔ lɛ dɛn pwɛl am dɔn kam nia. 21 Lɛ di wan dɛn we de na Judia bigin rɔn go na di mawntin dɛn, lɛ di wan dɛn we de na Jerusɛlɛm kɔmɔt de, ɛn lɛ di wan dɛn we de nia de nɔ ɛnta insay de, 22 bikɔs na da tɛm de Gɔd go pɔnish pipul dɛn so dat ɔl wetin dɛn bin dɔn rayt go bi. 23 Dɛn tɛm dɛn de, i go bad fɔ dɛn bɛlɛ-uman dɛn ɛn di uman dɛn we de gi pikin bɔbi! Pipul dɛn go rili sɔfa, ɛn Gɔd go sho se i vɛks pan dɛn pipul ya. 24 Dɛn go kil sɔm wit sɔd ɛn kɛr ɔda wan dɛn go na ɔl di neshɔn dɛn as slev; di neshɔn dɛn go pwɛl Jerusɛlɛm te di tɛm we dɛn gi di neshɔn dɛn dɔn.

25 “Sayn dɛn go de na di san, mun, ɛn sta dɛn. Dɔn di neshɔn dɛn go kɔnfyuz ɛn dɛn nɔ go no wetin fɔ du bikɔs di si rɔf ɛn i de mek lawd lawd sawnd. 26 Pipul dɛn go fent bikɔs dɛn de fred ɛn bikɔs ɔf di tin dɛn we dɛn de ɛkspɛkt se go apin; di pawaful tin dɛn na ɛvin go shek. 27 Ɛn dɛn go si mɔtalman Pikin de kam insay klawd wit pawa ɛn gret glori. 28 Bɔt as dɛn tin ya bigin fɔ apin so, una tinap stret ɛn es una ed ɔp, bikɔs di tɛm fɔ lɛ una sev dɔn kam nia.”

29 Na de i gi dɛn wan ɛgzampul. I se: “Una tink bɔt di fig tik ɛn ɔl di ɔda tik dɛn. 30 We dɛn bigin fɔ pul nyu lif, una go si am ɛn no se di sizin we plant kin gro dɔn nia. 31 Semweso, we una si dɛn tin ya de apin, una no se Gɔd in Kiŋdɔm dɔn nia. 32 Fɔ tru, a de tɛl una se dis jɛnɛreshɔn nɔ go day te ɔl dɛn tin ya apin. 33 Ɛvin ɛn di wɔl nɔ go de igen, bɔt wetin a tɔk go mɔs bi.

34 “Bɔt una tek tɛm mek una nɔ put ɔl una at pan tumɔs it ɛn tumɔs drink ɛn fɔ de wɔri wɔri, te da de de kam ɛn una nɔ ivin no. 35 Da de de go kam lɛk trap. I go kam fɔ ɔl di wan dɛn we de na di wɔl. 36 So una nɔ slip, ɛn una go de rili beg Gɔd ɔltɛm so dat una go sev we ɔl dɛn tin ya de apin ɛn una go ebul tinap bifo mɔtalman Pikin.”

37 I bin de tich na di tɛmpul dyurin di de, dɔn na nɛt i bin de go lɔj na wan mawntin we dɛn kɔl Mawnt Ɔliv. 38 Ɛn ali mɔnin ɔl di pipul dɛn kin kam to am na di tɛmpul fɔ yɛri wetin i de tɔk.