Yu De Si “Gɔd We Mɔtalman Nɔ De Si”?

1, 2. (a) Ɛksplen wetin mek i bin tan lɛk se Mozis bin de pan trɔbul. (Luk di pikchɔ nia dis atikul in taytul.) (b) Wetin mek Mozis nɔ bin fred we di kiŋ bin vɛks bad?

FƐRO na bin rula we ɔlman bin de fred, ɛn di Ijipshian dɛn bin de tek am lɛk gɔd. Wan buk we dɛn kɔl When Egypt Ruled the East, bin tɔk se di pipul dɛn na Ijipt bin biliv se Fɛro “gɛt sɛns ɛn pawa pas ɔlman.” Fɛro bin de wɛr wan krawn we gɛt sɔntin lɛk kobra we rɛdi fɔ bɛt. I bin de wɛr am fɔ mek in pipul dɛn fred ɛn fɔ mek in ɛnimi dɛn go de mɛmba se i nɔ go te igen, i go kil dɛn ɔl. Tink bɔt aw Mozis bin fil we Jiova bin tɛl am se: “A de sɛn yu go naw to di kiŋ fɔ go pul mi pipul dɛn we na di Izrɛlayt dɛn kɔmɔt na Ijipt.”—Ɛks. 3:10.

² Mozis bin go na Ijipt fɔ go tɛl Fɛro wetin Gɔd se, ɛn dat bin mek Fɛro vɛks bad. Afta nayn bad bad tin dɛn bin dɔn apin na Ijipt, Fɛro wɔn Mozis se: “I nɔ want fɔ si Mozis in fes igen, bikɔs di de we Mozis go go bifo am Mozis go day.” (Ɛks. 10:28) Bifo Mozis kɔmɔt bifo Fɛro, i tɔk se di kiŋ in fɔs bɔy pikin go day. (Ɛks. 11:4-8) Dɔn, Mozis tɛl ɔl di Izrɛlayt famili dɛn fɔ kil wan got ɔ ship ɛn rɔb di blɔd na dɛn domɔt dɛn. Dɛn animal ya bin valyu to di Ijipshian gɔd we dɛn kɔl Ra. (Ɛks. 12:5-7) Wetin Fɛro go du? Mozis nɔ bin fred. Wetin mek i nɔ bin fred? Na bikɔs Mozis bin biliv ɛn obe Jiova, “pan ɔl we di kiŋ bin vɛks bad. I nɔ bin gri fɔ tɔn bak, i bin de go lɛkɛ pɔsin we de si Gɔd we mɔtalman nɔ de si.”—Rid Di Ibru Pipul Dɛn 11:27, 28.

 3. Wetin wi go lan bɔt di fet we Mozis bin gɛt pan “Gɔd we mɔtalman nɔ de si”?

³ Yu gɛt di kayn fet we de mek i tan lɛk se yu de si Gɔd? (Mat. 5:8, NW) Fɔ ɛp wi fɔ biliv tranga tranga wan so dat wi go si “Gɔd we mɔtalman nɔ de si,” i go fayn lɛ wi lan frɔm Mozis in ɛgzampul. Aw di fet we Mozis bin gɛt pan Jiova ɛp am nɔ fɔ fred mɔtalman? Aw Mozis bin sho se i biliv di prɔmis dɛn we Gɔd bin dɔn mek? Ɛn aw di si we Mozis bin ebul fɔ si “Gɔd we mɔtalman nɔ de si,” bin ɛp am we in ɛn in pipul dɛn bin de pan trɔbul?

 4. To mɔtalman, udat na bin Mozis we yu kɔmpia am to Fɛro?

⁴ To mɔtalman, yu nɔ go kɔmpia Fɛro ɛn Mozis. I bin tan lɛk se Mozis in layf, di tin dɛn we fɔ mek i gladi, ɛn in tumara bambay bin de na Fɛro in an. Mozis bin aks Jiova se: “Udat nain fɔ go tinap bifo di kiŋ ɛn pul di Izrɛlayt dɛn kɔmɔt na Ijipt?” (Ɛks. 3:11) Fɔti ia bifo dat, Mozis bin dɔn rɔnawe kɔmɔt na Ijipt as rɛfyuji. Sɔntɛm, i go dɔn de tink se, ‘I rili mek sɛns fɔ lɛ a go bak na Ijipt ɛn mek di kiŋ go vɛks pan mi?’

5, 6. Wetin bin ɛp Mozis fɔ fred Jiova, bɔt nɔ fred Fɛro?

⁵ Gɔd bin tich Mozis wan impɔtant lɛsin bifo i go bak na Ijipt. Leta, Mozis rayt dis impɔtant lɛsin na wan buk we nem Job. I bin se: “Fɔ fred PAPA GƆD nain na bɔku bɔku sɛns.” (Job 28:28) Fɔ ɛp Mozis mek i nɔ fred mɔtalman ɛn fɔ mek i du tin wit sɛns, Jiova bin mek i si aw mɔtalman difrɛn frɔm in we na di Ɔlmayti Gɔd. I bin aks Mozis se: “Udat mek mɔtalman ɛn gi am mɔt? Udat de mek in yes dɛf ɔ in tɔn mumu? Udat mek i de si ɔ blɛn? Nɔto mi we na PAPA GƆD?”—Ɛks. 4:11.

⁶ Wetin na bin di lɛsin? Di lɛsin na dat Mozis nɔ bin nid fɔ fred. Wetin mek wi se so? Na bikɔs na Jiova bin sɛn am, ɛn I go gi am di pawa fɔ tɛl Fɛro In mɛsej. Apat frɔm dat, Jiova gɛt pawa pas Fɛro. Nɔto di fɔs tɛm dis we Gɔd in savant dɛn dɔn sɔfa na di Ijipshian dɛn an. I go bi se Mozis go dɔn tink bɔt aw Jiova bin protɛkt Ebraam, Josɛf, ɛn Mozis insɛf sɛf we ɔda Fɛro dɛn bin de rul Ijipt. (Jɛn. 12:17-19; 41:14, 39-41; Ɛks. 1:22–2:10) Mozis bin ebul fɔ go to Fɛro ɛn tɛl am ɔltin we Jiova bin tɛl am fɔ tɔk, bikɔs i bin gɛt fet pan Jiova we “mɔtalman nɔ de si.”

 7. Aw di fet we wan sista bin gɛt pan Jiova bin ɛp am fɔ tinap tranga wan?

⁷ Semweso, wan sista we nem Ɛla bin gɛt fet pan Jiova ɛn dat bin ɛp am nɔ fɔ fred mɔtalman. Insay 1949, sɔm polisman dɛn na Istonia, we dɛn kɔl KGB, bin arɛst Ɛla. We dɛn arɛst am, dɛn pul ɔltin we i wɛr ɛn tinap de wach am. Di sista bin se: “A bin shem bad bad wan. Bɔt afta a pre to Jiova, i gi mi kolat.” Afta dat, dɛn lɔk Ɛla in wangren na wan ples fɔ tri dez. Ɛla tɔk se: “Di polisman dɛn ala se: ‘Wi go mek shɔ se nɔbɔdi na Istonia nɔ go sabi di nem Jiova igen! Wi de go wit una na kamp. Ɛn wi de kɛr di ɔda wan dɛn go na Sayberia!’ Afta dat, dɛn provok mi bak se, ‘We una Jiova?’” Yu tink se Ɛla go fred mɔtalman, ɔ i go abop pan Jiova? We dɛn bin de aks am kwɛstyɔn dɛn, i nɔ bin fred fɔ tɛl dɛn se: “A dɔn mekɔp mi maynd, i go bɛtɛ lɛ a de na jel ɛn kɔntinyu fɔ bi Jiova in padi, pas fɔ lɛ una fri mi ɛn mek a pwɛl mi padi biznɛs wit Jiova.” I bin tan lɛk se Ɛla bin de si Jiova as rial Pɔsin jɔs lɛk aw i bin de si di polisman dɛn we bin tinap bifo am. Bikɔs Ɛla bin gɛt fet, dat bin ɛp am fɔ kɔntinyu fɔ du wetin Jiova want.

8, 9. (a) Wetin go ɛp yu nɔ fɔ fred mɔtalman? (b) If sɔntin apin we mek yu want fɔ fred mɔtalman, udat mɔ yu fɔ tink bɔt?

⁸ Di fet we yu gɛt pan Jiova go ɛp yu nɔ fɔ fred. If dɛn pawaful ɔfisa dɛn tray fɔ stɔp yu fɔ mek yu nɔ wɔship Gɔd, dat kin mek i tan lɛk se yu layf, di tin dɛn we fɔ mek yu gladi, ɛn yu tumara bambay de na dɛn an. Yu go ivin bigin tink if i mek sɛns fɔ kɔntinyu fɔ sav Jiova ɛn mek di wan dɛn we gɛt pawa, vɛks pan yu. Mɛmba se: Di tin we go mek yu nɔ fred mɔtalman na we yu gɛt fet pan Gɔd. (Rid Prɔvabs 29:25.) Jiova bin aks wan kwɛstyɔn se: “Udat na yu, we yu de fred mɔtalman we gɛt fɔ day, we de fred mɔtalman we dɛn mek lɛk gras?”—Ayz. 51:12, 13.

⁹ Go de tink mɔ bɔt yu Papa we gɛt pawa pas ɔlman. I de si, i de fil, ɛn i de du sɔntin fɔ ɛp di wan dɛn we de sɔfa ɔnda dɛn bad rula dɛn. (Ɛks. 3:7-10) We yu de bifo dɛn pawaful ɔfisa dɛn, ‘nɔ wɔri bɔt wetin yu go tɔk, ɛn aw yu go tɔk. Wɛn di tɛm rich Gɔd go tɛl yu wetin fɔ tɔk.’ (Mat. 10:18-20) Yu nɔ go kɔmpia Jiova to di wan dɛn we de rul ɔ to dɛn gɔvmɛnt ɔfisa dɛn. If yu tray fɔ gɛt mɔ fet naw, Jiova go tan lɛk rial Pɔsin we rili want fɔ ɛp yu.

10. (a) Wetin Jiova bin tɛl di Izrɛlayt dɛn fɔ du insay Naysan 1513 bifo Krays? (b) Wetin mek Mozis bin du wetin Gɔd tɛl am fɔ du?

¹⁰ Insay di ia 1513 bifo Krays, insay wan mɔnt we dɛn kɔl Naysan, Jiova bin tɛl Mozis ɛn Erɔn fɔ tɛl di Izrɛlayt dɛn fɔ pik wan manship ɔ got, kil am, ɛn rɔb di blɔd na dɛn domɔt. (Ɛks. 12:3-7) Wetin Mozis bin du? Di apɔsul Pɔl bin se: “Na bikɔs Mozis bin biliv Gɔd mek i bigin di Pasova wɛn i tɛl di Izrɛl pipul dɛn fɔ ib ib blɔd pan dɛn do, so dat wɛn di enjɛl we de kil dɛn fɔs bɔy pikin, kam, i nɔ go kil di Izrɛl pipul dɛn yon fɔs bɔy pikin dɛn.” (Ibru 11:28) Mozis bin no se Jiova de du ɛnitin we i tɔk, ɛn i bin biliv se Jiova go kil ɔl di fɔs bɔy pikin dɛn we de na Ijipt.

11. Wetin mek Mozis bin wɔn ɔda pipul dɛn?

¹¹ Mozis in pikin dɛn bin de na Midian, so dɛn bin de fa frɔm “di enjɛl we de kil dɛn fɔs bɔy pikin.” (Ɛks. 18:1-6) Bɔt i bin stil obe Jiova ɛn tɛl di ɔda Izrɛlayt dɛn we dɛn bɔy pikin dɛn layf bin de pan denja. Mozis bin rili lɛk in kɔmpin Izrɛlayt dɛn. Di Baybul se wantɛm wantɛm, “Mozis sɛn kɔl ɔl di big wan dɛn pan di Izrɛlayt dɛn ɛn tɛl dɛn mek dɛn pik wan yɔŋ ship ɔ got ɛn kil am so dat dɛn famili dɛn go sɛlibret di pasova fɛstival.”—Ɛks. 12:21.

12. Us impɔtant mɛsej Jiova dɔn tɛl wi fɔ tɔk?

¹² Di enjɛl dɛn de ɛp Jiova in pipul dɛn fɔ tɔk wan impɔtant mɛsej. Di mɛsej na: “Fred Gɔd, ɛn prez am bikɔs i wɔndaful! Di tɛm dɔn kam fɔ mek i jɔj mɔtalman. Una fɔdɔm bifo am ɛn prez am, nain mek ɛvin, nain mek di dray grɔn, di big wata we de rawnd di dray grɔn ɛn dɛn wata we de bɔs na grɔn!” (Rɛv. 14:7) Na naw na di tɛm fɔ tɔk dis mɛsej. Wi fɔ wɔn pipul dɛn fɔ kɔmɔt insay Babilɔn we ɔlman no, so dat dɛn nɔ go “sɔfa lɛkɛ aw i gɛt fɔ sɔfa.” (Rɛv. 18:4) Di “ɔda ship dɛn” dɔn jɔyn di anɔyntɛd Kristian dɛn fɔ beg di wan dɛn we nɔ de nia Gɔd fɔ “bi in padi dɛn.”—Jɔn 10:16; 2 Kɔr. 5:20.

13. Wetin go mek yu want fɔ tɛl ɔda pipul dɛn di gud nyus?

¹³ Wi biliv tranga wan se “di tɛm dɔn kam fɔ mek [Gɔd] jɔj mɔtalman.” Wi biliv bak se Jiova gɛt gud rizin we mek i de tɛl wi fɔ du di prichin wok kwik kwik wan; i nɔ jɔs de ɔri wi fɔ natin. Di apɔsul Jɔn bin si wan vishɔn usay i “si fo enjɛl dɛn tinap na di fo kɔna dɛn na di wɔl. We dɛn tinap de, dɛn bin de tap di briz we bin want fɔ blo kɔmɔt na di fo kɔna dɛn na di wɔl.” (Rɛv. 7:1) Yu tink se di fet we yu gɛt, de ɛp yu fɔ si dɛn enjɛl ya we rɛdi fɔ lɛf di briz we go mek da big trɔbul kam na di wɔl? If di fet we yu gɛt de mek yu ebul si dɛn enjɛl dɛn de, yu go ebul fɔ tɛl ɔda pipul dɛn di gud nyus wit zil.

14. Wetin de mek wi want fɔ “wɔn di wikɛd man lɛ i go chenj frɔm di wikɛd tin dɛn we i de du”?

¹⁴ Tru Kristian dɛn gɛt padi biznɛs wit Jiova ɛn dɛn op se dɛn go gɛt layf we go de sote go. Bɔt wi gɛt wok fɔ du we na fɔ “wɔn di wikɛd man lɛ i go chenj frɔm di wikɛd tin dɛn we i de du, so dat i go sev in layf.” (Rid Izikɛl 3:17-19.) Wi nɔ jɔs de prich fɔ lɛ Jiova nɔ ol wi fɔ pipul dɛn blɔd. Wi de prich bikɔs wi lɛk Jiova, ɛn wi lɛk wi kɔmpin mɔtalman. Fɔ sho wi wetin i min fɔ gɛt lɔv ɛn sɔri-at, Jizɔs bin pul wan stori bɔt wan gud Samɛritan. Wi fɔ aks wisɛf dis kwɛstyɔn, ‘A de prich to pipul dɛn bikɔs a gɛt sɔri-at, jɔs lɛk da Samɛritan we bin “sɔri” fɔ da man?’ Wi nɔ go ɛva want fɔ tan lɛk da prist ɛn da Livayt we bin “pas na di ɔda say na di rod” fɔ mek dɛn nɔ ɛp dɛn kɔmpin. Dis stori de tich wi se wi nɔ fɔ balans di prichin wok. (Lyuk 10:25-37) Di fet we wi gɛt pan di tin dɛn we Gɔd dɔn prɔmis ɛn di lɛk we wi lɛk wi kɔmpin mɔtalman go mek wi du di prichin wok gud gud wan bifo di tɛm dɔn.

15. Wetin mek di Izrɛlayt dɛn bin fil se dɛn yon dɔn dɔn?

¹⁵ Di fet we Mozis bin gɛt pan “Gɔd we mɔtalman nɔ de si,” bin ɛp am we di Izrɛlayt dɛn bin de pan trɔbul afta dɛn kɔmɔt na Ijipt. Di Baybul se: “Wɛn di Izrɛlayt dɛn tɔn biɛn ɛn si se di kiŋ ɛn in sojaman dɛn dɔn rich nia dɛn, dɛn bɔtɔm bɛlɛ bwɛl. Dɛn pre to PAPA GƆD fɔ sev dɛn.” (Ɛks. 14:10-12) Fɔ se dɛn nɔ bin no se dis kayn tin ya go apin? Nɔ, dɛn bin no. Jiova bin dɔn tɔk se: “A go mek in at traŋa fɔ lɛ i go rɔnata una. Aw a go dil wit in ɛn in sojaman dɛn go mek pipul dɛn prez ɛn ɔna mi. Dis go mek di Ijipshian dɛn no fɔ tru tru se mi na PAPA GƆD.” (Ɛks. 14:4) Pan ɔl we Jiova bin dɔn tɔk dis, di Izrɛlayt dɛn bin stil de fred bikɔs dɛn bin jɔs de si di Rɛd Si we nɔbɔdi nɔ go ebul fɔ krɔs, Fɛro ɛn in sojaman dɛn we bin de rɔnata dɛn wit fast fast chariɔt dɛn, ɛn di 80 ia ol shɛpad we bin de go wit dɛn! Dɛn bin fil se dɛn yon dɔn dɔn.

16. Aw fet bin ɛp Mozis we i rich na di Rɛd Si?

¹⁶ Pan ɔl dis, Mozis nɔ bin fred atɔl. Wetin mek? Na bikɔs di fet we i bin gɛt bin ɛp am fɔ si sɔntin we pawaful pas di Rɛd Si ɔ di sojaman dɛn we bin de rɔnata dɛn. I bin de “si PAPA GƆD in wɔnda,” ɛn i bin no se Jiova go fɛt fɔ di Izrɛlayt dɛn. (Rid Ɛksodɔs 14:13, 14.) Di fet we Mozis bin gɛt bin ɛp Gɔd in pipul dɛn fɔ gɛt fet. Di Baybul se: “Na bikɔs di Izrɛl pipul dɛn bin biliv Gɔd mek dɛn krɔs di big wata we nem ‘Rɛd Si’ lɛkɛ na dray grɔn dɛn de waka pan. Bɔt wɛn di Ijipt pipul dɛn want tray fɔ krɔs am, dɛn ɔl lɛf na di wata.” (Ibru 11:29) Afta dat, di Izrɛlayt dɛn “biliv PAPA GƆD mɔ ɛn Mozis we nain savant.”—Ɛks. 14:31.

17. Wetin gɛt fɔ apin tumara bambay we go tɛst wi fet?

¹⁷ I nɔ go te igen, i go tan lɛk se wi de pan trɔbul. Di tɛm we da big trɔbul go dɔn sidɔm gud gud wan na di wɔl, di gɔvmɛnt dɛn go dɔn dɔnawe wit di rilijɔn dɛn we bin big ɛn bɔku pas wi yon. (Rɛv. 17:16) Jiova bin dɔn tɔk se wi go tan lɛk pipul dɛn we de na say we “nɔ gɛt wɔl . . . ɛn sɛf nɔ gɛt ba dɛn ɔ get.” (Izi. 38:10-12, 14-16) If i lɛf to wi nɔmɔ, i go tan lɛk se no we nɔ de fɔ lɛ wi sev. Wetin yu go du da tɛm de?

18. Ɛksplen wetin mek wi fɔ tinap tranga wan we da big trɔbul go kam na di wɔl.

¹⁸ Wi nɔ nid fɔ fred atɔl. Wetin mek? Na bikɔs Jiova dɔn tɔk se i go sev in pipul dɛn we sɔm pipul dɛn go kam fɔ fɛt dɛn. Jiova se da de de we Gɔg go kam fɛt in pipul dɛn ‘in bad vɛks go grap. Fɔ we i bin de jɛlɔs ɛn we i bin vɛks bad bad wan lɛk we faya de kech.’ (Izi. 38:18-23) Afta dat, Jiova go dɔnawe wit ɔl di wan dɛn we want fɔ du bad tin to in pipul dɛn. Di fet we yu gɛt fɔ se dis go bi insay “di big de we wi fɔ fred” go ɛp yu fɔ “si PAPA GƆD in wɔnda” ɛn fɔ kɔntinyu fɔ du wetin Gɔd want.—Joɛl 2:31, 32.

19. (a) Uskayn padi biznɛs bin de bitwin Jiova ɛn Mozis? (b) If yu fala wetin Jiova se pan ɔl wetin yu de du, wetin na di blɛsin dɛn we yu go gɛt?

¹⁹ Rɛdi yusɛf naw fɔ dɛn fayn fayn tin dɛn we gɛt fɔ apin. Aw yu go rɛdi? Na bay we yu tan lɛk “pɔsin we de si Gɔd we mɔtalman nɔ de si”! Mek lɛ yu padi biznɛs wit Jiova Gɔd tayt bay we yu de stɔdi in Wɔd ɛn pre ɔltɛm. Mozis bin gɛt tayt padi biznɛs wit Jiova ɛn Jiova bin yuz am fɔ du pawaful tin dɛn. Na dat mek di Baybul se Jiova bin no Mozis “fes to fes.” (Dit. 34:10) Mozis na bin prɔfɛt we rili spɛshal. Fet go ɛp yu fɔ no Jiova lɛk se yu de rili si am. Di Baybul de ɛnkɔrej yu fɔ fala wetin Gɔd se “pan ɔl wetin yu de du.” If yu du dat, Gɔd go mek yu “si yu we klia” wan.—Prɔv. 3:6.