“Di Wan dɛn We De Waka Tret” wit Jiova Gɛt Gladi-At

1-2. (a) Wetin sɔm gɔvmɛnt dɛn dɔn du agens Jiova in pipul dɛn? Wetin Jiova in pipul dɛn dɔn du? (b) Aw di sɔfa we dɛn de mek wi sɔfa de mek wi gɛt gladi-at? (Tɔk bak bɔt di pikchɔ na di frɔnt pej.)

RAYT naw, i pas 30 kɔntri dɛn usay dɛn dɔn ban wi wok ɔ dɛn nɔ de alaw wi fɔ du ɔl wetin wi fɔ du fɔ wɔship Jiova. Na sɔm pan dɛn kɔntri dɛn ya, di gɔvmɛnt dɔn put wi brɔda ɛn sista dɛn na prizin. Wetin na di bad tin we dɛn du? To Jiova, dɛn nɔ du no bad tin. Ɔl wetin dɛn dɔn du na fɔ rid ɛn stɔdi di Baybul, tɛl ɔda pipul dɛn bɔt wetin dɛn biliv, ɛn atɛnd mitin wit dɛn kɔmpin Kristian dɛn. Dɔn bak, dɛn nɔ de gri fɔ miks pan ɛnitin we gɛt fɔ du wit pɔlitiks. Pan ɔl we dɛn de mek Gɔd in fetful savant dɛn rili sɔfa, dɛn dɔn kɔntinyu fɔ waka tret wit Gɔd ɛn sho se dɛn nɔ de ɛva kɔmɔt biɛn am.b Ɛn dɛn gladi fɔ du dat!

² Sɔntɛm yu go dɔn si pikchɔ dɛn we de sho sɔm pan wi brɔda ɛn sista dɛn we gɛt maynd, ɛn yu go dɔn notis se dɛn de smayl. Dɛn gladi bikɔs dɛn no se Jiova gladi wit dɛn fɔ we dɛn de kɔntinyu fɔ waka tret wit am. (1 Kro. 29:​17a) Jizɔs bin se: “Di wan dɛn we pipul dɛn dɔn mek sɔfa bikɔs dɛn de du wetin rayt gɛt gladi-at . . . Una gladi pasmak bikɔs una gɛt bɔku blɛsin.”—Mat. 5:​10-12.

 3. Akɔdin to Akt 4:​19, 20, wetin di apɔsul dɛn bin du we dɛn bin de mek dɛn sɔfa? Wetin mek dɛn du dat?

³ Di tin dɛn we wi brɔda ɛn sista dɛn de sɔfa fiba wetin Jizɔs in apɔsul dɛn bin bia we dɛn bin de mek dɛn sɔfa bikɔs dɛn bin de prich bɔt Jizɔs. Bɔku tɛm, di jɔj dɛn na di Ju ay kɔt bin de “tɛl dɛn mek dɛn lɛf fɔ tɔk bɔt Jizɔs in nem.” (Akt 4:​18; 5:​27, 28, 40) Wetin di apɔsul dɛn bin du? (Rid Akt 4:​19, 20.) Dɛn bin no se pɔsin we gɛt pawa pas di jɔj dɛn dɔn ‘tɛl dɛn fɔ prich to pipul dɛn ɛn ɛksplen klia wan’ di tru bɔt di Krays. (Akt 10:​42) So Pita ɛn Jɔn, we bin de tɔk fɔ dɛn, bin gɛt maynd fɔ tɔk se dɛn go obe Gɔd ɛn nɔ obe dɛn jɔj dɛn de. Dɛn tɔk bak se dɛn nɔ go stɔp fɔ tɔk bɔt Jizɔs. So i tan lɛk se dɛn bin de aks dɛn jɔj dɛn de dis kwɛstyɔn, ‘Una nɔ de fred fɔ tɛl wi se wi fɔ obe una ɛn nɔ obe Gɔd?’

 4. Akɔdin to Akt 5:​27-29, us ɛgzampul di apɔsul dɛn sɛt fɔ ɔlman we na tru Kristian? Aw wi go falamakata dɛn?

⁴ Di apɔsul dɛn sɛt fayn ɛgzampul we ɔlman we na tru Kristian dɔn de fala, dat na, fɔ ‘obe Gɔd as rula, nɔto mɔtalman.’ (Rid Akt 5:​27-29.) We di apɔsul dɛn bin de kɔmɔt na di Ju ay kɔt afta dɛn bin dɔn bit dɛn bikɔs dɛn kɔntinyu fɔ waka tret wit Gɔd, “dɛn bin de go ɛn gladi bikɔs na ɔnɔ fɔ sɔfa fɔ [Jizɔs] in nem,” ɛn dɛn kɔntinyu fɔ prich!—Akt 5:​40-42.

 5. Us kwɛstyɔn dɛn wi nid fɔ ansa?

⁵ Di ɛgzampul we di apɔsul dɛn sɛt de mek wi aks sɔm kwɛstyɔn dɛn lɛk, Aw di apɔsul dɛn bin ebul fɔ obe Gɔd ɛn nɔ obe mɔtalman, bɔt stil fala di lɔ na di Baybul we se dɛn fɔ “put [dɛnsɛf] ɔnda di wan dɛn we gɛt pawa”? (Rom. 13:​1) Aw wi go ebul fɔ “obe di gɔvmɛnt dɛn ɛn di wan dɛn we gɛt pawa” lɛk aw apɔsul Pɔl tɔk, ɛn stil kɔntinyu fɔ waka tret wit Gɔd we na wi men Rula?—Tay. 3:​1.

 6. (a) Udat na “di wan dɛn we gɛt pawa” we Romans 13:​1 tɔk bɔt? Aw wi fɔ trit dɛn? (b) Wetin na di tru tin bɔt ɔl mɔtalman rula dɛn?

⁶ Rid Romans 13:​1. “Di wan dɛn we gɛt pawa” we dis vas tɔk bɔt na mɔtalman rula dɛn we de kɔntrol ɔda pipul dɛn. Kristian dɛn fɔ put dɛnsɛf ɔnda dɛn pipul dɛn ya we gɛt pawa. Dɛn rula dɛn ya de ɛp fɔ mek pis de, dɛn de mek shɔ se pipul dɛn obe di lɔ, ɛn sɔntɛnde, dɛn de ivin protɛkt Jiova in pipul dɛn. (Rɛv. 12:​16) So, wi fɔ pe wi taks, pe ɔda kayn taks dɛn, fred dɛn, ɛn ɔnɔ dɛn. (Rom. 13:​7) Bɔt di wangren rizin we mek dɛn gɔvmɛnt dɛn ya gɛt pawa na bikɔs Jiova de alaw dɛn fɔ gɛt am. Jizɔs bin mek dis pɔynt klia we di Roman Gɔvnɔ we nem Pɔntiɔs Paylet bin de aks am kwɛstyɔn. We Paylet bin tɔk bɔt di pawa we i gɛt fɔ sev Jizɔs ɔ fɔ mek dɛn kil am, Jizɔs bin tɛl am se: “Yu nɔ bin fɔ gɛt pawa oba mi atɔl if Gɔd nɔ bin alaw yu fɔ gɛt am.” (Jɔn 19:​11) Jɔs lɛk Paylet, di pawa we ɔl mɔtalman rula ɛn pɔlitishian dɛn gɛt, gɛt say we i stɔp.

 7. Ustɛm wi nɔ fɔ obe mɔtalman rula dɛn? Wetin dɛn fɔ mɛmba?

⁷ Kristian dɛn fɔ obe mɔtalman gɔvmɛnt dɛn we dɛn lɔ dɛn nɔ de agens Gɔd in lɔ dɛn. Bɔt wi nɔ fɔ obe mɔtalman rula dɛn we dɛn tɛl wi fɔ du sɔntin we Gɔd nɔ want ɔ we dɛn stɔp wi fɔ du sɔntin we Gɔd se wi fɔ du. Fɔ ɛgzampul, sɔntɛm dɛn go se yɔŋman dɛn fɔ go fɛt fɔ dɛn kɔntri.c Ɔ sɔntɛm dɛn go ban wi Baybul ɛn wi pɔblikeshɔn dɛn, ɛn stɔp wi fɔ prich ɛn wɔship Jiova wit wi brɔda ɛn sista dɛn. We mɔtalman rula dɛn nɔ yuz dɛn pawa di rayt we, lɛk we dɛn de mek Krays in disaypul dɛn sɔfa, dɛn go gɛt fɔ ansa to Gɔd fɔ dat. Jiova de wach dɛn!—Ɛkli. 5:​8.

 8. Wetin na di difrɛns bitwin Jiova ɛn “di wan dɛn we gɛt pawa”? Wetin mek wi nid fɔ no di difrɛns?

⁸ Di wɔd fɔ “gɛt pawa” min fɔ de oba ɔda pipul dɛn, bɔt i nɔ min fɔ de oba ɔlman. Pan ɔl we di Baybul kɔl mɔtalman gɔvmɛnt dɛn “di wan dɛn we gɛt pawa,” pɔsin de we na in gɛt ɔl di pawa, ɛn na In de pantap ɔlman. Bɔku tɛm, di Baybul kɔl Jiova Gɔd “di Wan we De Pantap Ɔlman.”—Dan. 7:​18, 22, 25, 27, NWT.

 9. Wetin prɔfɛt Daniɛl bin si na in vishɔn dɛn?

⁹ Prɔfɛt Daniɛl bin si vishɔn dɛn we sho klia wan se Jiova na di Wan we gɛt pawa pas ɔl di ɔda wan dɛn we gɛt pawa. Fɔs, Daniɛl bin si 4 big wayl animal dɛn we tinap fɔ wɔl pawa dɛn we dɔn pas, dat na, Babilɔn, Mɛdo-Pashia, Gris, ɛn Rom, ɛn di wɔl pawa we de rul tide, we na Anglo-Amɛrika. (Dan. 7:​1-3, 17) Dɔn Daniɛl si Jiova Gɔd sidɔm na in tron na di kɔt we de na ɛvin. (Dan. 7:​9, 10) Di nɛks tin we da fetful prɔfɛt de bin si fɔ bi wɔnin to di rula dɛn we de tide.

10. Akɔdin to Daniɛl 7:​13, 14, 27 (NWT), udat dɛn Jiova gi di pawa fɔ rul di wɔl? Wetin dis pruv bɔt Am?

¹⁰ Rid Daniɛl 7:​13, 14, 27, NWT. Gɔd tek ɔl di pawa we mɔtalman gɔvmɛnt dɛn gɛt ɛn gi am to ɔda pipul dɛn we fit fɔ gɛt am ɛn we gɛt pawa pas dɛn. Na udat dɛn i gi? Na “sɔmbɔdi we tan lɛk mɔtalman pikin,” dat na Jizɔs Krays, ɛn “di Wan we De Pantap Ɔlman in oli wan dɛn,” dat na di 144,000 we go rul “sote go.” (Dan. 7:​18, NWT) Wi si klia wan se Jiova na “di Wan we De Pantap Ɔlman,” bikɔs na in nɔmɔ gɛt di pawa fɔ du dis kayn tin.

11. Wetin bak Daniɛl rayt we sho se Jiova de oba ɔl di neshɔn dɛn?

¹¹ Di tin we Daniɛl si na di vishɔn gri wit wetin i bin dɔn tɔk bifo i si dis vishɔn. Daniɛl bin se di “GƆD we de na ɛvin . . . de pul ɛn put kiŋ dɛn na pawa.” I bin rayt bak se “di Wan we De Pantap Ɔlman na in na di Rula na di kiŋdɔm fɔ mɔtalman ɛn i de gi am to ɛnibɔdi we i want.” (Dan. 2:​19-21; 4:​17, NWT) Fɔ se tɛm dɛn bin ɛva de we Jiova pul ɔ put rula dɛn na pawa? Yɛs!

12. Gi wan ɛgzampul bɔt aw Jiova bin pul kiŋ dɛn we bin de na pawa trade. (Luk di pikchɔ.)

¹² Jiova dɔn sho klia wan se i gɛt pawa pas ɔl “di wan dɛn we gɛt pawa.” Lɛ wi tɔk bɔt tri ɛgzampul dɛn. Fɛro na Ijipt bin mek Jiova in pipul dɛn bi slev, ɛn bɔku tɛm i nɔ bin de gri fɔ fri dɛn. Bɔt Gɔd bin fri dɛn ɛn mek Fɛro drawn na di Rɛd Si. (Ɛks. 14:​26-28; Sam 136:​15) Kiŋ Bɛlshaza na Babilɔn bin mek big pati ɛn “es [insɛf] ɔp agens PAPA GƆD na ɛvin” ɛn ‘prez di silva ɛn gold gɔd dɛn,’ i nɔ prez Jiova. (Dan. 5:​22, 23) Bɔt Gɔd bin mek dis prawd man kam dɔŋ. “Da sem nɛt de,” dɛn kil Bɛlshaza ɛn Jiova gi in kiŋdɔm to di Mid ɛn Pashian dɛn. (Dan. 5:​28, 30, 31) Kiŋ Ɛrɔd Agripa I na Palestayn bin mek dɛn kil apɔsul Jems, dɔn i put apɔsul Pita na prizin, ɛn i bin want fɔ kil am. Bɔt Jiova nɔ bin alaw Ɛrɔd fɔ du wetin i plan. “Jiova in enjɛl mek i sik,” ɛn i day.—Akt 12:​1-5, 21-23.

13. Gi wan ɛgzampul bɔt aw Jiova bin dɔnawe wit rula dɛn we bin kam togɛda fɔ fɛt am.

¹³ Jiova dɔn sho bak se i gɛt pawa pas rula dɛn we kam togɛda fɔ fɛt am. I bin fɛt fɔ di Izrɛlayt dɛn ɛn ɛp dɛn fɔ dɔnawe wit 31 Kenanayt kiŋ dɛn ɛn fɔ tek ova bɔku pat dɛn na di Prɔmis Land. (Jɔs. 11:​4-6, 20; 12:​1, 7, 24) Dɔn bak, Jiova bin ɛp di Izrɛlayt dɛn fɔ win Kiŋ Bɛnedad ɛn 32 ɔda Sirian rula dɛn we bin kam fɛt Izrɛl.—1 Kiŋ 20:​1, 26-29.

14-15. (a) Wetin Kiŋ Nɛbyudadnɛza ɛn Kiŋ Darayɔs bin tɔk bɔt Jiova in rayt fɔ rul? (b) Wetin wan pan di man dɛn we rayt di sam buk bin tɔk bɔt Jiova ɛn In pipul dɛn?

¹⁴ Bɔku tɛm, Jiova dɔn pruv se in na di Wan we De Pantap Ɔlman! Wantɛm, Kiŋ Nɛbyukadnɛza na Babilɔn bin bost bɔt ‘in pawa ɛn di we aw pipul dɛn de kɔle ɛn rɛspɛkt am.’ I nɔ bin put insɛf dɔŋ ɛn gri se na Jiova na di Wan we fit fɔ gɛt di prez, so Gɔd bin mek i kres. Afta we Nɛbyukadnɛza wɛl, i “prez di Wan we De Pantap Ɔlman” ɛn gri se “[Jiova] de rul sote go.” I tɔk bak se: “Nɔbɔdi nɔ de we ebul stɔp am.” (Dan. 4:​30, 33-35, NWT) Afta we dɛn bin tɛst di we aw Daniɛl de waka tret wit Gɔd ɛn we Jiova bin sev am we dɛn ib am usay di layɔn dɛn de, Kiŋ Darayɔs bin pas lɔ se: “Ɔlman . . . fɔ wɔship Daniɛl in PAPA GƆD, bikɔs na PAPA GƆD we gɛt layf, ɛn i de sote go; In kindɔm nɔ go ɛva fɔdɔm ɛn in pawa go de te ɔltin dɔn.”—Dan. 6:​7-10, 19-22, 26, 27.

¹⁵ Wan pan di man dɛn we rayt di sam buk bin se: “PAPA GƆD [“Jiova,” NWT] nɔ de mek wetin pipul plan bi wans nɔto wetin in want dɛn fɔ du.” I tɔk bak se: “Di neshɔn we dɛn Gɔd na Jiova gɛt gladi-at, di pipul dɛn we i dɔn pik fɔ bi in yon prɔpati.” (Sam 33:​10, 12, NWT) Dis na gud rizin we fɔ mek wi kɔntinyu fɔ waka tret wit Jiova.

16. Wetin wi gɛt kɔnfidɛns se go apin di tɛm fɔ di “big big trɔbul”? Wetin mek? (Luk di pikchɔ.)

¹⁶ Wi dɔn rid bɔt wetin Jiova bin du trade. Bɔt wetin wi de ɛkspɛkt se i go du tumara bambay? Wi gɛt kɔnfidɛns se Jiova go sev in fetful savant dɛn we di “big big trɔbul” go kam. (Mat. 24:​21; Dan. 12:​1) I go du dat we Gɔg we de na Megɔg, we na ɔl di neshɔn dɛn we go kam togɛda, go atak in fetful savant dɛn we de ɔlsay na di wɔl. Ilɛk i bi se sɔm pan di wan dɛn we go kam togɛda na ɔl di 193 mɛmba dɛn na di United Nations, dɛn nɔ go du fɔ di Wan we De Pantap Ɔlman ɛn in sojaman dɛn we de na ɛvin. Jiova prɔmis se: “A go sho mi pawa ɛn mi olinɛs na dɛn yay, ɛn mek di neshɔn dɛn no mi. Na datɛnde dɛn go no se na mi na . . . PAPA GƆD [“Jiova,” NWT].”—Izi. 38:​14-16, 23; Sam 46:​10.

17. Wetin di Baybul bin dɔn tɔk se go apin tumara bambay to di kiŋ dɛn na di wɔl ɛn di wan dɛn we de kɔntinyu fɔ waka tret wit Jiova?

¹⁷ Di atak we Gɔg go atak Gɔd in pipul dɛn go mek Amagɛdɔn stat, ɛn da tɛm de, Jiova go dɔnawe wit “di kiŋ dɛn na di wan ol wɔl.” (Rɛv. 16:​14, 16; 19:​19-21) Bɔt na jɔs “udat de waka tret go de na di land, wit di wan dɛn we de du di rayt tin.”—Prɔv. 2:​21.

18. Wetin bɔku tru Kristian dɛn rɛdi fɔ du? Wetin mek? (Daniɛl 3:​28)

¹⁸ Frɔm trade trade, bɔku tru Kristian dɛn dɔn risk dɛn fridɔm ɛn ivin risk dɛn layf bikɔs dɛn lɛk Jiova we na di Wan we gɛt rayt fɔ rul. Dɛn dɔn mekɔp dɛn maynd fɔ kɔntinyu fɔ waka tret wit Jiova. Dɛn tan lɛk di tri Ibru dɛn we bin kɔntinyu fɔ fetful to di Wan we De Pantap Ɔlman, we bin sev dɛn na da big big faya.—Rid Daniɛl 3:​28.

19. Wetin Jiova go yuz fɔ jɔj in pipul dɛn? Wetin dis fɔ mek wi du naw?

¹⁹ Devid, we na wan pan di man dɛn we rayt di sam buk, bin rayt bɔt aw i rili impɔtant fɔ lɛ wi kɔntinyu fɔ waka tret wit Gɔd. I bin se: “PAPA GƆD [“Jiova,” NWT] na yu na di jɔj fɔ ɔlman. PAPA GƆD [“Jiova,” NWT] bikɔs a de du wetin rayt, lɛ dɛn no se a inosɛnt.” (Sam 7:​8) Devid rayt bak se: “Mek di gudnɛs ɛn di waka we a de waka tret ɛp mi.” (Sam 25:​21) Di bɛst we fɔ liv wi layf na we wi kɔntinyu fɔ fetful to Jiova ɛn nɔ ɛva kɔmɔt biɛn am, ilɛk wetin go apin to wi. We wi du dat, wi go fil di sem we aw wan pan di man dɛn we rayt di sam buk bin fil. I bin se: “Di wan dɛn we de waka tret wit Gɔd ɛn we de du wetin Jiova in lɔ se gɛt gladi-at.”—Sam 119:​1, futnot, NWT.