Lɛ Wi Falamakata Jizɔs We Bin Gɛt Maynd ɛn We Bin De Tink ɛn Du di Rayt Tin

1, 2. (a) Wetin go mek wi sev? (b) Wetin go ɛp wi fɔ de na di rod we go mek wi sev?

WE WI bi Krays in disaypul, i jɔs tan lɛk se wi de travul na wan rod. Da rod de go mek wi gɛt layf sote go na ɛvin ɔ na dis wɔl. Jizɔs bin se: “Di wan we bia te ɔltin dɔn [te i day ɔ te di wɔl dɔn], na in go sev.” (Mat. 24:13) If wi kɔntinyu fɔ du wetin rayt, wi go sev. Bɔt as wi de waka na di rod, wi fɔ tek tɛm mek natin nɔ pul wi maynd de ɔ mek wi lɔs. (1 Jɔn 2:15-17) Wetin go ɛp wi fɔ kɔntinyu fɔ waka na dis rod?

² Jizɔs sɛt pafɛkt ɛgzampul fɔ wi, ɛn i bin dɔn waka na dis rod. Dɛn bin rayt bɔt aw i waka na dis rod, insay di Baybul. We wi stɔdi di Baybul, wi go no uskayn pɔsin Jizɔs bi. Wi go ebul fɔ lɛk am ɛn sho se wi gɛt fet pan am. (Rid Pita In Fɔs Lɛta 1:8, 9.) Di apɔsul Pita bin se Jizɔs lɛf ɛgzampul fɔ wi fɔ mek wi falamakata am. (1 Pit. 2:21) If wi tek tɛm fɔ falamakata Jizɔs, wi go gɛt di “men tin” we wi abop fɔ gɛt, dat na layf we go de sote go.a Insay di fɔs atikul, wi bin tɔk bɔt aw wi go falamakata Jizɔs in ɛgzampul we i kam pan di we aw i bin ɔmbul ɛn di we aw i bin gɛt sɔri-at. So lɛ wi tɔk naw bɔt aw wi go falamakata am fɔ gɛt maynd, fɔ tink gud wan ɛn du di rayt tin.

 3. Wetin i min fɔ gɛt maynd? Aw wi go gɛt am?

³ We pɔsin gɛt maynd, dat kin ɛp am fɔ bia ɛnikayn bad tin we go mit am. I kin “bia we i de sɔfa” ɛn “i kin tinap tranga wan fɔ du wetin rayt.” Pɔsin we gɛt maynd “nɔ kin wɔri we prɔblɛm mit am ɛn i kin fetful to Gɔd.” Fɔ gɛt maynd gɛt sɔntin fɔ du wit fred, op, ɛn lɔv. Wetin mek wi se so? We wi de fred Gɔd, i go mek wi gɛt maynd ɛn nɔ fred mɔtalman. (1 Sam. 11:7; Prɔv. 29:25) If wi gɛt op, i go mek wi nɔ pe atɛnshɔn to di bad tin dɛn we de mit wi, bɔt i go ɛp wi fɔ pe atɛnshɔn pan di tin dɛn we go apin tumara bambay. (Sam 27:14) If wi gɛt lɔv, i go mek wi gɛt maynd, ilɛksɛf wi gɛt fɔ lɔs wi layf. (Jɔn 15:13) Wi go gɛt maynd, if wi abop pan Gɔd ɛn falamakata in Pikin.—Sam 28:7.

 4. Aw Jizɔs bin sho se i gɛt maynd we i bin de “wit di ticha dɛn” na di tɛmpul? (Luk di pikchɔ nia dis atikul in taytul.)

⁴ We Jizɔs bin ol 12 ia, i bin gɛt maynd fɔ du wetin rayt. Lɛ wi tɔk bɔt wetin bin apin we Jizɔs bin “sidɔm wit di ticha dɛn” na “di tɛmpul.” (Rid Lyuk 2:41-47.) Dɛn ticha ya bin sabi di Lɔ we Gɔd bin gi Mozis gud gud wan, ɛn dɛn bin sabi di ɔda lɔ dɛn we dɛn bin dɔn mek, fɔ pwɛl di Lɔ we Gɔd bin gi Mozis. Bɔt Jizɔs nɔ bin fred dɛn ɛn sɛt in mɔt; i bin “de aks dɛn kwɛstyɔn.” Jizɔs nɔ bin de aks dɛn pikin pikin kwɛstyɔn dɛn. Jizɔs bin de aks dɛn kwɛstyɔn dɛn we bin de mek dɛn pe atɛnshɔn ɛn tink gud wan. Ɛn i go bi se di ticha dɛn nɔ bin ebul fɔ aks Jizɔs kwɛstyɔn dɛn we go briŋ kam agyumɛnt. Wetin mek? Na bikɔs di ticha dɛn ɛn ɔlman we bin de lisin bin de “kɔle di we aw i bin ɔndastand ɛn aw i bin de ansa dɛn.” Di ansa we i bin de gi bin kɔmɔt na Gɔd in Wɔd!

 5. Aw Jizɔs bin de sho se i gɛt maynd we i de prich?

⁵ We Jizɔs bin de prich, i bin sho se i gɛt maynd fɔ du bɔku bɔku tin dɛn. I nɔ bin de fred fɔ tɔk bɔt aw di bigman dɛn pan Gɔd biznɛs de ful di pipul dɛn wit dɛn lay lay tichin dɛn. (Mat. 23:13-36) Jizɔs nɔ bin alaw di wɔl fɔ chenj am. (Jɔn 16:33) I kɔntinyu fɔ prich, pan ɔl we pipul dɛn bin de tray fɔ du am bad. (Jɔn 5:15-18; 7:14) Jizɔs nɔ bin fred fɔ drɛb di wan dɛn we de sɛl na di tɛmpul. I bin drɛb dɛn tu tɛm bikɔs dɛn bin de mek pipul dɛn wɔship nɔ klin na Gɔd in yay.—Mat. 21:12, 13; Jɔn 2:14-17.

 6. Aw Jizɔs bin sho se i gɛt maynd di las de bifo i day?

⁶ Wi go gɛt mɔ fet if wi stɔdi di kayn maynd we Jizɔs bin gɛt we i bin de sɔfa. Lɛ wi tɔk bɔt di maynd we i bin gɛt di las de bifo i day. I bin no di difrɛn tin dɛn we go apin to am di tɛm we Judas go mek dɛn ol am. Bɔt stil, we dɛn de it di Pasova, Jizɔs tɛl Judas se: “Wetin yu de du, du am kwik kwik wan.” (Jɔn 13:21-27) We dɛn bin de na di gadin we nem Gɛtsimani, Jizɔs nɔ bin fred fɔ sho insɛf to di sojaman dɛn we bin kam fɔ arɛst am. Pan ɔl we in layf bin de pan denja, i bin tɔk fɔ protɛkt in disaypul dɛn. (Jɔn 18:1-8) We dɛn bin de aks am kwɛstyɔn na di Ju Ay kɔt, i bin gɛt maynd fɔ tɛl dɛn se in na di Krays ɛn in na Gɔd in Pikin, pan ɔl we i bin no se di ay prist bin de luk fɔ we fɔ kil am. (Mak 14:60-65) Jizɔs bin kɔntinyu fɔ du wetin rayt te dɛn kil am. Jɔs bifo i blo in las blo, i bin tɔk lawd wan se: “A dɔn du am dɔn!”—Jɔn 19:28-30.

 7. Yɔŋ wan dɛn, aw una fil we una gɛt Jiova in nem? Aw una go sho se una gɛt maynd?

⁷ Aw wi go sho se wi gɛt maynd lɛk Jizɔs? We wi de na skul. Yɔŋ wan dɛn, una go sho se una gɛt maynd we una nɔ fred fɔ mek ɔda pipul dɛn no se una na Jiova Witnɛs dɛn, pan ɔl we una klasmet dɛn ɔ ɔda pipul dɛn go provok una fɔ dat. We una du dis, una de sho se una gladi we una gɛt Jiova in nem. (Rid Sam 86:12.) We yu de na skul, dɛn go want fɔ fos yu fɔ biliv se Gɔd nɔ de; nɔbɔdi nɔ mek wi, wi jɔs kam so nɔmɔ lɛk dat. Bɔt yu gɛt gud rizin fɔ biliv se na tru di Baybul tɔk we i se na Gɔd mek wi. Yu kin yuz di buk we nem The Origin of Life—Five Questions Worth Asking fɔ ansa di wan dɛn we want fɔ no “di rizin we mek [yu] gɛt op.” (1 Pit. 3:15) We yu du dis, yu go rili gladi, bikɔs yu dɔn sho se di tin dɛn we de na Gɔd in Wɔd na tru.

 8. Wetin mek wi fɔ gɛt maynd we wi de prich?

⁸ We wi de prich. As tru Kristian dɛn, wi nid fɔ tɔk bɔt Jiova ɛn ‘Jiova go ɛp wi nɔ fɔ fred.’ (Akt 14:3) Wetin mek wi fɔ gɛt maynd we wi de prich? Na bikɔs wi no se na di tru tin dɛn we de na di Baybul wi de prich. (Jɔn 17:17) Wi no bak se “wi ɛn Gɔd de wok togɛda” ɛn wi gɛt di oli spirit fɔ ɛp wi. (1 Kɔr. 3:9; Akt 4:31) Wi no se we wi de prich wit zil, wi de sho se wi lɛk Jiova ɛn wi kɔmpin mɔtalman. (Mat. 22:37-39) Ɛn bikɔs wi gɛt maynd, wi nɔ de sɛt wi mɔt. Bifo dat, wi rɛdi fɔ sho pipul dɛn di lay lay tichin dɛn we dɔn mek dɛn nɔ de si di tru tin dɛn bɔt Gɔd. (2 Kɔr. 4:4) Ɛn wi de kɔntinyu fɔ prich di gud nyus pan ɔl we sɔm pipul dɛn de provok wi, dɛn nɔ de lisin to wi, ɛn dɛn ivin want fɔ stɔp wi.—1 Tɛsa. 2:1, 2.

 9. Aw wi go sho se wi gɛt maynd we bad tin de mit wi?

⁹ We wi de sɔfa. We wi biliv pan Gɔd, dat de mek wi gɛt fet ɛn maynd fɔ bia ɛni bad tin we mit wi. If pɔsin we wi lɛk day, wi kin fil am, bɔt wi nɔ de luz op. Wi kin abop pan Gɔd we de “kɔrej wi ɔltɛm.” (2 Kɔr. 1:3, 4; 1 Tɛsa. 4:13) If wi sik siriɔs wan ɔ wi skrap, wi kin fil pen, bɔt wi nɔ go du ɛnitin we go mek wi pwɛl Gɔd in lɔ. Wi nɔ go tek ɛni tritmɛnt we di Baybul nɔ gri wit. (Akt 15:28, 29) If wi at pwɛl, i kin “kɔndɛm wi,” bɔt bikɔs wi abop pan Gɔd we “de nia di wan dɛn we dɛn at pwɛl,” wi nɔ de giv ɔp.b—1 Jɔn 3:19, 20; Sam 34:18.

10. Wetin pɔsin we de tink gud wan ɛn du di rayt tin kin ebul fɔ du? Aw pɔsin we de wɔship Jiova fɔ tɔk ɛn du tin?

¹⁰ Pɔsin we de tink ɛn du tin di rayt we, na pɔsin we ebul fɔ no wetin rayt ɛn wetin rɔng, ɛn i kin disayd fɔ du di rayt tin. (Ibru 5:14) Kristian dɛn we de tink ɛn du tin di rayt we kin “disayd fɔ du di rayt tin we go mek dɛn padi biznɛs wit Gɔd go bifo.” Dis kayn pɔsin de tɔk ɛn du tin di we aw Gɔd want. I de tɔk tin dɛn we go ɛp ɔda pipul dɛn, i nɔ de tɔk tin dɛn we go mek ɔda pipul dɛn fil bad. (Prɔv. 11:12, 13) Na pɔsin we “nɔ de vɛks kwik.” (Prɔv. 14:29) I “de waka stret wan,” dis min se i de disayd fɔ du di rayt tin te i day. (Prɔv. 15:21) Wetin go ɛp wi fɔ tink di rayt we ɛn du di rayt tin? Wi fɔ stɔdi Gɔd in Wɔd ɛn du di tin dɛn we wi de lan. (Prɔv. 2:1-5, 10, 11) Jizɔs na di pɔsin we de tink ɛn du di rayt tin pas ɔlman we dɔn liv na di wɔl. If wi lan bɔt am, wi go rili bɛnifit.

11. Aw Jizɔs bin sho se i de tink gud wan ɛn disayd fɔ du di rayt tin we i de tɔk?

¹¹ Jizɔs bin sho se in na pɔsin we de tink ɛn du tin di rayt we pan ɔl wetin i bin de se ɛn du. Di we aw i bin de tɔk. I bin de “tɔk fayn” we i de prich di gud nyus, ɛn dis bin mek di wan dɛn we bin de lisin to am, bin de kɔle. (Lyuk 4:22; Mat. 7:28) I bin de alaw Gɔd in Wɔd fɔ tɔk fɔ am. I bin de rid am, kot am, ɔ sho di rayt skripchɔ we de sɔpɔt wetin i de tɔk. (Mat. 4:4, 7, 10; 12:1-5; Lyuk 4:16-21) Jizɔs bin de ɛksplen di Skripchɔ dɛn gud gud wan, ɛn dat bin de tɔch di pipul dɛn at. Afta we i bin dɔn gɛt layf bak, i bin tɔk to tu pan in disaypul dɛn we dɛn bin de go na wan ples we dɛn kɔl Ɛmeɔs. I bin “tɛl dɛn ɔl di tin dɛn we dɛn bin rayt bɔt am insay ɔl di Skripchɔ dɛn.” Leta, di disaypul dɛn bin tɔk se: “Nɔto in mek wi bin fil sɔntin na wi at we i bin de tɔk to wi . . . ɛn ɛksplen di Skripchɔ dɛn klia wan to wi?”—Lyuk 24:27, 32.

12, 13. Wetin sho se Jizɔs nɔ bin de vɛks kwik ɛn i nɔ bin de pin?

¹² Di we aw i de fil ɛn biev. Bikɔs Jizɔs de tink di rayt we, i “nɔ de vɛks kwik.” (Prɔv. 16:32) I “nɔ gɛt wamat.” (Mat. 11:29) I bin de peshɛnt wit in disaypul dɛn ɔltɛm pan ɔl we dɛn bin de mek mistek. (Mak 14:34-38; Lyuk 22:24-27) I nɔ bin de vɛks ivin we dɛn bin de trit am bad.—1 Pit. 2:23.

¹³ Bikɔs Jizɔs bin de tink gud wan ɛn disayd fɔ du di rayt tin, dat bin mek i nɔ bin de pin, bɔt i bin de tray fɔ ɔndastand wetin mek pɔsin du sɔntin. I bin ɔndastand wetin mek Jiova gi di Izrɛlayt dɛn di Lɔ, ɛn i bin de sho dis bay aw i bin de trit di pipul dɛn. Fɔ ɛgzampul, lɛ wi tɔk bɔt wetin de na Mak 5:25-34. (Rid.) Wan uman we de blid bin go midul bɔku bɔku pipul dɛn ɛn tɔch Jizɔs in klos, ɛn i bin wɛl. Di Lɔ we Gɔd bin gi Mozis bin se pɔsin we de blid nɔ klin, so dis uman nɔ bin fɔ dɔn tɔch ɛnibɔdi. (Lɛv. 15:25-27) Bɔt Jizɔs bin no “di impɔtant tin dɛn na di Lɔ” we na “fɔ gɛt sɔri-at, ɛn fɔ fetful,” so i nɔ bin tɔk pan di uman we i tɔch in klos. (Mat. 23:23) Bifo dat, i tɔk to am fayn ɛn tɛl am se: “Mi pikin, yu fet dɔn mek yu wɛl. Go wit kolat, dis bad sik we yu gɛt dɔn dɔn.” Bikɔs Jizɔs bin de tink gud wan ɛn du di rayt tin, dis bin mek i de trit pipul dɛn fayn!

14. Wetin Jizɔs bin disayd fɔ du? Wetin bin ɛp am fɔ pe atɛnshɔn pan di prichin wok?

¹⁴ Di tin we i disayd fɔ du na layf. Fɔ sho se Jizɔs bin de tink gud wan, i bin disayd fɔ liv in layf di rayt we. I bin de yuz ɔl in tɛm fɔ prich di gud nyus. I bin tek am se na in yon wok dis na layf. (Lyuk 4:43) Jizɔs nɔ bin lɛf di prichin wok; di tin dɛn we i bin disayd fɔ du bin ɛp am fɔ pe atɛnshɔn pan dis wok, ɛn i bin mek shɔ se i dɔn di prichin wok we i bin gɛt. I bin disayd fɔ liv simpul layf so dat i go gɛt mɔ tɛm ɛn trɛnk fɔ prich. (Lyuk 9:58) I bin si se i fɔ tren ɔda pipul dɛn we go kɔntinyu di prichin wok afta i dɔn day. (Lyuk 10:1-12; Jɔn 14:12) I bin prɔmis in disaypul dɛn se i go ɛp dɛn fɔ du di prichin wok “te di wɔl want dɔn.”—Mat. 28:19, 20.

15. Aw wi go sho se wi de tink di rayt we we i kam pan di aw wi de tɔk?

¹⁵ Lɛ wi tɔk bɔt ɔda we dɛn we wi kin falamakata Jizɔs. We wi de tɔk. We wi de tɔk to wi kɔmpin Kristian dɛn, wi fɔ tɔk sɔntin we go ɛnkɔrej dɛn, wi nɔ fɔ tɔk sɔntin we go mek dɛn at pwɛl. (Ɛfi. 4:29) We wi de tɔk to pipul dɛn bɔt Gɔd in Kiŋdɔm, wi fɔ put “sɔl” insay di tɔk, we min se wi fɔ tɔk fayn to dɛn. (Kɔl. 4:6) Wi fɔ tray fɔ no wetin dɛn nid ɛn wetin dɛn go want lɛ wi tɔk to dɛn bɔt. We wi no dat, wi fɔ tray fɔ tɔk to dɛn bɔt dɛn tin dɛn de. Wi fɔ mɛmba se we wi tɔk fayn to pipul dɛn, dɛn go want fɔ lisin to wi ɛn wetin wi de tɔk go tɔch dɛn at. Apat frɔm dat, we wi de ɛksplen di tin dɛn we wi biliv, wi fɔ mek di Baybul tɔk fɔ wi. Wi fɔ rid di Baybul to di pipul dɛn bikɔs Gɔd in Wɔd gɛt pawa pas ɛnitin we wi go se.—Ibru 4:12.

16, 17. (a) Aw wi go sho se wi na pɔsin we de ɔndastand ɛn nɔ de vɛks kwik? (b) Wetin go ɛp wi fɔ pe atɛnshɔn pan di prichin wok?

¹⁶ Di we aw wi de fil ɛn biev. We wi de tink di rayt we, i kin ɛp wi fɔ kɔntrol wisɛf ɛn “nɔ vɛks kwik.” (Jems 1:19) We sɔmbɔdi du wi bad, wi fɔ tray fɔ tink wetin mek i du dat. If wi tink dis kayn we, i go mek wi nɔ vɛks kwik ɛn i go ɛp wi lɛ wi “fɔgɛt bɔt wetin apin.” (Prɔv. 19:11) If wi de tink gud wan, i go mek wi ɔndastand wetin mek sɔmbɔdi du wi sɔntin. Wi nɔ fɔ fil se wi brɔda ɛn sista dɛn fɔ pafɛkt, wi fɔ mɛmba se dɛn kin gɛt prɔblɛm dɛn we wi nɔ kin ɔndastand. Wi fɔ rɛdi fɔ lisin to wetin dɛn de se, ɛn if na sɔntin we nɔ pwɛl lɔ, wi kin tray fɔ du wetin dɛn se.—Fil. 4:5.

¹⁷ Di we aw wi de liv wi layf. As Jizɔs in disaypul dɛn, wi no se no ɔda wok nɔ de we impɔtant pas di prichin wok we wi de du. So wi fɔ disayd fɔ du di rayt tin, we go ɛp wi fɔ pe atɛnshɔn pan di prichin wok. Wi fɔ put Gɔd in biznɛs fɔs ɛn liv simpul layf so dat wi go ebul fɔ gɛt mɔ tɛm fɔ du di prichin wok bifo di ɛnd kam.—Mat. 6:33; 24:14.

18. Wetin go mek wi kɔntinyu fɔ de na di rod we go mek wi gɛt layf sote go? Wetin wi fɔ mekɔp wi maynd fɔ du?

¹⁸ I rili fayn we wi dɔn lan bɔt sɔm fayn kwaliti dɛn we Jizɔs gɛt. Jɔs tink bɔt aw wi go bɛnifit if wi stɔdi bɔt di ɔda kwaliti dɛn we Jizɔs gɛt ɛn falamakata am. Lɛ wi mekɔp wi maynd fɔ fala Jizɔs in fut mak gud gud wan. If wi du dat, wi go kɔntinyu fɔ de na di rod we go mek wi gɛt layf sote go ɛn wi go kam nia Jiova mɔ ɛn mɔ, we na in Jizɔs bin falamakata pafɛkt wan.