Sɔpɔt di Tru Tin we di Baybul Tɔk bɔt Day

1-2 (a) Us we dɛn Setan dɔn ful pipul dɛn? (b) Wetin wi go tɔk bɔt insay dis atikul?

SETAN we “de mek pipul lay,” dɔn ful bɔku pipul dɛn frɔm Adam ɛn Iv dɛn tɛm. (Jɔn 8:​44) Sɔm pan Setan in lay dɛn na di lay lay tin dɛn we dɛn de tich bɔt day ɛn fɔ se we pɔsin day i de go liv ɔda say. Bɔku pan di kɔstɔm dɛn we pipul dɛn gɛt ɛn di tin dɛn we dɛn kin du, kɔmɔt frɔm di lay lay tin dɛn we Setan de tich bɔt dayman. Dis dɔn mek sɔm pan wi brɔda ɛn sista dɛn de “fɛt fɔ stil biliv pan Jizɔs Krays” we pɔsin day na dɛn famili ɔ na di eria usay dɛn de.—Jud In Lɛta 3.

² If dɛn want yu fɔ put an pan dɛn kɔstɔm dɛn de, wetin go ɛp yu fɔ tinap tranga wan fɔ du wetin Gɔd want, ɛn fɔ sho se yu biliv wetin di Baybul tich bɔt dayman? (Ɛfi. 6:​11) Aw yu go ɛp ɛn ɛnkɔrej yu kɔmpin Kristian we in fambul dɛn de mɔna am fɔ put an pan kɔstɔm dɛn we Gɔd nɔ lɛk? Dis atikul go tɔk bɔt aw Jiova de ɛp wi. Fɔs, lɛ wi si wetin di Baybul tɔk bɔt day.

 3. Wetin bin apin afta we Setan lay di fɔs lay?

³ Gɔd nɔ bin want mɔtalman fɔ day. Bɔt fɔ lɛ Adam ɛn Iv go de sote go, dɛn bin nid fɔ obe Jiova we i bin tɛl dɛn fɔ du wan simpul tin. I bin tɛl dɛn se: ‘Una nɔ fɔ it pan di sɛns tik, bikɔs if una it pan am, da sem de de, una go day.’ (Jɛn. 2:​16, 17) Dɔn Setan kam wit prɔblɛm dɛn. I yuz snek fɔ tɔk to Iv, ɛn i tɛl am se: “Una nɔ go day.” I sɔri fɔ no se Iv bin biliv wetin Setan tɔk, ɛn i it di frut. Leta, in man sɛf it di frut. (Jɛn. 3:​4, 6) Na dis tin we dɛn du bin mek mɔtalman bigin sin ɛn day.—Rom 5:​12.

4-5. Aw Setan dɔn kɔntinyu fɔ ful pipul dɛn?

⁴ Adam ɛn Iv bin day jɔs lɛk aw Gɔd bin dɔn tɔk. Bɔt Setan nɔ bin stɔp fɔ tɔk lay lay tin bɔt day. Leta, i bin bigin fɔ tɔk bɔt ɔda lay lay tin dɛn. Wan pan dɛn tin dɛn de na we i se we pɔsin day, na in bɔdi de day bɔt sɔntin de pan am we de kɔntinyu fɔ liv as spirit. Setan dɔn de ful bɔku bɔku pipul dɛn wit dɛn lay lay tɔk dɛn ya te to dis wi yon tɛm.—1 Tim. 4:​1.

⁵ Wetin mek Setan dɔn ebul fɔ ful bɔku bɔku pipul dɛn? Na bikɔs i no aw bɔku pipul dɛn de fil bɔt day, so i de yuz dat fɔ ful dɛn. Wi nɔ want fɔ day bikɔs Gɔd mek wi fɔ de sote go. (Ɛkli. 3:​11, NW) So wi de si day as wi ɛnimi.—1 Kɔr. 15:​26.

6-7. (a) Setan ebul fɔ ayd di tru tin bɔt wetin de apin to pɔsin we dɔn day? Ɛksplen. (b) Aw di tru tin we di Baybul tɔk dɔn ɛp wi nɔ fɔ fred dayman?

⁶ Pan ɔl we Setan dɔn de tray fɔ ayd di tru bɔt day, i nɔ stil ebul fɔ du dat. Infakt, bɔku bɔku pipul dɛn tide dɔn ebul fɔ no ɛn de tɔk bɔt di tru tin we di Baybul tɔk bɔt wetin de apin to pɔsin we dɔn day, ɛn di op we de fɔ di wan dɛn we dɔn day. (Ɛkli. 9:​5, 10; Akt 24:​15) Dɛn tru tin dɛn ya de rili ɛnkɔrej wi ɛn ɛp wi fɔ lɛ wi nɔ fred ɛn gɛt dawt bɔt wetin go apin we wi day. Fɔ ɛgzampul, as Jiova in savant dɛn wi nɔ de fred dayman, ɛn wi nɔ de fred se bad tin go apin to pɔsin we wi lɛk we dɔn day. Wi no se dɛn nɔ de alayf ɛn dɛn nɔ de du bad to ɛnibɔdi. I jɔs tan lɛk se na dip slip dɛn de pan. (Jɔn 11:​11-14) Wi no bak se di wan dɛn we dɔn day nɔ no se tɛm de go. So ivin di wan dɛn we dɔn day fɔ lɔng lɔng tɛm go fil lɛk se na jɔs shɔt tɛm nɔmɔ pas di tɛm we dɛn go gɛt layf bak.

⁷ Yu nɔ tink se di tru tin bɔt wetin de apin to pɔsin we dɔn day klia, simpul, ɛn i mek sɛns? Dis rili difrɛn frɔm di lay lay tin dɛn we Setan de tich fɔ kɔnfyus pipul dɛn. Apat frɔm di ful we Setan de ful pipul dɛn, dɛn in lay lay tichin dɛn de gi badnem to di Wan we mek ɔltin. Fɔ lɛ wi ebul no gud gud wan di bad tin dɛn we Setan dɔn du, wi go tɔk bɔt tri kwɛstyɔn dɛn: Aw Setan in lay lay tɔk dɛn dɔn briŋ badnem pan Jiova? Aw dat dɔn mek pipul dɛn de tink se nid nɔ de fɔ biliv pan di day we Krays day fɔ sev wi frɔm sin ɛn day? Aw dat dɔn ad to di pwɛl at we mɔtalman gɛt ɛn di sɔfa we wi de sɔfa?

 8. Frɔm wetin de na Jɛrimaya 19:​5, aw Setan in lay lay tɔk dɛn bɔt dayman dɔn briŋ badnem pan Jiova?

⁸ Setan in lay lay tɔk dɛn bɔt dayman dɔn briŋ badnem pan Jiova. Wan pan dɛn lay dɛn de na we i se di wan dɛn we dɔn day go sɔfa bay we dɛn de bɔn dɛn na faya. Dɛn kayn tichin dɛn de de gi Gɔd badnem. Aw? Na bikɔs dɛn tichin dɛn de de mek pipul dɛn biliv se di Gɔd we gɛt lɔv, wikɛd jɔs lɛk Setan. (1 Jɔn 4:​8) Aw dat de mek yu fil? Di wan we impɔtant pas ɔl, aw dat de mek Jiova fil? Afta ɔl, Jiova et ɛnikayn wikɛd tin.—Rid Jɛrimaya 19:​5.

 9. Aw Setan in lay lay tɔk dɛn dɔn mek pipul dɛn tink se nid nɔ de fɔ biliv pan di day we Krays day lɛk aw Jɔn 3:​16 ɛn 15:​13 tɔk?

⁹ Setan in lay lay tɔk dɛn bɔt day dɔn mek pipul dɛn tink se nid nɔ de fɔ biliv pan di day we Krays day. (Mat. 20:​28) Wan ɔda lay lay tɔk we Setan dɔn briŋ na dat mɔtalman gɛt sol we nɔ de day. If na so i bi, ɔlman fɔ dɔn liv sote go. Krays nɔ bin fɔ dɔn kam ɛn day fɔ mek wi gɛt layf we go de sote go. Mɛmba se di day we Krays day fɔ wi na di bɛst we dat we Gɔd dɔn sho se i lɛk mɔtalman. (Rid Jɔn 3:​16; 15:​13.) Imajin aw Jiova ɛn in Pikin de fil bɔt dɛn kayn lay lay tichin dɛn ya we de mek pipul dɛn fil se nid nɔ de fɔ lɛ Jizɔs kam day fɔ wi.

10. Aw Setan in lay lay tɔk dɛn dɔn ad to di pwɛl at we mɔtalman dɛn gɛt ɛn di sɔfa we dɛn de sɔfa?

¹⁰ Setan in lay lay tɔk dɛn dɔn ad to di pwɛl at we mɔtalman dɛn gɛt ɛn di sɔfa we dɛn de sɔfa. Dɛn kin tɛl mama ɛn papa dɛn we dɛn at pwɛl bikɔs dɛn pikin dɔn day se na Gɔd dɔn tek am, sɔntɛm fɔ bi enjɛl na ɛvin. Fɔ se dis lay lay tɔk kin mek dɛn at nɔ pwɛl ɔ i kin mek dɛn gɛt mɔ pwɛl at? Dɛn de yuz di lay lay tichin bɔt ɛlfaya fɔ sho se i nɔ bad fɔ pɔnish pipul dɛn, lɛk fɔ bɔn di wan dɛn we de agens wetin di chɔch de tich na stik. Wan buk we de tɔk bɔt wan Spanish kɔt we bin de pɔnish pipul dɛn we nɔ gri wit wetin di Katolik Chɔch bin de tich tɔk se, di wan dɛn we bin de jɔj bin biliv se we dɛn de bɔn dɛn kayn pipul dɛn de na faya, dat de mek dɛn “tes aw ɛlfaya go tan lɛk.” Dɛn se dɛn bin de du dis so dat di pipul dɛn go ripɛnt bifo dɛn day ɛn dɛn nɔ go go na ɛlfaya afta we dɛn day. Na bɔku kɔntri dɛn, pipul dɛn biliv se dɛn fɔ wɔship dɛn fambul dɛn we dɔn day, fɔ ɔnɔ dɛn ɔ fɔ mek dɛn blɛs dɛn. Ɔda wan dɛn de du dis fɔ mek dɛn fambul dɛn we dɔn day gladi so dat dɛn nɔ go du dɛn bad. I sɔri fɔ no se dɛn kayn lay lay tin ya we pipul dɛn biliv nɔ de gi dɛn tru tru kolat. Bifo dat, dɛn de wɔri pasmak ɔ ivin de fred.

11. Aw wi fambul dɛn ɛn padi dɛn we de tink gud bɔt wi go tray fɔ fos wi fɔ du tin dɛn we de agens Gɔd in Wɔd?

¹¹ We i kam pan kɔstɔm dɛn bɔt dayman, di lɛk we wi lɛk Gɔd ɛn in Wɔd, di Baybul, go ɛp wi fɔ obe Jiova ivin we wi fambul ɔ padi dɛn we de tink gud bɔt wi de fos wi fɔ jɔyn dɛn. Dɛn go ivin tray fɔ du tin dɛn we go mek wi shem, sɔntɛm dɛn kin ivin tɔk se wi nɔ lɛk ɔ rɛspɛkt di pɔsin we dɔn day. Ɔ dɛn kin tɔk se di we aw wi de biev go mek di pɔsin we dɔn day du bad tin dɛn to di wan dɛn we de alayf. Aw wi go sɔpɔt di tru tin dɛn we di Baybul de tich? Lɛ wi tɔk bɔt aw yu go fala dɛn prinsipul dɛn ya na di Baybul.

12. Us kɔstɔm dɛn bɔt dayman de agens wetin di Baybul de tich?

¹² Mek ɔp yu maynd fɔ lɛ yu “nɔ gɛt ɛnitin fɔ du wit” tin dɛn we pipul dɛn biliv ɔ kɔstɔm dɛn we de agens di Baybul. (2 Kɔr. 6:​17) Na wan Karebian kɔntri, bɔku pipul dɛn biliv se afta we pɔsin day in “gost” de de arawnd ɛn i go pɔnish di wan dɛn we bin dɔn trit am bad. Akɔdin to wan risach, dɛn se di “gost” kin ivin briŋ trɔbul na wan ol eria. Na Afrika, dɛn gɛt di kɔstɔm fɔ kɔba lukin-glas dɛn ɛn tɔn di pɔsin in pikchɔ dɛn na di wɔl na di bɛrin os. Wetin mek dɛn kin du dis? Na bikɔs sɔm pipul dɛn biliv se di pɔsin we dɔn day nɔ fɔ si insɛf. As Jiova in savant dɛn, wi nɔ de biliv ɛni lay lay tɔk ɔ put an pan di tin dɛn we pipul dɛn de du we de sɔpɔt Setan in lay lay tichin dɛn.—1 Kɔr. 10:​21, 22.

13. Frɔm wetin de na James 1:​5, wetin yu fɔ du if yu nɔ shɔ bɔt sɔm kɔstɔm dɛn?

¹³ If yu nɔ shɔ bɔt sɔm kɔstɔm ɔ tin dɛn we pipul dɛn biliv, pre to Jiova ɛn aks am fɔ gi yu mɔ sɛns fɔ no wetin fɔ du. (Rid Jems 1:​5.) Dɔn, yu kin du risach na wi buk ɛn magazin dɛn. If nid de, tɛl di ɛlda dɛn na yu kɔngrigeshɔn. Dɛn nɔ go tɛl yu wetin fɔ du, bɔt dɛn go ɛp yu fɔ si Baybul prinsipul dɛn we go ɛp yu lɛk di wan dɛn we dɛn tɔk bɔt na ya. We yu du dɛn tin ya, dat go ɛp yu fɔ “no wetin gud ɛn wetin bad,” ɛn dɛn tin dɛn ya go ɛp yu “fɔ no wetin rayt na Gɔd in yay.”—Ibru 5:​14.

14. Aw wi kin avɔyd fɔ du tin dɛn we go mek pipul dɛn stɔp fɔ sav Jiova?

¹⁴ “Una fɔ mek Gɔd gɛt di prez fɔ ɔl. Una fɔ liv una layf so dat una nɔ go mek . . . pipul we na Kristiɛn tap fɔ biliv pan Gɔd.” (1 Kɔr. 10:​31, 32) We wi de disayd fɔ put an pan sɔm kɔstɔm ɔ tradishɔn dɛn, wi fɔ tink bak bɔt aw wetin wi dɔn disayd go afɛkt ɔda pipul dɛn kɔnshɛns, mɔ wi kɔmpin Kristian dɛn. Wi nɔ go ɛva want fɔ du sɔntin we go mek wi kɔmpin Kristian dɛn stɔp fɔ sav Jiova. (Mak 9:​42) Dɔn bak, wi fɔ avɔyd fɔ du tin dɛn we go mek di wan dɛn we nɔto Jiova Witnɛs dɛn fil bad. Lɔv go mek wi tɔk to dɛn wit rɛspɛkt, ɛn dat go briŋ prez to Jiova. Wi nɔ go want fɔ mek plaba wit pipul dɛn ɔ provok dɛn fɔ di tin dɛn we dɛn biliv. Mɛmba se lɔv na tin we rili pawaful! We wi sho se wi lɛk di wan dɛn we de agens wi ɛn tɔk wit rɛspɛkt to dɛn, dat kin ivin mek dɛn at kol.

15-16. (a) Wetin mek i mek sɛns fɔ lɛ ɔda pipul dɛn no wetin yu biliv? Gi wan ɛgzampul. (b) Aw di wɔd dɛn we Pɔl bin rayt na Lɛta Fɔ Rom 1:​16 gɛt sɔntin fɔ du wit wi?

¹⁵ Mek lɛ ɔlman no na di say usay yu de se yu na Jiova Witnɛs. (Ayz. 43:​10) If wan pan yu fambul day, i go izi fɔ yu fɔ tɔk to yu ɔda fambul dɛn ɛn neba dɛn di rizin we mek yu nɔ de put an pan sɔm kɔstɔm dɛn if yu bin dɔn tɛl dɛn wetin yu biliv. Fransisko we de na Mɔzambik rayt se: “We mi ɛn mi wɛf we nem Karolina bin lan di trut, wi bin tɛl wi fambul dɛn se wi nɔ go wɔship dayman dɛn igen. Wi bin gɛt fɔ pruv wetin wi bin dɔn disayd di tɛm we Karolina in sista day. Wi pipul dɛn biliv se we pɔsin day, dɛn fɔ mek sɛrimoni fɔ was di bɔdi. Dɔn wan pan di dayman in fambul go slip fɔ tri dez usay dɛn trowe di wata we dɛn was am wit. Dɛn biliv se dis go mek di dayman in spirit gladi. Karolina in fambul dɛn bin want am fɔ slip fɔ tri dez usay dɛn trowe di wata we dɛn yuz fɔ was in sista.”

¹⁶ Wetin Fransisko ɛn in wɛf bin du? Fransisko bin ɛksplen se: “Bikɔs wi lɛk Jiova ɛn wi want fɔ du wetin go mek i gladi, wi nɔ bin gri fɔ put an pan da kayn kɔstɔm de. Dɛn bin tɛl wi se wi nɔ gɛt wan rɛspɛkt fɔ di dayman ɛn dɛn se dɛn nɔ go ɛva ɛp wi ɔ kam fɛn wi igen. Bikɔs wi bin dɔn tɛl dɛn wetin wi biliv, wi nɔ bin ɛksplen tɛl dɛn ɛnitin igen di tɛm we dɛn bin vɛks. Sɔm pan wi fambul dɛn bin ivin tɔk fɔ wi, ɛn se wi bin dɔn ɛksplen tɛl dɛn wetin wi biliv. As tɛm de go, Karolina in fambul dɛn at bin kol, ɛn wi bin ebul fɔ mek pis wit dɛn. Infakt, sɔm bin ivin kam na wi os fɔ aks fɔ wi buk ɛn magazin dɛn.” So lɛ wi nɔ ɛva shem fɔ tinap tranga wan fɔ di tru tin dɛn we di Baybul tich bɔt dayman.—Rid Lɛta Fɔ Rom 1:​16.

17. Wetin go ɛp wi fɔ bi gud padi to wi kɔmpin Kristian we in at pwɛl?

¹⁷ We wi kɔmpin Kristian lɔs in fambul, wi fɔ tray tranga wan fɔ bi “gud padi . . . , brɔda we dɛn bɔn fɔ di tɛm dɛn we prɔblɛm kin de.” (Prɔv. 17:​17, NW) Aw wi go bi “gud padi” mɔ to wi brɔda ɔ sista we dɛn de fos fɔ put an pan tin dɛn we de agens di Baybul? Lɛ wi tɔk bɔt tu Baybul prinsipul dɛn we go ɛp wi fɔ ɛnkɔrej di wan dɛn we dɛn at pwɛl bikɔs dɛn pɔsin we dɛn lɛk day.

18. Wetin mek Jizɔs bin kray? Wetin wi lan frɔm in ɛgzampul?

¹⁸ “Una kray wit di wan dɛn we de kray.” (Rom 12:​15, NW) I nɔ kin izi fɔ wi fɔ no wetin fɔ tɔk to pɔsin we de kray. Ilɛk wi nɔ no wetin fɔ tɔk, we dɛn si se wi de kray wit dɛn, dɛn kin no se wi bisin bɔt aw dɛn de fil. We Jizɔs in padi we nem Lazarɔs bin day, Meri, Mata, ɛn ɔda pipul dɛn bin de kray fɔ dɛn brɔda ɛn padi we dɛn lɛk. Afta 4 dez, Jizɔs bin kam ɛn insɛf bin “kray” pan ɔl we i bin no se i go gi am layf bak. (Jɔn 11:​17, 33-35) Di kray we Jizɔs kray bin sho di we aw Jiova bin fil bɔt Lazarɔs in day wan. We di pipul dɛn bin si we Jizɔs de kray, dɛn bin no se i rili lɛk di famili. Ɛn dat bin rili ɛnkɔrej Meri ɛn Mata. Semweso, we wi brɔda ɛn sista dɛn si se wi lɛk dɛn ɛn wi bisin bɔt dɛn, dat de mek dɛn no se nɔto dɛn wangren de bɔt dɛn gɛt padi dɛn we bisin bɔt dɛn ɛn de sɔpɔt dɛn.

19. Aw wi go fala wetin de na Ɛkliziastis 3:​7 we wi de ɛnkɔrej wi kɔmpin Kristian we in at pwɛl?

¹⁹ “Tɛm de fɔ sɛt mɔt, ɛn tɛm de fɔ tɔk.” (Ɛkli. 3:​7) Wan ɔda we aw wi kin ɛnkɔrej wi kɔmpin Kristian we in at pwɛl na bay we wi de tek tɛm lisin to am we i de tɔk. Alaw yu brɔda ɔ sista fɔ tɛl yu wetin de na in at ɔ aw i de fil, ɛn nɔ fil bad if i de tɔk tin dɛn we nɔ mek sɛns. (Job 6:​2, 3) I go bi se i strɛs bikɔs in fambul dɛn we nɔ de sav Jiova de mɔna am fɔ du tin dɛn we de agens di Baybul. So na fɔ pre wit am. Beg di Wan “we de ansa wi prea” fɔ gi am trɛnk ɛn fɔ mek i tink di rayt we. (Sam 65:​2) If i pɔsibul, una rid di Baybul togɛda. Ɔ rid wan patikyula atikul frɔm wi buk ɛn magazin dɛn, yu kin rid tru tru stori bɔt pɔsin in layf we go ɛnkɔrej am.

20. Wetin wi go tɔk bɔt insay di nɛks atikul?

²⁰ Wi rili gladi fɔ no di tru bɔt dayman ɛn di wɔndaful op we de fɔ di wan dɛn we dɔn day. (Jɔn 5:​28, 29) So bay wetin wi de tɔk ɛn bay wetin wi de du, lɛ wi tinap tranga wan fɔ di tru tin dɛn we de insay di Baybul ɛn lɛ wi tich ɔda pipul dɛn ɛnitɛm we wi gɛt di chans. Insay di nɛks atikul, wi go tɔk bɔt juju biznɛs we na wan ɔda we we Setan de yuz fɔ tray fɔ stɔp pipul dɛn fɔ lɛ dɛn nɔ no di trut. Wi go si wetin mek wi nid fɔ avɔyd tin dɛn we gɛt fɔ du wit dɛbul biznɛs ɛn fɔ stɔp fɔ ɛnjɔy wisɛf wit dɛn tin dɛn de we Setan de yuz as trap.