Wi Biliv Tranga Wan se di Wan dɛn We Dɔn Day Go Gɛt Layf Bak!

1-2. Us wɔndaful op we Jiova in savant dɛn gɛt?

OP NA sɔntin we rili impɔtant. Di op we sɔm pipul dɛn gɛt na fɔ lɛ dɛn gɛt gladi-at na dɛn mared-os, lɛ dɛn mɛn pikin dɛn we gɛt wɛlbɔdi, ɔ lɛ dɛn wɛlbɔdi prɔblɛm dɔn. Wi as Kristian dɛn kin op fɔ gɛt dɛn sem tin dɛn de. Bɔt wi de op fɔ gɛt sɔntin we pas ɔl dɛn wan dɛn de; wi gɛt op fɔ liv sote go ɛn fɔ si wi padi ɛn fambul dɛn we dɔn day.

² Apɔsul Pɔl bin se: “A abop pan Gɔd, . . . se di wan dɛn we du wetin rayt ɛn di wan dɛn we nɔ du wetin rayt go gɛt layf bak.” (Akt 24:​15) Nɔto Pɔl na di fɔs pɔsin we tɔk bɔt di op fɔ gɛt layf bak. Job sɛf bin tɔk bɔt dat. I bin biliv tranga wan se Gɔd go mɛmba am ɛn gi am layf bak.—Job 14:​7-10, 12-15.

 3. Wetin mek wi go bɛnifit frɔm 1 Kɔrintians chapta 15?

³ Di tichin fɔ se “di wan dɛn we dɔn day go gɛt layf bak” na pat pan di “fawndeshɔn,” ɔ di “fɔs tin dɛn” we ɔl Kristian dɛn biliv. (Ibru. 6:​1, 2) Di tin dɛn we Pɔl tɔk bɔt di op fɔ gɛt layf bak de na 1 Kɔrintians chapta 15. Di tin dɛn we i rayt go dɔn ɛp di fɔstɛm Kristian dɛn fɔ tinap tranga wan. Ɛn ilɛk i dɔn te we yu biliv se di wan dɛn we dɔn day go gɛt layf bak, 1 Kɔrintians chapta 15 go ɛnkɔrej yu, ɛn ɛp yu fɔ biliv mɔ ɛn mɔ se dat go apin.

 4. Wetin mek wi shɔ se wi padi ɛn fambul dɛn we dɔn day go gɛt layf bak?

⁴ Bikɔs Jizɔs Krays bin gɛt layf bak, dat mek wi shɔ se wi padi ɛn fambul dɛn we dɔn day go gɛt layf bak. Ɛn dat na wan pan “di gud nyuz” dɛn we Pɔl bin tɛl di Kristian dɛn we bin de na Kɔrint. (1 Kɔr. 15:​1, 2) Infakt, i bin se if ɛni Kristian nɔ biliv se Jizɔs bin gɛt layf bak, da pɔsin de in fet na fɔ natin. (1 Kɔr. 15:​17) Bikɔs wi biliv se Jizɔs bin gɛt layf bak, na dat mek wi biliv se ɔda pipul dɛn go gɛt layf bak.

5-6. Wetin di wɔd dɛn we de na 1 Kɔrintians 15:​3, 4 min fɔ wi?

⁵ We Pɔl bin bigin fɔ tɔk bɔt di op fɔ gɛt layf bak, i bin tɔk bɔt tri tin dɛn we na tru: (1) “Krays day fɔ wi sin dɛn.” (2) Dɛn “bɛr am.” (3) “I gɛt layf bak di tɔd de jɔs lɛk aw di Skripchɔ dɛn se.”—Rid 1 Kɔrintians 15:​3, 4.

⁶ Wetin i min fɔ wi we Jizɔs day, dɛn bɛr am, ɛn i gɛt layf bak? Bifo di Mɛsaya bin kam, prɔfɛt Ayzaya bin dɔn tɔk se dɛn go “kil am kɔmɔt na dis wɔl” ɛn dɛn go “bɛr am wit dɛn wikɛd pipul.” Bɔt Ayzaya bin tɔk bak bɔt ɔda tin. I bin se di Mɛsaya go tot “bɔku pipul sin.” Jizɔs bin du ɔl dis bay we i bin gi in layf as prayz fɔ fri wi. (Ayz. 53:​8, 9, 12; Mat. 20:​28; Rom 5:​8) So we Jizɔs bin day, dɛn bɛr am, ɛn i gɛt layf bak, i mek wi gɛt gud rizin dɛn fɔ op se wi go fri frɔm sin ɛn day ɛn wi go de bak wit wi padi ɛn fambul dɛn we bin dɔn day.

7-8. Wetin de ɛp Kristian dɛn fɔ biliv se Jizɔs bin gɛt layf bak?

⁷ Wi op fɔ gɛt layf bak gɛt sɔntin fɔ du wit di layf we Jizɔs bin gɛt bak. So wi nid fɔ biliv gud gud wan se Jizɔs bin gɛt layf bak. Wetin mek wi biliv se Jiova bin gi Jizɔs layf bak?

⁸ Bɔku pipul dɛn bin si Jizɔs afta we i gɛt layf bak, ɛn dɛn bin tɛl ɔda pipul dɛn bɔt dat. (1 Kɔr. 15:​5-7) Di fɔs pɔsin we si Jizɔs we Pɔl tɔk bɔt na bin apɔsul Pita (Sifas). Sɔm ɔda disaypul dɛn bak bin tɔk se Pita bin si Jizɔs afta we i gɛt layf bak. (Lyuk 24:​33, 34) Dɔn bak, “di 12 apɔsul dɛn” bin si Jizɔs afta we i gɛt layf bak. Leta, “i pas 500 brɔda dɛn we Krays apia to di sem tɛm,” i go mɔs bi se na di tɛm we dɛn bin gɛt da mitin na Galili we Matyu 28:​16-20 tɔk bɔt. Afta dat, Jizɔs bin apia to Jems. Sɔntɛm Jems na bin Jizɔs in stɛp brɔda we nɔ bin biliv fɔs se na Jizɔs na di Mɛsaya. (Jɔn 7:​5) Jems bin kam fɔ biliv afta we i si se Jizɔs dɔn gɛt layf bak. I fayn fɔ no se arawnd di ia 55 we Pɔl bin de rayt dis lɛta, bɔku pipul dɛn we bin si Jizɔs afta we i gɛt layf bak bin stil de alayv, so ɛnibɔdi we bin gɛt dawt bin gɛt di chans fɔ aks dɛn pipul dɛn de.

 9. Akɔdin to Akt 9: 3-5, wetin apin to Pɔl we na ɔda tin we pruv se Jizɔs bin gɛt layf bak?

⁹ Leta, Jizɔs bin apia to Pɔl. (1 Kɔr. 15:​8) Pɔl (Sɔl) bin de go na Damaskɔs we i yɛri Jizɔs we bin dɔn gɛt layf bak in vɔys, ɛn i bin si vishɔn we sho am se Jizɔs de na ɛvin. (Rid Akt 9:​3-5.) Da tin de we apin to Pɔl na ɔda tin we pruv se fɔ tru tru Jizɔs bin gɛt layf bak.—Akt 26:​12-15.

10. Bikɔs Pɔl bin biliv se Jizɔs dɔn gɛt layf bak, wetin dat bin mek i du?

¹⁰ Sɔm pipul dɛn go rili want fɔ no wetin Pɔl tɔk bikɔs bifo Jizɔs apia to am, i bin de mek di Kristian dɛn sɔfa. Afta we Pɔl bin dɔn kam fɔ no se Jizɔs bin gɛt layf bak, i bin de wok tranga wan fɔ ɛp ɔda pipul dɛn fɔ biliv dis tru tin. I bin gɛt fɔ bia we dɛn bin de bit am, we dɛn bin de put am na prizin, ɛn we i bin de insay ship we pwɛl na si, jɔs fɔ mek i prich to pipul dɛn bɔt aw Jizɔs we bin dɔn day dɔn gɛt layf bak. (1 Kɔr. 15:​9-11; 2 Kɔr. 11:​23-27) Bikɔs Pɔl bin rili biliv se Jizɔs bin dɔn gɛt layf bak, i bin rɛdi fɔ day as i de prich bɔt da tin de we i biliv. Dis pruf we wi dɔn si frɔm dɛn fɔstɛm Kristian dɛn ya we bin no se Jizɔs bin gɛt layf bak dɔn ɛp wisɛf fɔ biliv dat, nɔto so? Ɛn i de mek wi biliv mɔ se di wan dɛn we dɔn day go gɛt layf bak tumara bambay.

11. Wetin go dɔn bi di rizin we mek sɔm Kristian dɛn na Kɔrint nɔ bin de tink di rayt we bɔt di op fɔ gɛt layf bak?

¹¹ Sɔm pipul dɛn we bin de na Kɔrint we na bin Grik siti, nɔ bin de tink di rayt we bɔt di op fɔ gɛt layf bak. Dɛn bin ivin se “di wan dɛn we dɔn day nɔ go gɛt layf bak.” Wetin mek? (1 Kɔr. 15:​12) Di pipul dɛn we bin lɛk mɔtalman sɛns we bin de na wan ɔda Grik siti we nem Atɛns, bin de laf we dɛn yɛri pipul dɛn de tɔk se Jizɔs bin gɛt layf bak. So i go mɔs bi se sɔm Kristian dɛn na Kɔrint bin de tink lɛk dɛn. (Akt 17:​18, 31, 32) Ɔda wan dɛn go dɔn tink se di op fɔ gɛt layf bak nɔto rial tin, i jɔs min se pipul dɛn we na sina dɛn tan lɛk pɔsin we dɔn day, dɔn dɛn gɛt layf bak we dɛn bi Kristian. Ilɛk wetin na di rizin we mek dɛn Kristian dɛn ya nɔ bin biliv se di wan dɛn we dɔn day go gɛt layf bak, na fɔ natin dɛn bin gɛt fet. If Gɔd nɔ bin dɔn gi Jizɔs layf bak, dat min se nɔbɔdi nɔ bin dɔn pe di prayz fɔ fri dɛn ɛn dɛn ɔl na bin sina te to da tɛm de. So di wan dɛn we nɔ bin biliv se pipul dɛn go gɛt layf bak nɔ bin gɛt rial op.—1 Kɔr. 15:​13-19; Ibru. 9:​12, 14.

12. Akɔdin to 1 Pita 3:​18, 22, aw di layf we Jizɔs bin gɛt bak bin difrɛn frɔm di layf we ɔda pipul dɛn bin gɛt bak bifo am?

¹² Pɔl bin rili no se “Krays [bin] dɔn gɛt layf bak.” Di layf we Jizɔs bin gɛt bak bin pas ɔl di ɔda wan dɛn we bin gɛt layf bak bifo am bikɔs afta we dɛn pipul dɛn de bin gɛt layf bak, dɛn bin day leta. Pɔl bin se Jizɔs na “di fɔs wan we dɔn gɛt layf bak pan di wan dɛn we dɔn day jɔs lɛk di fɔs tin we dɛn avɛst.” Wetin Pɔl bin min we i se na Jizɔs na di fɔs wan? Jizɔs na di fɔs pɔsin we bin gɛt layf bak as spirit ɛn di fɔs mɔtalman we bin gɛt layf bak fɔ go de na ɛvin.—1 Kɔr. 15:​20; Akt 26:​23; rid 1 Pita 3:​18, 22.

13. Wetin Pɔl tɔk we sho se Adam difrɛn frɔm Jizɔs?

¹³ Aw wan man in day go mek bɔku bɔku pipul dɛn gɛt layf? Pɔl bin gi klia ansa to dis kwɛstyɔn. I sho di difrɛns bitwin di prɔblɛm we Adam kam wit pan mɔtalman ɛn di tin we Jizɔs in day go mek apin. We Pɔl bin de tɔk bɔt Adam, i bin se: “Na wan man briŋ day.” Adam in sin bin kam wit day fɔ in ɛn in pikin dɛn. Wi stil de sɔfa fɔ we i nɔ bin obe Gɔd. Bɔt bikɔs Gɔd bin gi layf bak to in Pikin, wi gɛt op fɔ tumara bambay! “Na wan man bak go mek di wan dɛn we dɔn day gɛt layf bak,” ɛn da man de na Jizɔs. Na dat mek Pɔl bin se, “Jɔs lɛk aw Adam mek ɔlman de day, na so bak di Krays go mek ɔlman gɛt layf.”—1 Kɔr. 15:​21, 22.

14. Adam go gɛt layf bak? Ɛksplen.

¹⁴ Wetin Pɔl bin min we i se na “Adam mek ɔlman de day”? Pɔl bin de tink bɔt Adam in pikin dɛn we dɔn gɛt sin frɔm am, we nɔ pafɛkt, ɛn we de day. (Rom 5:​12) Bɔt Adam nɔto wan pan di pipul dɛn we go “gɛt layf.” Adam nɔ go bɛnifit frɔm di day we Jizɔs day bikɔs i bin pafɛkt ɛn i nɔ bin obe Gɔd bay wilful. Di tin we bin apin to Adam go bi di sem tin we go apin to di wan dɛn we “mɔtalman Pikin” go jɔj as “got.” Dat min se we dɛn go day, “dɛn nɔ go ɛva gɛt layf igen.”—Mat. 25:​31-33, 46; Ibru. 5:​9.

15. Udat dɛn de pat ɔf di “ɔlman” we Pɔl se go “gɛt layf” bak?

¹⁵ Notis se Pɔl bin se “di Krays go mek ɔlman gɛt layf.” (1 Kɔr. 15:​22) Pɔl bin rayt dis in lɛta to di anɔyntɛd Kristian dɛn na Kɔrint we bin gɛt di op fɔ gɛt layf bak na ɛvin. Gɔd bin dɔn put dɛn brɔda ɛn sista dɛn de ‘wansay ɛn dɛn bin gɛt wanwɔd wit Krays Jizɔs, ɛn Gɔd bin dɔn kɔl dɛn fɔ bi oli pipul dɛn.’ Ɛn i bin tɔk bɔt “di wan dɛn we dɔn day we gɛt wanwɔd wit Krays.” (1 Kɔr. 1:​2; 15:​18; 2 Kɔr. 5:​17) Insay wan ɔda lɛta we Pɔl bin rayt, i bin se di wan dɛn we “gɛt wanwɔd wit [Krays] we . . . day lɛk aw i day,” go “gɛt wanwɔd wit am bak . . . lɛk aw i bin gɛt layf.” (Rom. 6:​3-5) Jizɔs bin gɛt layf bak as spirit ɛn i bin go na ɛvin. So na dat go apin to ɔl di wan dɛn we gɛt “wanwɔd wit Krays,” dat na ɔl di anɔyntɛd Kristian dɛn.

16. Wetin Pɔl bin min we i kɔmpia Jizɔs to “di fɔs tin we dɛn avɛst”?

¹⁶ Pɔl bin rayt se Krays bin gɛt layf bak as “di fɔs wan we dɔn gɛt layf bak pan di wan dɛn we dɔn day jɔs lɛk di fɔs tin we dɛn avɛst.” Mɛmba se ɔda pipul dɛn lɛk Lazarɔs we bin gɛt layf bak bin kam liv na dis wɔl, bɔt Jizɔs na di fɔs pɔsin we gɛt layf bak as spirit ɛn na in fɔs gɛt layf we go de sote go. Pɔl kɔmpia am to di fɔs tin dɛn we di Izrɛlayt dɛn bin de avɛst fɔ gi Gɔd. Dɔn bak, we Pɔl kɔmpia Jizɔs to “di fɔs tin we dɛn avɛst,” i min se ɔda pipul dɛn go gɛt layf bak afta Jizɔs fɔ go de na ɛvin. Ɔ leta, di apɔsul dɛn ɛn di ɔda wan dɛn we gɛt “wanwɔd wit Krays” go gɛt layf bak fɔ go de na ɛvin jɔs lɛk Jizɔs.

17. Ustɛm di wan dɛn we “gɛt wanwɔd wit Krays” go gɛt layf bak fɔ go de na ɛvin?

¹⁷ Di tɛm we Pɔl bin de rayt in lɛta to di Kristian dɛn na Kɔrint, di wan dɛn we bin “gɛt wanwɔd wit Krays” ɛn we go gɛt layf fɔ go de na ɛvin nɔ bin dɔn bigin fɔ gɛt da layf de yet. Pɔl bin se dɛn go gɛt da layf de leta. I bin rayt se: “I go bi bay tɔn: Na Krays fɔs we tan lɛk di fɔs tin we dɛn avɛst, afta dat, di wan dɛn we na Krays in yon insay di tɛm we i go de wit wi.” (1 Kɔr. 15:​23; 1 Tɛs. 4:​15, 16) Tide, wi de na di tɛm we di Baybul bin dɔn se Krays “go de wit wi.” So di apɔsul dɛn ɛn di ɔda anɔyntɛd Kristian dɛn we bin dɔn day bin nid fɔ wet te di tɛm we Krays go de wit wi fɔ lɛ dɛn go go na ɛvin ɛn “gɛt wanwɔd wit [Jizɔs] bak we [dɛn] gɛt layf bak lɛk aw i bin gɛt layf.”

18. (a) Wetin mek wi go se ɔda pipul dɛn go gɛt layf bak afta di wan dɛn we go gɛt layf bak fɔ go de na ɛvin? (b) Wetin wi lan frɔm 1 Kɔrintians 15:​24-26 bɔt wetin go apin?

¹⁸ Bɔt wetin go apin to ɔl di fetful Kristian dɛn we nɔ gɛt di op fɔ go de na ɛvin wit Krays? Dɛnsɛf gɛt di op fɔ gɛt layf bak. Di Baybul se Pɔl ɛn di ɔda wan dɛn we gɛt fɔ go na ɛvin go de pan “di wan dɛn we go gɛt layf bak fɔs.” (Fil. 3:​11) Yu nɔ tink se dis min se ɔda pipul dɛn go gɛt layf bak afta dɛn? Dis gri wit wetin Job bin tɔk bɔt wetin go apin to am afta we i day. (Job 14:​15) “Di wan dɛn we na Krays in yon insay di tɛm we i go de wit wi” go de wit am na ɛvin we i go mek ɔl di gɔvmɛnt dɛn ɛn di wan dɛn we gɛt pawa nɔ de igen. Ivin “di las ɛnimi, we na day,” nɔ go de igen. So wi shɔ se ɔl di wan dɛn we go gɛt layf bak fɔ go de na ɛvin nɔ go ɛva day igen. Bɔt wetin go apin to di ɔda wan dɛn?—Rid 1 Kɔrintians 15:​24-26.

19. Wetin di wan dɛn we gɛt di op fɔ de na dis wɔl fɔ ɛkspɛkt?

¹⁹ Wetin di wan dɛn we gɛt di op fɔ de na dis wɔl fɔ ɛkspɛkt? Dɛn kin abop pan di tin we Pɔl bin tɔk. I bin se: “A abop pan Gɔd, . . . se di wan dɛn we du wetin rayt ɛn di wan dɛn we nɔ du wetin rayt go gɛt layf bak.” (Akt 24:​15) Wi no se ɛnibɔdi we nɔ de du wetin rayt nɔ go ebul go na ɛvin. So dis tin we Pɔl bin tɔk de sho se pipul dɛn go gɛt layf bak na dis wɔl tumara bambay.

20. Wetin dɔn ɛp yu fɔ biliv mɔ ɛn mɔ se di wan dɛn we dɔn day go gɛt layf bak?

²⁰ Wi nɔ gɛt wan dawt fɔ se pipul dɛn “go gɛt layf bak.” Di wan dɛn we go gɛt layf bak na dis wɔl go gɛt di op fɔ liv na di wɔl sote go. Yu kin trɔst dis prɔmis. Dis op go kɔrej yu we yu mɛmba yu padi ɔ fambul we dɔn day. Dɛn go ebul fɔ gɛt layf bak di tɛm we Krays ɛn di ɔda wan dɛn go “rul as kiŋ dɛn . . . fɔ 1,000 ia.” (Rɛv. 20:​6) Yusɛf kin gɛt kɔnfidɛns se if yu day bifo Jizɔs stat fɔ rul da tɛm de, yu go gɛt layf bak. “Wi go mɔs gɛt wetin wi op fɔ.” (Rom. 5:​5) Dis op go mek yu kɔntinyu fɔ gɛt trɛnk naw, ɛn i go mek yu kɔntinyu fɔ gɛt gladi-at as yu de sav Gɔd. Bɔt ɔda tin dɛn de we wi kin lan frɔm 1 Kɔrintians chapta 15. Wi go tɔk bɔt dɛn insay di nɛks atikul.