“Yu Go De wit Mi na Paradays”

 1. Jɔs bifo Jizɔs day, wetin i bin tɛl wan kriminal we bin de nia am? (Lyuk 23:​39-43)

JIZƆS ɛn di tu kriminal dɛn we bin de nia am bin de sɔfa as dɛn de day slo wan. (Lyuk 23:​32, 33) Ɔl tu dɛn kriminal dɛn de bin de provok Jizɔs, so i sho klia wan se dɛn nɔto bin in disaypul dɛn. (Mat. 27:​44; Mak 15:​32) Bɔt wan pan dɛn bin chenj di we aw i bin de biev. I bin tɔk se: “Jizɔs, mɛmba mi we yu go na yu Kiŋdɔm.” Jizɔs bin ansa am se: “Fɔ tru, a de tɛl yu tide se yu go de wit mi na Paradays.” (Rid Lyuk 23:​39-43.) Pan ɔl we di kriminal go dɔn yɛri se ‘di Kiŋdɔm na ɛvin bin dɔn nia’ di tɛm we Jizɔs bin de prich, i nɔ bin dɔn bi Jizɔs in disaypul. Ɛn Jizɔs nɔ ɛva tɔk se di man go de na da Kiŋdɔm de na ɛvin. (Mat. 4:​17) Jizɔs bin de tɔk bɔt Paradays we go de na di wɔl tumara bambay. Wetin mek wi se dat?

 2. Aw wi no se di kriminal we ripɛnt na bin Ju?

² I go mɔs bi se di kriminal we ripɛnt na bin Ju. Da kriminal de bin tɛl di ɔda kriminal se: “Yu nɔ de fred Gɔd, we yu ɛn dis man gɛt di sem pɔnishmɛnt?” (Lyuk 23:​40) Di Ju dɛn bin de wɔship wan Gɔd, bɔt di pipul dɛn we de na ɔda neshɔn dɛn bin biliv bɔku gɔd dɛn. (Ɛks. 20:​2, 3; 1 Kɔr. 8:​5, 6) If dɛn kriminal dɛn de nɔto bin Ju, sɔntɛm di kriminal bin fɔ dɔn aks se, “Yu nɔ de fred di gɔd dɛn?” Dɔn bak, dɛn nɔ bin sɛn Jizɔs to di pipul dɛn we de na ɔda neshɔn dɛn, bɔt na to “di Izrɛlayt dɛn . . . we tan lɛk ship dɛn we dɔn lɔs.” (Mat. 15:​24) Gɔd bin mek di Izrɛlayt dɛn no se i go gi layf bak to di wan dɛn we dɔn day. Sɔntɛm di kriminal we ripɛnt bin no bɔt dis, ɛn in wɔd dɛn sho se i de ɛkspɛkt se Jiova go gi layf bak to Jizɔs fɔ rul na Gɔd in Kiŋdɔm.

 3. Wetin di kriminal go mɔs dɔn tink bɔt we Jizɔs bin tɔk bɔt Paradays? Ɛksplen. (Jɛnɛsis 2:​15)

³ If di kriminal we ripɛnt na bin Ju, i go dɔn no bɔt Adam ɛn Iv ɛn di Paradays we Jiova bin put dɛn. So i go bi se di kriminal bin biliv se di Paradays we Jizɔs bin tɔk bɔt go bi fayn gadin we go de na di wɔl.—Rid Jɛnɛsis 2:​15.

 4. Wetin di wɔd dɛn we Jizɔs bin tɔk to wan pan di kriminal dɛn fɔ muv wi fɔ tink bɔt?

⁴ Jizɔs in wɔd dɛn to di kriminal fɔ muv wi fɔ tink bɔt aw layf go tan lɛk na Paradays. Fɔ tru, wi go lan sɔntin bɔt Paradays frɔm di pisful rul we Kiŋ Sɔlɔmɔn bin de rul. Di Baybul tɔk se Jizɔs gret pas Sɔlɔmɔn. Wi go ɛkspɛkt se Jizɔs go wok wit di wan dɛn we go rul wit am fɔ mek di wɔl bi wɔndaful Paradays. (Mat. 12:​42) Dis sho klia wan se di “ɔda ship dɛn” fɔ tink bɔt wetin dɛn go nid fɔ du fɔ mek dɛn go kwalifay fɔ de sote go na Paradays.—Jɔn 10:​16.

 5. Aw yu tink se layf go tan lɛk na Paradays?

⁵ Wetin kin kam na yu maynd we yu tink bɔt aw layf go tan lɛk na Paradays? Sɔntɛm yu go tink bɔt wan fayn pak, we tan lɛk di gadin we bin de na Idɛn. (Jɛn. 2:​7-9) Sɔntɛm yu go mɛmba Mayka in prɔfɛsi we se Gɔd in pipul dɛn “ɔl go sidɔm ɔnda dɛn yon vayn ɛn ɔnda dɛn yon fig tik.” (Mayk. 4:​3, 4, NWT) Sɔntɛm yu go mɛmba bak vas dɛn we de na di Baybul we se plɛnti it go de. (Sam 72:​16; Ayz. 65:​21, 22) So yu go imajin yusɛf na wan fayn gadin, ɛn yu sidɔm na wan tebul we gɛt bɔku fayn fayn it dɛn. Sɔntɛm yu go imajin di fayn sɛnt we di plant ɛn flawa dɛn gɛt. Ɛn i go mɔs bi se yu go imajin yu fambul ɛn padi dɛn, ivin di wan dɛn we dɔn gɛt layf bak, de laf ɛn ɛnjɔy fɔ spɛn tɛm togɛda. Ɔl dɛn tin dɛn de nɔto jɔs drim. Wan dawt nɔ de se ɔl dɛn tin dɛn ya go apin na di wɔl. Bɔt, insay Paradays wi go ɛnjɔy fɔ wok bak.

 6. Us wok wi go du na Paradays? (Luk di pikchɔ.)

⁶ Jiova mek wi fɔ ɛnjɔy we wi de wok. (Ɛkli. 2:​24) Wi go bizi mɔ insay di Wan Tawzin Ia we Krays Go De Rul. Di wan dɛn we go sev di tɛm fɔ da big big trɔbul ɛn di bɔku bɔku pipul dɛn we go gɛt layf bak, go nid klos, it, ɛn say fɔ de. Fɔ mek wi go ebul fɔ gi dɛn ɔl dɛn tin dɛn de, wi nid fɔ du bɔku wok we wi go ɛnjɔy. Jɔs lɛk Adam ɛn Iv we Gɔd bin tɛl dɛn fɔ mek di wɔl, wi go gɛt wok we wi go ɛnjɔy fɔ du, we na fɔ mek di wɔl bi Paradays. Imajin bak aw wi go ɛnjɔy fɔ tich di bɔku bɔku pipul dɛn we go gɛt layf bak we no smɔl tin bɔt Jiova ɛn wetin i want, ɛn fɔ ɛp di wan dɛn we bin fetful we bin dɔn de lɔng tɛm bifo Jizɔs kam na di wɔl fɔ lan bɔt di tin dɛn we apin frɔm di tɛm we dɛn bin day!

 7. Us kɔnfidɛns wi fɔ gɛt? Wetin mek?

⁷ Wi fɔ gɛt kɔnfidɛns se we wi go de na Paradays, wi go gɛt pis, gɛt ɔl wetin wi nid, ɛn ɔltin go rili ɔganayz. Wetin mek? Na bikɔs Jiova dɔn ɔlrɛdi sho wi ɛgzampul bɔt aw layf go tan lɛk ɔnda in Pikin in rul. Di akawnt bɔt di tɛm we Kiŋ Sɔlɔmɔn bin de rul na di ɛgzampul we Jiova dɔn sho wi.

 8. Aw di wɔd dɛn we de na Sam 37:​10, 11, 29 bin kam tru trade? (Rid “Kwɛstyɔn dɛn we Pipul dɛn Kin Aks” na dis Wachtawa.)

⁸ Jiova in spirit bin dayrɛkt Kiŋ Devid fɔ rayt bɔt aw layf go tan lɛk we kiŋ we fetful ɛn gɛt sɛns go sidɔm na di tron tumara bambay. (Rid Sam 37:​10, 11, 29.) Bɔku tɛm, wi kin rid Sam 37:​11 we wi de tɔk to ɔda pipul dɛn bɔt Paradays we go de tumara bambay. Wi gɛt gud rizin fɔ du dat bikɔs Jizɔs bin kot da vas de we i bin de prich ɔp wan mawntin, ɛn dis sho se wetin di vas tɔk go kam tru tumara bambay. (Mat. 5:​5) Bɔt Devid in wɔd bin sho bak aw layf go tan lɛk insay Kiŋ Sɔlɔmɔn in tɛm. We Sɔlɔmɔn bin de rul na Izrɛl, Gɔd in pipul dɛn bin de ɛnjɔy spɛshal pis ɛn dɛn bin gɛt bɔku prɔpati na di land we “fayn fɔ plant ɛn mɛn animal dɛn.” Gɔd bin dɔn tɔk se if dɛn kɔntinyu fɔ “obe di lɔ dɛn . . . dɛn go gɛt kolat ɛn dɛn go go lidɔm slip ɛn nɔ gɛt natin fɔ wɔri bɔt.” (Lɛv. 20:​24; 26:​3, 6) Dɛn prɔmis dɛn de bin kam tru di tɛm we Sɔlɔmɔn bin de rul. (1 Kro. 22:​9; 29:​26-28) Ɛn Jiova bin prɔmis se dɛn nɔ go “fɛn” wikɛd pipul dɛn we bin de wɔship ɔda gɔd dɛn igen. (Sam 37:​10) So, di wɔd dɛn we de na Sam 37:​10, 11, 29 bin kam tru trade ɛn dɛn go kam tru bak tumara bambay.

 9. Wetin di kwin na Shiba bin se bɔt di rul we Kiŋ Sɔlɔmɔn bin de rul?

⁹ Di kwin na Shiba bin yɛri bɔt di pis ɛn jɛntri we di Izrɛlayt dɛn neshɔn bin gɛt di tɛm we Sɔlɔmɔn bin de rul. I bin kɔmɔt fa fa say fɔ travul go na Jerusɛlɛm fɔ go si wetin de apin fɔ insɛf. (1 Kiŋ 10:​1) Afta i dɔn tek tɛm luk Sɔlɔmɔn in kiŋdɔm, i tɔk se: ‘Ɔl wetin a yɛri nɔ du sɛf. . . . Yu ɔfisa dɛn ɛn wokman dɛn ɔl go de gladi fɔ sidɔm wit yu fɔ de yɛri wetin de kɔmɔt na yu mɔt!’ (1 Kiŋ 10:​6-8) Bɔt di tin dɛn we bin de apin di tɛm we Sɔlɔmɔn bin de rul na jɔs ɛgzampul bɔt wetin Jiova go du fɔ mɔtalman di tɛm we In Pikin Jizɔs go de rul.

10. Us we dɛn Jizɔs gret pas Sɔlɔmɔn?

¹⁰ Jizɔs gret pas Sɔlɔmɔn ɔlsay. Sɔlɔmɔn nɔ bin pafɛkt ɛn i bin mek siriɔs mistek dɛn we bin kam wit prɔblɛm pan Gɔd in pipul dɛn. Bɔt, Jizɔs na rula we pafɛkt we nɔ de mek wan mistek. (Lyuk 1:​32; Ibru. 4:​14, 15) Jizɔs bin kɔntinyu fɔ fetful to Gɔd pan ɔl we i bin de gɛt tɛst dɛn we nɔ rili izi frɔm Setan. Krays dɔn pruv se i nɔ go ɛva sin ɔ du ɛnitin we go ambɔg di wan dɛn we i de rul we kɔntinyu fɔ de biɛn am. In na di bɛst Kiŋ we wi go ɛva gɛt.

11. Udat dɛn go ɛp Jizɔs fɔ rul?

¹¹ Jizɔs go gɛt 144,000 pipul dɛn we go rul wit am fɔ ɛp fɔ kia fɔ mɔtalman ɛn fɔ du wetin Jiova want fɔ di wɔl. (Rɛv. 14:​1-3) Dɛn pipul dɛn ya bin dɔn gɛt bɔku tɛst dɛn ɛn bia bɔku prɔblɛm dɛn we dɛn bin de na di wɔl, so dɛn go ɔndastand wetin de apin to di wan dɛn we de na di wɔl. Us patikyula tin dɛn pipul dɛn ya we go rul wit Jizɔs go du?

12. Us wok Jiova go gi di 144,000 fɔ du?

¹² Jizɔs ɛn di wan dɛn we go rul wit am gɛt bɔku wok fɔ du we pas di wok we Sɔlɔmɔn bin gɛt. Kiŋ Sɔlɔmɔn bin gɛt fɔ kia fɔ bɔku pipul dɛn insay jɔs wan neshɔn. Bɔt, di wan dɛn we go rul na Gɔd in Kiŋdɔm go ɛp fɔ kia fɔ bɔku bɔku pipul dɛn we de ɔlsay na di wɔl. Fɔ tru, na big big ɔnɔ Jiova dɔn gi di 144,000 we go rul wit Jizɔs!

13. Us spɛshal wok di wan dɛn we go rul wit Jizɔs gɛt?

¹³ Jɔs lɛk Jizɔs, di 144,000 go bi kiŋ ɛn prist dɛn. (Rɛv. 5:​10) Ɔnda di Lɔ we Gɔd bin gi Mozis, di prist dɛn men wok na bin fɔ protɛkt di pipul dɛn wɛlbɔdi ɛn fɔ mek shɔ se dɛn ɛp di pipul dɛn fɔ kɔntinyu fɔ de nia Jiova. Di Lɔ na bin “shado fɔ di gud tin dɛn we gɛt fɔ kam,” so i mek sɛns fɔ biliv se di wan dɛn we go ɛp Jizɔs fɔ rul go ɛp Gɔd in pipul dɛn fɔ kɔntinyu fɔ gɛt wɛlbɔdi ɛn de nia Jiova. (Ibru. 10:​1) Wi nɔ no aw dɛn kiŋ ɛn prist dɛn ya go de tɔk to di wan dɛn we dɛn go rul na di wɔl. Ilɛk wetin Jiova go arenj, wi gɛt kɔnfidɛns se insay Paradays, di wan dɛn we de na di wɔl go gɛt di protɛkshɔn we dɛn nid.—Rɛv. 21:​3, 4.

14. Aw di “ɔda ship dɛn” ɛn di “ship dɛn we nɔ bɔku” gɛt wanwɔd?

¹⁴ Jizɔs bin kɔl di wan dɛn we go rul wit am “ship dɛn we nɔ bɔku.” (Lyuk 12:​32) I bin tɔk bɔt wan ɔda grup bak we i kɔl “ɔda ship dɛn.” Dɛn tu grup ya na wan ɛn dɛn gɛt wanwɔd. (Jɔn 10:​16) Ɔl di wan dɛn we de na dɛn grup dɛn ya ɔlrɛdi de wok togɛda, ɛn dɛn go kɔntinyu fɔ wok togɛda we di wɔl go dɔn bi Paradays. As wi no, bay da tɛm de, di wan dɛn we na di “ship dɛn we nɔ bɔku” go dɔn go na ɛvin ɛn di wan dɛn we na di “ɔda ship dɛn” go gɛt di op fɔ ɛnjɔy layf na dis wɔl sote go. Bɔt tin dɛn de we di “ɔda ship dɛn” go nid fɔ du naw fɔ mek dɛn go kwalifay fɔ de na Paradays.

15. (a) Aw di “ɔda ship dɛn” de wok wit Krays in brɔda dɛn? (b) Aw yu go falamakata di brɔda we de na di famesi in ɛgzampul? (Luk di pikchɔ.)

¹⁵ Di kriminal we ripɛnt bin day bifo i gɛt di chans fɔ pruv se i gladi fɔ wetin Krays du fɔ am. Bɔt, wi we na di “ɔda ship dɛn” gɛt bɔku chans rayt naw fɔ sho aw wi de fil bɔt Jizɔs. Fɔ ɛgzampul, wi go sho se wi lɛk am bay aw wi de trit in brɔda dɛn we Gɔd dɔn anɔynt wit oli spirit. Jizɔs bin tɔk se i go jɔj di wan dɛn we na ship dɛn akɔdin to aw dɛn trit in brɔda dɛn. (Mat. 25:​31-40) Wi go sɔpɔt Krays in brɔda dɛn bay we wi de ɛp dɛn fɔ du di prichin wok wit zil ɛn mek disaypul dɛn. (Mat. 28:​18-20) Na dat mek wi want fɔ yuz di tin dɛn we dɛn de gi wi fɔ ɛp wi fɔ stɔdi di Baybul, lɛk di buk we gɛt di taytul Ɛnjɔy Layf Sote Go! If yu nɔ ebul fɔ kɔndɔkt Baybul stɔdi wit pɔsin yet, na fɔ mek am yu gol fɔ aks bɔku pipul dɛn if dɛn go want fɔ stɔdi di Baybul.

16. Wetin wi go du naw fɔ rɛdi fɔ de na Gɔd in Kiŋdɔm?

¹⁶ Wi nɔ nid fɔ wet te wi de na Paradays bifo wi bi di kayn pɔsin we Jiova want fɔ de de. Rayt naw, wi kin tray fɔ bi pipul dɛn we ɔnɛs bay wetin wi de tɔk ɛn du ɛn nɔ du ɛnitin pasmak. Ɛn wi kin kɔntinyu fɔ de biɛn Jiova, wi man ɔ wɛf, ɛn wi kɔmpin Kristian dɛn. If wi obe Jiova naw insay dis wikɛd wɔl, i go izi fɔ mek wi obe am na Paradays. Wi kin tray bak fɔ sabi du tin dɛn ɛn gɛt abit dɛn fɔ sho se wi rɛdi fɔ de de. Rid di atikul we gɛt di tayul “Yu Rɛdi fɔ ‘Gɛt di Wɔl’?” we de na dis Wachtawa.

17. Yu tink se wi fɔ alaw wi at fɔ pwɛl bad bad wan bikɔs ɔf di sin dɛn we wi bin dɔn kɔmit trade? Ɛksplen.

¹⁷ Wi fɔ tray bak fɔ stɔp fɔ fil gilti bikɔs ɔf di siriɔs sin dɛn we wi bin kɔmit trade. As wi no, wi nɔ go ɛva tek di day we Jizɔs bin day as ɛkskyuz fɔ “mek am abit fɔ de sin bay wilful wan.” (Ibru. 10:​26-31) Bɔt wi gɛt kɔnfidɛns se if wi dɔn rili ripɛnt fɔ di siriɔs sin we wi bin dɔn kɔmit, wi dɔn aks Jiova ɛn di ɛlda dɛn fɔ ɛp wi, ɛn wi dɔn chenj di we aw wi de biev, i dɔn fɔgiv wi fɔ ɔl wi sin dɛn. (Ayz. 55:​7; Akt 3:​19) Mɛmba Jizɔs in wɔd dɛn to di Faresi dɛn. I bin se: “A nɔ kam fɔ kɔl pipul dɛn we de du wetin rayt, a kam fɔ kɔl sina dɛn.” (Mat. 9:​13) Jizɔs in sakrifays gɛt pawa fɔ kɔba ɔl wi sin dɛn.

18. Wetin yu go lɛk fɔ tɔk bɔt to di kriminal we bin day nia Jizɔs?

¹⁸ Yu ebul fɔ imajin yusɛf na Paradays de tɔk wit di kriminal we Jizɔs bin tɔk to? Wan dawt nɔ de se una ɔl tu go tɔk bɔt aw una gladi fɔ Jizɔs in sakrifays. Sɔntɛm yu go aks am fɔ tɛl yu mɔ bɔt wetin bin apin insay di shɔt tɛm we bin dɔn lɛf fɔ lɛ Jizɔs day ɛn aw i bin fil we Jizɔs bin ansa am fɔ wetin i bin aks fɔ. Dɔn, sɔntɛm i go aks yu aw i bin tan lɛk fɔ de insay di las dez na Setan in wikɛd wɔl. I go bi big big ɔnɔ fɔ stɔdi Gɔd in Wɔd wit dɛn kayn pipul dɛn de!—Ɛfi. 4:​22-24.

19. Wetin mek wi go ɛnjɔy fɔ de na Paradays? (Luk di pikchɔ na di frɔnt pej.)

¹⁹ Wi go ɛnjɔy fɔ de na Paradays. Wi go mit wit gud pipul dɛn ɔltɛm ɛn du wok dɛn we go bɛnifit wi. Di tin we pas ɔl na dat, ɛvride, wi go ebul fɔ sabi wi Papa we de na ɛvin mɔ ɛn mɔ ɛn ɛnjɔy wetin i dɔn gi wi. Wi go gɛt bɔku tin dɛn ɔltɛm fɔ lan bɔt am, ɛn wi go gɛt bɔku tin dɛn fɔ lan bɔt di tin dɛn we i mek. Di mɔ wi kɔntinyu fɔ de na Paradays, na di mɔ wi go lɛk Gɔd. Wi rili gladi fɔ di prɔmis we Jiova ɛn Jizɔs dɔn gi wi fɔ de sote go na Paradays!