Wantete wa Ntinu

11 Kansi, Solomo wa Ntinu wazolanga akento ayingi a nzenza+ kumosi yo mwan’ankento a Faro:+ Akento a esi Moabe,+ esi Amone,+ esi Edome, esi Sidone+ yo Anekete.+ 2 Akento a esi zula ina Yave kavovesa Aneyisaele vo: “Ke nusangana yau ko,* oyau mpe ke basangani yeno ko, kadi bebendomona ntima mieno muna sadila nzambi zau.”+ Kansi Solomo i yau katatamena yo kubazola. 3 Wakala ye 700 z’akento akwa tunda ye 300 za makangu, akento andi malembe-malembe bamvilula o ntima.* 4 Solomo vava kanuna,+ akento andi bamvilwidi ntima kalanda nzambi zankaka,+ ntim’andi ke wasikila ko muna Yave wa Nzambi andi nze ntim’a Davidi wa se diandi. 5 Solomo wele landi Asetorete+ wa nzambi ankento a Sidone yo Milekome+ wa nzambi a ngemi a Aneyamone. 6 Solomo wavanga mambu mambi vana meso ma Yave, kalanda mvimba Yave ko nze una Davidi wa se diandi kavanga.+

7 I bosi Solomo otungidi e bata+ vana mongo mu kuma kia Kemose wa nzambi a ngemi a Moabe, e bata diankaka mu kuma kia Moleke+ wa nzambi a ngemi a Aneyamone+ vana mongo utalanene ye Yerusaleme. 8 I una kavanga mu kuma kia akazi andi awonso a nzenza ana bayokanga ndumbu yo kelela nzambi zau yimenga.

9 Yave ofungidi Solomo makasi wau vo ntim’andi uvengomokene muna Yave wa Nzambi a Isaele+ ona wamoneka kwa yandi nkumbu miole+ 10 yo kunlukisa muna diambu diadi, i sia vo, kalandi nzambi zankaka ko.+ Kansi, Solomo kalemvokela nkanikinu a Yave ko. 11 Yave ovovese Solomo vo: “Wau vo ovangidi diambu diadi yo lembi lunda e kangu diame ye nzengo zame yakanikina, katula ikatula kintinu vana moko maku yo vana kio kwa mosi muna selo yaku.+ 12 Kansi, muna kuma kia Davidi wa se diaku, kivanga wo muna lumbu yaku ko. Va moko ma mwan’aku+ ikatulwila kio, 13 kikatula kintinu kiawonso ko.+ Mu kuma kia Davidi wa selo kiame ye Yerusaleme eyi yasola,+ kanda dimosi ivana kwa mwan’aku.”+

14 Yave obundumwinini Solomo mbeni,+ Kadadi wa musi Edome wa kanda dia kintinu kia Edome.+ 15 Davidi vava kabukumuna Edome,+ Yoabe wa mfumu a makesa watomboka kazika ana bavondwa yo vava fukisa emvimba wan’amakala awonso a Edome. 16 (Kadi Yoabe ye Isaele yawonso bakala vana fulu kiakina ngonde sambanu, yavana bavonda* wan’amakala awonso muna Edome.) 17 Kansi, Kadadi watina ye akaka muna selo ya se diandi, ana bakala ye Anedome, bayenda kuna Engipito; Kadadi kimwana-mwana kakala. 18 Muna diadi, bavaikidi muna Midiani yo lwaka kuna Parani. Babongele wantu muna Parani,+ balweke kuna Engipito kwa Faro wa ntinu a Engipito, ona wavana nzo kwa Kadadi, yo kunkayila madia ye ntoto. 19 Kadadi wamwenua e dienga vana meso ma Faro, umvene nleke a nkaz’andi, Takepenese wa ntinu ankento,* kakala se nkaz’andi. 20 Kuna kwalanda, o nleke a Takepenese owutidi Kadadi mwan’a yakala, Ngenubate, Takepenese untwese* muna nzo a Faro, Ngenubate osansukidi muna nzo a Faro kumosi yo wan’a Faro.

21 Tuka kuna Engipito, Kadadi owidi wo vo Davidi olele yo mase mandi,+ Yoabe mpe wa mfumu a makesa ofwidi.+ Muna kuma kiaki, Kadadi ovovese Faro vo: “Unsindika, yavutuka kuna nsi ame.” 22 Kansi, Faro umvutwidi vo: “Nki kikondele wau ozolele vutukila kuna nsi aku?” Ovutwidi vo: “Kikondelo lekwa ko. Dodokolo, unsindika kaka.”

23 Nzambi obundumwini diaka Solomo mbeni ankaka,+ Rezone wa mwan’a Eleyada ona watina mfumu andi Kadadeze+ wa ntinu a Soba. 24 Vava Davidi kavonda* esi Soba,+ Rezone wakutakesa buka kia wantu yo kituka se mfumu a asanzi. I bosi, bayenda kuna Damaseke,+ bakedi kûna yo yadila kuna Damaseke. 25 Rezone mbeni a Isaele kakala muna lumbu yawonso ya Solomo, vana ntandu a mpasi zina Kadadi katwasa, wamenga kikilu Isaele ekolo kayalanga muna Suria.

26 Yerobame+ wa mwan’a Nebate wa musi Eferaime a Sereda, wa ntaudi a Solomo,+ e nkumbu a ngudi andi Serua, nkento wafwilwa yakala. Oyandi mpe wayantika telamena* ntinu.+ 27 Ekiaki i kuma katelamena ntinu: Solomo watunga Kundubulu*+ yo londa yaka ya Mbanz’a Davidi wa se diandi.+ 28 Yerobame nkwa kikesa kakala. Vava Solomo kamona vo toko diadi nkwa fululu muna salu, untumbikidi kinkengi+ kia asadi awonso a nzo a Yosefe ana babokelwa muna salu yangolo. 29 Muna ntangwa yayina, Yerobame ovaikidi muna Yerusaleme, Akiya+ wa ngunza wa musi Silo, owanane yandi muna nzila. Akiya ovuete mvuatu ampa, yau awole kaka bakala muna kiana. 30 Akiya okatwidi mvuatu ampa una kavuata, otiazwini wo mu tini 12. 31 Ovovese Yerobame vo:

“Bonga tini kumi, kadi i wau wuwu kavovele o Yave wa Nzambi a Isaele: ‘Katula ikatula kintinu vana moko ma Solomo, ikuvana makanda kumi.+ 32 Kansi, kanda dimosi kesala diau+ mu kuma kia Davidi wa selo kiame+ ye Yerusaleme, mbanza ina yasola muna makanda mawonso ma Isaele.+ 33 Vanga ivanga wo, kadi bangiambwidi+ yo fukamena Asetorete wa nzambi ankento a esi Sidone ye Kemose wa nzambi a esi Moabe yo Milekome wa nzambi a Aneyamone. Ke badiatidi muna nzila zame ko ngatu vanga mambu mansongi vana meso mame yo lemvokela nzengo zame ye mfundisa zame wauna kavanga Davidi wa se diandi. 34 Kansi kikatula kintinu kiawonso ko vana moko mandi, ikunyambula kakala kaka se mfidi muna lumbu yawonso ya zingu kiandi, muna kuma kia Davidi wa selo kiame ona yasola,+ kadi walemvokela nkanikinu ye nzengo zame. 35 Kansi, katula ikatula kintinu vana moko ma mwan’andi yavana kio kwa ngeye, i sia vo, makanda kumi.+ 36 Kanda dimosi ivana kwa mwan’andi, kimana Davidi wa selo kiame kakala kaka ye mwinda vana ndose ame muna Yerusaleme,+ mbanza ina yasola yasia mo e nkumbu ame. 37 Ikubonga, wayala yawonso ozolele, wakala se ntinu muna Isaele. 38 Avo olemvokele mawonso ikanikini yo diatila muna nzila zame yo vanga mambu mansongi vana meso mame muna lemvokela nzengo zame ye nkanikinu miame, wauna Davidi wa selo kiame kavanga,+ mono mpe ikala yaku. Ikutungila nzo asikila wauna yatungila Davidi e nzo,+ ikuvana Isaele. 39 Ifusulwisa mbongo a Davidi e nsoni,+ kansi ke yakwele mvu ko.’”+

40 Muna diadi, Solomo ovavidi vonda Yerobame, kansi Yerobame otinini kuna Engipito kwa Sisaki+ wa ntinu a Engipito,+ okedi kûna yavana Solomo kafwa.

41 Vo i mambu mankaka ma lusansu lwa Solomo ye mawonso kavanga ye ngangu zandi nga ke zasonama ko mu nkand’a lusansu lwa Solomo e?+ 42 Mvu 40 i kolo* Solomo kayala muna Yerusaleme ye Isaele yawonso. 43 I bosi, Solomo olele yo mase mandi, banzikidi muna Mbanz’a Davidi wa se diandi; mwan’andi Rekabame+ oyantikidi yala vana fulu kiandi.