Zasoneka Matai

27 O kuma vava kwakia, nganga zambuta zawonso ye akuluntu a nkangu bavuandidi Yesu e mfulu kimana bamvonda.+ 2 Vava bankangidi, bele kunyekola kwa Pilato wa nguvulu.+

3 I bosi, o Yuda ona wanyekola vava kamwene vo Yesu ozengelo tumbu kia lufwa, uyibenze, wele vutula e sekele 30 za palata kwa nganga zambuta ye akuluntu,+ 4 ovovele vo: “Nsumukini wau ngiekwele menga makondwa-kuma.” Bavutwidi vo: “Ke diambu dieto ko. Matadidi kwaku!” 5 Otubidi e sekele za palata muna tempelo, ovaikidi. I bosi, wele kuyizembeleka.+ 6 Kansi e nganga zambuta babongele sekele za palata, bavovele vo: “Ke diansongi ko mu sia zo muna lundilu diavauka dia tusalu, kadi nzimbu za menga.” 7 Vava bavuende mfulu, basumbidi zo mpatu a nwumbi, yazikila anzenza. 8 Ikuma e mpatu yayina iyikilwanga vo Mpatu a Menga+ yamu unu. 9 I bosi, dialungana dina diavovua muna Yeremiya wa ngunza vo: “Babongele sekele 30 za palata, i ntalu ina kazengelwa kuna kwa ankaka muna wan’a Isaele, 10 bavene zo muna mpatu a nwumbi yazikila anzenza nze una Yave kankanikina.”+

11 Yesu otelamene vana ndose a nguvulu; o nguvulu unyuvuidi vo: “Ongeye i Ntinu a Ayuda e?” Yesu umvutwidi vo: “Ngeye kibeni ovovele wo.”+ 12 Kansi, ekolo nganga zambuta ye akuluntu bamfundanga, kasidi vutula diambu ko.+ 13 I bosi Pilato umvovese vo: “Nga kuwidi ko ulolo wa mambu bekusilanga kimbangi e?” 14 Kamvutwidi kana nkutu diambu dimosi ko, o nguvulu osivikidi kikilu.

15 Muna konso nkinzi a nduta, o nguvulu wakala ye fu kia yambula mbakami mosi, konso ona nkangu bazolele.+ 16 Muna ntangwa yayina, muna pelezo mwakala kimpumbulu kimosi kiatoma zayakana, nkumbu andi Baraba. 17 Dianu vo, una balungalakene, Pilato ubavovese vo: “Nani nuzolele yanuyambulwila, Baraba yovo Yesu ona oyikilwanga vo Kristu?” 18 Kadi Pilato wazaya wo vo mu kuma kia kimpala banyekolwele. 19 Ekolo kavuende vana kunda kia lufundisu, o nkaz’andi untwikidi e nsangu, oku vo: “Kuvangi diambu ko kwa muntu ndioyo wansongi, kadi mpasi zayingi mbwene o unu muna ndozi mu kuma kiandi.” 20 Kansi, e nganga zambuta ye akuluntu balebele nkangu balomba Baraba,+ vo i Yesu kavondwa.+ 21 O nguvulu ubavutwidi vo: “Nani vana vena yau awole nuzolele vo yanuyambulwila?” Bamvutwidi vo: “Baraba.” 22 Pilato ubavovese vo: “Ozevo, adieyi mfwete vanga kwa Yesu oyikilwanga vo Kristu?” Yau awonso bavovele vo: “Kamanikwa vana nti!”*+ 23 Ovovele vo: “Ekuma? Nkia diambu diambi kavangidi?” Bakazidi diaka, oku vo: “Kamanikwa vana nti!”+

24 Pilato wau kamwene vo kena y’edi kavanga ko, e mvuanga mu wokela kaka zina, obongele maza, osukwidi moko mandi vana ndose a nkangu, oku vo: “I munkondwa-kuma muna menga ma muntu ndioyo. Manutadidi kweno.” 25 Nkangu wawonso uvutwidi vo: “Yambula o menga mandi makala vana ntu mieto ye vana ntu mia wan’eto.”+ 26 I bosi ubayambulwidi Baraba, kansi otumini vo Yesu kazwabulwa,+ unyekwele kavondelwa vana nti.+

27 Makesa ma nguvulu babakidi Yesu bele yandi muna lûmbu lwa nguvulu, makesa mawonso makutakene vana kena.+ 28 Bavudidi e mvuatu miandi, bamvuikidi nzak’ambwaki,+ 29 bavangidi e mpu* a nsende, bamvuikidi yo vana ntu, basidi e tutu vana koko kwandi kwalunene. Bamfukamene, bansakanene, oku vo: “Kiambote kiaku, e Ntinu a Ayuda!” 30 Bantaulwidi mete,+ babongele e tutu, banwende dio vana ntu. 31 Vava bamene kunsakanena, bamvudidi e nzak’ambwaki, bamvuikidi e mvuatu miandi, bele kunkoma vana nti.+

32 Ekolo bekwendanga, bawananene yo musi Kurene, nkumbu andi Simone. Bankomekene kanata o nti ampasi* a Yesu.+ 33 Vava balweke vana fulu kiyikilwanga vo Ngolongota, i sia vo, Ku-valanganza kia ntu,+ 34 bamvene vinyu yasangwa ye mbilubisu* kanua;+ kansi vava kayelekele yo, kazolele yo nua ko. 35 Vava bamene kunkoma vana nti, bakayanene mvuatu miandi, batelele mio nkas’a mienze,+ 36 bafongele vavana, banlangididi. 37 Basidi mpe e baya vana ntandu a ntu andi diasonama o mfundu andi vo: “Ondioyu i Yesu wa Ntinu a Ayuda.”+

38 I bosi, bamanikini mivi miole vana nti, vana ndambu andi, mosi kuna lunene, wankaka kuna lumonso.+ 39 Awana baviokelenge bantiangwini+ yo nikuna e ntu,+ 40 oku vo: “Ongeye wadi bangula tempelo yo tungulula yo mu lumbu tatu,+ ukivuluza! Avo u mwan’a Nzambi, kulumuka ova nti ampasi!”*+ 41 Diau dimosi mpe, nganga zambuta, asoneki ye akuluntu bayantikidi kunsakanena, oku vo:+ 42 “Wavuluza akaka; yandi kibeni kelenda kuyivuluza ko! Yandi i Ntinu a Isaele;+ yambula kakulumuka vana nti ampasi,* tukwikila muna yandi. 43 Nzambi kasidi e vuvu; yambula kamvuluza owau, avo zola kekunzolanga,+ kadi ovovele vo: ‘Mono i Mwan’a Nzambi.’”+ 44 Diau dimosi mpe, e mivi ana bakedi vana nti, vana ndambu andi, bayantikidi kuntumba.+

45 Tuka muna ola ina yasambanu,* e tombe kibukamene muna nsi yawonso yamuna ola yavua.*+ 46 Muna tezo kia ola ina yavua,* Yesu obokele muna nding’angolo, oku vo: “Eli, Eli, lama sabaktani?” i sia vo, “E Nzambi ame, e Nzambi ame, ekuma ungiambulwidi?”+ 47 Ankaka muna awana batelamene vavana, vava bawidi wo, bavovele vo: “Eliya kabokele.”+ 48 Vana vau, mosi muna yau wele ntinu, obongele e vusu, ovungidi dio muna vinyu ya ngani, osomekene dio vana ntu a tutu, umvene dio kanua.+ 49 Kansi, ankaka bavovele vo: “Yambula twatala kana vo Eliya okwiza kumvuluza.” 50 Yesu obokele diaka muna nding’angolo, ofwidi.*+

51 E rido a nzo avauka+ itiazukini vana kati,+ tuka kuna ntandu yakuna yanda,+ o ntoto uzakamene, e nsenzele mivasukini. 52 E ziami* iziukidi, mavimbu mayingi m’avauki ana baleka muna lufwa, mavaikidi, 53 (wantu bavaikidi muna ziami vava Yesu kafulukidi, bakotele muna mbanza avauka), mamonekene kwa wantu ayingi. 54 Kansi, o mfidi a makesa ye awana balangididinge Yesu vava bamwene nzakam’a ntoto ye mambu mavangamene, bamwene wonga wayingi, bavovele vo: “Kieleka, o ndioyu i Mwan’a Nzambi.”+

55 Vakedi mpe akento bakedi kwandá, batadidinge. Akento awaya balanda Yesu tuka kuna Ngalili muna kunsadila;+ 56 ankaka vana bena i Maria Mandala yo Maria wa ngudi a Yakobo yo Yose, yo nkaz’a Zebedayo.*+

57 Kuna masika,* vezidi mvuama mosi wa musi Arimataya, nkumbu andi Yosefe, oyandi mpe nlongoki a Yesu kakala.+ 58 Muntu ndioyo wele kwa Pilato, olombele vimbu dia Yesu.+ Pilato okanikini vo diavewa kwa yandi.+ 59 Yosefe obongele e vimbu, ozingidi dio vana nlele a lino,+ 60 osidi dio muna ziami kiandi* kiampa,+ kina kazokesa vana nsenzele. Onengomwene tadi diampwena vana mwelo a ziami,* wele kwandi. 61 Kansi, Maria Mandala ye Maria wankaka bakedi kaka vana, bavuende vana ntwal’a ziami.+

62 Muna lumbu kialanda, kina kia Nkubama,+ e nganga zambuta ye Afarisi bakutakene vana ndose a Pilato, 63 bavovele vo: “E Mfumu, tusungamene vo, o nkwa luvunu ndioyo vava kakala o moyo wavovanga vo: ‘E lumbu kina kiatatu se yafulwa.’+ 64 Dianu vo, kanikina vo e ziami kialangidilwa yamuna lumbu kina kiatatu, kimana alongoki andi balembi kwiza kunyiya+ yo vova kwa nkangu vo: ‘Ofulukidi muna mafwa!’ Ozevo, o luvunu lwalu luvioka o bi ke mu luna lwantete ko.” 65 Pilato ubavovese vo: “Nuvuidi ayingidi. Nuenda, nuvanga mawonso nulenda mu yingila kio.” 66 Bele, batomene zika e ziami yo sia dimbu muna tadi ye ayingidi.