Bakivana Kuna Mvevo mu Kwenda Sadila kuna Equador

MPANGI mosi wa nleke oyikilwanga mu nkumbu a Bruno kuna Itália wazola baka nzengo zamfunu. Wau vo ngangu zayingi kakala zau, vava kafokola tanga sikola zasina, e yitu y’alongi andi bankasakesa vo kakota sikola zanda. Ke kolo kiayingi ko vava kavubwa, Bruno wasia nsilu kwa Yave vo osia salu kia Nzambi va fulu kiantete muna zingu kiandi. Nkia nzengo kabaka? Wavova vo: “Yasamba kwa Yave vo isinga zingila ngwizani yo kuyiyekola kwama yo kunsia va fulu kiantete. Kansi, yavova diaka muna sambu vo nzolele kala ye zingu kia kiese muna sadila Yave e salu ya mpila mu mpila.”

Mvu miakete kaka miavioka, Bruno wayenda kuna Equador kuna América ya Sude. Wavova vo: “Yave wavana mvutu za sambu yame lutila una yavingilanga.” Vava kalwaka kuna Equador wasivika kikilu, kadi wawanana mpe y’aleke ayingi batuka mu nsi zakaka ana bayenda ko muna wokesa e salu kia Yave.

ALEKE ANA ‘BETONTANGA YAVE’

Nze una uvanganga aleke ayingi mu nza yawonso, Bruno, watambulwila mbok’a Yave vo: “Nuntontela muna diadi, . . . ovo ndembi kunuziulwila zianela z’ezulu, yanuvongwela nsambu, yavana ke vekal’ova vafwana zo ko.” (Mal. 3:10) Muna kuma kia zola kwau muna Nzambi, ‘betontanga Yave’ muna sadila ntangwa, ngolo ye mavwa mau kuna mvevo yo kwenda sadila muna zunga ivwidi ateleki ayingi a Kintinu o mfunu.

Vava belwakanga muna zunga yampa, asadi awaya a mvevo bebakulanga vana vau vo “o nsâlu wayingi, kansi nsadi mike.” (Mat. 9:37) Kasikil’owu, Jaqueline watuka kuna Alemanha wasonekena ampangi kuna vula dia Equador vo: “Tezo kia mvu miole se ngina oku Equador, wantu 13 ilongokanga yau Nkand’a Nzambi, 4 muna yau bekwendanga muna tukutakanu ntangwa zawonso. Ediadi diasivi kikilu.” Chantal watuka kuna Canadá wavova vo: “Muna mvu a 2008 yayaluka kuna nlambu a mbu wa Equador kwakala nkutakani mosi kaka. Owau nkutakani tatu zina ko ye vioka aviti a nzila 30 besadilanga muna zunga kiaki. Ekwe kiese mu mona alongoki ayingi ampa benungunukanga!” Wakudikila diaka vo: “Ke kolo ko yayalukidi kuna mbanza mosi ina tezo kia 2743 ma meta vana ntandu a Miongo mia Andes. Vioka 75.000 ma wantu bena mu mbanza yayi kansi, nkutakani imosi kaka ina mo. Wantu betoma yangalelanga e nsangu zambote. Itoma yangalelanga e salu kiame kia umbangi.”

MPASI ZA YALUKA MUNA NSI ZAKAKA

Dialudi, ke diasazu ko mu kwenda sadila muna nsi za kinzenza. Kansi, aleke akaka bemonanga mpasi zazi una ke bayalukidi ko. Kayla watuka kuna Estados Unidos wavova vo: “Ampangi zakaka y’ekani diambote bampovesa mambu mangyoyesa. Ke babakula ko e kuma yabakila nzengo za kwenda sala salu kia kimviti a nzila muna nsi a kinzenza. Ezak’e ntangwa, diamfilanga mu kiyuvula vo: ‘Nga nzengo zambote kikilu nzolele baka?’” Kana una vo i wau, Kayla wayaluka. Wavova vo: “O samba kwa Yave yo mokena ye mpangi zazikuka muna mwanda, diansadisa mu bakula vo Yave akwa ntima mvevo kesambulanga.”

Kuna kw’akaka, diampasi kikilu mu longoka ndinga akaka. Siobhan watuka kuna nsi a irlanda wavova vo: “Diampasi diakala muna vova konso diambu. Yakala yo luzindalalu ye fululu kia longoka ndinga, yo kuyiseva vava yavanganga vilwa.” Anna watuka kuna Estônia wavova vo: “O longoka e ndinga Espanhol diasunda e mpasi ke mu mbangazi, mbundukutu ye kondwa maza ma tiya ko. E zak’e ntangwa yakalanga ye ngindu za vutuka kuna nsi ame. Kansi yasia e sungididi muna lunungunuku lwame ke mu vilwa wame ko.”

Diampasi mpe dikalanga mu sisa yitu y’akundi. Jonathan watuka kuna Estados Unidos wavova vo: “Vava yalwaka yakendalala kikilu mu kuma kia vambana ye yitu y’akundi ame. Kansi, elongi dia mono kibeni dia Nkand’a Nzambi ye salu kia umbangi kiansadisa mu sunda e viangi. Kuna kwakwiziwa, mambu ma kiese yamona muna salu kiame ye akundi ampa muna nkutakani, bansadisa mu vutukila e kiese kiame.”

E mpasi za zingu i diambu diakaka ditwasanga nkakalakani. E zingu kilenda swaswana ye nsi ina otukidi. Beau watuka kuna Canadá wavova vo: “Muna nsi aku wawutukila nanga e kura yo maza ke mekondwanga ko. Kansi, okwaku diampasi muna kala ye kura yo maza.” Usukami, kondwa kwa makalu mambote yo wantu ke bazeye tanga ko i mambu makaka metoma monekanga muna nsi za usukami. Ines watuka kuna Áustria, muna zizidila mpasi zazi osiang’e sungididi muna fu yambote besonganga wantu muna nsi yayi. Wavova vo: “Esi Equador azodi a nzenza, akwa ngemba ye alembami. Edi disundidi o mfunu, bavwidi etima dia zaya mayingi mu kuma kia Nzambi.”

NSAMBU ZA KONDWA TEZO

Wau vo aleke awaya awonso muna kwenda sadila kuna Equador mambu mayingi mambote babembola, bemonanga vo mana Yave kekubavananga ‘malutidi’ mana bayindulanga. (Ef. 3:20) Dialudi, bemonanga vo e nsambu bevwanga zakondwa tezo. (Mal. 3:10) Tala mana bavova mu kuma kia salu kiau:

Bruno: “Yayantika e salu kiame kwaku Equador muna zunga kia Amazônia. I bosi, yayenda sadisa vava kiavongeswa e vula dia Equador. Owau ku Betele isadilanga. Vava yakala kuna Itália, yabaka nzengo za sia salu kia Yave va fulu kiantete. Dialudi, Yave olungisanga luzolo lwame lwakala ye zingu kia kiese ye kunsadila salu ya mpila mu mpila.”

Beau: “Ekolo isadilanga ntangw’ame yawonso muna salu ya mwanda kwaku Equador, e ngwizani ame yo Yave yitoma kumamanga. Ivwanga mpe nsambu za lungisa ekani diame dia kangala mu fulu yambote.”

Anna: “Wau vo i mpumpa, yayindulanga vo kilendi zinga ko nze misionario. Kansi owau imonanga vo ndenda kwame. Ivutulanga matondo muna nsambu za Yave, ngina ye kiese kia longa wantu, tunga Maseka ma Kintinu yo vanga yikundi yampa.”

Elke: “Vava yakala kuna Áustria nkumbu miayingi yalombanga kwa Yave kimana kansadisa yayantika longoka Nkand’a Nzambi, kana nkutu yo muntu mosi. Okwaku, wantu 15 ilongokanga yau Nkand’a Nzambi. E kiese bemonanga alongoki ana benungunukanga kiwokesanga luyangalalu lwame.”

Joel: “Diambu diampwena kikilu muna sadila Yave mu nsi za kinzenza. Oyantika bunda e vuvu muna Yave yo vingila vo kasambula e salu kiaku. Ateleki 6 bakala muna buka yalwakila vava yatuka kuna Estados Unidos, vioka mvu mosi o lutangu lw’ateleki lwawokela mu 21. Wantu 110 twakala muna luyindulu.”

ADIEYI TUVOVA MU KUMA KIAKU?

E mpangi za matoko ye ndumba, nga mpila zingu kieno kilenda kunuvana elau dia kwenda sadila muna nsi yovo zunga yivwidi ateleki ayingi a Kintinu o mfunu? Kansi, ofwete toma kubama muna baka nzengo zazi zampwena. Vana ntandu, muna baka nzengo za yaluka divavanga vo wakala yo zola kwasikila muna Yave yo wantu. Avo una yo zola kwaku yo mona vo wafwana kwenda sadila mu nsi yakaka, sambanga kwa Yave. I bosi, mokena yo mase maku m’Akristu y’akuluntu muna nkutakani mu kuma kia diambu diadi. Ngeye mpe olenda bakula vo olenda sadila Yave mu mpila yayi yakiese.

[Mvovo mia Sina muna lukaya lwa 3]

“O samba kwa Yave yo mokena ye mpangi zazikuka muna mwanda diansadisa mu bakula vo Yave akwa ntima mvevo kesambulanga.” —Kayla watuka kuna Estados Unidos

[Babu/​Foto ina muna lukaya lwa 6]

Una lenda kubamena mu kwenda sadila muna nsi a kinzenza

• Kalanga y’elongi dia ngeye kibeni dia Nkand’a Nzambi

• Fimpulula Salu Kieto kia Kintinu kia Agositu 2011 lukaya lwa 4-6

• Mokena y’awana basadila kala muna nsi a kinzenza

• Vava zaya lusansu ye fu ya nsi ina ozolele kwenda

• Longoka e ndinga ivovwanga kuna ozolele kwenda

[Babu/​Foto ina muna lukaya lwa 6]

Akaka bayaluka muna nsi za kinzenza bekuyidikilanga muna . . .

• vutuka muna nsi zau konso mvu mu kwenda sala ngonde zakete

• sia nzo zau yovo mavula ma tekela lekwa mu mfutila

• sadila muna Internet

[Mafoto zina muna lukaya lwa 4]

1 Jaqueline watuka kuna Alemanha

2 Bruno watuka kuna Itália

3 Beau watuka kuna Canadá

4 Siobhan watuka kuna Irlanda

5 Joel watuka kuna Estados Unidos

6 Jonathan watuka kuna Estados Unidos

7 Anna watuka kuna Estônia

8 Elke watuka kuna Áustria

9 Chantal watuka kuna Canadá

10 Ines watuka kuna Áustria