Mokanda ya liboso ya Samwele

12 Nsukansuka Samwele alobaki na Yisraele mobimba boye: “Talá, nasali makambo nyonso* oyo bosɛngaki ngai, mpe natyeli bino mokonzi mpo ayangela bino.+ 2 Sikoyo, bótala: mokonzi oyo akokamba* bino, ye oyo!+ Ngai nakómi mobange mpe na nsuki mpɛmbɛ, bana na ngai ya mibali bazali awa elongo na bino;+ mpe nakambi bino banda bolenge na ngai tii na mokolo ya lelo.+ 3 Ngai oyo. Soki bozwaki ngai na likambo, bófunda ngai liboso ya Yehova mpe liboso ya moto na ye oyo atyami mafuta.+ Nabɔtɔlaki ngɔmbɛ to mpunda ya nani?+ Nabubaki to nanyɔkɔlaki nani? Nandimaki kozwa kanyaka epai ya nani mpo nakanga miso na mabe na ye?+ Soki nasalaki bongo, bóloba nazongisela bino yango.”+ 4 Na yango balobaki: “Obubá biso te, onyokolá biso te, mpe ondimá kozwa kanyaka epai ya moto moko te.” 5 Bongo alobaki na bango boye: “Yehova azali motatoli liboso na bino, mpe moto na ye oyo atyami mafuta azali motatoli lelo oyo, ete bomoni ata likambo moko te oyo bokoki kofunda ngai na yango.”* Bongo balobaki: “Azali motatoli.”

6 Bongo Samwele alobaki na bato: “Yehova oyo asalelaki Moize ná Arona mpe oyo abimisaki bankɔkɔ na bino na mokili ya Ezipito,+ azali motatoli. 7 Sikoyo bóya mpe bótɛlɛma liboso na ngai, mpe nakosambisa bino liboso ya Yehova na kotalela misala nyonso ya bosembo oyo Yehova asaleli bino mpe bankɔkɔ na bino.

8 “Ntango Yakobo akómaki na Ezipito+ mpe bankɔkɔ na bino bakómaki kobelela Yehova mpo na kosɛnga lisalisi,+ Yehova atindaki Moize+ ná Arona mpo na kokamba bankɔkɔ na bino mpe kobimisa bango na Ezipito, mpe kofandisa bango na esika oyo.+ 9 Kasi babosanaki Yehova Nzambe na bango, yango wana, atɛkaki bango+ na lobɔkɔ ya Sisera,+ mokonzi ya limpinga ya Hazore mpe na lobɔkɔ ya Bafilistia+ mpe na lobɔkɔ ya mokonzi ya Moabe,+ mpe babundisaki bango. 10 Bongo babelelaki Yehova mpo na kosɛnga lisalisi+ mpe balobaki: ‘Tosali lisumu,+ mpo totiki Yehova mpo na kosalela Babaala+ mpe bikeko ya Ashitorete;+ sikoyo bikisá biso na lobɔkɔ ya banguna na biso mpo tósalela yo.’ 11 Na yango, Yehova atindaki Yerubaala,+ mpe Bedane, mpe Yefeta+ mpe Samwele+ mpo na kobikisa bino na lobɔkɔ ya banguna na bino ya zingazinga, mpo bófanda na kimya.+ 12 Ntango bomonaki ete Nahashe,+ mokonzi ya Baamone, ayei kobundisa bino, bokobaki koloba na ngai ete: ‘Te, tolingi kaka kozala na mokonzi oyo akoyangela biso!’+ atako Yehova Nzambe nde azali Mokonzi na bino.+ 13 Sikoyo, mokonzi oyo boponi, oyo bosɛngaki, ye oyo. Bótala! Yehova atyeli bino mokonzi.+ 14 Soki bobangi Yehova,+ bosaleli ye+ mpe botosi mongongo na ye,+ soki botombokeli etinda ya Yehova te, mpe soki bino ná mokonzi oyo azali koyangela bino bolandi Yehova Nzambe na bino, malamu! 15 Kasi soki botosi mongongo ya Yehova te, mpe botombokeli mpenza etinda ya Yehova, lobɔkɔ ya Yehova ekopesa bino mpe batata na bino etumbu.+ 16 Sikoyo, bóya mpe bótɛlɛma liboso na ngai mpo bómona likambo monene oyo Yehova alingi kosala na miso na bino. 17 Tozali na eleko ya kobuka mbuma ya blé, boye te? Atako bongo, nakobelela Yehova mpo abɛtisa bankake mpe anɔkisa mbula; bongo bokoyeba mpe bokomona ete bosali mabe na miso ya Yehova ndenge bosɛngi mokonzi.”+

18 Na yango, Samwele abelelaki Yehova, mpe Yehova abɛtisaki bankake mpe anɔkisaki mbula na mokolo yango, bongo bato nyonso babangaki Yehova mpe Samwele makasi mpenza. 19 Mpe bato nyonso balobaki na Samwele ete: “Bondelá Yehova Nzambe na yo mpo na basaleli na yo,+ mpo tolingi kokufa te. Mpo tobakisi mabe mosusu na masumu na biso nyonso na ndenge tosɛngi mokonzi.”

20 Bongo Samwele alobaki na bato: “Bóbanga te. Ya solo, bosali mpenza mabe oyo nyonso. Kasi sikoyo, bópɛngwa te mpe bótika kolanda Yehova te.+ Bósalela Yehova na motema na bino mobimba.+ 21 Bópɛngwa te mpo na kolanda banzambe ya lokuta,*+ oyo bazali na litomba moko te+ mpe bakoki kobikisa te, mpo bazali bikeko oyo ezangi ntina.* 22 Yehova akosundola bato na ye te,+ mpo na nkombo na ye monene,+ mpo Yehova aponaki bino mpo bózala bato na ye.+ 23 Mpo na ngai, nakoki kokanisa soki moke te kotika kobondela mpo na bino. Ekozala lisumu oyo nasaleli Yehova. Mpe nakokoba koteya bino nzela ya malamu mpe ya sembo. 24 Kaka nde bóbanga Yehova,+ bósalela ye na bosembo,* na motema na bino mobimba, mpo asali makambo minene mpo na bino.+ 25 Kasi soki bosali mabe na nko, bokosila,+ bino ná mokonzi na bino.”+