Epai ya Bakolose
2 Mpo nalingi bóyeba etumba monene oyo nazali kobunda mpo na bino, mpo na baoyo bazali na Laodikia+ mpe mpo na baoyo nyonso bamoná naino te elongi na ngai.* 2 Mpo bábɔndisama,+ mpe bázala na bomoko na bolingo.+ Na ndenge yango bakozwa bomɛngo oyo eutaka na kotya motema oyo batye mpenza na makambo bayebi, mpo bázwa boyebi ya solosolo ya sekele mosantu ya Nzambe, elingi koloba, Kristo.+ 3 Biloko nyonso ya motuya ya bwanya mpe ya boyebi ebombami malamu mpenza na kati na ye.+ 4 Nazali koloba bongo mpo moto moko te akosa bino na maloba ya kondimisa. 5 Atako na nzoto nazali wana te, na elimo nazali elongo na bino. Nazali kosepela komona ndenge makambo ezali na molɔngɔ na kati na bino+ mpe ndenge botyelaka Kristo motema na bino mobimba.+
6 Na yango, kaka ndenge bondimi Kristo Yesu Nkolo, bókoba kotambola na bomoko elongo na ye, 7 kopika misisa, kotongama na kati na ye+ mpe kotɛlɛma ngwi na kondima,+ kaka ndenge boteyamaki, mpe bópesaka matɔndi mingi.+
8 Bókeba ete moto moko te amema bino bakangami* na nzela ya filozofi mpe na bokosi ya mpambampamba+ na kolanda mimeseno ya bato, na kolanda makambo mikemike ya mokili kasi na kolanda Kristo te; 9 mpo bizaleli nyonso ya Nzambe ezali mpenza na kati ya Kristo.+ 10 Na yango bino botondi na nyonso na nzela na ye, oyo azali mokonzi ya guvɛrnema nyonso mpe ya bokonzi nyonso.+ 11 Na boyokani oyo bosali na ye, bokatamaki mpe ngenga, kokatama ngenga oyo bakataka na mabɔkɔ te, oyo balongolaka mosuni ya nzoto,+ kasi kokatama ngenga oyo ezali ya Kristo.+ 12 Mpo bokundamaki elongo na ye na batisimo na ye+ mpe na boyokani oyo bosali na ye, bosekwisamaki*+ mpe elongo, na nzela ya kondima na bino na mosala ya nguya ya Nzambe, oyo asekwisaki* ye.+
13 Lisusu, atako bokufaki mpo na mabunga na bino mpe mpo bokatamaki ngenga te na nzoto na bino ya mosuni, Nzambe azongisaki bino na bomoi elongo na ye.+ Alimbisaki biso mabunga na biso nyonso na boboto mpenza+ 14 mpe abomaki mokanda oyo ekomamá na mabɔkɔ,+ oyo ezalaki na mibeko,+ mpe ezalaki kotɛmɛla biso.+ Ye alongoli yango na ndenge abakaki yango nsɛtɛ na nzete ya mpasi.*+ 15 Na nzela ya nzete ya mpasi,* atikaki baguvɛrnema mpe bakonzi bolumbu, alakisaki bango liboso ya bato nyonso ete alongi bango,+ wana azalaki kotambwisa bango na molɔngɔ ya balongi.
16 Na yango, moto asambisa bino te mpo na kolya mpe komɛla+ to mpo na fɛti moko boye to mpo na kokumisa sanza ya sika+ to mpe mpo na sabata.+ 17 Makambo wana ezali elili ya makambo oyo ekoya,+ kasi bosolo ezali nde Kristo.+ 18 Bókeba na baoyo bazalaka na komikitisa kaka mpo bato bámona bango, mpe baoyo basambelaka baanzelu* mpo bakoki kozangisa bino libonza.+ Bato ya bongo “bakangamaka makasi kaka na” makambo oyo bazali komona, mpe bavimbaka na lolendo mpo na makanisi na bango ya mpamba, 19 mpe bakangami makasi te na motó,+ elingi koloba moto oyo na nzela na ye, nzoto mobimba, eleisami mpe esangani liboke moko na boyokani mpenza na lisalisi ya matonga mpe bikanganeli na yango. Mpe ezali kokoba kokola na bokoli oyo euti na Nzambe.+
20 Soki bokufaki esika moko na Kristo na makambo mikemike ya mokili,+ mpo na nini bozali kosala makambo lokola nde bozali bato ya mokili, na ndenge bozali komitya na nse ya mibeko lokola:+ 21 “Kozwa te, komeka te, mpe kosimba te?” 22 mibeko yango etali biloko nyonso oyo ebebaka ntango basaleli yango. Yango ezali mitindo mpe mateya ya bato.+ 23 Atako makambo wana emonanaka lokola ezali ya bwanya na nzela ya losambo oyo moto amityeli ye moko mpe na komikitisa ya lokuta, na konyokola nzoto makasi,+ ezali na ntina moko te mpo na kobundisa mposa ya nzoto.