Yosua

8 Na nsima, Yehova alobaki na Yosua boye: “Kobanga te mpe kozala na nsɔmɔ te.+ Kamatá elongo na yo mibali nyonso ya etumba mpe matá mpo na kobundisa Ai. Talá, napesi na lobɔkɔ na yo mokonzi ya Ai, bato ya ekólo na ye, engumba na ye mpe mokili na ye.+ 2 Osengeli kosala Ai mpe mokonzi na yango kaka ndenge osalaki Yeriko mpe mokonzi na yango.+ Kasi biloko ya kopunza mpe bibwɛlɛ ya engumba yango, bokoki kozwa yango mpo na bino moko. Tyá bato bábombana na nsima ya engumba yango mpo na kobundisa yango.”

3 Bongo Yosua mpe mibali nyonso ya etumba bamataki mpo na kobundisa Ai. Yosua aponaki bilombe ya etumba 30 000, mpe atindaki bango na butu. 4 Apesaki bango mitindo oyo: “Talá, bosengeli kobombana na nsima ya engumba mpo na kobundisa yango. Bóbombana mosika mingi te na engumba yango, mpe bino nyonso bosengeli komilɛngɛla mpo na kobundisa yango. 5 Ngai ná bato nyonso oyo bazali elongo na ngai tokopusana penepene na engumba, mpe ntango bato ya Ai bakobima mpo na kobundisa biso, ndenge basalaki yango liboso,+ tokokima bango. 6 Ntango bakobima mpo na kolanda biso, tokobenda bango mosika na engumba, mpo bakoloba: ‘Bazali kokima biso, kaka ndenge basalaki mbala ya liboso.’+ Mpe tokokima bango. 7 Na nsima bosengeli kobima na esika oyo bobombanaki mpe kozwa engumba yango; Yehova Nzambe na bino akopesa yango na mabɔkɔ na bino. 8 Ntango kaka bozwi engumba, bosengeli kotya yango mɔtɔ.+ Bosengeli kosala kaka ndenge Yehova alobi. Talá, napesi bino mitindo.”

9 Na nsima Yosua atindaki bango bákende, mpe batambolaki tii na esika oyo basengelaki kobombana; batyaki kaa na bango ya etumba na esika oyo ekaboli Betele ná Ai, na wɛsti ya Ai. Nzokande Yosua alekisaki butu yango elongo na bato.

10 Yosua alamukaki ntɔngɔntɔngɔ mpe ayanganisaki limpinga mobimba. Ye ná bankulutu ya Yisraele bamemaki bango na Ai. 11 Mibali nyonso ya etumba+ oyo bazalaki elongo na ye bamataki mpe bakómaki liboso ya engumba yango. Batyaki kaa na nɔrdi ya Ai, mpe lobwaku ezalaki kati na bango mpe Ai. 12 Na ntango wana kaka, azwaki mibali soki 5 000 mpe atyaki bango bábombana+ kati na Betele+ mpe Ai, na wɛsti ya engumba yango. 13 Bongo batyaki kaa ya bato mingi na nɔrdi ya engumba,+ mpe bato oyo bazalaki kokɛngɛla na nsima batyamaki na wɛsti ya engumba yango,+ mpe na butu wana Yosua akendaki na katikati ya lobwaku yango.*

14 Mpe ntango kaka mokonzi ya Ai amonaki likambo yango, ye ná mibali ya engumba babimaki nokinoki na ntɔngɔntɔngɔ mpo na kobunda na Yisraele na esika moko oyo ezalaki liboso ya mokili patatalu oyo ekauká. Kasi ayebaki te ete bato babombanaki na nsima ya engumba mpo na kobunda na ye. 15 Ntango mibali ya Ai bayaki kobundisa bango, Yosua ná Yisraele mobimba bakimaki na nzela oyo ekei tii na esobe.+ 16 Bongo babengaki mibali nyonso oyo bazalaki na engumba mpo bálanda bango; mpe wana bazalaki kolanda Yosua, babendamaki mosika na engumba. 17 Ata mobali moko te atikalaki na Ai mpe na Betele; bango nyonso babimaki mpo na kolanda Bayisraele. Batikaki engumba polele mpenza mpe balandaki Bayisraele.

18 Sikoyo, Yehova alobaki na Yosua boye: “Sembolá likɔnga moke oyo ezali na lobɔkɔ na yo na ngámbo ya Ai,+ mpo nakopesa engumba yango na lobɔkɔ na yo.”+ Bongo Yosua asembolaki likɔnga moke oyo ezalaki na lobɔkɔ na ye na ngámbo ya engumba yango. 19 Ntango kaka asembolaki lobɔkɔ na ye, bato oyo babombanaki babimaki nokinoki na bisika na bango, mpe bapotaki mbangu na engumba mpe bazwaki yango. Na mbala moko batyaki engumba yango mɔtɔ.+

20 Ntango mibali ya Ai babalukaki, bamonaki milinga ya engumba ezalaki komata likoló, mpe bazalaki na makasi te mpo na kokima epai boye to boye. Na nsima Bayisraele oyo bazalaki kokima na esobe babalukelaki bato oyo bazalaki kolanda bango. 21 Ntango Yosua ná Yisraele mobimba bamonaki ete mibali ya etumba oyo babombanaki bazwi engumba mpe bamonaki milinga ya engumba ezali komata, babalukaki mpe babundisaki mibali ya Ai. 22 Mpe Bayisraele mosusu babimaki na engumba mpo na kokutana na bango. Bongo bato ya Ai bakangamaki na motambo na katikati, Bayisraele mosusu na ngámbo oyo mpe basusu na ngámbo oyo kuna. Mpe Bayisraele babomaki bango kino moto ata moko te abikaki to akimaki.+ 23 Kasi bakangaki mokonzi ya Ai+ wana azalaki naino na bomoi mpe bamemaki ye epai ya Yosua.

24 Ntango Yisraele esilisaki koboma bato nyonso ya Ai na esobe, esika balandaki bango, mpe ntango moto ya nsuka kati na bango abomamaki na mopanga, Yisraele mobimba ezongaki na Ai mpe ebɛtaki yango na mopanga. 25 Bato nyonso oyo bazalaki kofanda na Ai, kobanda na mobali tii na mwasi, bazalaki 12 000; bango nyonso babomamaki na mokolo yango. 26 Yosua azongisaki te lobɔkɔ na ye oyo asembolaki na yango likɔnga moke+ tii ntango asilisaki koboma bato nyonso oyo bafandi na Ai.+ 27 Nzokande, Bayisraele bazwaki bibwɛlɛ mpe biloko ya kopunza oyo bamonaki na engumba yango, na kolanda mitindo oyo Yehova apesaki Yosua.+

28 Na nsima Yosua atumbaki Ai mpe akómisaki yango libondo ya putulu+ oyo etikalá bongo tii na mokolo ya lelo. 29 Abomaki mokonzi ya Ai mpe abakaki nzoto na ye na nzete tii na mpokwa, mpe ntango moi elingaki kolala, Yosua apesaki mitindo ete bákitisa ebembe yango na nzete.+ Na nsima, babwakaki yango na esika ya kokɔta na porte ya engumba mpe batɛlɛmisaki libondo monene ya mabanga likoló na ye, oyo ezali kuna tii na mokolo ya lelo.

30 Ezalaki na ntango yango nde Yosua atongaki etumbelo moko na Ngomba Ebala+ mpo na Yehova Nzambe ya Yisraele, 31 kaka ndenge Moize mosaleli ya Yehova apesaki Bayisraele mitindo mpe ndenge ekomami na buku ya Mobeko+ ya Moize ete: “Etumbelo oyo basali na mabanga ya mibimba, oyo ata esaleli moko te ya ebende eleká likoló na yango.”+ Bapesaki Yehova makabo ya kotumba mpe bambeka ya kimya* likoló ya etumbelo yango.+

32 Na nsima, Yosua akomaki likoló ya mabanga yango Mobeko+ oyo Moize akomaki liboso ya Bayisraele.+ 33 Yisraele mobimba, bankulutu na bango, bakapita, mpe basambisi na bango batɛlɛmaki ngámbo na ngámbo ya Sanduku liboso ya banganga-nzambe, Balevi, oyo bazalaki komema sanduku ya kondimana ya Yehova. Bapaya mpe bana-mboka bazalaki wana.+ Ndambo na bango batɛlɛmaki liboso ya Ngomba Gerizime mpe ndambo mosusu liboso ya Ngomba Ebala+ (kaka ndenge Moize, mosaleli ya Yehova, apesaki mitindo),+ mpo na kopambola bato ya Yisraele. 34 Nsima na yango, atángaki na mongongo makasi maloba nyonso ya Mobeko,+ mapamboli+ mpe bilakeli mabe,+ na kolanda nyonso oyo ekomami na buku ya Mobeko. 35 Na maloba nyonso oyo Moize apesaki mitindo, ezalaki ata na moko te oyo Yosua azangaki kotánga na mongongo makasi liboso ya lisangá mobimba ya Yisraele.+ Basi, bana, mpe bapaya+ oyo bazalaki kofanda* kati na bango bazalaki mpe wana.+