Mokanda ya mibale ya Ntango

12 Ntango kaka bokonzi ya Rehoboame epikamaki makasi+ mpe akómaki mokonzi ya nguya, asundolaki Mobeko ya Yehova,+ ye ná Yisraele mobimba. 2 Na mbula ya mitano ya boyangeli ya Rehoboame, Shishake+ mokonzi ya Ezipito amataki kobundisa Yerusaleme, mpo Bayisraele bazangaki bosembo epai ya Yehova. 3 Shishake azalaki na makalo 1 200 mpe batambwisi-mpunda 60 000 mpe ebele ya basoda oyo bautaki na ye na Ezipito, oyo motángo eyebanaki te: bato ya Libi, Basukiyime mpe bato ya Etiopi.+ 4 Abɔtɔlaki bingumba makasi ya Yuda mpe nsukansuka akómaki na Yerusaleme.

5 Bongo mosakoli Shemaya+ ayaki epai ya Rehoboame mpe bankumu ya Yuda oyo bayanganaki na Yerusaleme mpo na Shishake, mpe alobaki na bango boye: “Talá oyo Yehova alobi: ‘Lokola bino bosundoli ngai, ngai mpe nasundoli bino+ na lobɔkɔ ya Shishake.’” 6 Ntango bayokaki bongo, bankumu ya Yisraele mpe mokonzi bamikitisaki+ mpe balobaki boye: “Yehova azali sembo.” 7 Ntango Yehova amonaki ete bamikitisi, Yehova alobaki lisusu na Shemaya: “Bamikitisi. Nakoboma bango lisusu te,+ mpe etikali moke, nakobikisa bango. Nakokitisela Yerusaleme nkanda na ngai na nzela ya Shishake te. 8 Kasi bakokóma basaleli na ye, mpo báyeba bokeseni kati na kosalela ngai mpe kosalela bakonzi* ya mikili mosusu.”

9 Bongo Shishake mokonzi ya Ezipito amataki kobundisa Yerusaleme; azwaki biloko ya motuya ya ndako ya Yehova+ mpe biloko ya motuya ya ndako ya mokonzi. Azwaki eloko nyonso, ata mpe banguba ya wolo oyo Salomo asalaki.+ 10 Bongo na esika na yango, Mokonzi Rehoboame asalaki banguba ya kwivre, mpe apesaki yango na mabɔkɔ ya bakonzi ya bakɛngɛli,* oyo bazalaki kokɛngɛla ekɔtelo ya ndako ya mokonzi. 11 Mbala nyonso oyo mokonzi azalaki koya na ndako ya Yehova, bakɛngɛli bazalaki kokɔta mpe komema banguba yango. Na nsima bazalaki kozongisa yango na mwa ndako ya bakɛngɛli. 12 Lokola mokonzi amikitisaki, nkanda ya Yehova mpo na ye ekitaki,+ mpe abomaki bango nyonso te.+ Longola yango, na Yuda, makambo mosusu ya malamu ezalaki.+

13 Mokonzi Rehoboame afandisaki mpenza bokonzi na ye na Yerusaleme mpe akobaki koyangela. Azalaki na mbula 41 ntango akómaki mokonzi, mpe ayangelaki mbula 17 na Yerusaleme, engumba oyo Yehova aponaki na teritware ya mabota nyonso ya Yisraele, mpo na kotya nkombo na ye kuna. Nkombo ya mama ya mokonzi ezalaki Naama, Moamone.+ 14 Kasi Rehoboame asalaki makambo oyo ezali mabe, mpamba te na motema na ye azwaki te mokano ya koluka Yehova.+

15 Lisolo ya Rehoboame, banda na ebandeli tii na nsuka, ekomami na mokanda ya maloba ya mosakoli Shemaya+ mpe ya Ido+ momoni-bimonaneli, oyo ekomami na kolanda molɔngɔ ya bankɔkɔ. Mpe bitumba ezalaki ntango nyonso kati na Rehoboame mpe Yeroboame.+ 16 Na nsima, Rehoboame akufaki* mpe bakundaki ye esika moko na bankɔkɔ na ye na Sité ya Davidi;+ mpe mwana na ye Abiya+ akómaki mokonzi na esika na ye.