Kobima
7 Bongo Yehova alobaki na Moize ete: “Talá, nakómisi yo lokola Nzambe* epai ya Farao, mpe Arona ndeko na yo akokóma mosakoli na yo.+ 2 Okoloba nyonso oyo nakopesa yo etinda, Arona ndeko na yo akoloba na Farao, mpe akotika Bayisraele bálongwa na mokili na ye. 3 Kasi ngai, nakotika motema ya Farao ekóma makasi,+ nakokómisa bilembo na ngai mpe makamwisi na ngai mingi na mokili ya Ezipito.+ 4 Farao akoyokela bino te, mpe ekosɛnga natya lobɔkɔ na ngai likoló ya Ezipito mpe nakobimisa ebele* ya bato na ngai, Bayisraele, na mokili ya Ezipito na bitumbu minene.+ 5 Mpe Baezipito bakoyeba mpenza ete nazali Yehova+ ntango nakosembolela Ezipito lobɔkɔ na ngai mpe nakolongola Bayisraele na katikati na bango.” 6 Moize ná Arona basalaki ndenge Yehova apesaki bango mitindo; basalaki kaka bongo. 7 Moize azalaki na mbula 80 mpe Arona azalaki na mbula 83 ntango oyo balobaki na Farao.+
8 Sikoyo Yehova alobaki na Moize mpe na Arona ete: 9 “Soki Farao alobi na bino ete: ‘Bósala likamwisi moko,’ boye okoyebisa Arona ete: ‘Zwá lingenda na yo mpe bwaká yango na nse liboso ya Farao.’ Ekokóma nyoka moko monene.”+ 10 Bongo Moize ná Arona bakɔtaki epai ya Farao mpe basalaki kaka ndenge Yehova apesaki mitindo. Arona abwakaki lingenda na ye na nse liboso ya Farao ná basaleli na ye mpe yango ekómaki nyoka moko monene. 11 Kasi, Farao mpe abengaki bato ya bwanya mpe banganga-nkisi, mpe banganga-nzambe ya Ezipito oyo basalelaka maji,+ basalaki mpe kaka bongo na misala na bango ya maji.+ 12 Moto na moto abwakaki lingenda na ye, mpe ekómaki banyoka ya minene; kasi lingenda ya Arona emɛlaki mangenda na bango. 13 Atako bongo, motema ya Farao ekómaki makasi,+ mpe ayokelaki bango te, kaka ndenge Yehova alobaki.
14 Bongo Yehova alobaki na Moize ete: “Motema ya Farao ezali makasi.+ Aboyi kotika bato bákende. 15 Na ntɔngɔ, kende epai ya Farao. Talá! Azali kokende na mai! Mpe osengeli kotɛlɛma mpo na kokutana na ye pembeni ya ebale Nile; mpe zwá na lobɔkɔ na yo lingenda oyo ebongwanaki nyoka.+ 16 Mpe osengeli koloba na ye ete: ‘Yehova Nzambe ya Baebre atindi ngai epai na yo+ mpe alobi: “Tiká bato na ngai bákende kosalela ngai na esobe,” kasi otosi te tii sikoyo. 17 Talá oyo Yehova alobi: “Na likambo oyo okoyeba ete nazali Yehova.+ Talá, nazali kobɛta mai ya ebale Nile na lingenda oyo ezali na lobɔkɔ na ngai, mpe yango ekobongwana makila. 18 Mpe mbisi ya ebale Nile ekokufa, ebale Nile ekobimisa nsolo mabe, mpe Baezipito bakokoka ata moke te komɛla mai ya ebale Nile.”’”
19 Na nsima, Yehova alobaki na Moize ete: “Lobá na Arona boye: ‘Zwá lingenda na yo mpe sembolá lobɔkɔ na yo likoló ya mai ya Ezipito,+ likoló ya bibale na bango, likoló ya banzela ya mai ya Nile, likoló ya maziba na bango+ mpe likoló ya mai na bango nyonso oyo etyamá na bibombelo, mpo ekóma makila.’ Makila ekozala na mokili mobimba ya Ezipito mpe na biloko oyo babombaka mai, ezala ya mabaya to ya mabanga.” 20 Mbala moko, Moize ná Arona basalaki kaka ndenge Yehova apesaki mitindo. Atombolaki lingenda mpe abɛtaki mai ya ebale Nile na miso ya Farao ná basaleli na ye, mpe mai nyonso ya ebale ebongwanaki makila.+ 21 Mpe mbisi oyo ezalaki na ebale ekufaki,+ mpe ebale ebandaki kobimisa nsolo mabe, mpe Baezipito bakokaki komɛla mai ya Nile te,+ mpe makila ezalaki na mokili mobimba ya Ezipito.
22 Kasi, banganga-nzambe ya Ezipito oyo basalelaka maji basalaki kaka bongo na misala na bango ya molili,+ bongo motema ya Farao ezalaki kaka makasi, mpe ayokelaki bango te, kaka ndenge Yehova alobaki.+ 23 Na yango, Farao azongaki na ndako na ye, mpe atyaki likebi te na likambo yango. 24 Na yango, Baezipito nyonso bazalaki kotimola zingazinga ya ebale Nile mpo na kozwa mai ya komɛla, mpo bazalaki te kokoka komɛla mai ya ebale Nile. 25 Mpe mikolo nsambo elekaki kobanda Yehova abɛtaki ebale Nile.