Mokanda ya mibale ya

6 Mokolo moko, bana ya basakoli+ balobaki na Elisha boye: “Talá! Esika oyo tozali kofanda na yo ezali nkaka mingi. 2 Tiká biso tókende na Yordani. Mpe kuna, mokomoko na biso akozwa nzete moko mpo tótonga esika oyo tokoki kofanda kuna.” Elisha alobaki na bango: “Bókende.” 3 Moko na bango atunaki ye: “Okosepela kokende elongo na biso basaleli na yo?” Elisha ayanolaki: “Ɛɛ, nakokende.” 4 Na yango, akendaki elongo na bango. Ntango bakómaki na Yordani, babandaki kokata banzete. 5 Ntango moko na bango azalaki kokata nzete, ebende ya epasola* elongwaki mpe ekweaki na mai. Bongo, agangaki: “Ee, nkolo na ngai, ezali epasola ya bato, nadefaki yango!” 6 Moto ya Nzambe ya solo atunaki ye: “Ekwei wapi?” Bongo alakisaki ye esika oyo ekweaki. Na yango, Elisha akataki eteni ya nzete mpe abwakaki yango na esika yango; bongo ebende ya epasola yango ekómaki kotepatepa likoló ya mai. 7 Elisha alobaki na ye: “Zwá yango.” Na yango asembolaki lobɔkɔ na ye mpe azwaki yango.

8 Mokolo moko, mokonzi ya Siri akendaki kobundisa Yisraele.+ Asololaki na basaleli na ye mpe alobaki: “Nakotya kaa na esika boye, mpe bokozala elongo na ngai.” 9 Bongo moto ya Nzambe ya solo+ atindelaki mokonzi ya Yisraele maloba oyo: “Kebá, koleka te na esika boye, mpo bato ya Siri bazali kokita kuna.” 10 Bongo mokonzi ya Yisraele atindaki maloba mpo na kokebisa bato na ye oyo bazalaki na esika oyo moto ya Nzambe ya solo alobelaki. Elisha akobaki kokebisa mokonzi, mpe mbala mingi* mokonzi azalaki kokima bisika oyo azalaki kokebisa ye mpo na yango.+

11 Yango epesaki mokonzi* ya Siri nkanda makasi. Bongo abengisaki basaleli na ye mpe alobaki na bango: “Bóyebisa ngai! Nani kati na biso azali na ngámbo ya mokonzi ya Yisraele?” 12 Bongo moko ya basaleli na ye alobaki: “Moto te, nkolo na ngai mokonzi! Ezali mosakoli Elisha ya Yisraele nde ayebisaka mokonzi ya Yisraele makambo oyo olobaka ata na shambrɛ na yo epai olalaka.”+ 13 Mokonzi ya Siri alobaki: “Bókende koluka esika azali, mpo natinda bato bákanga ye.” Na nsima, bapesaki ye nsango ete Elisha azali na Dotane.+ 14 Na mbala moko mokonzi atindaki bampunda, makalo ya bitumba mpe limpinga monene ya basoda kuna. Bakómaki na butu mpe bazingaki engumba yango.

15 Na ntɔngɔntɔngɔ, ntango mosaleli* ya moto ya Nzambe ya solo alamukaki mpe abimaki libándá, amonaki basoda bazingi engumba, ná bampunda mpe makalo ya bitumba. Na mbala moko, mosaleli yango alobaki na ye: “Ee, nkolo na ngai! Tokosala ndenge nini?” 16 Kasi Elisha alobaki na ye: “Kobanga te!+ Mpo baoyo bazali elongo na biso bazali mingi koleka baoyo bazali elongo na bango.”+ 17 Bongo Elisha abandaki kobondela mpe koloba: “Ee Yehova, nabondeli yo, fungolá miso na ye mpo amona.”+ Na mbala moko Yehova afungolaki miso ya mosaleli yango mpe amonaki etúká ya ngombangomba etondi na bampunda ná makalo ya bitumba oyo ezali kopela mɔtɔ,+ ezingi Elisha bipai nyonso.+

18 Ntango basoda ya Siri bakitaki epai na ye, Elisha abondelaki Yehova mpe alobaki: “Nabondeli yo, bomá miso ya bato* oyo.”+ Bongo abomaki miso na bango, kaka ndenge Elisha asɛngaki. 19 Mpe Elisha alobaki na bango: “Bobungi nzela. Oyo ezali te engumba oyo bozali koluka. Bólanda ngai, mpe nakomema bino epai ya moto oyo bozali koluka.” Nzokande, amemaki bango na Samaria.+

20 Ntango bakómaki na Samaria, Elisha abondelaki boye: “Ee Yehova, fungolá miso na bango mpo bámona.” Bongo Yehova afungolaki miso na bango, mpe bamonaki ete bazali na katikati ya Samaria. 21 Ntango mokonzi ya Yisraele amonaki bango, atunaki Elisha: “Naboma bango, tata na ngai, naboma bango?” 22 Kasi Elisha alobaki na ye: “Osengeli koboma bango te. Soki okei kobunda etumba na mopanga mpe na litimbo mpe okangi bato, obomaka bango? Pesá bango nde mampa ná mai mpo bálya mpe bámɛla,+ bongo bázonga epai ya nkolo na bango.” 23 Na yango, mokonzi asalelaki bato ya Siri fɛti monene; balyaki mpe bamɛlaki. Nsima na yango, atikaki bango bázonga epai ya nkolo na bango. Banda wana, bituluku ya bapunzi ya bato ya Siri+ ezongaki lisusu na mokili ya Yisraele te.

24 Nsima na yango, Bene-hadade mokonzi ya Siri ayanganisaki limpinga* na ye mobimba, amataki mpe azingaki Samaria.+ 25 Bongo nzala makasi+ ekɔtaki na Samaria. Bato ya Siri bazingaki engumba yango tii motó ya mpunda+ ekómaki na ntalo ya shekele ya palata 80, mpe moko ya bandambo minei ya kabe* ya nyɛi ya bibenga ekómaki na ntalo ya shekele ya palata 5. 26 Mokolo moko ntango mokonzi ya Yisraele azalaki koleka likoló ya efelo, mwasi moko abelelaki ye: “Ee nkolo na ngai mokonzi, salisá biso!” 27 Mokonzi ayanolaki ye: “Soki Yehova asalisi yo te, epai wapi ngai nakozwa lisalisi mpo na yo? Nakozwa yango nde na esika ya kotutatuta mbuma? To na ekamwelo ya vinyo? To mpe na ekamwelo ya mafuta?” 28 Mokonzi atunaki ye: “Likambo na yo ezali nini?” Ayanolaki: “Mwasi oyo alobaki na ngai: ‘Pesá mwana na yo ya mobali mpo tólya ye lelo, mpe mwana na ngai ya mobali, tokolya ye lobi.’+ 29 Na yango, tolambaki mwana na ngai mpe tolyaki ye.+ Mokolo oyo elandaki, nalobaki na ye: ‘Pesá mwana na yo mpo tólya ye.’ Kasi ye abombaki mwana na ye.”

30 Ntango kaka mokonzi ayokaki maloba ya mwasi yango, apasolaki bilamba na ye.+ Wana azalaki koleka likoló ya efelo, bato bamonaki ete alati ngɔtɔ* na nse ya bilamba na ye. 31 Bongo alobaki: “Tiká Nzambe apesa ngai etumbu ya makasi, soki lelo nakati te motó ya Elisha mwana ya Shafate!”+

32 Elisha afandaki na ndako na ye, mpe bankulutu bafandaki wana elongo na ye. Mokonzi atindaki moto moko liboso na ye, kasi liboso ete momemi-nsango yango akóma, Elisha alobaki na bankulutu boye: “Bomoni ndenge mwana wana ya mobomi-bato+ atindi moto mpo akata ngai motó? Bókɛngɛla mpo ntango momemi-nsango yango akoya, bókanga porte, mpe bófungola yango te mpo akɔta te. Bozali koyoka te makɛlɛlɛ ya makolo ya nkolo na ye nsima na ye?” 33 Ntango Elisha azalaki naino koloba na bango, momemi-nsango yango akómaki epai na ye. Na nsima, mokonzi ayaki mpe alobaki: “Mpasi monene oyo euti epai ya Yehova. Sikoyo mpo na nini nazela lisusu Yehova?”