Yosua

5 Ntango kaka bakonzi nyonso ya Baamore+ oyo bazalaki na ngámbo ya wɛsti ya Yordani* mpe bakonzi nyonso ya Bakanana+ oyo bazalaki pene na mbu bayokaki ete Yehova akaukisaki mai ya Yordani liboso ya Bayisraele tii ntango basilisaki kokatisa, balɛmbaki nzoto*+ mpe bazalaki lisusu na mpiko te* mpo bazalaki kobanga Bayisraele.+

2 Na ntango yango, Yehova alobaki na Yosua boye: “Salá bambeli ya mabanga ya silekise mpe katá lisusu mibali ya Yisraele ngenga,+ mpo na mbala ya mibale.” 3 Na yango, Yosua asalaki bambeli ya mabanga mpe akataki mibali ya Yisraele ngenga na Gibeate-haaralote.*+ 4 Talá ntina oyo Yosua akataki bango ngenga: Mibali nyonso oyo babimaki na Ezipito, mibali nyonso ya etumba,* bakufaki na esobe, na mobembo na bango nsima ya kobima na Ezipito.+ 5 Bato nyonso oyo babimaki na Ezipito bakatamaki ngenga, kasi bato nyonso oyo babotamaki na esobe, na mobembo na bango nsima ya kobima na Ezipito bakatamaki ngenga te. 6 Bayisraele batambolaki mbula 40+ na esobe tii ntango ekólo mobimba ekufaki, elingi koloba, mibali ya etumba oyo babimaki na Ezipito, oyo baboyaki koyoka mongongo ya Yehova.+ Yehova alapelaki bango ndai ete bakomona soki moke te mokili+ oyo Yehova alapelaki bankɔkɔ na bango ndai ete akopesa biso;+ mokili oyo etondi na miliki mpe na mafuta ya nzoi.+ 7 Yango wana bana na bango bazwaki esika na bango.+ Yosua akataki bango ngenga. Bazalaki misutu mpo bakataki bango ngenga te ntango bazalaki kosala mobembo.

8 Ntango basilisaki kokata mibali ya ekólo mobimba ngenga, batikalaki na bisika na bango na kaa, tii ntango bampota na bango esilaki.

9 Na nsima Yehova alobaki na Yosua boye: “Lelo, nalongoli bino nsɔni ya Ezipito.” Yango wana, esika yango ekómá kobengama Gilgale*+ tii na mokolo ya lelo.

10 Bayisraele bakobaki kofanda na kaa na Gilgale, mpe basalaki Elekeli na mpokwa ya mokolo ya 14 ya sanza yango,+ na mokili patatalu oyo ekauká ya Yeriko. 11 Mpe, kaka na mokolo oyo elandaki Elekeli, babandaki kolya biloko ya mokili yango: mampa oyo ezangá levire+ mpe mbuma ya kotumba. 12 Bongo mana etikaki kokwea na mokolo yango oyo balyaki mwa biloko ya mokili yango; mana ezalaki lisusu te mpo na Bayisraele,+ mpe babandaki kolya biloko ya mokili ya Kanana na mbula wana.+

13 Ntango Yosua akómaki pene na Yeriko, atombolaki miso na ye mpe amonaki mobali moko+ atɛlɛmi liboso na ye mpe asimbi mopanga na lobɔkɔ na ye.+ Yosua apusanaki pene na ye mpe atunaki ye: “Ozali na ngámbo na biso to na ngámbo ya banguna na biso?” 14 Bongo ye alobaki: “Te, nayei lokola nkumu* ya limpinga ya Yehova.”+ Ntango Yosua ayokaki bongo, akweaki elongi na nse, afukamaki mpe alobaki na ye: “Nkolo na ngai, olingi koyebisa mosaleli na yo nini?” 15 Nkumu ya limpinga ya Yehova alobaki na Yosua: “Longolá basandale na yo na makolo, mpo esika oyo ozali ezali mosantu.” Na mbala moko, Yosua alongolaki basandale.+