Kobima

30 “Okosala etumbelo moko mpo ezala esika ya kotumba mpaka ya malasi;+ okosala yango na nzete ya akasia.+ 2 Esengeli kozala karé, lipeko* moko na molai mpe lipeko moko na monene, mpe bosanda na yango mapeko mibale. Elongo na maseke na yango ekosala eteni kaka moko.+ 3 Okozipa yango na wolo ya pɛto: etando na yango ya likoló, mipanzi na yango nyonso ya zingazinga, ná maseke na yango; mpe okosala ndelo* ya wolo zingazinga na yango. 4 Okosalela yango mpe mpɛtɛ mibale ya wolo na nse ya ndelo* na yango, na mipanzi mibale oyo etalani, mpo yango ekozala mpo na kokɔtisa banzete ya komemela yango. 5 Salá banzete ya komema na nzete ya akasia mpe zipá yango na wolo. 6 Okotya yango liboso ya rido oyo ezali pene na sanduku ya Litatoli,+ liboso ya ezipeli oyo ezali likoló ya Litatoli, epai nakomilakisa liboso na yo.+

7 “Arona+ akotumba mpaka ya malasi ya nsolo kitoko+ likoló na yango,+ akosala ete ebimisa milinga na etumbelo ntango akobanda kobongisa miinda+ ntɔngɔ nyonso. 8 Lisusu, ntango Arona akopelisa miinda liboso molili ekɔta,* akotumba mpaka. Ezali likabo ya mpaka ya malasi ya ntango nyonso liboso ya Yehova na boumeli ya mabota na bino. 9 Bosengeli te kopesa likoló na yango mpaka ya malasi oyo epesami nzela te+ to likabo ya kotumba to likabo ya mbuma,* mpe bosengeli te kosopa likabo ya masanga likoló na yango. 10 Mbala moko na mbula, Arona asengeli kotya likoló ya maseke ndambo ya makila ya nyama ya mbeka ya kozipa masumu mpo na kopɛtola etumbelo.+ Akosala bongo mbala moko na mbula mpo na kopɛtola etumbelo+ na boumeli ya mabota na bino. Ezali etumbelo oyo eleki mosantu mpo na Yehova.”

11 Bongo Yehova alobaki na Moize ete: 12 “Ntango nyonso oyo okozwa motángo mobimba to okotánga bana ya Yisraele,+ moto na moto asengeli kopesa lisiko mpo na bomoi* na ye epai ya Yehova na ntango ya kotánga bango. Ekozala bongo mpo mpasi eyela bango te na ntango ya kokomama nkombo. 13 Talá eloko oyo baoyo nyonso bankombo na bango ekomami bakopesa: shekele* moko kabolá na mibale na kolanda shekele ya esika mosantu.*+ Gera* ntuku mibale ekokani na shekele moko. Shekele moko kabolá na mibale ezali likabo ya kopesa Yehova.+ 14 Moto nyonso oyo akomisami nkombo, oyo azali na mbula banda na 20 matá, akopesa Yehova likabo.+ 15 Mozwi akopesa mingi te, mpe moto oyo azangá asengeli te kopesa moke na nse ya shekele* moko kabolá na mibale, mpo na kopesa Yehova likabo mpo na kozipa masumu ya bomoi* na bino. 16 Okozwa epai ya Bayisraele mbongo ya palata mpo na kozipa masumu mpe kopesa yango mpo na mosala ya hema ya kokutana, mpo ezala ekaniseli liboso ya Yehova mpo na Bayisraele, mpo na kozipa masumu ya bomoi* na bino.”

17 Yehova alobaki lisusu na Moize ete: 18 “Salá saani monene ya kwivre ná etɛlɛmiselo na yango mpo na kosukola;+ na nsima tyá yango na kati ya hema ya kokutana ná etumbelo mpe tyá mai na kati ya saani yango.+ 19 Arona ná bana na ye ya mibali bakosukola mabɔkɔ mpe makolo na bango na saani yango.+ 20 Ntango bakokɔta na hema ya kokutana to ntango bakopusana na etumbelo mpo na mosala mpe mpo na kopesa likabo ya mbeka ya kotumba mpo na Yehova, mpe mpo milinga emata, bakosukola na mai mpo bákufa te. 21 Basengeli kosukola mabɔkɔ ná makolo mpo bákufa te, mpe yango esengeli kozala mobeko mpo na bango mpo na libela, ye ná bana na ye na boumeli ya mabota na bango.”+

22 Yehova akobaki koloba na Moize ete: 23 “Na nsima, zwá malasi ya kitoko koleka: shekele 500 ya mire oyo ekangamá, mpe katikati ya motángo wana, shekele 250 ya kinamono ya nsolo kitoko, shekele 250 ya nkokó ya nsolo kitoko, 24 mpe kasia, shekele 500 na kolanda shekele ya esika mosantu,*+ elongo na hini* ya mafuta ya olive. 25 Bongo salá na yango mafuta mosantu; esengeli kosangisama malamu mpenza.*+ Ekozala mafuta mosantu mpo na kotya moto mafuta.

26 “Okotya mafuta yango na hema ya kokutana+ mpe na sanduku ya Litatoli, 27 mpe na mesa ná bisaleli na yango nyonso, na etɛlɛmiselo ya miinda ná bisaleli na yango, na etumbelo ya mpaka ya malasi, 28 na etumbelo ya likabo ya kotumba ná bisaleli na yango nyonso, mpe na saani monene ná etɛlɛmiselo na yango. 29 Osengeli kosantisa yango mpo ekóma mosantu koleka.+ Moto nyonso oyo azali kosimba yango asengeli kozala mosantu.+ 30 Mpe okotya Arona+ ná bana na ye ya mibali mafuta,+ mpe okosantisa bango mpo básalela ngai mosala ya banganga-nzambe.+

31 “Okoloba na Bayisraele ete: ‘Oyo ekokoba kozala mpo na ngai mafuta mosantu mpo na kotyaka mafuta na boumeli ya mabota na bino.+ 32 Bokosalela yango te na nzoto ya bato, mpe bosengeli te kosala eloko mosusu na biloko oyo basali yango. Ezali eloko moko mosantu. Yango ekokoba kozala eloko mosantu na miso na bino. 33 Moto nyonso oyo asali malasi oyo ekokani na yango mpe atye ndambo na yango likoló ya moto oyo apesami nzela te* asengeli kobomama* na kati ya bato na ye.’”+

34 Bongo Yehova alobaki na Moize ete: “Zwá malasi oyo:+ matangá ya sitakite, onika, galabanume ya nsolo kitoko ná olibana ya pɛto. Ndambo ya mokomoko na yango ekozala ndenge moko. 35 Salá na yango mpaka ya malasi;+ biloko ya nsolo kitoko esengeli kosangisama malamu,* kotyama mungwa,+ kozala pɛto mpe mosantu. 36 Okonika ndambo na yango ekóma putulu mpe okotya ndambo na yango liboso ya Litatoli na kati ya hema ya kokutana, epai nakomilakisa liboso na yo. Esengeli kozala mosantu koleka mpo na bino. 37 Mpaka ya malasi oyo bokosala na biloko wana, bosengeli te kosalela yango mpo na bino moko.+ Osengeli kotalela yango lokola eloko moko mosantu mpo na Yehova. 38 Moto nyonso oyo akosala mosusu oyo ekokani na yango mpo na kosepela na nsolo na yango, asengeli kobomama* na kati ya bato na ye.”